Bakuna na itinurok sa PSG, oks lang kahit ilegal, tsk!

ni Korina Sanchez - @Isyung 'K' | January 7, 2021

Happy New Year sa lahat!

Salamat at lumipas na rin ang 2020. Pero simula pa lang ng taon ay may isyu na tayong pag-uusapan. Kung ang mga salitang ‘quarantine’, ‘lockdown’ at ‘pandemic’ ang madalas nating marinig last year, malamang ay ‘bakuna’ na ang karaniwang salita na mababanggit ngayong bagong taon.

Pero wala pang bakunang nakukuha ang gobyerno para sa mga Pinoy. ‘Yan ang opisyal na katayuan ng Food and Drug Administration (FDA). Wala pang inaaprubahang bakuna para maipamahagi sa publiko — maliban na lang kung miyembro ng Presidential Security Group (PSG).

Buking na nabakunahan na ang mga miyembro ng PSG. Ito ay ayon mismo kay Pangulong Rodrigo Duterte. Samantala, nagpahayag na rin si PSG chief Brig. Gen. Jesus Durante III na sila lang ang nagdesisyon na mapabakunahan na ang mga miyembro ng PSG ng bakuna na hindi pa aprubado ng FDA ng Pilipinas.

Kaya, maraming tanong ang lumalabas ngayon na hindi diretsong masagot ng PSG at administrasyon. Paano nakapasok ang bakuna na ‘yan? Ayon sa Bureau of Customs, walang dumaan sa kanilang bakuna kaya sigurado smuggling ‘yan. Hindi ba krimen ‘yun?

At kung paniniwalaan si Durante na sila lang ang nagdesisyon na magpabakuna, sino ang kumausap sa Sinopharm para maipasok ang mga bakuna? Sino rin ang nagbayad?

Ayon kay Presidential Spokesperson Harry Roque, regalo o donasyon ‘yun kaya walang nilabag na batas, kaya tapos na ang usapang ‘yan.

Kung ganun, alam pala nilang may pumasok na bakuna sa bansa kahit ilegal.

Ganito ang kasalukuyang administrasyon, kapag sila ang kumilos na labag sa batas, okay lang ‘yun. Pero ano ang silbi ng FDA kung hindi pala nila mapipigilan ang isang sangay ng gobyerno na kumilos ng ilegal?

Ano ang gagawin ng Bureau of Customs ngayong malinaw na smuggling ang naganap sa pagpasok ng bakuna? Maniwala tayong may mangyayari sa imbestigasyon ng NBI sa isyu na ito. Gayundin, ano ang katayuan ng DOJ kung malinaw na labag sa batas ang naganap? Kakasuhan ang buong PSG? At kapani-paniwala ba na ang PSG lang ang kusang nagdesisyon na magpabakuna, na sila lang ang kumausap sa Sinopharm, at naipasok nila ang bakuna na hindi alam ng ilang opisyal o ahensiya, o ng Palasyo mismo? Kung hindi PSG ang gumawa kaya niyan at sabihin natin ang mga tauhan ng tanggapan ng Vice-President ang kusang nagdesisyon tulad ng ginawa ng PSG para maprotektahan rin si Vice-President Leni Robredo, hindi kaya inaresto na sila agad at kinulong?

Tila ganito na ang kapulisan at militar sa ilalim ng kasalukuyang gobyerno. Dapat maniwala ang publiko na wala silang nilalabag na batas sa lahat ng kanilang kilos, na dapat sila ang rinerespeto ng publiko.

Hindi man lang medical frontliners na talagang kailangan ng proteksiyon ang unang binigyan ng bakuna. At sa kabila ng isyung ito, wala pa ring linaw kung kailan magkakaroon ng legal na bakuna na ipinasok sa bansa at aprubado ng FDA para sa mamamayan.

Karapatan ng mga Pinoy na makakuha ng de-kalidad na bakuna kontra COVID-19

ni Korina Sanchez - @Isyung 'K' | December 29, 2020

Bakit nga naman magpapabakuna sa produkto na may 50% porsiyento lamang na “efficacy rate” o bisa sa tao? Kapag sinabihang “fifty-fifty ang posibilidad” ng anuman, aprubado na ‘yan sa iyo? Hindi ba malaking sugal ‘yan para sa bakuna? Ito ang lumalabas na bisa ng bakuna ng Sinovac, ang tila paboritong bakuna na ipapasok sa bansa na siyempre, made in China.

Ayon sa Department of Science and Technology (DOST), katanggap-tanggap na ang porsiyentong ‘yan para magamit sa bansa — ‘yan mismo ay mula sa DOST.

Sa kabila nito, umalma ang ilang mambabatas. Anila, kalokohan ang pahayag ni Agusan del Norte Rep. Lawrence Fortun. Ang pahayag ni Fortun ay hindi dapat bumibigay ang gobyerno sa “any overture, pressure, or campaigning by the Chinese government, the Chinese embassy, or any of their proxies”. Sa madaling salita, huwag bumigay na naman sa China. Hindi rin tinanggap nina Sen. Miguel Zubiri at Sen. Franklin Drilon ang bakuna ng Sinovac. Hindi raw magtatanim ng tiwala sa bakuna kung ganyan lang ang bisa.

