Pautang sa mga tsuper

ni Gina Pleñago @News | June 6, 2026

Photo: DTI-PH

Ipinagkaloob na ng DTI sa pamamagitan ng Small Business Corporation (SBCorp) ang pautang sa mga miyembro ng Pasang Masda sa ilalim ng E-Transport Loan Program nito, na sumusuporta sa paglipat ng mga operator at drayber ng pampublikong sasakyan patungo sa mga electric vehicle (EV).

Sa pangunguna ni DTI Secretary Cris Roque, ang inisyatibo ay naglalayong tulungan ang mga drayber na mabawasan ang mga gastos sa pagpapatakbo, mapataas ang kanilang kita, at makapag-ambag sa isang mas napapanatiling sektor ng transportasyon. 

Sumasalamin ang programa sa pangako ng gobyerno na magbigay ng mga naa-access na solusyon sa financing na nagpapabuti sa kabuhayan habang isinusulong ang mga layunin ng malinis na enerhiya at modernisasyon ng bansa. 

Unang inilunsad ng DTI noong Abril 17, 2026 ang nasabing program na naglaan ng P2 bilyon, kung saan magmumula ang loans na P1.5 milyon hanggang P3 milyon sa kada borrower.

Ang loan sa online ay maaaring i-apply sa pamamagitan ng pag-download ng SBCorp Money app sa mobile phone, at piliin ang E-Transport Loan icon at sa mga detalye ay bisitahin lamang ang sbcorp.gov.ph o makipag-ugnayan sa mga tanggapan ng DTI at Negosyo Centers sa buong bansa.

NGCP, nanawagan ng mas mabilis na permit at right-of-way para sa energy projects

ni Mylene Alfonso @News | June 6, 2026

Photo: File / NGCP

TIniyak ng National Grid Corporation of the Philippines sa Malacañang ang patuloy na pagpapalakas ng transmission network at pagkumpleto ng mga kritikal na proyekto upang matugunan ang lumalaking demand sa enerhiya ng bansa. Ayon sa NGCP, kabilang sa kanilang prayoridad ang pagpapalakas ng transmission network ng bansa upang masiguro ang matatag at maaasahang suplay ng kuryente sa iba’t ibang bahagi ng Pilipinas.

Patuloy na nagpapatupad ang korporasyon ng mga kritikal na transmission projects upang matugunan ang lumalaking demand at masuportahan ang integration ng mga bagong planta ng kuryente at renewable energy sources.

Kasabay nito, welcome sa NGCP ang patuloy na pagtutok ng pamahalaan sa sektor ng enerhiya at ang panawagan para sa napapanahong pagpapalabas ng mga permit at hindi naantalang right-of-way access upang mapabilis ang pagkumpleto sa mga pangunahing transmission projects.

Ang nasabing pahayag ng NGCP ay sa gitna na rin ng utos ni Pangulong Ferdinand Marcos Jr. sa DOE na tingnan ang mga proyektong ginagawa ng NGCP at ang pagrebyu sa performance ng korporasyon, upang matiyak na natutugunan ang mga pangangailangan at problema sa suplay ng enerhiya sa bansa.

10% dagdag-pensyon, oks sa DOF

ni Mylene Alfonso @News | June 4, 2026

Photo: Nasa larawan sina (kanan) DOF Secretary & SSS Chairperson Frederick  D. Go at SSS President and CEO Robert Joseph M. De Claro. (Mylene Alfonso)

Suportado ni Finance Secretary at Social Security Commission Chairperson Frederick Go ang pagpapalabas ng Social Security System ng P6 bilyon para sa mga pensioner.

Bunsod ito ng maagang pagpapatupad ng SSS sa ikalawang bugso ng Pension Reform Program (PRP) para sa mahigit 4.1 milyong pensioner, matapos ilipat sa Hunyo 2026 ang nakatakdang pagtaas ng pensyon sa Setyembre.

Ayon kay Go, magpapalabas si SSS President at Chief Executive Officer, Robert Joseph M. de Claro, ng pondo para sa karagdagang benepisyo mula Hunyo hanggang Agosto 2026 upang matulungan ang mga pensioner na makayanan ang epekto ng inflation at tumataas na gastos sa enerhiya.

Ang mga pensioner ng SSS na rehistrado hanggang Mayo 31, 2026 ay agad na makatatanggap ng dagdag-pensyon simula Hunyo 1, 2026. Samantala, ang mga magiging benepisyaryo mula Hunyo 1 hanggang Agosto 31, 2026 ay magsisimulang makatanggap ng mas mataas na pensyon sa Setyembre 1, 2026.

Sa ilalim ng ikalawang yugto ng PRP, magkakaroon ng 10% dagdag sa buwanang pensyon ang mga retirement at disability pensioner, habang 5% naman ang dagdag para sa death at survivor pensioner.