Mga konsyumer patuloy na nagsusulong ng mas mabuting alternatibo sa sigarilyo

ni Chit Luna @News | July 2, 2024

Nanawagan ang mga consumer groups sa mga bansa na igalang ang kanilang karapatang pumili ng mas ligtas na alternatibo sa sigarilyo para mabawasan ang kanilang pagkakalantad sa mga nakakalasong kemikal mula sa usok nito.

Sinabi ni Carissa Düring, direktor ng Considerate Pouchers sa Sweden, isang pandaigdigang grupo ng nagtataguyod sa karapatan ng mga konsyumer, na sila ay may mahalagang papel sa pagwawakas sa problema sa paninigarilyo.

Ang grupo ni Düring ay sumusuporta sa karapatan ng mamimili na pumili ng alternatibo sa sigarilyo na may higit na mas mababang dulot na panganib.

Ang Sweden ay madalas na binabanggit bilang isang matagumpay na bansa sa pagbawas sa pinsala ng sigarilyo o tobacco harm reduction (THR).

Ang THR ay isang diskarte sa kalusugan ng publiko na nagtataguyod sa mga produktong may mas mabababang mapanganib at walang usok na alternatibo sa sigarilyo tulad ng vape, heated tobacco at oral nicotine pouches.

Sinabi ni Düring sa 11th Global Forum on Nicotine (GFN) na ginanap sa Poland kamakailan na nauna ang Sweden sa paggamit ng nicotine pouch at snus. Dahil dito, nagtala ang Sweden ng pinakamababang smoking rate sa buong European Union.

Iniugnay ni Düring ang tagumpay ng Sweden sa pagrespeto sa karapatan ng mga mamimili. Aniya, ang mga konsyumer mismo ang humiling sa European Union na huwag pakialaman ang kanilang snus.

Dahil dito, inaasahan ang Sweden na magiging unang bansa sa Europe na makamit ang smoke-free status.

Ang mga consumer advocates tulad ni Düring ay nasa unahan ng pandaigdigang kampanya para wakasan ang problema ng paninigarilyo at magligtas ng buhay ng mga nininigarilyo.

Hinihimok nila ang mga awtoridad na gumamit ng diskarteng nakabatay sa agham at kilalanin ang THR na nagsusulong nga mga alternatibong walang usok bilang mas mahusay na kapalit sa sigarilyo.

Sinasabi ng mga grupong ito na ang mga alternatibong walang usok ay may mahalagang papel sa THR.

Layunin ng THR na bawasan ang pinsalang dulot ng paninigarilyo, ang pinakamapanganib na paraan ng paggamit ng tabako. Hinihikayat nito ang mga naninigarilyo na lumipat sa mga produktong nikotina na walang usok.

Ipinapakita ng mga siyentipikong pag-aaral na ang mga produktong walang usok ay 95 porsiyentong mas mabuti kaysa sa tradisyonal na sigarilyo. Hindi tulad ng mga sigarilyo, ang mga produktong ito ay hindi nagsusunog ng tabako o gumagawa ng usok na naglalaman ng libu-libong nakakapinsalang kemikal.

Maraming mga bansa, gayunpaman, ay patuloy na naghihigpit sa mga produktong ito kumpara sa sigarilyo.

Sinabi ni Asa Saligupta, direktor at founding member ng ENDS Cigarette Smoke Thailand (ECST) at miyembro ng Parliament's Committee on Laws and Regulations of E-Cigarettes, na isa ang Thailand sa mga bansang patuloy na nagbabawal sa pag-angkat ng e-cigarettes.

Sa kabila ng pagbabawal, ang Thailand ay may higit sa 1.5 milyong vapers, ayon kay Saligupta. Aniya, ang ECST (ENDS Cigarette Smoking Thailand), na may mahigit 100,000 miyembro, ay nagtatrabaho upang turuan ang publiko at makipag-usap sa gobyerno para baligtarin ang pagbabawal.

Si Ignacio Leiva, tagapagtatag at pangulo ng Association of Vaporizer Consumers of Chile (ASOVAPE) at kalihim ng ARDT Iberoamerica, ay gumanap ng mahalagang papel sa pagtataguyod ng THR sa Chile.

Inorganisa niya ang unang pro-vaping na pampublikong demonstrasyon sa Latin America.

Aniya, patuloy silang nagtuturo sa publiko tungkol sa benepisyo ng THR.

Sinabi ng mga consumer groups na patuloy silang nahaharap sa mga hamon kabilang ang kumplikadong polisiya ng mga bansa, ang hindi pagsali sa kanila sa mga talakayan at patakaran at patuloy na pagtanggi ng World Health Organization na isama ang kanilang pananaw.

