Trahedya ng couple rider, 'wag na ikalat sa social media

ni Atty. Rodge Gutierrez - @Mr. 1-Rider | December 1, 2022

Naglipana sa iba’t ibang social media platform, partikular sa YouTube at Facebook ang iba’t ibang klase ng aksidente na karaniwang kinasasangkutan ng ating mga ‘kagulong’ at ang iba ay viral pa na madalas ay nakadaragdag pa sa pighati na dinaranas ng mga kaanak.

Tulad na lamang ng nangyari sa mag-asawa na libangan ang sumakay ng motorsiklo at malaking bahagi ng kanilang bonding bilang mag-asawa ay ang mag-joy ride sa iba’t ibang lugar sa tuwing sila ay may pagkakataon dahil may kaya naman sila sa buhay.

Nitong nagdaang Nobyembre 13 ay nagtungo ang mag-asawang nabanggit sa dinarayong lugar ng mga mahilig magmotorsiklo—ang Marilaque Highway sa Tanay, Rizal na paboritong destinasyon ng iba’t ibang grupo ng ating mga ‘kagulong’.

Bago pa man din sumabak ang mag-asawang ito na tahakin ang kahabaan ng naturang highway ay nakangiti pa sila nag-post ng kanilang huling larawan ilang minuto bago maganap ang trahedya na may photo caption pang, “Sunday ride! Keep us safe Lord!”.

Sa katunayan, bukod sa napakaraming ‘kagulong’ natin ang nagtutungo doon ay dinarayo rin ito ng mga motovlogger dahil lahat sila ay kinukunan ang mga humaharurot ng motorsiklo pababa at nagpapalakpakan pa.

Karamihan sa mga vlogger ay nakapuwesto sa halos lahat ng kurbada, ngunit mas paborito nilang mag-abang sa tinatawag nilang overshoot spot sa kahabaan ng naturang highway na tinatawag din nilang portal na ang ibig sabihin umano ay lagusan patungong langit o impyerno dahil sa dami na ng naaksidente sa naturang lugar.

Wala kasing araw na walang sumisemplang sa naturang kalsada dahil sa napakadelikado ng kurbada at lahat ng vlogger na naroon ay walang ginawa kung hindi ang mag-abang ng maaaksidente para may magamit silang content sa kanilang vlog.

May ilang mga ‘kagulong’ nga tayo na minsan kapag medyo naiinip na dahil sa walang naaaksidente kahit ordinaryong semplang lamang ay nagdadasal pa na sana umano ay may mangyari na para may magamit silang content na inaabangan umano ng kanilang followers.

At dumating nga ang pangyayari sa mag-asawa na habang magka-angkas na humaharurot pababa ng Marilaque Highway ay sumalpok sa hulihang bahagi ng kasalubong na pick-up truck na dahilan para pareho silang tumilapon.

Dead on the spot ang babae, samantalang naisugod pa sa pagamutan ang lalaki na kalauna'y binawian din ng buhay dahil sa dami ng tinamong bale sa iba’t ibang bahagi ng katawan.

Ang higit na masakit sa pangyayaring ito ay apat na anak na pawang mga bata pa ang naulila dahil iniwan sila ng mag-asawang nasawi na wala naman ibang intensyon kung hindi ang maglibang gamit ang kanilang motorsiklo na karaniwan naman nilang ginagawa.

Nasakote naman ang driver ng pick-up truck, ngunit nang ibigay nito sa pulisya na nag-iimbestiga sa naturang kaso ang dashcam ng kanyang sasakyan ay doon nakita na may malaking pagkakamali ang mag-asawang nasawi dahil nag-counterflow sila kaya sumalpok na naging sanhi ng kanilang pagkasawi.

Kitang-kita rin sa dashcam na sobra ang bilis ng kanilang takbo at pagsapit sa kurbada ay sinakop nila ang linya pasalubong sa pick-up truck kaya hindi na sila nagkaroon ng pagkakataong umiwas pa.

Dahil sa dami ng vlogger sa naturang lugar ay napakarami ng nag-upload, iba-iba rin ang detalye—may tama, may mali at hanggang ngayon ay viral pa rin ang naturang pangyayari kaya nakikusap ang kaanak ng mga nasawi na kung maaari ay i-delete o alisin na ang naglipanang video.

Tulong umano ito sa apat na maliliit pang anak na mahihirapang makalimutan ang pangyayari dahil santambak talaga ang video, lalo na sa YouTube na isang pindot lang sa cellphone ay nagbabalik na ang masakit na pangyayari, lalo na sa mga kaanak.

Tinatawagan din natin ang Rizal PNP na sana ay bantayan ang naturang lugar na mahabang panahon nang palaging may naaaksidente at huwag nating ikatuwa na tila isa na itong tourist destination dahil buhay ang nakataya dito.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012, GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

‘Pinas, kaya bang sabayan ang e-vehicles?

ni Atty. Rodge Gutierrez - @Mr. 1-Rider | November 29, 2022

Sa sobrang bilis nang pagbabago ng teknolohiya ay halos hindi na tayo puwedeng kumurap dahil halos araw-araw ay may mga nadaragdag at bagong nauuso hindi lang sa pagkain, gadgets at marami pang iba — kabilang na ang pagdating ng electric vehicle.

