‘Di maitataob nina Donny, Joshua, Will, atbp… JAMES, ‘DI NA KAILANGAN NG KA-LOVE TEAM, JUSTIN BIEBER NG ‘PINAS

ni Erlinda Rapadas @Teka Nga | July 15, 2026

Photo: IG _james

Nabuwag man ang tandem nila ni Nadine Lustre, may kinang pa rin naman ang career ni James Reid dahil naririyan pa rin ang kanyang mga loyal fans. Siya ang tinaguriang local version ni Justin Bieber.

Hindi na niya kailangan na magkaroon ng ka-love team upang mapanatili ang kanyang kasikatan. Kahit na may mga bagong young actors ngayon na kinakikiligan ng mga bagets tulad nina Donny Pangilinan, Joshua Garcia, Will Ashley, atbp., iba pa rin ang appeal ni James.

Ang kailangan lang ng aktor-singer ay mas maraming exposure, mall shows, at mag-organize ng meet and greet sa mga grupo ng kanyang mga fans. Need din niya ang magagandang TV at movie projects. 

Well, dati pa ay mabenta na si James sa mga product endorsements. Tiyak na marami pang offers na darating kung magiging visible siya sa social media. 

Marami rin ang nakapansin na hindi na aloof si James sa mga fans. Masang-masa na ang kanyang appeal. Huwag na lang sana siyang babakuran nang husto kapag dumadalo sa mga showbiz events.

---

NAPAKA-INDEPENDENT woman ni Nadine Lustre na sa edad na 12, nakatulong na sa mga pangangailangang pinansiyal ng kanyang pamilya at napag-aral ang kanyang mga kapatid. 

Maagang napatong sa mga balikat ng aktres ang tungkulin na buhayin ang kanyang mga magulang at mga kapatid. Malaking responsibilidad iyon na kanyang kinayang lagpasan.

Ngayon ay masaya na si Nadine na makitang nasa maayos na kalagayan ang kanyang pamilya. Aktibo pa rin siya sa kanyang career dahil katatapos lang niya ng serye nila ni Alden Richards na Love, Siargao (LS). 

In a relationship siya ngayon sa Fil-French businessman na si Christophe Bariou. Hindi pa nila napag-uusapan ang tungkol sa kasal. It seems malayo sa plano ni Nadine ang pagpapakasal at pagkakaroon ng sariling pamilya.

Sey nga ng aktres, isang malaking responsibilidad ang pagkakaroon ng anak at hindi niya alam kung kakayanin niyang magbuntis matapos maging breadwinner ng kanyang pamilya. Pero kung sadyang ibibigay at darating ang kanyang anak, kanyang tatanggapin.

---

MARAMING Overseas Filipino Workers (OFWs) ang nagpapayo kay Arnell Ignacio na buweltahan at idemanda ang mga taong nanira sa kanya at kinasuhan siya ng plunder. 

Ngayong ibinasura ng Ombudsman ang corruption complaint laban kay Ignacio, pagkakataon na niya na balikan ang nagsampa ng kaso laban sa kanya.

Hinihiling din ng Department of Migrant Workers (DMW) na magkaroon ng Motion for Reconsideration sa natitira pang isang kaso laban kay Arnell, ang usurpation of authority. 

Dahil sa magandang record at performance niya sa panahon ng kanyang pag-upo sa Overseas Workers Welfare Administration (OWWA), naniniwala ang marami na malilinis din niya ang kanyang pangalan at tuluyang makakamit ang hustisya.

Samantala, marami ang nagtatanong kung wala bang ibibigay na sanction sa mga taong nag-akusa at nagdemanda kay Arnell upang maalis siya sa kanyang puwesto sa OWWA?

Paano na ang kanyang reputasyon at imahe na nasira sa mata ng publiko? Dapat ay muli siyang ibalik sa OWWA o bigyan ng ibang puwesto sa gobyerno.

---

MAY bagong diskarte ang mga artista ngayon sa pagpo-promote ng kanilang pelikula at TV show. Ito ay ang palengke tour na sinimulan nina Bea Binene at Wilbert Ross para i-promote ang serye nilang Love U Lots (LUL). Namimigay sila ng mga libreng gulay, prutas, bigas, atbp. sa matataong lugar.

Ganito rin ang ginawa nina Barbie Imperial at Richard Gutierrez para sa promo ng serye nilang Blood vs. Duty (BVD). Pinagkaguluhan sila sa kanilang pag-iikot sa

Nepa Q-Mart, Balintawak Market, Muñoz Market at Commonwealth Market.

Naalala tuloy ng mga fans ang dating style ng pagpo-promote ng Guy and Pip love team. 

Well, let’s see kung magiging effective ito sa mga bagong artista ngayon.