Sweden unang bansa na makakapigil sa paninigarilyo

ni Chit Luna @News | May 31, 2024

Malapit nang makamit ng Sweden ang posisyon bilang unang bansa na smoke-free matapos nitong payagan ang mga produktong walang usok na pumalit sa sigarilyo.

Ang pagtanggap ng Sweden ng smoke-free products ay lubhang nakabawas sa antas ng paninigarilyo at mga dulot na sakit nito, ayon sa isang pag-aaral.

Ayon sa report na "No Smoke Less Harm" na inilabas ng Smoke Free Sweden, ang bansang ito ay maaaring maging unang bansa na may antas ng paninigarilyo na mas mababa sa 5 porsiyento at makamit ang taguring “smoke-free nation”.

Ang antas ng paninigarilyo sa Sweden ay bumagsak sa 5.6 porsiyento noong 2022 mula sa 49 porsiyento ng mga kalalakihan noong 1960.

Iniugnay ng report ang tagumpay na ito sa pagiging bukas ng Sweden sa mga alternatibong produkto ng nikotina at pagpapatibay ng tobacco harm reduction (THR). Ang mga alternatibong produktong tulad ng snus, oral nicotine pouch, heated tobacco products, at vape ay higit na hindi nakakapinsala kaysa sa paninigarilyo, ayon sa ulat.

Ang paglipat na ito, ayon sa ulat, ay humantong sa "smoke-free generation" sa Sweden. Ang ZYN, isang popular na oral nicotine pouch sa US, ay nagmula din sa bansang ito.

Ipinakita ng report na ang mataas na paggamit ng nikotina ay hindi nangangahulugan ng mataas na bilang ng problema sa kalusugan. Bilang patunay, ang Sweden ay may higit na mababang bilang ng mga maysakit na nauugnay sa tabako kumpara sa ibang bansa sa Europa.

Si Dr. Karl Fagerström, isang dalubhasa na nag-ambag sa report, ay nagsabi na habang nakakahumaling ang nikotina, hindi ito ang sanhi ng malubhang sakit na nauugnay sa paninigarilyo.

Halos isa sa apat na nasa hustong gulang sa Sweden ang gumagamit ng nikotina araw-araw, na katumbas ng average sa Europa. Gayunpaman, ang Sweden ay may mas mababang bilangng pagkamatay na may kaugnayan sa tabako (44 porsiyentong mas mababa), antas ng kanser (41 porsiyentong mas mababa) at pagkamatay sa kanser (38 porsiyentong mas mababa) kumpara sa iba pang bahagi ng European Union.

Ang Sweden ay may 52-porsiyentong mas kaunting pagkamatay sa mga lalaki na may kaugnayan sa tabako kaysa sa Poland at 57 porsiyentong mas kaunti kaysa sa Romania. Para sa cancer sa baga ng lalaki, ang Sweden ay may mas mababang bilang din ng pagkamatay kaysa sa France, Germany, Italy at Poland.

Kinilala kamakailan ni Dr. Scott Gottlieb, isang dating komisyoner ng US FDA, ang mga benepisyo ng mga produktong smoke-free. Sinabi niya sa isang panayam sa CNBC na kung lilipat ang maraming naninigarilyo sa mga bagong produkto (tulad ng ZYN oral nicotine pouch), magdudulot ito ng malaking benepisyo sa kalusugan.

Sinasabi din ng report na ang paraan ng pagkonsumo ng nikotina ay may malaking epekto sa kalusugan.

Habang ang paninigarilyo ay nauugnay sa mataas na antas ng kamatayan at sakit, ang mga smoke-free alternatives ay hindi nagdudulot ng katulad na panganib sa kalusugan ng sigariylo.

Iminumungkahi ng report sa ibang mga bansa na sundan ang diskarte ng Sweden para mabawasan ang mga problema sa kalusugan na nauugnay sa tabako. Ipinapakita ng karanasan sa Swedish na ang tamang pag-unawa ng publiko tungkol sa nikotina ay maaaring humantong sa mas mabuting patakarang pangkalusugan.

Ang National Health Service (NHS) mismo ang nagsabi na ang nikotina, bagama't nakakahumaling, ay hindi gaanong nakakapinsala sa kalusugan.

Umapela ang Smoke Free Sweden sa World Health Organization (WHO) at sa ibang mga bansa na kilalanin ang potensyal ng tobacco harm reduction (THR) sa pagbabawas ng pinsala at maglatag ng mga tamang patakaran para dito.

Vaping mas mababa ang panganib kaysa paninigarilyo — pag-aaral sa UK

ni Chit Luna @News | May 23, 2024

Isang grupo sa United Kingdom ang nagpakita ng mga siyentipikong ebidensya at opinyon ng mga eksperto na nagpapatunay na ang paggamit ng vape ay mas mababang panganib na dulot kumpara sa paninigarilyo.