Electric vehicle ang tawag sa bagong usong sasakyan na pinatatakbo lamang ng electric motor at bateriya, wala itong tambutso, kaya wala rin itong ibinibugang usok na mabuting dulot sa hangin sa kapaligiran dahil walang polusyon.

Marami na ang klase ng electric vehicle mula maliit hanggang sa malaking sasakyan na mabibili na sa bansa tulad ng e-bike, e-trike, scooter, e-motorcycle, SUV, jeepney, bus at truck na unti-unting nakikita ng pubiko ang bentahe nito.

Mula sa araw-araw na pagsakay sa mga pampublikong sasakyan, nahumaling na ang mga komyuter na gumamit na lamang ng motorsiklo hanggang sa masiyahan na ay natutong gumamit ng race bikes o big bikes at ngayon dumarami na rin ang gumagamit ng e-bikes.

Kumpara sa mga sasakyang gumagamit ng gasolina o diesel na karaniwa’y nagbubuga ng maruming usok na pangunahing problema ng buong Metro Manila dahil sa maitim na ang itaas na bahagi na ng nasasakupan nito.

Sa pag-aaral na isinagawa ng Greenpeace Southeast Asia at ng Center for Research on Energy and Clean Air, ang usok mula sa mga sasakyang gumagamit ng gasolina at diesel ang dahilan ng kamatayan ng maraming Pilipino.

Base sa unang inilabas na ulat ay umabot sa 27,000 katao ang binabawian ng buhay taun-taon dahil sa nakalalasong hangin, ayon sa pag-aaral ng mga eksperto at ikatlo ang ating bansa sa buong Asya na marami ang namamatay dahil sa air pollution.

Kaya namamayagpag sa ngayon ang mga e-vehicle, ngunit marami pa rin ang nagtatanong kung napapanahon nga bang bumili ng mga ganitong klase ng sasakyan na ayon naman sa mga mayroon ng e-vehicle ay marami umano ang bentahe.

Unang-una ay hindi nga naman sakop ng number o color coding scheme ang e-vehicle na napakalaking bentahe bukod pa sa may espesyal na pate number na ibinibigay ang Land Transportation Office (LTO) at napakabilis pa ng proseso sa pagpaparehistro.

Hindi rin damay ang e-vehicle sa patuloy na pagtaas ng petrolyo at kahit tumaas ang kuryente ay mas mura pa rin kilowatt-hour per liter dahil ang natatakbo ng e-vehicle ay mas mababa ang gastos kumpara kung magkakarga ng gasolina.

Sa ngayon ay problema pa ring kinahaharap ng mga may-ari ng e-vehicle ay ang mga parking lots na dapat may charging stations, ngunit may malls na naglagay na ng charging stations, tulad ng Robinsons, Ayala at iba pang establisimyento na inaasahang madaragdagan pa sa paglipas ng panahon.

Umiiral na batas na ngayon ang RA11697 o EVIDA Law (EV Industry Development Act) na nakapaloob sa ilalim nito ang mandato sa mga ahensya ng gobyerno na ipatupad ang eksklusibong parking lot sa mga itatayong gusali.

Dapat lagyan ng charging stations ang mga parking area at gasolinahan sa bansa at hindi dapat bigyan ng building permit ang magtatayo ng gusali kung wala nito.

Kung gagamitin sa pamamasada ang e-vehicle, dapat ay mabilis ang proseso sa pagkuha ng prangkisa at dapat idagdag din sa TESDA ang kurso hinggil sa pagkukumpuni at tamang paggamit ng e-vehicle.

Hindi na talaga mapipigil ang pagdami ng mga gumagamit ng e-vehicle dahil dalawang dekada na simula nang dumating ang unang hybrid vehicle sa merkado na ngayon ay unti-unti nang umaani ng tagumpay.

Marami ng car manufacturers ang nag-anunsyo na plano nilang itigil ang paggawa ng internal combustion engine (I.C.E.) vehicle sa susunod na 10 hanggang 15 taon at ang Jaguar ay plano nang e-cars na lamang ang ipagbibili sa 2025 at maraming manufacturer na ang gumaya.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012, GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Bakit kailangang magbayad ng toll fee?

ni Atty. Rodge Gutierrez - @Mr. 1-Rider | November 26, 2022

Marami sa ating mga kababayan ang tuwing dadaan ng expressway ay bayad nang bayad ng toll fee pero hindi naiintindihan kung bakit sila nagbabayad nito at hindi rin nila alam kung ano mismo ang toll fee.

