Kumakalat na si Rep. Mikee ang itatalaga sa DOE, pinalagan

ni Ka Ambo - @Bistado | May 21, 2022

MAY inilabas na mga pangalan na itatalagang bagong miyembro ng gabinete sa ilalim ng BBM Administration.

Ilan dito ay kinumpirma pero ilan ay nanatili pa rin sa status ni ‘Marites’.

◘◘◘

PINAKAKONTROBERSIYAL na pangalan ngayon ay si Rep. Mikey Arroyo na anak ni ex-PGMA.

Nababahala kasi ang ilang sektor ng ekonomiya sa ulat na itatalaga ang batang Arroyo sa Department of Energy (DOE).

◘◘◘

AYON sa United Filipino Consumers and Commuters (UFCC), dapat pag-isipang mabuti ni incoming President Ferdinand 'Bongbong' Marcos, Jr. ang paghirang kay Mikey sa DOE.

Inilalarawan ng pangulo ng UFCC na si RJ Javella na “bad news” ang ulat na itatalaga si Mikey sa DOE dahil nakataya ang kapakanan at interes ng mga konsyumer at komyuter.

◘◘◘

HAMON ng UFCC sa susunod na Pangulo, tupdin ang Article 12, Section 17 at 18 na mag-aalis ng kontrol ng mga oligarko sa serbisyo ng kuryente, tubig, toll roads at iba pa.

Sa pamamagitan ng naturang batas, maipatutupad ni BBM ang kanyang plataporma na pababain ang singil sa elektrisidad at presyo ng petrolyo.

◘◘◘

NAGDUDUDA ang ilan kung paano maipatutupad ni Mikey ang plataporma ni BBM gayung wala siyang expertise maliban sa pagiging pulitiko tulad ni DOE Secretary Alfonso Cusi.

Dapat ay makumbinse ni Mikey ang taumbayan na mayroon siyang sapat na karanasan at kaalaman hinggil sa naturang responsibilidad.

◘◘◘

DUMARAING pa rin ang mga tsuper at operator ng public transport.

Gumagapang na sila sa hirap.

◘◘◘

BAGAMAN, isang napakasopistikadong ahensiya ang DOE, pero sakaling mahusay ang maitatalaga dito, milyun-milyong Pinoy ang masasaklolohan nila kapag napababa nang todo ang singil sa elektrisidad at presyo ng petrolyo.

Pinagsususpetsahan kasi na ang DOE ay mas kumakampi sa mga korporasyon kaysa sa konsyumer.

◘◘◘

NAGWAGI si BBM dahil siya na lang ang tanging nakakaunawa sa kapakanan ng ordinaryong mamamayan.

Alalahanin natin na ang bulto ng boto ni BBM ay mula sa hanay ng mga ordinaryong mamamayan at mula sa mga nagdarahop.

◘◘◘

SANA’Y hindi magkamali si BBM sa pagtatalaga ng mga tao sa lahat ng sangay ng burukrasya.

Kapag nagawa niya 'yan, iyan na mismo ang radikal na pagbabago mula sa “gitna” na ang tinutukoy ay ang mismong pamahalaan.

'Pag walang ideolohiya, walang direksyon ang bansa

ni Ka Ambo - @Bistado | May 19, 2022

NATAPOS na ang kampanyahan para sa magiging lider ng bansa at mga komunidad

Pero nakarinig ba kayo tungkol sa ideolohiya?

Malungkot ang sagot: Wala.

◘◘◘

KAPAG walang niyayakap na ideolohiya ang mga lider, walang direksyon ang isang bansa.

Iyan mismo ang pinakaugat ng problema.

◘◘◘

HINDI lang ang mga lider ang walang ideolohiya, bagkus maging ang mga mamamayan.

Ibinibinhi at ipinayayabong ang ideolohiya mismo mula sa kultura.

◘◘◘

KAPAG walang kulturang niyayakap, paano makabubuo ng isang epektibo at makamandag na ideolohiya ang isang nasyon?

Sa totoo lang, may mga ideolohiyang nagtutunggalian sa ating lipunan.

◘◘◘

MAY mga ideolohiyang nagbanggaan sa lipunan, ang problema, hindi ito ganap na nauunawaan ng mga mamamayan.

Maging ang mga opisyal ng gobyerno o kahit abogado ay kapos sa pang-unawa kung ano ang ideolohiya.

◘◘◘

HINDI kailanman, magkakaroon ng radikal na pagbabago, kapag ang isang lipunan ay walang niyayakap na ideolohiya.

Ang ideolohiyang ganap na maka-Pilipino ang siyang gamot at solusyon sa lahat ng problemang panlipunan kasama na ang korupsiyon

at krisis sa ekonomiya

◘◘◘

TINATAYA na tatagal pa ang giyera ng Ukraine at Russia

Ideolohiya rin ang ugat nito.

◘◘◘

HINDI rin mareresolba ang world economic war.

