Paglipat sa e-cigarettes maaaring magpababa ng panganib para sa mga pasyenteng sumailalim sa operasyon sa puso

ni Chit Luna @News | March 12, 2026

File photo

Ipinakita ng isang malawak na pag-aaral sa South Korea na inilathala sa European Heart Journal na ang tuluyang paglipat sa electronic cigarettes (e-cigarettes) ay maaaring magdulot ng mas mababang panganib sa mga pasyenteng sumailalim sa operasyon sa puso.

Ito ay kumpara sa mga pasyenteng patuloy na gumagamit ng tradisyunal na sigarilyo matapos sumailalim sa isang major heart procedure.

Sa pag-aaral na pinamagatang "Prognosis after switching to electronic cigarettes following percutaneous coronary intervention," natuklasan na mas mababa ang posibilidad ng major adverse cardiovascular events (MACE) sa mga naninigarilyo na tuluyang lumipat sa e-cigarettes kumpara sa mga hindi tumigil sa paggamit ng tradisyunal na sigarilyo.

Ang naturang pag-aaral ay pinangunahan ni Danbee Kang ng Samsung Medical Center at Sungkyunkwan University. Nakatuon ito sa mga pasyenteng may coronary artery disease (CAD) na sumailalim sa percutaneous coronary intervention (PCI), isang procedure na ginagawa upang mabuksan ang mga baradong ugat sa puso.

Sinuri ng mga mananaliksik ang isang nationwide cohort upang matukoy kung paano nakaapekto ang mga pagbabago sa smoking habits matapos ang operasyon sa pangmatagalang kalagayan ng kalusugan ng mga pasyente.

Batay sa kanilang resulta, ang pagbawas sa panganib ng cardiovascular events sa mga lumipat sa vaping ay halos kapantay ng mga pasyenteng tuluyang tumigil sa paninigarilyo.

Ipinakita rin ng pag-aaral na mas ligtas ang mga "full switchers" o ang tuluyang tumigil sa paggamit ng sigarilyo kumpara sa mga gumagamit ng parehong vape at tradisyunal na sigarilyo.

Napag-alaman din na bumubuti ang endothelial function—ang kalusugan ng lining ng mga ugat—kapag naalis ang paglanghap ng usok na naglalaman ng tar at carbon monoxide.

Bagama’t iginiit ng European Society of Cardiology (ESC) na ang "gold standard" ay ang ganap na pagtigil sa anumang produktong may nicotine, kinilala ng mga Korean researchers ang praktikal na hamon na kinahaharap ng maraming pasyente.

Ayon sa grupo, ang pinakamainam pa rin ay ang tuluyang paghinto sa paggamit ng nicotine. Gayunpaman, kung hindi ito agad magagawa, mas mabuting opsyon ang paglipat sa e-cigarettes.

Ipinakita rin sa pag-aaral na halos 60 porsiyento ng mga pasyente ang nahihirapang tuluyang tumigil sa paninigarilyo kahit na nakaranas na sila ng seryosong heart attack o sumailalim sa operasyon sa puso.

Dahil dito, nakikita ang paglipat sa vaping bilang isang "viable alternative" o pansamantalang hakbang upang mabawasan ang posibilidad ng panibagong atake sa puso.

Ang e-cigarettes ay kabilang sa mga tinatawag na tobacco harm reduction (THR) products, kasama ang heated tobacco at nicotine pouches, na idinisenyo upang mabawasan ang pinsala sa kalusugan sa pamamagitan ng pag-aalis ng usok na nagmumula sa pagsusunog ng tabako.

Pinagtitibay ng siyentipikong pagsusuri ang kaso para sa smoke-free products sa tobacco harm reduction

ni Chit Luna @News | February 4, 2026

Photo: File

Isang bagong toxicological review na inilathala ng US National Library of Medicine (NLM) ang nagbabala na maaaring hindi nabibigyan ng sapat na pansin sa kasalukuyang diskusyon tungkol sa smoke-free products (SFPs) ang isang mahalagang usaping pangkalusugan ng publiko.

Ang NLM ang pinakamalaking biomedical library sa mundo at nagsisilbing pambansang sanggunian para sa mga propesyonal sa kalusugan, mga siyentipiko, at publiko.

