Pambubuking ng COA sa korupsiyon sa mga ahensiya ng gobyerno, oks!

ni Korina Sanchez - @Isyung 'K' | August 21, 2021

Salamat at may Commission on Audit (COA). Salamat at may ahensiya ng gobyerno na hindi kontrolado at hindi umaatras sa mga banta ni Pangulong Rodrigo Duterte. ‘Yan naman ang tungkulin ng COA. Bantayan kung paano nagagamit ang pondo ng gobyerno — pondo na galing din sa mamamayan. Naging mainit sa mata ni Pangulong Duterte ang COA matapos maglabas ng ulat na ang Department of Health ay may P67.3 bilyong pagkukulang sa dokumento o kung paano nagamit ang pondo. Binatikos ang COA na dapat hindi isinasapubliko ang mga ulat at idirekta na lang sa mga tinutukoy na ahensiya dahil napapasama agad sa mata ng publiko ang mga opisyal. Inutusan pa ang gabinete na ‘wag pansinin ang COA. Dinepensahan nang husto ang kanyang paboritong kalihim ng DOH.

Pero nasa Konstitusyon na kailangan malaman ng publiko ang lahat ng ulat na inilalabas ng COA, bagay na madalas hindi rin nirerespeto ng Palasyo. Ang mahalaga ay sila lamang ang masusunod. Wala naman sa ulat ng COA na ninakaw ang mga pondo pero ipinapaliwanag nila sa iba’t ibang ahensiya kung paano o bakit ganyan ang paggamit ng pondo. Katulad ng pinagawang infinity pool ng Philippine Ports Authority (PPA) sa La Union na sinabi ng COA ay hindi kailangan at pagsasayang lang ng pondo. Natural, umalma ang general manager ng PPA. Hindi luho ang infinity pool. Ano ba ang tungkulin ng PPA, kabilang ba ang mag-swimming o matuto lumangoy?

Ang Overseas Workers Welfare Administration (OWWA) ang ipinapaliwanag din kung bakit sa construction company bumili ng sanitary napkin, at mahal pa, kung may botika na malapit lang sa kanilang tanggapan, gayundin ang ‘stayson’ ng gobyerno hindi nakalusot sa mata ng COA. Pinaliliwanag kung bakit may halos P190 milyong piso ang ibinayad ng PTV-4 bilang sahod pero wala ring kaukulang dokumento, tulad ng daily time record. Hindi ba kailangan ng paliwang ang lahat na ito?

Ilan lamang ito sa mga kinikuwestiyon ng COA sa iba’t ibang ahensiya o kagawaran. Ayon kay dating COA chief Heidi Mendoza, nagiging bukas sa korupsiyon kapag napapadalas ang hindi pagsumite o pagpapaliwanag kung paano nagagamit ang pondo. Nakapagtataka kung bakit nagagalit si P-Duterte sa COA, kung ang isa sa kanyang mga sinabi ay kung may “whiff of corruption” ay aaksiyunan niya agad. “Whiff” pa ba ang mga ito, o umaalingasaw na pero hindi na lang pinapansin? Tama si Sen. Manny Pacquiao, tama ang ginagawa ng COA at kailangang managot ang mga tiwali at makulong. Kung ganyan sana kadali, matagal nang umapaw ang Bilibid.

Malaking karangalan sa bansa ang medalya ng mga atleta

ni Korina Sanchez - @Isyung 'K' | August 10, 2021

Natapos na ang kampanya ng ating mga atleta sa Tokyo Olympics sa pagkamit ni Carlo Paalam ng silver medal sa boxing nang matalo ni Galal Yafai ng Great Britain. Kung nanalo si Paalam, pangalawang gintong medalya sana ang mauuwi matapos makamit ni Hidilyn Diaz ang pinagnanasaang medalya. Apat ang inuwing medalya ng ating mga atleta, ang pinakamagandang resulta sa loob ng ilang dekada. Patunay na maraming ibang sports kung saan puwedeng makipagkumpitensiya ang Pilipino, hindi lang sa basketball.

Uuwi ang mga atleta sa karangalan, pasasalamat mula sa buong bansa at gantimpala na rin mula sa gobyerno at pribadong sektor. Pera, pabahay at iba pang premyo. Siguradong lahat sila ay makatatanggap ng pag-endorso ng sari-saring produkto. Pero sa kabila ng lahat ng 'yan, marami sa kanila ang nais ituloy ang pagsasanay para sa susunod na Olympics sa Paris, partikular ang mga hindi nakasungkit ng gintong medalya. Dahil sa magandang pagganap ng Philippine Olympic Team sa Tokyo, sana ay maraming atleta ang mabigyan ng inspirasyon na kumatawan para sa bansa sa mga susunod na paligsahan.

