MMDA, dapat bantay-trapik, hindi bantay-salakay

ni Atty. Rodge Gutierrez @Mr. 1-Rider | December 20, 2022

Maganda na sana ang tinatahak na landas ng 17 alkalde sa Metro Manila na magpatupad ng moratorium sa pagkumpiska sa lisensya ng mga motoristang lalabag sa batas-trapiko.

Ito kasi ang napagkasunduan ng mga alkalde kamakailan na inaasahang ipatutupad sa first quarter ng taong 2023 at kasalukuyan nang pinaplantsa ang magiging sistema at legalidad ng naturang hakbangin.

Ang moratorium ay magiging epektibo matapos na mabuo ng mga lokal na pamahalaan sa National Capital Region (NCR), Metropolitan Manila Development Authority (MMDA) at Land Transportation Office (LTO) ang mga guidelines para sa inter-connectivity program na gagamitin sa single ticketing system.

Nagbigay pa ng pahayag si MMDA Acting Chairman Romando Artes na magpapasa umano ng ordinansa ang mga city at municipal councils sa Metro Manila upang walang maging balakid sa pagpapatupad ng naturang kasunduan.

Laman ng mga ipapasang ordinansa ang kautusang suspensyon sa pagkumpiska ng lisensya ng mga driver na magkakaroon ng traffic violation sa oras na simulan na ang nabanggit na moratorium.

Kahit ang Department of the Interior and Local Government (DILG) ay nagbigay din ng komento na bagama’t hindi muna kukumpiskahin ang driver’s license ay ililista pa rin ng mga traffic enforcer ang pangalan ng mga lalabag na motorista at ipapasa ang impormasyon sa LTO.

Maganda dahil magkakaroon umano ng single ticketing system at magkakaroon na ng inter-connectivity sa database sa mga lumabag at lalabag pa sa batas-trapiko sa Metro Manila.

Kung maisasakatuparan ito sa pagpasok ng Bagong Taon ay malaking tulong ito para magkaroon ng common database ang Metro Manila LGUs, MMDA, at LTO.

Kasabay ng paghaharap-harap ng mga alkalde ay inanunsiyo rin ni DILG Secretary Benhur Abalos na nangako umano ang Metro Manila mayors at MMDA na bababaan ang penalty sa ilang traffic violations.

Kung inyong mapapansin ay special mention ni Sec. Abalos ang MMDA na makikiisa para ibaba ang penalty sa traffic violations — tapos ngayon ay nanggagalaiti si Chief Presidential Legal Counsel Juan Ponce Enrile sa pamunuan ng MMDA.

Gusto ni Enrile na ipasuri sa psychiatrist ng National Center for Mental Health (NCMH) sa Mandaluyong City ang pamunuan ng MMDA dahil sa pagtatakda umano nito ng performance target para sa mga mahuhuling lumalabag sa batas-trapiko.

Dahil dito ay inaasahang walang humpay na panghuhuli ang isasagawa ng kanilang mga traffic enforcer dahil sa target nilang makakolekta umano ang ahensiya ng tumataginting na P230 milyon mula sa mga pasaway na motorista.

Ang panggagalaiting ito ni Enrile ay umani ng positibong reaksyon mula sa mga motorista nang kuwestiyunin nito sa kanyang lingguhang programa sa telebisyon ang pagtatakda ng MMDA ng performance target laban sa mga traffic violators.

Sa halip nga naman kasi na tutukan kung paano mapabababa ang bilang ng mga pasaway na motorista ay ang pagtutok sa target collection ang nasa isip ng mga opisyal ng MMDA.

Kinukuwestiyon din ni Enrile kung bakit kailangan ng target, kung may violator nga naman ay dapat na hulihin upang papanagutin sa kanyang pagkakamali at hindi dahil naghahabol sa quota.

Totoo kasi na kapag umiral ang ganitong sistema ng MMDA ay wala ng ibang gagawin ang kanilang mga enforcer kundi ang manghuli nang manghuli kahit walang violation.

Isa pa ay tama rin naman na hindi revenue agency ang MMDA kaya hindi dapat ang target collection ang inaatupag kundi ang maisaayos ang daloy ng trapiko sa Metro Manila at bahagi lang ang panghuhuli.

Kaya ko ito isinulat kasi taumbayan na ang apektado rito, mga motorista at kaawa-awa nating mga ‘kagulong’ na karamihan ay sinasagupa ang sama ng panahon para lamang kumita tapos ay pupuwersahin lang ng MMDA dahil sa naghahabol sa quota.

