Sobrang loyal daw sa dyowa… BIRTHDATE NI VICE, IPINA-TATTOO NI ION SA BINTI

ni Janiz Navida @Showbiz Special | July 14, 2026

Photo: IG _praybeytbenjamin

Tiyak na feeling ang haba-haba ng hair ni Unkabogable Star Vice Ganda (kahit pa naka-wig lang naman siya. Chos! Haha!) dahil sa sinabi ng kanyang ‘asawa’ na si Ion Perez kung bakit naka-tattoo sa binti nito ang date of birth ni Meme Vice.

Sa isang episode ng It’s Showtime, itinaas ni Ion ang laylayan ng suot na pantalon para ipakita ang isang binti kung saan naka-tattoo ang mga petsa na birthdate pala ng mga taong espesyal sa kanyang buhay.

Pag-amin ni Ion, “Si Tatay, si Nanay, tapos ikaw (Vice),” bilang sagot sa tanong ni Meme Vice kung kaninong mga birthdate ang naka-tattoo sa kanyang binti.

Marami ang humanga kay Ion dahil mukhang mas super in love raw ito kay Vice. 

Biniro naman ni Vice si Ion na puwede namang ipaputol ang binti kung hindi na siguro sila.

But for sure, joke lang talaga ni Meme ‘yun dahil ang totoo, tiyak na kilig to the max talaga siya sa loyalty sa kanya ng mister.

Well, sorry na lang sa iba kung ganyan kahaba ang hair ni Vice Ganda!

Sana all!!!

---

ANG ika-9 na Entertainment Editors' Choice na inihandog ng PlayTime Entertainment ay nagbigay-ningning sa mga manonood noong Hulyo 5 sa Ceremonial Hall ng Marriott Grand Ballroom sa Newport World Resorts, Pasay City. 

Sa pamamagitan ng pakikipagtulungan nito sa Society of Philippine Entertainment Editors (SPEEd) at sa taunang seremonya ng paggawad ng parangal na The EDDYS, buong-pagmamalaking kinikilala ng PlayTime Entertainment ang mga pinakamahusay na pelikula ng bansa — mula sa mga aktor at direktor hanggang sa mga kuwentong tumatatak sa ating lahat. 

Bilang opisyal na tagapaghandog ng ika-9 na EDDYS, buong-pagmamalaking iginawad ng PlayTime Entertainment ang mga premyong cash at tropeo ng pagkilala sa mga nagwagi sa mga pangunahing kategorya: Best Supporting Actor, Best Actor, Best Supporting Actress, Best Director, at Best Picture. 

Binibigyang-diin ng mga parangal na ito ang dedikasyon ng PlayTime na itaguyod ang kahusayang Pilipino at parangalan ang mga natatanging talento na humuhubog sa pelikulang Pilipino. 

Ang mga parangal ay iniabot nina Adela Mae Marshall, tagapagsalita ng PlayTime Entertainment, at Alexandra Krishna Oriño, ang Miss PlayTime Universe 2026.

"Bilang opisyal na presenter ng EDDYS ngayong taon, ipinagmamalaki ng PlayTime Entertainment na ipagdiwang ang mga natatanging isipan at kahanga-hangang talento ng industriya ng pelikulang Pilipino," pahayag ni Adela Mae Marshall,

tagapagsalita ng PlayTime Entertainment. 

"Isang karangalan para sa amin na mag-abot ng mga parangal at premyong cash sa mga nagwagi sa anim na pangunahing kategorya. Kinikilala ng PlayTime Entertainment ang dedikasyon at sining na nagbibigay-daan upang maging tunay na world-class ang pelikulang Pilipino."

Sinang-ayunan ito ni Tessa Mauricio-Arriola, pangulo ng SPEEd, "Labis kaming natutuwa na makatuwang ang PlayTime Entertainment bilang aming opisyal na presenter. Ang kanilang bisyon ay tumutugma sa misyon ng SPEEd na itaguyod ang mahusay na paggawa ng pelikulang Pilipino."

Ang ika-9 na Entertainment Editors' Choice katuwang ang PlayTime Entertainment ay isang malaking tagumpay.

