DENNIS, GAME MAG-FRONTAL NUDITY

ni Mercy Lejarde @Talkies | August 14, 2026

Photo: IG _dennistrillo

Hindi isinasara ni Dennis Trillo ang posibilidad na gumawa ng eksenang frontal nudity kung kinakailangan ito sa isang pelikula.

Kamakailan ay naging guest si Dennis sa Fast Talk with Boy Abunda (FTWBA), kung saan napag-usapan ang kanyang pagiging bukas sa iba’t ibang klase ng roles at hamon sa pag-arte.

Diretsahang tinanong ni Boy si Dennis kung kaya niyang maghubad o gumawa ng frontal nudity para sa isang pelikula.

“Depende siguro, Tito. Ngayon, may mga prosthetics nang inilalagay, eh. Kaya na nilang dayain. Siguro, depende kung kailangan talaga sa eksena,” pahayag ni Dennis.

Sinundan ito ng tanong ni Boy kung hindi ba niya uurungan ang mga ganitong klaseng roles.

“‘Pag talagang kailangang-kailangan du’n sa eksena, siguro,” sagot ng aktor.

Samantala, inamin din ni Dennis na bukod sa kanyang misis na si Jennylyn Mercado, may isa pa siyang leading lady na naging paborito niya.

Tinanong siya ni Boy, “Bukod kay Jen, favorite mong leading lady?”

“Siguro dati, si… baka si Marian Rivera,” sagot ni Dennis.

Hindi naman pinalampas ng mahusay na TV host na si Boy ang pagkakataon na usisain ang aktor kung nakatanggap na ba siya ng indecent proposal.

“No,” diretsong sagot ni Dennis.

Hindi rin nakapagtataka na si Marian Rivera ang isa sa mga paboritong leading ladies ni Dennis dahil sa taglay nitong ganda. 

‘Di ba, Dingdong Dantes?

---

IBINAHAGI ng aktres na si Iza Calzado sa social media ang isang taos-pusong mensahe para sa kanyang ika-44 na kaarawan noong Agosto 12.

Ani Iza, “No amount of color and smiles can ever tell the full story of a person’s life. There are the black and whites, all the shades of gray, and everything in between. And I’m learning to embrace all of it—the beautiful, imperfect, and even broken parts of my life and being, because in every inch of it lies the grace of God.

“His love has carried me, healed me, and brought me here. And truly, it is a blessed birthday. Sa dami ng pinagdaanan ko sa buhay, I'm still here! Living, loving, laughing, and siyempre, dancing!

“Chapter 44 begins today! Grateful for the life I’ve lived, excited for all that‘s still to come, and praying this will be the best chapter yet.”

Samantala, bumuhos din ang birthday greetings mula sa mga celebrities sa comment section ng post ni Iza, kabilang sina Karen Davila, Jodi Sta. Maria, at Bianca Gonzalez.

Belated happy birthday, Iza!

---

HANDA nang ibida ng BINI ang OPM sa Japan ngayong weekend sa Mountain Stage ng 2026 Summer Sonic, hatid ang kanilang biggest P-pop hits sa isa sa mga tanyag na music festivals sa Asya.

Magpapaindak sina Aiah, Colet, Maloi, Gwen, Stacey, Mikha, Jhoanna, at Sheena sa Biyernes (Agosto 14), 14:40–15:20 JST sa Expo ‘70 Commemorative Park sa Osaka.

Dadalhin naman nila ang kanilang musika sa Tokyo sa Linggo (Agosto 16), 15:30–16:10 JST sa ZOZO Marine Stadium and Makuhari Messe. 

Magkakaroon din ng livestream ang show sa Tokyo na eksklusibong mapapanood sa Japan sa pamamagitan ng WOWOW on Demand.

Isang annual music festival ang Summer Sonic na ginaganap sa isang weekend ng Agosto sa dalawang rehiyon ng Japan, tampok ang major international at Japanese artists. 

Bukod sa BINI, nakatakda ring mag-perform sa nasabing festival ang Filipino-Japanese singer na si Ena Mori at ang tinaguriang Kings of P-pop na SB19.

Samantala, tumanggap ng apat na nominations ang BINI sa 39th Awit Awards, kabilang ang Best Performance by a Group at Best Pop Recording para sa Shagidi, Best R&B Recording para sa Katabi, at Best Global Collaboration para sa Blink Twice, kung saan kasama nila ang Indonesian singer na si Agnez Mo.