Umabot na raw sa 9… ION, NAGPAPA-TATTOO ‘PAG BORED O PROBLEMADO

ni Mercy Lejarde @Talkies | July 15, 2026

Photo:IG _praybeytbenjamin

Gumagaan daw ang pakiramdam ng It’s Showtime (IS) host na si Ion Perez, mister ni Vice Ganda, kapag nagkaka-tattoo, kaya hindi na nakapagtatakang nagpalagay siya ng panibagong tattoo na may espesyal na kahulugan para sa mga pinakamahahalagang tao sa kanyang buhay.

Sa isang segment ng IS, napag-usapan ang mga tattoo ni Ion.

Tinanong ni Vice Ganda si Ion, “Ilan na ang tattoo mo?”

“Siyam na ngayon,” sagot ni Ion.

Nang tanungin kung bakit siya mahilig magpa-tattoo, sinabi ni Ion, “Minsan, nagpapa-tattoo ako ‘pag nababagot ako o ‘pag may problema. Pero ngayon, ‘yung pang-siyam, galing talaga sa puso ko.”

Ito ang tattoo niya sa binti na date of birth ni Vice.

Dagdag pa ni Jhong, “‘Pag ipina-tattoo mo ‘yan, nakatatak na talaga sa katawan mo.”

Tinanong din ni Jhong kung ano ang nasa isip ni Ion habang ipinapagawa ang tattoo.

“Wala naman, Kuya. Medyo may konting sakit, pero pagkatapos nu’n, gumaan ang pakiramdam ko, kasi nailagay ko na ang mga mahahalagang tao sa buhay ko,” ani Ion.

Samantala, tinanong ni Vhong si Vice kung ano ang naging reaksiyon nito nang malaman niyang ipina-tattoo ni Ion ang kanyang birthda.

“S’yempre, nu’ng una, nagalit ako,” pag-amin ni Vice.

“Bakit ka nagalit?” usisa ni Vhong.

Pabirong sagot ni Vice, “Sabi ko, ‘You didn’t have to do that.’ Tapos, tinanong ko kung magkano ang tattoo. Sabi n’ya, P1,500, kaya sobra akong na-touched.”

In fairness, winner talaga si Vice Ganda sa puso ni Ion. 

Pak, ganern!

---

IBINAHAGI ng komedyanteng si Ate Gay ang magandang balita tungkol sa kanyang kalusugan at nagpaabot ng malaking pasasalamat sa Diyos.

Sa kanyang social media post, masaya niyang ibinalita na mabilis umano ang naging resulta ng kanyang ginagawang paggamot gamit ang CyberKnife sa Asian Hospital.

Ayon kay Ate Gay, malaki ang kanyang pasasalamat sa naging epekto ng paggamot at sa kanyang doktor.

“Napakagaling ng CyberKnife at ng doctor ko sa Asian Hospital. Ang bilis maghilom ng bukol ko. Oh, 1 session pa lang ‘yan. Thank you, Lord. Today is my 2nd,” saad ni Ate Gay.

Samantala, sa kanyang pinakabagong post, nilinaw ni Ate Gay na hindi pa siya tuluyang gumagaling mula sa cancer. 

Gayunpaman, sinabi niyang mas malakas na ang kanyang pakiramdam habang patuloy siyang sumasailalim sa gamutan. 

Itinuwid niya ang mga ulat na nagsasabing tuluyan na niyang nalampasan o napagtagumpayan ang cancer.

Ayon kay Ate Gay, “‘Di pa po ako cancer-free. Nagsa-CyberKnife pa po ako at immunotherapy. But malakas na po ako at nagkakalaman na muli ang aking pangangatawan. Ang bongga ng CyberKnife dahil ang 35 beses kong radiation nu’n, sa kanya, 5 times lang.

“Salamat, Lord Jesus, sa pang-araw-araw na buhay. Napakasaya ko na kapiling ang aking mga katrabaho, pamilya, at madlang Dabarkads. Salamat sa aking mga anghel na patuloy ang paggabay sa akin.”

Praying for your fast recovery, Ate Gay. God bless you!

‘Yun lang, and I thank you.

Sobrang kinabahan sa eksena nila… JAMES, UMAMING IBANG-IBA ANG NARANASAN KAY KATHRYN

ni Janiz Navida @Showbiz Special | July 15, 2026

Photo: IG _james & _draivee

After 9 years, balik-teleserye na ang Multimedia Prince na si James Reid at for the first time, magsasama sila ng “Box Office Queen” ng henerasyon ngayon na si Kathryn Bernardo. Ito ay sa seryeng Someone, Someday na magsisimula na sa July 27 sa AllTV 2, A2Z at TV5, pero mas unang eere sa Netflix sa July 24 at sa iWant sa July 25.

Sa ginanap na solo mediacon para kay James kahapon sa Noctos Bar, masayang-masaya ang aktor dahil Till I Met You pa, na pinagtambalan nila ng dating on and offscreen partner na si Nadine Lustre, ang kanyang huling seryeng ginawa.

Ang huling movie naman niya ay ang Miss Granny (2018) na pinagbidahan ni Pop Star Sarah Geronimo.

Kaya naman, matagal-tagal din talagang napahinga sa pag-arte si James dahil after nga ng last movie niya, nag-focus muna siya sa music.