Sana ay itigil na rin ang paglalagay ng mga kulay-pulitika sa tagumpay ng mga atleta. Kinatawan nila ang buong bansa, hindi lang isang administrasyon o isang pangulo. Naglabasan kasi sa social media na sa ilalim lamang umano nitong administrasyon, nitong pangulo naging matagumpay ang bansa sa pagkamit ng unang gintong medalya sa Olympics. Natural ay maraming sumagot sa kanila, tulad ng paalala sa pagdawit kay Hidilyn Diaz sa Oust-Duterte matrix. Inamin din naman ng pamahalaan na kulang na kulang ang suporta sa ating mga atleta, bagay na ipinahayag na noon ni Hidilyn. Nagpahayag na nga si Rep. Joey Salceda na dapat suportahan ang mga atleta habang nagsasanay at hindi lang kapag nanalo na. Kaya sana ay tumigil na at lahat naman tayo panalo.

Tatlong taon bago ang 2024 Paris Olympics. May mga paligsahan na kailangang salihan ang mga atleta kung nais maging kuwalipikado para sa Paris 2024. Inaasahang magiging maganda na ang suporta sa kanila matapos ang magandang kaganapan sa Tokyo. Ngayong nakatikim na ng medalya, baka gutom na rin ang iba. Bakit hindi?

Mga bakunang epektib kontra Delta variant

ni Korina Sanchez - @Isyung 'K' | July 27, 2021

Ayon sa pag-aaral na inilathala sa New England Journal of Medicine ay nagpahayag na ang tig-dalawang dose ng bakunang Pfizer at AstraZeneca ay epektibo laban sa Delta variant ng COVID-19, ang variant na sinasabing nagdudulot ng labis na pag-aalala sa buong mundo dahil sa mas nakahahawa ito.

Samantala, ang bakuna ng Moderna ay epektibo rin laban sa Delta variant. Ang tatlong bakunang nabanggit ay sumasailalim ngayon sa mga pagsusuri upang matukoy kung kinakailangan ng pangatlo o booster shot para sa karagdagang proteksiyon. Sa ngayon sinasabi ng gobyerno na hindi pa kailangan.

Ikinalulungkot naman ng mga dalubhasa ang kakulangan ng datos mula sa bakunang Sinovac upang makapaglabas ng tapat na pahayag. Maraming bansa sa ASEAN ang gumagamit ngayon ng tinatawag na “mix and match” ng mga bakuna kung saan magkaibang tatak ang una at pangalawang dose. Para umano mas mapabilis ang pagbigay-proteksiyon. Karamihan sa mga bansa sa ASEAN ay nagpasimula ng pagbabakuna gamit ang Sinovac na ibinigay ng gobyerno ng China.

Ang mga bakuna ng Pfizer at Moderna ay ngayong pa lang dumarating sa bansa sa pamamagitan ng mga donasyon at pagbili ng mga pribadong kompanya. Maaaring sumunod na rin ang gobyerno sa ginagawang “mix and match” ngayong may ibang bakuna na. May mga positibo na para sa Delta variant sa bansa kaya higit na mahalaga ang mabakunahan sa lalong madaling panahon. Ginagawa ng gobyerno ang lahat upang mapigilan ang pagkalat lalo na sa babala ni Pangulong Rodrigo Duterte na maaaring ipatupad ang mahigpit na lockdown kung magsimulang kumalat ang mga kaso. Bumabagsak na nga ang stock market sa babalang ito.

Higit isang buwan na lang at maririnig muli natin ang walang kamatayang awit ni Jose Marie Chan. Magkakaroon ba tayo ng mas masayang Pasko ngayong taon? Hindi pa masabi. Ang Delta variant ay tila balakid sa plano ng lahat. Ang mga bansa na nagpasyang luwagan ang paghihigpit ay nakararanas ng pagtaas ng mga impeksiyon, karamihan sa mga ito ay dahil sa Delta variant at karamihan ay mga hindi bakunado.

Ginagawa ng mga pamahalaan ang lahat para kumbensihin ang mga tao na magpabakuna. Ngunit kahit nagkakaroon ng pagsipa ng bilang ng mga kaso may mga mas naniniwala pa rin sa napakamaling impormasyon na ikinakalat ng mga nagpapahayag ng maling opinyon.

Sana ay hindi nila bayaran ng kanilang buhay ang mga maling paniniwala at dapat panagutan din ang nagkakalat ng maling impormasyon.