8 dapat ang kanta, naging 3 na lang… SB19 PABLO, MAY SAKIT, NANGINIG ANG KAMAY SA OPM CON 2026

ni Reggee Bonoan @Sheet Matters | July 14, 2026

Photo: IG _imszmc_ & SB19-Reggee Bonoan

Sa katatapos na Puregold OPM Con Generations 2026 na ginanap sa Smart Araneta Coliseum nitong Sabado, Hulyo 11, expected na naming maraming taong manonood dahil sadyang inaabangan ito ng mga loyal customers ng nasabing major retail chain ng supermarket at hypermarket.

Pero hindi namin inasahan na halos magkapalit na ng mukha ang mga nasa loob ng coliseum dahil mula Patron hanggang General Admission ay punumpuno ng tao ang bawat seksiyon. 

Maging ang mga hagdanan ay halos hindi na madaanan dahil maraming nakaupo, kaya ang simpleng pagpunta sa banyo ay naging isang matinding pagsubok bago pa man makabalik ang mga tagahanga sa kanilang mga upuan.

Sabi nga ni Ms. Ivy Hayagan-Piedad, Senior Marketing Manager ng Puregold Price Club, Inc., “The Big Dome has long been a home to some of OPM’s most iconic acts and unforgettable performances, and seeing it come alive once again for Filipino music is something Puregold will always be proud of.

“OPM has the power to bring generations together. Puregold is deeply grateful to the artists, fans, communities, partners, and everyone who helped turn this vision into a true historical moment for OPM.”

Samantala, halos lahat naman ng performers sa Puregold OPM Con Generations 2026 ay magagaling, lalo na ang surprise artists na ka-collab ng bawat singer. 

Pero ang sadyang hinihintay ng lahat ay ang SB19 na talagang nakakabingi ang mga hiyawan, tilian at palakpakan nang tawagin na sina Pablo, Josh, Ken/Felip, Justin at Stell.

Bigay-todo ang hataw ng grupo sa pasakalye bago ang first production number nila at saka inianunsiyo na tatlong kanta lang ang kakantahin nila kaya may mga nagsabing “Oohh, bakit?”

Ang narinig kasi namin, walong kanta ang dapat sanang kakantahin ng SB19 tulad ng iba na inabot ng 30 hanggang 45 minutong performances. 

Nalaman naming overtime na dahil ilang minuto na lang at alas-dose na nang hatinggabi gayung nagsimula ang programa ng 6:00 PM.

“Overtime” na raw kasi kaya iniksian ang SB19 kaya maraming nabitin. Pero bigay-todo naman ang grupo kaya natuwa ang lahat ng mga supporters nila at higit sa lahat ay busog ang tenga at mata ng lahat nang kantahin nila ang Tatsulok bilang hudyat na si Bamboo ang ka-collab nila at sabay litaw sa stage sa pamamagitan ng hydraulics.

Pero may nagsabi na kaya iniksian ang production number ng SB19 ay dahil may sakit si Pablo. May naglabas pa ng video na nanginginig nga ang kanang kamay ni Pinuno (tawag sa kanya) at seryoso siya noong gabi. 

Nang magkasama sila ni Stell sa entablado ay kinakausap siya kung okay na siya at tumatango naman ang una.

Sa ikatlong taon ng music festival ng Puregold ay super-successful pa rin ito simula nang magsimula sila. Ang nababago ay padagdag nang padagdag ang kanilang ambassadors na ang bagong pasok ay ang Alamat, XONARA at Ben&Ben. Kabilang na sila sa SB19, Flow G, Sunkissed Lola, G22, KAIA at Skusta Clee.

At ang surprise sa lahat ng nanood sa Big Dome ay umuwing may bitbit na groceries kaya naman ang saya-saya nila at looking forward na sa OPM Con 2027.

---

BLIND ITEM:

“MAY magtitiwala pa kaya sa kanila?” ang tanong sa amin ng bossing na gumagawa ng pelikula.

Tsinugi na pala ang mga taong pinagkatiwalaan ng producer na humawak ng projects niya sa loob ng maraming taon.