Kamakailan ay nagpasaya rin ang grupo sa Hawaii, Las Vegas sa Nevada, at Los Angeles, Rohnert Park, at San Diego sa California para sa kanilang BINI Signals World Tour. 

Nakatakda naman silang bumalik sa North America sa susunod na linggo para sa pagpapatuloy ng world tour sa Vancouver sa Aug. 18, Calgary sa Aug. 21, Edmonton sa Aug. 22, Winnipeg sa Aug. 24, Toronto sa Aug. 27, at Brooklyn, New York sa Aug. 28.

‘Yun lang, and I thank you.

OGIE, IBINULGAR NA PULITIKA ANG DAHILAN NG HIWALAYAN NILA NI AIKO

ni Reggee Bonoan @Sheet Matters | August 14, 2026

Photo: IG _ogie_diaz _aikomelendez

Isa kami sa mga nagulat nang mag-post si Quezon City Councilor Aiko Melendez sa kanyang Facebook (FB) account na naghiwalay na sila ng manager niyang si Ogie Diaz.

Ang post ng konsehala, “My manager Ogie Diaz and I have reached a crossroads in our business life, and we have chosen to take separate roads. Though one thing remains unchanged, we are still good friends. I deeply value the friendship we have built through the years. Always grateful Ogie, for the friendship, trust, and memories we’ve shared and will share (emoji praying hands). Mahal pa rin kita, alam mo ‘yan, Mader.”

Nagtanong kami kay Konsi Aiko tungkol sa post niya na naghiwalay na sila, at sagot nito, “Oo, pero magkaibigan pa rin kami.”

Hirit namin, sana ay walang kinalaman sa pulitika kasi nga magkaiba sila ng sinusuportahan dahil malapit siya kay Vice-President (VP) Sara Duterte at si Ogie naman ay true-blooded supporter at kaibigan ni Naga City Mayor Leni Robredo.

Ang sagot ni Aiko sa amin, “Basta magkaibigan pa rin kami.”

Hindi na kami nangulit pa dahil base sa tono ay ayaw nang mag-elaborate pa ng konsehala ng 5th District ng QC.

Nagpadala kami ng mensahe kay Ogie na kasalukuyang nasa Amerika, pero hindi kami sinagot. Baka dahil sa time difference, tulog pa siya. 

Hanggang sa napanood namin ang Showbiz Update (SU) vlog nila nina Mama Loi kasama sina Tamerlane Mopia at Oliver Carnay at dito ikinuwento ni Ogie kung bakit sila naghiwalay ni Aiko.

Bungad ni Ogie, “‘Di ko na po mina-manage si Aiko Melendez.

“Si Aiko Melendez ay maayos na nagpaalam through Viber na magko-concentrate s’ya sa politics at ‘yung mga gusto n’yang mangyari sa buhay n’ya, ‘yung gusto n’yang direksiyon, ‘yung gusto n’yang tahakin sa pulitika, eh, magawa n’ya.

“S’yempre, ‘di naman tayo ang manager n’ya sa politics, 80 percent ng buhay ni Aiko ay sa politics at 20 percent lang ‘yung sa movie career n’ya, so, pinayagan naman natin. Ganu’n lang ‘yun.”

Tanong ni Oliver Carnay, “‘Di kaya dahil ‘di magkapareho ang direksiyon ng political views ninyo?”

At mabilis itong inamin ng manager ni Aiko, “Isa na rin ‘yun! Oo, magkaiba naman kami ng kulay sa pulitika ni Aiko. May mga bumibira sa kanya bakit ‘di kami magkasundo sa kulay n’ya at ganu’n din sa akin, bakit ‘di kami magkasundo sa kulay ko. Dapat daw, kakulay ko si Aiko o kakulay n’ya ako. Ay, ‘di po, ‘di naman kami para tibagin kung ano’ng kulay sa pulitika.”

Hirit ni Mama Loi, “At saka maraming nagko-comment na pagsabihan mo raw si Ms. Aiko sa ibang mga ipino-post n’ya na ‘di mo ‘yun ginawa kasi nga respeto, ‘di ba?”

“Hindi, oo, kasi political views n’ya ‘yan, saka I’m sure, may nakakarating din sa kanya na, ‘Uy, pagsabihan mo ‘yung manager mo, bakit ganu’n ang kulay n’ya sa politics o bakit ganu’n ang view n’ya.’ S’yempre, wala rin namang pakialam si Aiko. Basta importante, maayos kami naghiwalay ni Aiko kahit i-text lang n’ya sa akin, eh, okay lang din naman, hinayaan ko na lang s’ya,” paliwanag ni Ogie.