Pero in fairness, sa trailer ng Someone, Someday, hindi mararamdamang kinalawang si James sa pag-arte. Ewan kung na-challenge siya sa galing ni Kathryn at ng isa pang magaling na aktres na kasama nila na si Maja Salvador o baka dahil inalalayan siya ng dalawa para maibigay ang best niya.

Natanong nga namin si James sa mediacon kahapon kung ano’ng mga naging adjustment niya working with Kathryn, gayung nasanay siya noon na si Nadine ang kanyang ka-love team.

Pag-amin ni James, “I think, the experience itself is different, you know, how me and Kath put together these new characters and trying to come up with something very new that people haven’t seen yet. We want to create something that is new, that is fresh.”

Sinabi nga raw niya kay Kathryn na sobra siyang kinabahan dahil hindi siya sanay na iba ang kanyang leading lady, pero naintindihan naman daw ito ng aktres dahil pareho lang silang galing sa ibang ka-love team.

Well, abangan natin ang mga eksena nina James at Kathryn sa Someone, Someday kung mahahalata sa kilos ni James ‘yung sinasabi niyang kaba nang makaeksena ang aktres.

---

‘Di pa magdyowa, Kris, ha? BIMBY, TODO-YAKAP AT AKBAY KAY RYZZA MAE, NAGSUSUBUAN PA

KILIG to the max talaga ang maraming viewers ngayon ng Eat… Bulaga! sa sweetness nina Ryzza Mae Dizon at Bimby Aquino Yap sa noontime show ng TV5.

Araw-araw kasi ay may bagong pakilig at pasabog ang MaeBy love team at parang lalo silang nagiging close.

Bukod nga sa mga pag-akbay-akbay ni Bimby kay Ryzza at madalas na pagyakap nito, may subuan pa ang dalawa na akala mo ay magdyowa kahit hindi pa naman.

‘Yun nga lang, kung may mga kinikilig, meron ding ibang KJ at medyo conservative at pinapayuhan si Bimby na ‘wag masyadong touchy kay Ryzza dahil hindi na sila bata at kailangan daw niyang irespeto ang katawan ng co-host.

Kung kay Bimby ay balewala ang mga pagyakap at paghawak niya sa bewang o balikat ni Ryzza, para sa iba, hindi siya dapat ganu’n ka-comfortable sa ka-love team dahil hindi naman sila magdyowa.

Hmmm… Ano kaya’ng masasabi ni Kris Aquino rito? 

---

PASABOG ang ginanap na civil wedding nina Bea Alonzo at Vincent Co sa Makati City Hall last July 13.

Kung kelan ang akala ng lahat ay wala nang magaganap na kasalan matapos itong maudlot nu’ng May 16 sa Spain, tulad ng unang napabalita, heto’t binulaga nina Bea at Vincent ang madlang pipol sa kanilang very intimate wedding, na ang chika, bukod kay Mayor Nancy Binay na nagkasal umano sa kanila, tig-dalawang kaibigan lang ang kasama nila sa loob ng room para magsilbing witness.

Very private ang wedding. Kung ‘di pa nag-post si Mayor Nancy ng picture nila ni Bea na may hashtag na “#onemorechance” at pagkatapos ay kumalat na nga ang picture ng newlyweds sa social media kasama ang alkalde sa loob ng room, duda pa rin ang marami kung totoong naganap na ang kasal.

Palaisipan talaga sa lahat kung bakit itinago nina Bea at Vincent ang kanilang kasal dahil mismong mga kapamilya nila ay wala sa seremonya.

Isang common friend ng dalawa ang nakausap namin at tinanong siyempre namin kung totoo bang tutol ang pamilya ni Vincent kay Bea kaya naudlot noon ang kasal at ngayon nga ay no show din sila sa civil wedding. 

Paniniyak ng aming source, alam ng parehong pamilya from the start ang planong kasal at kung hindi man natuloy nu’ng una, hindi raw ang kani-kanilang pamilya ang naging problema kundi sila Bea at Vincent ang nagkaroon ng personal issue kaya na-postpone ang wedding. Pero, hindi naman daw sinabi ng dalawa na “cancelled” na ito.

Kaya kung nagdesisyon man daw ngayon sina Bea at Vincent na ituloy ang kasal, desisyon na nila ‘yun bilang mga mature adult na hindi na kailangan ang consent ng mga magulang.

Kung anuman ang dahilan kung bakit ganito ka-intimate ang naturang wedding, eh, mas mabuting sa bibig na raw nina Bea at Vincent manggaling ‘yun.

Basta ang nilinaw ng aming source, walang katotohanan ang mga kumalat na dahilan noon na hindi inayunan ng kampo ni Bea ang mga kondisyon ng pamilya ni Vincent sa prenup agreement.

Ang mahalaga, kasal na sila ngayon at dahil nasa wastong edad na sila, anumang maging desisyon nila, eh, for sure, kayang-kaya na nilang panindigan.

Congratulations, Mr. & Mrs. Co!