Ang kuwento sa amin, “Nagtataka si (producer) bakit ang laki ng mga binabayaran sa mga tao, eh, ang alam n’ya, ‘di ganu’n, kaya ipina-check n’ya sa staff n’ya at nalaman na malalaki ang patong kaya nagduda na. Pinaimbestigahan na ang buong grupo.

“Then, nalaman na halos ang buong grupong ‘yun ay may mga magagandang bahay, magagandang sasakyan, may mga negosyo. Nagbago talaga ang lifestyle, as in ‘di naman ‘to kayang i-sustain kung aasa sa suweldo kahit pa sabihing araw-araw ang shooting.”

Hirit namin na baka naman masinop kaya nakapag-ipon at bilang reward sa sarili ay nag-invest sila para sa kanilang future.

“Hindi, eh, kasi ‘yung ibang kasama, ‘di naman ganu’n, kumbaga, pili lang sila,” katwiran sa amin.

May nabanggit pa na isa pang dahilan kung bakit nagduda ang producer. Nagbago na raw ang mga ugali at feeling boss na kung makaasta ang ilan sa grupo, na hindi naman daw ganoon dati. Ayaw na ayaw pa naman ng producer ng mayayabang at feelingero’t feelingera.

“Ang nakakagulat, isa sa grupo ang kumanta kaya lalong natukoy. At ‘yun na nga ang sinabi ng producer, na ayaw na n’yang makita ang mga pagmumukha ng grupo kaya lahat sila, wala na,” tsika pa sa amin.

Kaya pala maraming bagong mukha sa staff ng producer at sobrang higpit daw ngayon ng taong nangangasiwa ng budget nito.

Binanggit namin na maraming katsikahang producers ang mga taong tinanggal.

Sey pa ng source, “Eh, mabilis kumalat ang tsismis. I’m sure, alam na rin nila. May magtitiwala pa kaya sa kanila?”

Kumalat, fake news daw… MAYOR VICO, PINALAGAN ANG PREVENTIVE SUSPENSION ORDER DAW NG OMBUDSMAN

ni Beth Gelena @Bulgary | July 14, 2026

Photo: Vico Sotto - FB

Mariing pinabulaanan at tinawag na fake news ni Pasig City Mayor Vico Sotto ang mga naglalabasang ulat na papatawan umano siya ng preventive suspension order mula sa Office of the Ombudsman dahil sa isang umuusbong na isyu.

Ayon sa mga kumakalat na mapanirang impormasyon, ang nasabing reklamo umano ay dahil sa hindi paglabas ng P1,500 one-time cash allowance para sa mga kawani ng Pasig City Hall noong nakaraang founding anniversary ng lungsod.

Sa pamamagitan ng isang matapang at malinaw na Facebook (FB) post nitong Sabado, Hulyo 11, tahasang ipinahayag ng butihing alkalde na ang mga ganitong uri ng propaganda ay posibleng pinopondohan ng mga taong may pansariling interes.

Ayon sa kanya, matagal na siyang nakakatanggap ng sumbong na binibili ang mga FB page para sa ganitong uri ng gawain.

Hinimok din ni Mayor Vico ang publiko na i-report ang nasabing page na “I Love Pasig” na umano’y nagpakalat ng maling impormasyon. 

Nagpaalala rin siya na maging mapanuri sa mga nababasa at nakikita sa social media.

Matatandaang hindi ito ang unang beses na siniraan si Mayor Vico ng mga social media page. Noong Abril, 2025, kumalat ang isang video kung saan makikitang isang 77-anyos na babaeng person with disability (PWD) ang pinilit at tinuruan kung ano ang sasabihin upang dungisan ang pangalan ng alkalde.

Si Vico ay kilala bilang isa sa mga pinakabatang alkalde sa Metro Manila na naging popular dahil sa kanyang transparency at anti-corruption stance. Simula nang maupo bilang mayor ng Pasig City, madalas siyang target ng fake news at propaganda sa social media.

---

Mister na si Zoren, red flag daw… 

CARMINA, AMINADONG ‘DI TATAGAL SA TOXIC RELATIONSHIP

MATAPANG na sinagot ng aktres na si Carmina Villaroel ang mga nagsasabing ‘red flag’ ang mister niyang si Zoren Legaspi. 