Ayon sa UK Vaping Industry Association (UKVIA), ang vaping ay higit na hindi gaanong nakakapinsala tulad ng paninigarilyo na kumikitil ng halos 80,000 buhay bawat taon sa UK.

Ang UKVIA ay isang nangungunang organisasyong nagtatanggol sa mga benepisyo ng paglipat mula sa paninigarilyo tungo sa vaping. Nilabas nito ang pahayag matapos ang industriya ng vaping at mga vapers ay hindi isinama sa talakayan ng Tobacco and Vapes Bill sa parliamentary committee.

Ang Office for Health Improvement and Disparities (OHID), isang ahensya ng gobyerno, ang nagsabing ang pinsalang dulot ng vaping ay mahigit 95 porsiyento na mas mababa kaysa sa mga sigarilyo.

Idinagdag ng UKVIA na ang vaping ay nagdudulot ng maliit na bahagi lamang ng panganib ng paninigarilyo. Ang ganap na paglipat mula sa paninigarilyo patungo sa vaping ay may malaking benepisyo sa kalusugan, dagdag nito.

Kinumpirma sa publiko ni Sir Chris Whitty, Chief Medical Officer ng England, na ang vaping ay mas ligtas kaysa sa paninigarilyo, at ang paglipat ay isang positibong hakbang sa kalusugan.

Natuklasan naman ng isang pag-aaral ng Brunel University London na ang National Health Service ay makakatipid ng higit sa kalahating bilyong pounds kada taon kung kalahati ng mga naninigarilyong nasa wastong edad sa England ang lilipat sa vaping.

Nalaman ng isang pagsisiyasat noong 2019 na ang sinasabing sakit sa baga sa U.S. ay nagmula sa mga kontaminado at ilegal na produkto na naglalaman ng THC, ang psychoactive component sa cannabis, at hindi sa mga legal na produktong nicotine vaping.

Sinabi ni Alice Davies, isang opisyal ng impormasyon sa kalusugan sa Cancer Research UK, na nakakalito ang mga naglabasang headline dahil ang mga kasong ito ay hindi dapat maiugnay sa regular na nicotine vaping.

Sinabi ni Davies na walang mga naitalang kaso sa UK ng paggamit ng mga pinagbawal na kemikal katulad sa US.

Sinabi naman ng OHID Nicotine Vaping sa England na ang maling ulat sa EVALI o electronic cigarette or vape associated lung injury outbreak sa United States ay dapat ihiwalay sa nicotine vaping.

Kinumpirma ng Cancer Research UK na walang kumpirmadong kaso ng popcorn lung na iniulat sa mga taong gumagamit ng mga e-cigarette sa UK, at ang mga vape ay hindi nagdudulot ng ganitong pinsala sa baga.

Binanggit din ng UKVIA ang pinakabagong datos mula sa Action on Smoking and Health (ASH), isang public health charity, na nagpapakita na halos 4.5 milyong matatanda sa Great Britain ang gumamit ng vaping para bawasan o ganap na ihinto ang paninigarilyo.

Itinuturing ng National Health Service (NHS) ang vaping bilang isa sa mga pinakaepektibong paraan para huminto sa paninigarilyo, habang ang Office for Health Improvement and Disparities ay nag-ulat na ang vaping ay karaniwang tulong na ginagamit ng mga tao para tumigil sa paninigarilyo.

Si James Tucker, pinuno ng pagsusuri sa kalusugan sa Office for National Statistics (ONS) ay nagsabi na ang vaping ay may pangunahing papel sa pagbabawas sa antas ng paninigarilyo sa buong UK.

Ang isang komprehensibong pagsusuri ng Cochrane, isang pandaigdigang network ng mga mananaliksik sa kalusugan, na tumingin sa datos mula sa mahigit 300 klinikal na pagsubok at kinasangkutan ng higit sa 150,000 katao, ay nagpapakita na ang e-cigarette ay kabilang sa mga pinakaepektibong tulong na magagamit para huminto ang mga naninigarilyo.

Itinanggi din ng UKVIA ang ugnayan sa pagitan ng regular na vaping at paninigarilyo. Ayon sa isang report ng ASH UK, ang vaping ay napatunayang hindi isang "gateway” sa paninigarilyo.

Nabanggit sa nasabing ulat na habang ang paggamit ng e-cigarette ay tumaas sa England sa pagitan ng 2010 at 2021, ang antas ng paninigarilyo ng mga kabataan ay patuloy na bumaba sa parehong panahon.

Sinabi ng ASH UK na ito ay hindi sumusuporta sa gateway hypothesis sa antas ng populasyon.