Higit sa lahat ay taliwas ito sa napagkasunduan ng mga alkalde na bababaan pa ang penalty sa traffic violation kung saan dumalo pa ang pamunuan ng MMDA na sala pala sa lamig at sala sa init.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012, GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Paglilinaw sa tricycle ban

ni Atty. Rodge Gutierrez - @Mr. 1-Rider | December 17, 2022

Marami sa ating mga kababayan ang nalilito kung paano nga ba ipatutupad o susundin ang tricycle ban dahil mismong ang mga may-ari ng nito at maging ang mga enforcer ay tila hindi ito naiintindihan.

Ang buong alam ng lahat na ang tricycle o motorsiklong may nakakabit ng sidecar ay mariing ipinagbabawal sa national highway ngunit hindi ‘yan ganyan kasimple dahil iba ang ordinaryong tricycle at tricycle na nagbibigay serbisyo sa publiko ng may bayad.

Napakarami na ng insidenteng ang tricycle na dumaan sa national highway ay pinapara ng mga enforcer at iniisyuhan ng violation ticket na karaniwan ay kolorum, out of line, no franchise, no permit at kung anu-ano pa ang ikinakaso.

Maliwanag ang tricycle ban sa national highway, ngunit kung sasaliksikin natin ang lahat ng mga umiiral na panuntunan, maging ang rule on franchises ay hindi aplikable sa mga pribadong tricycle ang pagbabawal dumaan sa national highway.

Walang kontrol ang lahat ng Local Government Unit (LGU) sa mga pribadong sasakyan hangga’t ginagamit ito na pansarili lamang—kabilang ang tricycle, maliban na lamang kung makagagawa ito ng paglabag sa trapiko na aplikable naman sa lahat ng sasakyan.

Medyo may negatibong konotasyon ang salitang tricycle dahil kapag narinig natin ito ay agad naiisip ng marami nating kababayan na ito ay pampasaherong sasakyan na tumatanggap ng bayad o pamasahe.

Kaya maging ang mga tricycle na pribado ay nadadamay at maging ang may-ari ng mga ito ay ganito na rin ang akala na lahat ng three-wheelers ay mahigpit na ipinagbabawal, kaya natatakot silang gamitin ang pribadong tricycle sa highway.

Marahil panahon na para liwanagin ang pagpapatupad ng batas hinggil sa ipinapasadang tricycle at pribadong three-wheeler lalo pa at may bagong usong tatlong gulong ngayon na kung tawagin ay Tuk-Tuk three-wheelers, imported ito na naglipana na sa iba’t ibang bahagi ng bansa.

Halos lahat kasi ng traffic enforcer ay hindi naiintindihan ang tricycle ban sa national highway basta ang alam nila ay bawal ang dumaan sa highway ang tricycle, dapat hulihin at hindi nila alam na puwede ang pribado at hindi puwede ang pampasahero.

Sa iba’t ibang pamamalakad sa mga lokal na pamahalaan ay may iba-iba ring panuntunan, tulad na lamang sa kahabaan ng national highway patungong Bicol ay normal na nakakasabay ng mga biyaherong sasakyan ang mga ipinapasadang tricycle.

Normal na tanawin ito pagpasok pa lamang ng Laguna, Batangas, Quezon hanggang sa Bicol na isa sa mga dahilan nang pagbagal ng biyahe dahil sa limitadong takbo ng tricycle sa national highway.

Bahagi na ng kulturang Pinoy ang tricycle at kung titingan natin sa iba’t ibang bayan sa buong bansa ay nasa mahigit 21 disenyo ng tricycle ang makikita at walang ahensya ng pamahalaan ang kumokontrol kung ligtas ang inilalabas na disensyo.

Wala kasing kamay ang Land Transportation Franchising Regulatory Board (LTFRB) o maging ang Department of Transportation (DOTr) sa mga tricycle kaya dapat nating kalampagin ang mga Tricycle Operators and Drivers’ Association (TODA) hinggil sa disenyo.

Maraming probinsya na may mga tricycle ang magaganda ang disenyo, maluwag at komportable ang mga pasahero, ngunit sa Metro Manila ay tila nauuso ang napakakipot ng sidecar, nakakuba na ang pasahero sa loob at sobrang siksikan ang dalawang magkatabi sa loob.

Walang pakialam ang mga namamasadang tricycle kahit magsakripisyo ang kanilang pasahero dahil sa wala namang panuntunan o standardard na sinusunod ang mga gumagawa ng sidecar.

Kahit sa pagsakay ng pasahero ay hindi pare-pareho ang dami ng lulan nilang pasahero dahil merong apat ang sakay kasama ang driver at meron namang lima kasama ang driver na nakaupo na sa tangke ng gasolina ng motorsiklo at hirap na hirap nang magmaneho.

