Pagtatalaga ng bagong secretary sa DOE, kontrobersiyal

ni Ka Ambo - @Bistado | May 31, 2022

LIHIM na umeeksena pa rin daw ang outgoing secretary ng Department of Energy (DOE).

Siyempre, malabo siyang manatili sa puwesto.

◘◘◘

PERO mayroong ibinubulong si ‘Marites’, iginapang umano nito na ang papalit sa kanya ay dapat na maging kapanalig niya.

Opkors, para walan siyang problema anu’t anuman ang mangyari.

◘◘◘

TOTOO kaya na ang itinutulak ni Alfonso Cusi na maging kapalit niya ay ang dating kongresistang si Rodante Marcoleta?

Maugong na kinumbinse siya ng lider ng PDP-Laban na umatras na lamang bilang kandidatong senador sa pasubaling ipatatalaga na lang siya bilang gabinete.

◘◘◘

PERO may butas ang kanyang pag-atras dahil wala ito sa maayos na proseso.

Simpleng isinumite umano nito ang statement of withdrawal kay Commissioner George Garcia imbes na pormal sa Comelec en banc.

◘◘◘

MALINAW na nag-file si Marcoleta ng COC pero malinaw din ba ang

naging proseso sa withdrawal ng candidacy?

Dapat ay masagot muna ‘yan bago siya maitalaga sa puwesto.

◘◘◘

BATAY kasi sa batas, hindi puwedeng i-appoint sa loob ng isang taon ang sinumang tao na nag-file ng kandidatura mula sa petsa ng COC at hindi sa petsa ng eleksyon.

Kumbaga, hindi kaya sakop ng pagbabawal ang kaso ni Marcoleta?

Maselan ‘yan.

◘◘◘

MAY ulat na inalis na sa listahan ng aspirante bilang secretary ng DOE sina Rep. Mikey Arroyo at ERC Chairman Agnes Devanadera.

Tanging pag-asa na lamang ng mga kasalukuyang may kontrol sa DOE ay si Marcoleta.

Iyan ay kung makalusot.

◘◘◘

UMATRAS si Marcoleta dahil sa mahina siya sa lahat ng resulta ng election survey.

Malaking problema ni BBM kapag naitalaga siya sa DOE, hindi siya tatantanan ng intriga.

◘◘◘

NASA sa kamay na ng Pangulo ang kapangyarihang pumili ng mga karapat-dapat na puwedeng mamuno sa iba’t ibang departamento – kabilang ang DOE.

Mas mainam ay kung rerebisahin muna ng screening committee ang mga probisyon at reglamentong sumasaklaw sa pag-atras ng isang kandidato.

◘◘◘

Sa kaso ni Marcoleta, kay Commissioner Garcia siya nagsumite ng statement of withdrawal at hindi sa Comelec en banc na nakasaad sa Omnibus Election Code.

Kung sakali, hindi ba’t mali ang proseso.

At kung mali ang proseso, lumalabas na hindi pala talaga ganap ang pag-atras ni Marcoleta.

◘◘◘

BAKIT kaya tila may kumokontra na maitalaga ang isang ekspertong tulad ni Benito Ranque na suportado ng ECOP, PCCI, at PhilExport?

Takot ba sila mabulatlat ang mga bulilyaso?

May kalansay ba sa loob ng DOE?

Hepe ng DOE, dapat eksperto at may sapat na karanasan

ni Ka Ambo - @Bistado | May 29, 2022

Marami ang nag-aantay kung sino ang itatalaga ni P-BBM bilang hepe ng Department of Energy (DOE).

Mahalaga kasi na matupad ang plataporma na mapababa ang presyo ng petrolyo at mapaliit din ang singil sa konsumo ng elektrisidad.

◘◘◘

MAIPATUTUPAD lamang nang maayos ang plataporma kung eksperto at may sapat na karanasan sa DOE ang maitatalagang hepe rito.

Siyempre, alam at mulat siya sa diskarte at pasikot-sikot.

◘◘◘

KAMAKAILAN kasi ay tinalakay ng isang energy official ang sitwasyon sa buwanang singil sa elektrisidad at maging ang walang humpay na pagtaas sa presyo ng petrolyo.

Napakalinaw ang ibinigay na paliwanag hinggil dito.

◘◘◘

AYON mismo kay Energy Undersecretary Benito Ranque, kayang kaya naman pababain ora-mismo ang presyo ng langis hanggang P3.26 kada litro.

Mapababa rin agad ang buwanang singil sa konsumo ng elektrisidad ng mga pobreng Pilipino nang hindi na kailangan pang suspendihin ang excise at value-added tax na ipinapataw ng gobyerno.

Napakaganda n'yan.

◘◘◘

SA pagtataya ni Ranque, posibleng matapyasan agad ng P3.26 ang presyo kada litro ng gasolina at P1.40 naman sa krudo kung didinggin ng Kongreso ang kanyang panawagang pagbalangkas ng isang joint resolution ng Kongreso.