Nahuhuli na nga ang Pilipinas sa paggamit ng bakuna para masimulan na ang laban sa COVID-19. Nauna na ang Singapore bilang unang bansa sa Asya na tumanggap ng bakuna mula Pfizer/BioNTech. Alam nating mahirap mag-imbak ng bakunang ito at kailangan malamig na malamig ang paglalagyan. Ang mayayamang bansa ang natural na nakakuha agad ng bakuna ng Pfizer/BioNTech at Moderna at nagsimula nang bakunahan ang kanilang mamamayan. Sa Amerika, higit isang milyon na ang nabakunahan pero ang target ay dalawampung milyon agad. Siguradong nais ng Amerika na bumalik na sa normal ang buhay at matanggal na sa pagiging numero unong bansa sa dami ng kaso ng COVID-19.

Minamadali na raw ang pagdala ng bakunang Moderna sa Pilipinas. Ang bakuna mula AstraZeneca ay parating na rin. |Mabuti naman at maraming pagpipilian at hindi isang bakuna lang na mababa pa ang bisa. Para sa mga nais na munang maghintay, nasa kanila na iyon. Kapag mabisa ang bakuna, tulong na iyon para makamit ang “herd immunity” kung saan mababawasan na ang makakapitan ng virus at kusang mawawala na lang — yan ang plano. Sana maging matagumpay!

‘Nandilim ang paningin’, hindi katwiran para pumatay ng kapwa, period!

ni Korina Sanchez - @Isyung 'K' | December 24, 2020

Ano pa ba ang pag-uusapan natin ngayon? Matagal na tayong nasa media at marami na ring nasaksing hindi magaganda, pero iba ang usaping ito. At hindi nakapagtatakang sangkot ang pulis, lalo na sa ilalim ng administrasyong ito. Sigurado maraming nakanood ng video nang walang habas na pagpatay sa mag-inang Sonya at Frank Anthony Gregorio ni Joel Nuezca — wala na tayong pakialam sa kanyang ranggo — noong Linggo ng hapon.

Sa ating palagay, walang kinalaman kung ano ang pinag-awayan ng dalawa — may kasaysayan daw ng alitan ang magkapit-bahay dahil sa right of way, at naingayan dahil sa pagpapaputok ng “boga” ng biktima na siyang ikinagalit ng suspek.

Pero ang isyu ay may karapatan ba itong halimaw na pulis na basta na lang patayin ang mag-ina na wala namang banta sa kanyang buhay at kontrolado na niya ang sitwasyon?

Kitang-kita sa video na nagmamakaawa na si Sonya sa pulis. Niyakap na ang tila nakainom na anak para huminahon. Ganito ang sitwasyon sa kahabaan ng video. Tila nagbago na lang ang sitwasyon nang dumating ang batang babaeng anak ng pulis at sinigawan ang mag-ina ng, “My father is a policeman!” habang kinukunan ng video ang pangyayari.

Kung bakit pinababayaan ng pamilyang ito na lumapit ang bata sa ganyang sitwasyon ay nagpapahiwatig ng kanilang uri ng pagpapalaki sa bata. Sa punto na ito, tumingin ang pulis sa kumukuha ng video sa kanyang kaliwa saka binaril ang mag-ina. Siniguradong patay pa si Frank Anthony nang barilin ulit kahit bumulagta na. Lahat ito sa harap ng kanyang batang anak na babae.

Ano ang iniisip nito? Kaya niya lusutan ang pamamaril dahil pulis siya sa ilalim ng kasalukuyang administrasyon? May sapat siyang dahilan kaya lumabas nang armado at nauwi sa pagpatay sa mga kapitbahay? Ano ang banta sa kanyang buhay para kumilos nang ganyan? May nakita ba kayo sa video? Nagpakitang-gilas ba siya sa kanyang anak dahil ipinagmalaki nitong pulis ang kanyang ama? Pero ang matindi, marami na palang mga nakaraang kaso ang pulis, pero bakit nasa serbisyo pa? Dahil kayang-kaya niyang pumatay ng tao?

Agad naglabas ng paliwanag ang Palasyo na “isang bugok lang ‘yan.” Paano pala kung matapatan mo ang isa pang bugok? Sigurado ba silang isa lang ang bugok sa kanilang hanay?

At huwag nilang sasabihing nandilim ang paningin nito kaya nagawa ang krimen. O kaya “isolated case” ito. Ilang beses na nating narinig ang PNP na magpaliwanag na “isolated case” ang pagkakasangkot ng pulis sa katiwalian o krimen? Kung marami na, hindi na “isolated” ‘yan. Ibig sabihin ba ay kung adik ang katunggali ng mga pulis, malinaw ang pag-iisip pero kapag ordinaryong mamamayan na hindi armado ay nandilim ang paningin?

Ilang taon kaya ang aabutin ng kasong ito bago masentensiyahan? Malinaw ang ebidensiya kaya dapat gawin itong halimbawa ng hukuman. Dapat makulong habambuhay ang halimaw na ‘yan. Hindi na dapat makalabas sa lipunan. Ilang beses na palang nasasampahan ng kaso pero nakakalusot dahil sa kung anu-anong teknikalidad kaya nakabalik pa sa serbisyo. Ganyan nga yata talaga sa Pilipinas. Tsk!