Ilang lang ito sa kinahakaharap na suliranin ng industriya ng tricycle sa bansa na sana isang araw ay magkaroon ng standard na panuntunan para sa kapakanan ng ating mga naghahanapbuhay na ‘kagulong’ at ng mga pasahero na araw-araw sumasakay ng tricycle.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012, GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Sagot sa matinding trapik ang motorcycle taxi

ni Atty. Rodge Gutierrez - @Mr. 1-Rider | December 15, 2022

Nakararanas ngayon ng kakulangan ng unit ng mga Transport Network Vehicle Services (TNVS) ang ride hailing company na Grab na malaking dahilan kaya may mga pagkakataong nahihirapan ang mga commuter na makapag-book ng sasakyan.

Maraming pagkakataon na napipilitan ang commuter na magpa-book na lamang sa 6-seater na SUV dahil wala nang makuhang sedan sa Grab, kaya ang resulta ay dagdag-gastos dahil mas mahal ang SUV.

Hindi naman maasahan ang ordinaryong taxi na iniiwasan na rin ng mga pasahero dahil bukod sa isnabero ay nangongontrata pa o kaya’y namimili ng isasakay kung saan ihahatid at naniningil pa ng karagdagang singil kung may kalayuan.

Kunsabagay, aminado ng Grab Philippines na mayroon talagang kakapusan sa kasalukuyan sa kanilang mga unit, lalo pa ngayong panahon ng holiday season kung saan dagsa ang mga pasahero sa iba’t ibang pamilihan.

Base sa datos na inilabas ng Grab, nasa 40% na lang ng mga TNVS ang bumalik sa kanilang platform na malaking dagok bunga ng epekto ng pandemya dahil ang ibang driver ay tinamaan ng COVID-19 at ang iba naman ay nawalan ng kotse.

Nauna rito’y nanawagan ang Grab sa Land Transportation Franchising and Regulatory Board (LTFRB) na umano’y mapabilis ang proseso sa pagbibigay ng provisional authority para sa mga TNVS.

Ngunit ayon sa LTFRB, nitong nagdaang buwan ng Mayo ay nagbukas sila ng 7,000 slots upang magbigay ng permit para sa mga bagong TNVS, ngunit nasa 2,500 lang sa mga ito ang nakapagpatuloy para iproseso ang kanilang aplikasyon at makapagpasa ng kaukulang dokumento.

Batay sa fare structure ng Grab, naniningil sila ng P45 para sa base fare, P15 dagdag sa kada kilometrong biyahe, samantala, dagdag na P2 sa kada minuto ng biyahe at P40 na stop base fare na inirereklamo ng mga pasahero.

Dahil sa mga kinahaharap na problema ng TNVS ay bidang-bida naman ang ating mga ‘kagulong’ na ultimo mga taong-gobyerno ay pabor sa pagdami ng motorcycle taxi (MC taxi) para sa mas mabilis na serbisyo ng mga commuters sa Metro Manila.

Sobrang malaking tulong ang MC taxi, lalo na sa mga nagmamadaling commuter dahil madaling makaiwas sa trapik, ngunit sa kabila ng mga bentahe ay may mga commuter din na hindi sumasang-ayon sa pagdami ng bumibiyaheng MC taxi.

Kamakailan ay nagkaroon ng pagdinig sa Kongreso dahil sa mga reklamo sa shares acquisition ng Grab sa Move It. Wala umanong nilabag ang Grab at Move It sa hakbang at pinatotohanan na walang legal issues sa shares acquisition ng Grab sa Move It.

Sa naturang pagdinig, napatunayan na kahit ibang MC taxi players ay tumanggap din ng investment sa ibang kumpanya o kaya’y nagpalit ng pagmamay-ari sa mga nakalipas na taon.

Kung pagbabatayan natin ang ulat ng Security and Exchange Commission (SEC), ang Angkas ay tumaas ang asset mula P89 milyon noong 2020 at naging P588.23 milyon noong 2021.

Matatandang dati nang hinarang ng Angkas ang pagpasok ng ibang players tulad ng JoyRide at Move It, ngunit hindi pumayag ang LTFRB na manaig ang monopolyo.

Gayunman, kahit nakapasok ang iba pang players sa kalsada, mahigit 50% ang hawak ng Angkas na MC taxi sa Metro Manila. Pero sa 27,000 drivers nito ay 7,000 ang tinatawag na ‘hiram’ mula sa Move It.

Pero para sa atin, mas maraming player ay mas mabuti dahil kapag may kompetisyon ay bumababa ang presyo at gumaganda ang serbisyo at higit sa lahat ay maraming ‘kagulong’ ang nagkaroon ng hanapbuhay.

Sa tindi nang pagsisikip ng daloy ng trapiko sa araw-araw dahil sa Kapaskuhan ay hataw ngayon ang mga MC taxi, habal-habal at pati kolorum ay namamasada na—ang mahalaga ay masaya ang Pasko ng ating mga ‘kagulong’.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012, GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.