Itinatadhana sa joint resolution ang suspensyon ng Biofuels Act of 2006 na nagtatakda ng ‘additives’ sa mga produktong petrolyo.

◘◘◘

BINIGYAN-DIIN ni Ranque na dagdag-pasakit lang sa mga sektor ng public transportation at mga industriya ang bio-ethanol na inihahalo sa mga produktong petrolyo sa merkado.

Sa pagsasaliksik, hindi talaga kailangan ng mga pampasaherong jeep at bus ang additive na ginagamit lang para itaas ang antas ng road performance ng mga “high-end cars”.

◘◘◘

“THOSE additives should be made an option. Hindi naman talaga kailangan ng mga pampasaherong dyip at bus ang additives. Those additives are meant to induce performance ng mga mamahaling sasakyan,” wika ni Ranque.

Ibig sabihin, hindi kailangan magtanggal ng buwis para lamang mapababa ang presyo ng petrolyo.

◘◘◘

SA elektrisidad, dapat na palawakin lang ang mekanismo ng lifeline subsidy tungo sa P800 mula sa P400 para sa mga konsiyumer na kumokonsumo ng 100 kilowatts kada buwan.

Malaking tulong 'yan sa hanay ng mga ordinaryong Pinoy.

◘◘◘

MALINAW na may solusyon at diskarte si Ranque kumpara sa dalawang pumopostura bilang energy chief na sina Rep. Mikey Arroyo at ERC boss Agnes Devanadera.

Sana’y masapol ni P-BBM ang epektibo at angkop na kalihim sa DOE na magpapatupad ng kanyang plataporma-de-gobyerno.

Mga walang 'K', out sa gabinete!

ni Ka Ambo - @Bistado | May 26, 2022

UNTI-UNTI nang napupuno ang gabinete ni incoming President Bongbong Marcos.

Pinakahuling tinukoy ay si Cavite Rep. Boying Remulla bilang DOJ secretary.

◘◘◘

NAKATANGHOD pa rin ang mga tao kung sino ang maitatalaga sa Department of Energy (DOE).

Kasi naman ay naghihirap na ang tao dulot ng mataas na singil sa elektrisidad at presyo ng petrolyo.

◘◘◘

KAILANGAN may expertise ang sinumang ipupuwesto sa DOE dahil maselang departamento ito.

Naisisingit din dito ang pangalan ni Energy Regulatory Commission (ERC) Chief Agnes Devanadera.

◘◘◘

MARAMI agad ang umismid sa pangalan ni Devanadera dahil duda raw ang mga ekonomista sa kakayahan nito.

Kasi’y iginigiit nito na ibasura ang value added tax sa kuryente nang hindi na raw kailangan ang kaukulang batas.

◘◘◘

SA totoo lang, hindi maaaring alisin ang VAT kasi’y iyan mismo ay nakapaloob sa isang Republic Act at tanging pag-amyenda o repeal lamang ng panibagong batas ang puwedeng magtanggal nito.

Ayon kay House Committee on Ways and Means Chairperson Joey Salceda ng Albay, gawa ng Kongreso ang VAT, kaya Kongreso rin lang ang puwedeng magbasura o magrebisa sa Tax Law.

Malinaw 'yan.

◘◘◘

MALI rin aniya ang pag-unawa ni Atty. Devanadera sa usaping double taxation sa VAT na ipinapataw sa generation charge at distribution charge.

Kung pagbabasehan ang opinyon ni Salceda, mukhang hindi sapat ang kaalaman ng ERC Chief sa batas na may kaugnayan sa enerhiya.

◘◘◘

SA tingin natin, tulad ng anak ni ex-PGMA na si Rep. Mikey Arroyo, wala ring sapat na kakayahan si Devanadera.

Kaawa-awa ang mga konsyumers na patuloy na ginagatasan ng mga power producers at distributors.

◘◘◘

WALA ring malinaw na aksiyon at desisyon si Devanadera na papabor sa mga konsyumer kung pag-uusapan ang energy sector.

Sa totoo lang, kung nagre-refund ang Meralco, ibig sabihin, nakakalusot sa kanila ang illegal billing.

◘◘◘

MARAMING lider sa ibang bansa ang sunud-sunod na nagko-congrats kay BBM.

Pero, ereng mga maka-VP Leni kung ano-ano pa rin ang black propaganda.

Tapos na ang eleksyon, balintuwad pa rin silang nangangampanya.

◘◘◘

BUMIBILIB ang ibang bansa dahil sa maayos at malinis na eleksyon sa Pilipinas.

Pero, ang sumisira sa reputasyon ng ating bansa ay ang mga pusakal na anti-Marcos.

◘◘◘

HINDI na dapat pang sagutin ni Marcos ang black propaganda.

Mas makabubuti ay magpokus na ang susunod na administrasyon sa pagbangon muli ng ekonomiya.