Dahil din ito sa nagtutunggaliang ideolohiya ng malalaking bansa.

◘◘◘

ANG ideolohiya ay isang kapsulang solusyon na dapat lunukin ng bawat mamamayan.

Pero bago lunukin ang kapsula, dapat maunawaan ang mga sangkap at sustansyang nakasiksik sa loob nito.

◘◘◘

OPO, kailangan ang isang lider na may

karisma na magsusulong ng isang ideolohiya na yayakapin ng mga Pinoy.

Isang paghamon ito kay President-elect Bongbong Marcos na pamunuan ang pagpapayabong ng isang ideolohiyang ganap na maka-Pilipino.

Kaya ba niyang maging lider tungo sa isang bagumbagong lipunan sa ating henerasyon?

Barangay at SK Elections, ituloy para sa ekonomiya

ni Ka Ambo - @Bistado | May 18, 2022

TUTOK naman ngayon ang lahat kung sino ang itatalaga ni BBM sa gabinete.

Nauna na nang inihayag si VP-elect Inday Sara sa DepEd at MMDA Chairman Benhur Abalos sa DILG.

◘◘◘

MAHALAGANG matitino at may malinaw na track record at kuwalipikasyon ang mga dapat na maitalaga ni BBM.

Kasi’y kapag kaduda-duda ang personalidad at walang maayos na reputasyon, ikasisira ito ng Marcos Administration II.

◘◘◘

IMINA-MARITES naman ang anak ni ex-PGMA na si Rep. Mikee Arroyo na itatalaga sa Department of Energy (DOE).

Marami ang nagtaas ng kilay, si Mikee sa DOE?

Kinukuwestyon dito ang kredibilidad at kakayahan ni Mikee na pamunuan ang isang “highly sophisticated agency” tulad ng DOE.

Ano ang gagawin niya dun?

◘◘◘

KRISIS sa enerhiya at ekonomiya ang responsibilidad ng mamumuno sa DOE lalo’t maselan ang isyu sa oil price at mataas na singil sa elektrisidad.

Ang kuwalipikasyon lang ni Mikee ay pagiging anak ni ex-PGMA.

◘◘◘

DIREKTANG kinokontra ng mga opsiyal ng ECOP, PCCI at PHILEXPORT ang tsismis na italaga ang isang pulitiko sa DOE.

Isang pulitiko si DOE Secretary Alfonso Cusi, wala siyang landmark achievement sa larangan ng energy, uulitin na naman ba ang ganyang diskarte?

◘◘◘

AYON sa lider ng Employers’ Confederation of the Philippines (ECOP), Philippine Chamber of Commerce (PCCI) at Philippine Exports Confederation (PhilExport) na si Sergio Ortiz- Luis, Jr., isang teknokrat dapat ang maitalaga sa DOE.

Sopistikadong departamento ang DOE — pero direktang may kaugnayan ito sa produksyon at distribusyon ng petrolyo, elektrisidad, LPG at iba pa — paano magagampanan ito ng isang pulitiko?

◘◘◘

MAS okey sana, sakaling maipit si BBM ay humugot na lang siya ng isang “career-based” executive sa loob mismo ng DOE na kabisado na agad ang pasikot-sikot sa problemang pang-enerhiya.

Isang malaking paghamon ito kay BBM na maipatupad niya ang pangakong ibaba ang singil sa elektrisidad.

◘◘◘

USAP-USAPAN na agad ang Barangay at SK election sa Disyembre, 2022.

Hindi na ito dapat ipagpaliban pa, dahil ilang beses na itong kinansela.

◘◘◘

ANG eleksyon ang kaluluwa sa demokratikong gobyerno, No.1 prayoridad ito dapat sa pagpopondo.

Pinasisigla ng eleksyon ang demokrasya na nagpapatibay sa Republika.

◘◘◘

SA Pilipinas, ang eleksyon ay nagpapasigla rin ng ekonomiya dahil sa aktibong pakikilahok ng mga lider.

Kung itutuloy ang eleksyon sa Disyembre, mula ngayong Mayo at Hunyo — didiretso ang sigla ng ekonomiya sa higit na 43,000 barangay sa buong bansa.

◘◘◘

MAGKAKAROON ng oportunidad ang ordinaryong mamamayan na hatulan o husgahan ang performance ng kani-kanilang lider sa barangay batay sa response sa pandemic.

Ibig sabihin, bigyan natin ng pagkakataon ang ordinaryong mamamayan na ipahiwatig o iparamdam ang kanilang desisyon at emosyon sa performance ng kanilang mga lider.

◘◘◘

KAPAG may eleksyon, hindi lamang, sisigla ang demokrasya, sisigla ang ekonomiya, bagkus ay sisigla ang pagkilos ng mga tao sa barangay.

Isang iskema rin ito upang maibsan ang depresyon ng mga tao sa gitna ng krisis.