Ang pagsusuring pinamagatang, “The potential of smoke-free products to reduce harm for smokers: What does the toxicological evidence say?”, ay nagbigay-diin na napakaraming siyentipikong datos ang nagpapakitang ang e-cigarettes, heated tobacco products, at nicotine pouches ay nagdudulot ng mas mababang panganib kumpara sa tradisyunal na paninigarilyo.

Ang pag-aaral ay isinulat ni Reinhard Niessner ng Technical University of Munich at inilathala noong Agosto 2025, kasabay ng pagbabago ng mga polisiya sa tabako sa Europa.

Binigyang-diin ni Niessner na sa iba’t ibang bansa, napatunayang epektibo ang mga SFP gaya ng e-cigarettes, heated tobacco, at nicotine pouches sa pagtulong sa mga naninigarilyo na tuluyang tumigil sa sigarilyo.

Aniya, ang SFPs ay lumilikha lamang ng maliit na bahagi ng mga toxin na nalilikha sa pagsusunog ng tabako, kaya nag-aalok ito sa mga naninigarilyo ng praktikal na paraan upang lumipat sa mas ligtas na paggamit ng nikotina.

Ipinunto rin ni Niessner na sa United Kingdom, ang pagsusulong sa smoke-free products bilang mas ligtas na alternatibo ay nakatulong upang bumaba ang smoking rate ng mga adulto mula 20.3% noong 2010 tungo sa 11.9% noong 2023. Sa Sweden naman, naging sentral ang snus sa pagbaba ng antas ng paninigarilyo sa makasaysayang pinakamababang antas. Sa Estados Unidos, ang pagtaas ng paggamit ng e-cigarettes ng mga adulto ay naging mahalagang salik sa pagbawas ng smoking prevalence.

Batay sa kanyang kadalubhasaan bilang aerosol chemist, ipinaliwanag ni Niessner na hindi nikotina ang pangunahing sanhi ng mga sakit na may kaugnayan sa paninigarilyo; kundi ang mapanganib na halo ng mga kemikal na nalilikha kapag sinusunog ang tabako.

“When tobacco is ignited, cigarettes emit approximately 6,500 components, of which about 100 are of major toxicological concern,” Niessner said.

Binigyang-diin ni Niessner na iniiwasan ng smoke-free products ang combustion, kaya naaalis ang pinakanakakapinsalang reaksiyong kemikal. Idinagdag niya na ang e-cigarettes, heated tobacco, at oral nicotine products ay smoke-free, hindi nagsusunog ng tabako, at naglalabas ng mas mababang antas ng harmful and potentially harmful constituents (HPHCs) kumpara sa sigarilyo.

“It is the nature of science that the evidence will never be complete, but the totality of data should be considered when discussing the correct handling of SFPs. At present, these data suggest that SFPs can play a useful role in curbing the individual and societal risks associated with smoking,” Niessner said.

Binanggit din niya na ang e-cigarettes ay nagdudulot ng 80% hanggang 99.9% na pagbawas sa mga nakalalasong compound kumpara sa paninigarilyo, habang ang heated tobacco products naman ay nakakabawas ng higit sa 90% ng emissions ng mapanganib na carcinogens gaya ng tobacco-specific nitrosamines.

Samantala, ipinapakita ng pagsusuri na ang nicotine pouches ay may antas ng toxicants na kahalintulad ng makikita sa nicotine patches at chewing gum, na nagpapakita na kabilang ito sa mga pinakaligtas na nicotine products na kasalukuyang available.

Iginiit ni Niessner na ang hindi pagbibigay-diin sa nabawasang panganib ng mga produktong ito ay nagkakait sa mga adult smokers ng mga opsyon na maaaring makapagligtas ng buhay. “Raising concerns alone does not sufficiently inform the 20 million smokers about the comparative health risks,” he said.

Bagama’t hindi ganap na walang panganib ang smoke-free products dahil sa nakaaadik na katangian ng nikotina, binibigyang-diin ng pagsusuri na may ginagampanan silang “useful role in curbing individual and societal risks.”

Binibigyang-diin din ng review na kailangang protektahan ng mga regulator ang kabataan at mga hindi naninigarilyo, ngunit dapat ding tiyakin na ang mga adult smokers ay may karapatan sa malinaw na impormasyon at mas ligtas na mga alternatibo.