Guest sa digital show ng ABS-CBN na Hot Takes (HT) ang aktres at natanong tungkol sa mga pinakamasakit na kritisismo online na ibinato laban sa kanyang mister at sa kanilang matagal nang pagsasama.

Ani Carmina, hindi niya pinapansin ang mga matitinding kritisismo dahil hindi naman talaga alam ng mga tao ang tunay na ugali ng kanyang mister.

Mariin niyang sinabi na kung talagang toxic partner si Zoren, malamang ay lumayo na rin siya.

Ang pamumuhay ng kanilang pamilya ay lantad sa publiko, pero patuloy pa rin ang paghuhusga mula sa mga netizens. 

Wika niya, “There was a time na nasabihan si Zoren na red flag. Wala, dedma lang din ako.”

Paliwanag ni Carmina, ang pananaw ng publiko ay kadalasang lubos na naaapektuhan ng nakikita sa kanilang mga social media.

Aniya, “Kasi, like I said, you don’t know him. Kilala ko ‘tong taong ‘to, nakilala mo lang s’ya dahil sa napanood ninyo, sa napanood ninyo na unedited pa na ‘di ninyo alam kung saan nanggaling. ‘Di ninyo kilala ‘yung tao so how can you say na red flag s’ya?”

Nilinaw din ng aktres na hindi siya ‘yung tipo ng taong hahayaang magkaroon ng toxic relationship.

“Kami? Kilala namin ‘yung isa’t isa and kung red flag si Zoren, hello, matagal na akong wala sa marriage na ‘to, darling,” pagsisiwalat pa niya.

Pinuri rin ng maraming netizens si Carmina dahil sa kanyang hindi matitinag na katapatan sa asawa, pagiging mature sa pagharap sa mga isyu, at kumpiyansa sa kanilang relasyon.

---

Super idol niya, na-meet nang personal…

ECHO, NAGPA-FAN SIGN KAY CHRISTOPHER NOLAN SA POPCORN BOX

NAGPAKA-FANBOY si Jericho Rosales sa pagdalo niya sa premiere ng The Odyssey (TO) sa Mumbai, India, kung saan personal niyang nakita at nakasalamuha sina Matt Damon at award-winning director na si Christopher Nolan.

Ibinahagi ng aktor ang naging experience sa premiere. Aniya sa video caption na kanyang ipinost, “Warning: this video contains strong emotions to a great movie!”

Aniya, “Oh, my Godddd!” Wala siyang kiber kahit mabingi ang kanyang katabi sa sigaw niya.

“What an experience,” na tatlong beses niyang sinabi, at ilang beses din daw siyang napaiyak sa kuwento ng pelikula.

Iyon din ang kauna-unahang public audience screening ng pelikula kaya espesyal ang okasyon.

Una nang sinabi noon pa ng aktor, “I’m a long fan of Christopher Nolan and it’s an honor na maimbitahan sa premiere.”

Ramdam daw niya ang laki at kalidad ng pelikula sa IMAX.

“Thank you so much, Universal Pictures @universalpicturesph. The Odyssey opens July 5 in Philippine cinemas,” ang pasasalamat ni Echo.

Nagkaroon din siya ng pagkakataong makasalamuha sina Nolan, Matt at iba pang miyembro ng cast sa red carpet at premiere event.

Ibinahagi rin niya ang popcorn box, na habang kinakain ay may pagmamalaking sinabing, “Christopher Nolan signed this for me.” 

Isa raw ‘yung souvenir na labis niyang ipinagpapasalamat bilang matagal nang fan ng direktor.

Kaya naman, sobrang tuwa rin ang mga kapwa-celeb at netizens para sa kanya.

Napa-“OMG!” na lang si Bea Alonzo sa kanyang komento.

“OMGGG! Christopher Nolan!!! Matt Damon!!! That popcorn box,” na nilagyan ng tatlong heart emojis, wika naman ng aktres na si Iza Calzado.

“Your enthusiasm and excitement makes me so happy.”

“Lucky man.”

“So happy for you, sir.”