Ang toll fee ay halagang ating ibinabayad para gumamit ng kalsada o highway bilang bahagi ng inisyatibo ng gobyerno na makapagtayo ng major expressway para sa mas mabilis at maayos na biyahe patungong mga lalawigan.

Sa ilalim ng Presidential Decree No.1112 ay nabuo ang Toll Regulatory Board (TRB) na siyang inatasang mamahala, monitoring, pagsasaayos ng konstruksiyon, operasyon at maging ang maintenance ng lahat ng toll facilities.

Kahalintulad din ito ng paggamit sa ibang pampublikong pasilidad o serbisyo na kailangang magbayad ang gagamit ng tollways upang matulungan ng pagsasaayos at maintenance ng operasyon ng expressway sa bansa.

May pagkakataon namang inihihinto ang koleksyon o pagbabayad ng toll fee, halimbawa’y may national crisis o special holiday at ang mga bagong gawang expressway ay binubuksan at pinagagamit ito sa publiko nang walang bayad sa loob ng ilang buwan bago ipatupad ang panahon ng paniningil.

May mga sasakyan namang hindi talaga sinisingil sa tuwing dadaan sa expressway, tulad ng mga sasakyan ng gobyerno na opisyal ang lakad basta magpapakita ng official trip ticket sa lahat ng toll booth. Hindi rin sinisingil ang mga emergency vehicle, lalo na kung aktibo silang tumutugon sa krisis ng bansa.

Ang iba pang sasakyan na talagang walang bayad sa expressway ay ang truck ng bumbero, ambulansya, markadong sasakyan ng Armed Forces of the Philippines (AFP), Philippine National Police (PNP) at Bureau of Jail Management and Penology (BJMP).

Wala ring bayad ang mga hinatak na sasakyan na mula o dadalhin sa impounding area ng Land Transportation Office (LTO) at Land Transportation Franchising and Regulatory Board (LTFRB), ngunit ang mga pribadong truck ng bumbero at ambulansya na pag-aari ng mga negosyante ay hindi libre.

Ngunit ipinakikiusap ng TRB sa mga toll booth operator na kung nasa gitna ng pagresponde o pagtugon sa emergency ay payagan nang dumaan ng walang bayad maging pribado o pampublikong ambulansya o truck ng bumbero.

Ngayon, kung nagpaplano kayong magsagawa ng weekend trip, lalo na ngayong panahon ng Kapaskuhan o kaya’y gusto n’yo lamang malaman kung magkano ang bayad sa NLEX hanggang TPLEX ay narito ang ilang umiiral na bayad.

Kung galing sa Metro Manila at nagmamaneho ng Class 1 vehicle ay asahan na ang ganitong babayaran:

NORTHERN DESTINATIONS

• Manila patungong Angeles, Pampanga toll fee (NLEX-Balintawak to NLEX-Angeles): ₱272

• Manila patungong Lingayen, Alaminos toll fee (NLEX-Balintawak patungong TPLEX-Paniqui): ₱533

• Manila patungong Subic toll fee (NLEX-Balintawak patungong SCTEX-TIPO): ₱579

• Manila patungong Baguio via TPLEX toll fee: (NLEX-Balintawak patungong TPLEX-Sison): ₱744

• Manila patungong La Union, Laoag toll fee: (NLEX-Balintawak patungong TPLEX-Rosario): ₱765

SOUTHERN DESTINATIONS

• Manila patungong Tagaytay toll fee (SLEX-Magallanes patungong SLEX-Sta. Rosa): ₱175

• Manila patungong Batangas toll fee (SLEX-Magallanes patungong SLEX-Calamba): ₱214

Maaari kayong magbayad ng cash, ngunit karaniwan ay mahaba ang pila hindi tulad kung gagamit ng RFID ay mas mabilis na makakadaan sa mga toll gate at magiging maginhawa ang biyahe kung hindi magloloko ang kanilang RFID-linked electronic toll tag reader na sanhi ng hindi pagtaas ng gate barrier.

Alam ba ninyo na sa unang pagkakataon na ang sasakyan na dumaan sa toll gate na walang sapat na load sa kanilang RFID ay pagbibigyan pa ng pagkakataong magbayad, ngunit kung mauulit ito sa ikatlong pagkakataon ay obligado ng magbayad ng multang P1,000?

Kaya para walang abala ay tiyaking sapat ang load ng inyong RFID upang maiwasan ang anumang abala dahil kung ang motorista ang may pagkukulang ay tiyak na may kahaharaping problema.

Pero kung ang pamunuan ng mga nagpapatupad ng expressway ang may pagkukulang — tulad ng hindi gumana ang Autosweep RFID sa ilalim ng pamamalakad ng San Miguel Corporation na nagdulot ng matindi at napakahabang trapik sa expressway ay motorista pa rin ang may problema.

Isipin mo, kapag sila ang may pagkukulang ay nagpapaliwanag lang ay ayos na, pero kapag ang motorista, bukod sa multa, kapag minalas ay asunto pa.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012, GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.