Lumilipat ang mga mamimili sa nicotine pouches upang mabawasan ang pinsala ng paninigarilyo, ayon sa survey

ni Chit Luna @News | January 22, 2026

Photo File: Cleveland Health Clinic

Isang pag-aaral mula sa Spain ang nakadiskubre na karamihan sa mga mamimili ay gumagamit ng nicotine pouches upang mabawasan ang pinsalang dulot ng paninigarilyo.

Ang nicotine pouches ay mga produktong walang usok na naghahatid ng nicotine sa pamamagitan ng paglalagay ng maliit na pouch sa pagitan ng gilagid at itaas na labi. Wala itong dahon ng tabako at hindi nagbubunga ng usok o singaw.

Ang pag-aaral na “Regulation of Nicotine Pouches,” na isinulat ng Tholos Foundation katuwang ang international consultancy na Dynata, ay nakabatay sa datos mula sa isang survey na isinagawa noong Marso 2025 sa 515 aktibong gumagamit ng nicotine pouches.

Natuklasan sa survey na kung ipatutupad ang mga bagong regulasyon, isa sa tatlong mga respondent ang hahanap ng iligal na pinagmumulan, at isa pang ikatlo ang babalik sa paninigarilyo.

Sinusuportahan ng mga eksperto tulad ng psychiatrist na si Karl Fagerström ang nicotine pouches bilang mga kasangkapan sa harm reduction, na binibigyang-diin na ang nicotine na walang combustion ay may mas kaunting panganib. Itinuturo rin nila ang tagumpay ng Sweden sa pagpa-pababa ng smoking rates sa pamamagitan ng katulad na mga pamamaraan.

Tinanggap ng Nicotine Consumers Union of the Philippines (NCUP) ang resulta ng survey, na ayon kay NCUP president Anton Israel ay “emphasize the potential public health impact of nicotine pouches, and the need for regulations that embrace a harm reduction approach instead of outright bans.”

Binigyang-diin ni Israel na pinatutunayan ng mga kinalabasan ng survey ang tobacco harm reduction (THR) framework, na umaasa sa mga produktong may mas mababang panganib, kabilang ang vapes, heated tobacco, at nicotine pouches, upang matugunan ang mga pinsalang dulot ng paninigarilyo.

Ayon kay Israel, ang smoke-free na disenyo ng mga produktong ito ay nag-aalis ng pagsusunog, kaya nababawasan ang pagkakalantad sa mga mapaminsalang compound kumpara sa paninigarilyo.

Binigyang-diin din niya na ang nicotine mismo ang hindi pangunahing sanhi ng mga sakit na may kaugnayan sa paninigarilyo, na kadalasang nagmumula sa mga nakalalasong kemikal na nalilikha sa panahon ng combustion.

Binanggit niya na kahit ang UK’s National Health Service ay hayagang nagsasaad sa kanilang website na “while nicotine is a highly addictive drug, it does not contain toxic chemicals found in cigarettes, including tar and tobacco.”

Ayon sa NCUP, ipinapakita ng resulta ng Spanish survey ang lumalaking pagkilala sa nicotine pouches bilang mabisang kasangkapan sa pagtigil sa paninigarilyo.

Ipinunto ni Israel na nakamit ng Sweden ang pinakamababang smoking rate sa Europe sa tulong ng nicotine pouches at ng nauna rito, ang snus. Dagdag pa niya, ang Pilipinas kung saan ang mga pouches ay may regulasyon ay dapat isaalang-alang ang pag-aaral mula sa Spain bilang matibay na ebidensiya na ang mga alternatibo sa sigarilyo ay maaaring magpababa ng smoking prevalence.

Nagbabala rin siya na ang pagbabawal o labis na paghihigpit sa mga produktong ito ay maaaring magtulak sa mga mamimili patungo sa black market, kung saan walang umiiral na regulasyon at buwis.

“Consumers should be given a choice to choose products that are less harmful to their health,” aniya.

Tinukoy din ni Israel ang mga siyentipikong pag-aaral na nagpapakita na ang mga smoke-free na alternatibo ay naglalaman ng 95% na mas kaunting mapaminsalang kemikal kumpara sa usok ng sigarilyo.