Speed Cubing Open ilulunsad ng Asian Mind Sports at POC

by Gerard Arce @Sports News | May 20, 2026

Photo: Magtatagisan ang pinakamahuhusay na speed cubers sa Tagaytay City Combat Sports Center.

Ilulunsad ang kauna-unahang Philippine National Speed Cubing Open na lalahukan ng pinakamahuhusay na manlalaro sa bansa simula Mayo 26 hanggang 27, 2026, sa Tagaytay City Combat Sports Center. 

Nagsanib-pwersa ang Asian Mind Sports Association (AMSA) at Philippine Olympic Committee (POC) sa pagsasagawa ng  torneo bilang Exhibition Discipline sa ilalim ng gabay ng Olympic Council of Asia (OCA). 

Ayon kay POC president Abraham “Bambol” Tolentino,  inaasahang palalakasin nito ang mind game sa bansa.   “We played the cube as kids at one time or another and what we thought then was merely a game is now a serious sport,” pahayag ni Tolentino, na naglalayong palaganapin ang mind game sa bansa at gawing isang priority area para sa national-level development kasunod ng obserbasyon nito sa disiplina noong 2025 Asian Mind Sports Festival sa Singapore.

Kilala ang pinakasikat na speed cubing equipment na Rubik's Cube na nilulutas ng mga elite cuber gamit ang pattern recognition, muscle memory at mga paunang natukoy na sequence na tinatawag na "algorithm," ayon sa web.

Bilang kauna-unahang nationally endorsed speed cubing open tournament sa Pilipinas, ang event na itinataguyod ng Stellar Cube ay kumakatawan sa isang makabuluhang hakbang tungo sa propesyonalisasyon at pagsasama ng speed cubing sa sports ecosystem ng bansa.

Ang inaugural na pambansang torneo ay magpapatibay sa sistema ng mga pamantayan ng AMSA, kabilang ang pagmamarka ng atleta, sertipikasyon ng referee, pag-unlad ng coach at instructor, at mga structured na framework ng club.

Saklaw sa unang araw sa Mayo 27 ang Philippine National Speed ​​Cubing Summit at AMSA Referee Certification Training habang ang Day 2 ay ang tournament proper na nagtatampok ng 3x3x3 cube, 2x2x2 cube, Pyraminx, 3x3x3 one-handed at 3x3x3 blindfolded.          

Yulo sinungkit ang unang gold sa French Gymnastics

by Gerard Arce @Sports News | May 19, 2026

Photo: Mula sa ginto hanggang sa serbisyo sa bayan. Bukod sa pagiging double Olympic champion, may bagong papel si Carlos Yulo sa likod ng gymnastics, tulad ng pagiging bagong reservist ng Philippine Navy para sa patuloy niyang pagbibigay inspirasyon sa sport at serbisyo para sa bayan.

Nagbigay ng panibagong karangalan sa bansa si 2024 Paris Olympics double gold medalist Carlos Edriel “Caloy” Yulo matapos na sumungkit ng gintong medalya sa unang salang sa French men’s Artistic Gymnastics Championships kahapon (oras sa Pilipinas) sa OAJLP Gymnastique sa Amiens, France.

Nagpamalas ng kahusayan ang 26-anyos na 3-time World champion para pasikatan ang mga katunggali sa French men’s artistic gymnastics upang makuha ang 14.250 na difficulty sa parallel bars, habang sinundan naman ito ng gold medal performance sa 15.050, upang patalsikin ang dating kampeon na ASVG Vallarius.

Lubos na ipinagmalaki at binigyang pagpapahalaga ang kanyang koponan sa nakuhang tagumpay sa loob ng kompetisyon kahit pa man bitbit ang pressure at mabibigat na sandali patungo sa nilahukang torneo. “So proud of what we all did last night! Everyone gave their all, and it really showed on the competition floor,” pahayag ni Yulo. “A lot of stressful moments and pressure behind this win, which makes it even more special. Really grateful for this team and everything we experienced together.”

Kasunod ng makasaysayang 2 gintong medalya sa Paris Games, muling nagpasikat ang 9-time Southeast Asian Games Pinoy gymnasts’ ng gintong medalya sa vault sa nagdaang 53^rd FIG Artistic Gymnastics World Championships sa Jakarta, Indonesia, kaantabay ang tansong medalya sa floor exercises. Kuminang din si Yulo ng ginto sa floor exercise sa Artistic Gymnastics Asian Championships sa Jecheon, Korea, kasama ang tatlong tansong medalya.

Tulad ng kanyang nakababatang kapatid na si Karl, na nagbulsa ng isang ginto at dalawang tanso IG Artistic Gymnastics Apparatus World Cup Series, inaasahang sasabak ang magkapatid sa 20th Asian Games sa Aichi/Nagoya Japan simula Set.19 hanggang Oktubre 4. 

'D-Incredible Dy pina-knockout si Malignaggi sa 2nd rnd ng BKB

by Gerard Arce @Sports News | May 18, 2026

Photo: Ang bumangga giba! Nanatili pa ring hari ng BKB nang matagumpay na nadepensahan ni Rolando Dy ang kanyang Bare Knuckle Boxing Super Welterweight world title matapos talunin si Paulie Malignaggi. (BKBpix) 

Tinupad ni World bare-knuckle champion Rolando “D-Incredible” Dy ang kanyang pangako na tatapusin sa pamamagitan ng knockout si dating two-time world boxing titlist Paulie “Magic Man” Malignaggi sa bisa ng second round upang mapanatili ang Bare Knuckle Boxing (BKB) Police Gazette World super-welterweight kahapon sa BKB 54: Mayhem sa Manchester sa AO Arena sa United Kingdom.  

Ipinalasap ng dating mixed martial arts titlist ang tindi ng mga upak sa legendary boxer upang tuluyang ipatigil ni referee Clive Allison ang laban sa 56 segundo para mailista ang kanyang ika-apat na sunod na panalo at kauna-unahang depensa sa korona.

 “It’s bitter and sweet, because I’ve beaten a legend, but I don’t like to retire someone, but it is what it is. I just wanted to do my job,” pahayag ng 35-anyos na anak ni dating World Boxing Council (WBC) super-featherweight champion Rolando “Bad Boy from Dadiangas” Navarette.

Bago ang kanilang pagtatapat, inihayag ng dating UAE Warriors Featherweight champion na puntirya nitong pabagsakin ang dating world super-lightweight boxing titlist sa official weigh-in, na hindi nito palalagpasin ng fifth round ang laban.

Agad na naging agresibo sa atake ang Pinoy fighter na bumitaw ng sunod-sunod na kumbinasyon ng kaliwa’t kanang upak. Bagaman napipigilan ni Malignaggi ang mga atake ni Dy dulot ng mga yakap, patuloy pa ring bumibitaw ng mga banat sa tagiliran ang tubong Dasmarinas, Cavite sa first round.

Bumitaw naman ng left-right combination si Dy na tumama sa panga ni Malignaggi upang makuha ang unang knockdown. Ramdam ang pagkahilo, mas lalo pang inundayan ng suntok ni Dy ang katunggali at muling natyempuhan ng kanang straight sa mukha para tuluyang tapusin ang laban. Naiangat rin ni Dy ang kanyang bagong kartada sa anim panalo at isang talo kaantabay ang mga knockout wins.