Tinanong ni Mama Loi kung sino na ang manager ngayon ng konsehala.

Sagot ni Ogie, “S’ya na rin yata kasi parang may ano sila ni Onemig (Bondoc), parang nagsanib-puwersa na sila ni Onemig for brand collaboration. Nandito lang naman ako ‘pag kailangan n’ya ng payo o kung gusto n’ya ng balikat na iiyakan, nandito lang naman ako as always.”

Ang Viva Artists Agency ang nagma-manage kay Andrei Yllana at Starworx ng TV5 naman kay Marthena Jickain. Hindi kaya magpa-manage na rin ang konsehala sa talent

management ng panganay na anak?

“Sabi ko nga, anuman ang maging desisyon ni Aiko, magpa-manage man s’ya sa ibang manager, it’s okay. Ang lagi nating isine-save rito, friendship, eh. Pero kung ayaw na n’ya ‘yung friendship ko ay wala namang problema dahil wala namang permanente rito sa mundo. Ang importante, dapat sa lahat ng pagkakataon ay magkukuwento tayo ng totoong nangyari,” pahayag ni Ogie.

“Kasi ‘pag ‘di totoo, para kang nagsusunog ng tulay,” opinyon ni Mama Loi.

Winish ni Ogie si Aiko ng good luck at lahat ng inquiries ay puwede na raw dumiretso mismo sa konsehala.

---

‘Di sa lakas ng ulan… BOOM, ISINISI SA BASURA NG MGA ISKUWATER ANG BAHA

• 

  Boom Labrusca - IG

HINDI napigilan ng aktor na si Boom Labrusca ang gigil nang mag-trending sa social media na kaya bumaha nang todo sa Barangay Baclaran, Parañaque City ay dahil sa maraming basura.

Natabunan ng basura ang ilog na inanod sa Parañaque City kaya pala ilang oras ang baha sa nasabing siyudad.

Ini-repost ni Boom ang larawan ng nasabing ilog ng basura sa kanyang Facebook (FB) account.

Bungad niya, “Pasintabi po, hangga’t ang mga informal settlers ay hahayaan n’yo r’yan sa tabi-tabi, walang mangyayari. Alisin n’yo po sa ilog sa gilid-gilid ng dagat ang mga ‘yan, tanggalin n’yo lahat,” payo ng isa sa cast ng A Secret in Prague (ASIP) series sa TV5.

Aniya pa, dapat mas mataas ang parusa sa mahuhuling magtatapon ng basura na wala sa lugar.

Sabi niya, “Tapos, taasan n’yo pa kung ‘di mataas, gawing kulong ang pagtatapon ng basura. ‘Yung mga taga-Marikina, nagawa nila, inunti-unti nila, nagtulung-tulong, naumpisahan ng magandang programa ni Bayani (Fernando) na maging malinis muna ang kapaligiran, sinunod ng mga tao dahil sila rin ang napeperhuwisyo.

“Dapat ang tao ay magkaroon na ng malasakit, ‘di ‘yung puro negosyo at pagkakakitaan ng local. Yes po, ito po ay problema ng lokal na pamahalaan ng barangay n’yo. Barangay natin.”

Naniniwala rin ang aktor na hindi naman lahat ng informal settlers ay squatter ang pag-uugali.

“‘Di porke’t nakatira ka sa squatter ay magiging ugaling squatter ka. ‘Yung mga basurang ‘yan, kanino po ba galing ‘yan?

“Batang ‘90s knows. Ang basurang itinapon mo, babalik din sa ‘yo,” sey ni Boom.

Nasilip na rin ng aktor ang illegal electrical tapping o gumagamit ng jumper connections sa Meralco.

Sey niya, “Pati ‘yung systems loss sa Meralco mababawasan, ‘yung mga naka-jumper, mawawala. Char!”

At ang huling sabi nito, “Ano’ng silbi ng flood control kung ganyan ‘yung basurang itinapon n’yo? Squatter ka na nga, squatter pa pati ugali mo (puwede namang maging maayos, ‘di ba?). O, s’ya, sa susunod na baha ulit.”

Maraming netizens ang sumang-ayon sa post na ito ni Boom.

Ang mga nabasa namin:

“Rains are not the cause of floods, people are the cause of floods.”

“Sobrang dami kasi ng iskwater sa Pasay, Manila at Parañaque, alaga ng mga pulitiko ‘yang mga ‘yan. BOTANTE nila ang mga ‘yan para tuluy-tuloy sila sa puwesto.”

“Tao rin dapat ang maging responsable, ‘di lang sa flood control ang sisi lang.”

“Brutal pero tumpak.”

Halos pare-pareho na ang mga komentong nabasa namin tungkol sa isyung ito.

Respeto raw sa sarili niya… AC, UMAMING SIYA ANG NAKIPAG-BREAK KAY HARVEY AFTER 2 YRS.

ni Melba R. Llanera @Insider | August 14, 2026

Photo: IG _acbonifacio & _hfvbtsta

Muling kinumpirma ni AC Bonifacio na nauwi na talaga sa breakup ang magda-dalawang taon nilang relasyon ni Harvey Bautista, kung saan nauna niya itong inamin sa Painfully Human (PH) podcast ni Edward Barber sa YouTube (YT).

Tila bad breakup ang nangyari sa dating magkasintahan dahil nang tanungin namin si AC kung may komunikasyon pa sila ni Harvey, agad kaming sinagot nito na wala na at sariling desisyon niya ito para protektahan ang sarili sa sakit na pinagdaanan. 

Ayon din kay AC, hindi niya kasalanan ang paghihiwalay nila ni Harvey. Hindi raw ito mutual decision, siya ang nag-initiate ng breakup nila bilang respeto niya sa sarili. 

Nilinaw din niyang walang third party involved sa breakup nila ng aktor gaya ng iniisip ng ibang tao.

Nang kumustahin namin ang lagay ng puso niya ngayon, agad kaming sinagot ng Kapamilya actress-singer na okay siya, glowing at labis na nagpapasalamat sa mga mabubuting kaibigan at ina na laging nasa tabi niya at buong suporta ang ibinibigay sa kanya. 

Para kay AC, sa edad niyang 23 ay pinagdaanan niya ito para may matutunan siya sa larangan ng pakikipagrelasyon.

Samantala, tinaguriang ‘number one most hated PBB housemate’ noong nakaraang Pinoy Big Brother Celebrity Collab Edition (PBBCCE), kung saan naging paborito siyang i-bash ng mga netizens, aminado si AC na bilang tao ay nasaktan siya at naapektuhan. Umiyak din siya bilang bahagi ng grieving process, pero sa huli ay tinuruan niya ang sarili na tumayo, mag-move on at hayaan na lang ang mga namba-bash sa kanya dahil alam niyang kahit ano pa ang gawin at sabihin niya ay laging may makikitang mali sa kanya ang mga bashers.

Kasama si AC sa cast ng Saving Cherry (SC), isang drama-comedy movie na produced ng Regal Entertainment sa ilalim ng direksiyon ni Direk Ivan Edward Payawal. 

Bida rito si Barbie Forteza at nasa cast din sina Mikee Quintos, Mika Salamanca, Sassa Gurl, JC Alcantara at Khalil Ramos. Mapapanood ito sa September 2 sa mga sinehan.

Puring-puri naman ni AC ang husay at talento ni Barbie.

Ayon sa Kapamilya actress, may mga eksena sila ni Barbie na minsan, gusto na lang niyang panoorin kung paano nito binigyan ng buhay ang karakter bilang Cherry sa ibang lebel. 

Dagdag pa nito, may mga gabi na naiisip din niya kung paano kinaya ni Barbie ang mga eksena nito.

---

WALONG naggagandahan at matatapang na social media influencers ang magpapakita ng kanilang lakas ng loob, tatag at talino para malagpasan ang mga hamon at pagsubok sa pinakamainit na influencers’ challenge show sa YouTube, ang PinaSexy Challenge (PC). 

Tampok dito sina Nikkie Millares, Vanessa Raval, Trixie Escosis, Tei Escosis, Joyce Dayag, Aki Mitu, Eunice Andrea at Queen Manica Money.

Ang creator-director ng naturang online challenge series ay si Kristel Moreno, isang dating artista na napanood noon sa mga seryeng Precious Hearts Romances, kung saan nakapareha niya si JM de Guzman, Betty La Fea at ilan pang serye ng Kapamilya Network.

Layunin ng PC na maghatid ng bagong klase ng digital entertainment na puno ng saya, kompetisyon at mga hindi inaasahang tagpo na tiyak magbibigay-aliw sa mga manonood.

Mapapanood ito online at sa ngayon ay patuloy ang paghahanda ng production para sa opisyal na paglulunsad ng programa.