Dambuhalang problema sa ekonomiyaang sasalubong sa pag-upo ni P-BBM

ni Ka Ambo - @Bistado | June 30, 2022

MAUUPO na sa Palasyo si Pangulong Ferdinand “Bongbong” Marcos, Jr.

Klap-klap-klap!

◘◘◘

PASALUBONG sa kanyang pag-upo ang sobrang taas na presyo ng petrolyo, mababang halaga ng piso, dambuhalang deficit at hindi maawat na pagtaas ng singil sa konsumo ng elektrisidad at tubig.

Paano niya ito masosolusyunan?

◘◘◘

KALIWA’T kanan ang graft and corruption na kinumpirma ni outgoing president Duterte na hindi niya kayang resolbahin.

Kailangang ingatan ni P-BBM ang pagpili ng mga bagong itatalaga sa bawat posisyon.

◘◘◘

MALAKI ang tiwala ng 31 milyong botante na pumabor sa kanya na makagagawa siya ng paraan samantalang nanonood at nangungutya ang halos 20 milyong bumoto sa kanyang mga kalaban sa huling presidential derby noong Mayo.

Isang malaking paghamon ito sa isang Marcos.

◘◘◘

SA unang buwan ng pag-upo ni P-BBM, babalutin ng dilim ang buong Occidental Mindoro.

Bakit?

Ito ay dahil sa makupad na pagkilos ni Energy Regulatory Commission (ERC) chief Atty. Agnes Devanadera.

◘◘◘

AYON kay Rep. Carlos Zarate, walang kapatawaran ang kapalpakan dahil sa kakapusan ng supply ng kuryente sa 11 munisipalidad sa Occidental Mindoro mula pa nitong nakalipas na araw ng Sabado.

Itinigil na kasi ng Occidental Mindoro Consolidated Power Corporation (OMCPC) ang pagsu-supply ng kuryente sa Occidental Mindoro Power Cooperative (OMECO).

◘◘◘

IKINAKATWIRAN ng OMCPC, paso na ang kontrata na nagbibigay-pahintulot sa kanila para makapag-supply ng 20 megawatts sa OMECO.

Ang problema, hindi na rin pinagbigyan ni Devanadera ang hiling ng OMECO na palawigin pa ang kontrata, kasabay ng direktiba sa kooperatiba na kumuha na lang muna ng kuryente OMCPC na agad tumanggi.

◘◘◘

SIMPLE lang ang dahilan ng krisis: Tapos na ang kontrata.

Paano ngayon ‘yan? Simpleng problema, pero hindi masolusyunan.

◘◘◘

HINDI ba’t bilang hepe ng ERC, dapat prayoridad ni Devanadera ang tiyaking nasa ayos ang mga kontrata sa pagitan ng mga power producers at kooperatiba?

Gaano ba katagal ang kailangan ng ERC para rebisahin ang mga kontrata ng maliliit na power cooperatives?

◘◘◘

MALIIT na kooperatiba lamang ang nagbibigay ng elektrisidad sa mga lalawigan, pero napeperhuwisyo nito ang ordinaryong mamamayan kapag nadidispalinghaado ang serbisyo.

Paano ngayon ‘yan?

◘◘◘

ANG mga dambuhalang korporasyon, tulad ng Meralco at Aboitiz Power lamang ba ang babantayan ng ERC?

Nanghihinayang tayo at nababahala kasi’y puntirya pa naman ni Devanadera ang maging kalihim ng Department of Energy (DoE).

◘◘◘

KUNG napapabayaan ng ERC ang Occidental Mindoro, paano pa ang sitwasyon ng bansa kung sakaling siya ang makatsambang makopo ang DoE post?

Esep-esep lang kahit paminsan-minsan.

Malalaking problema ang sasalubong kay P-BBM sa unang linggo sa puwesto

ni Ka Ambo - @Bistado | June 29, 2022

NABABAHALA tayo sa pag-upo ni P-BBM sa Palasyo sa linggong ito.

Sasalubungin siya ng maselang krisis na hindi pa nararanasan ng ating bansa sa kasaysayan.

Ito ay ang negatibong epekto ng dalawang taong pandemic sanhi ng COVID-19 at ang epekto ng giyera ng Russia at Ukraine.

◘◘◘

MALINAW na kailangang maresolba ni P-BBM ang negatibong epekto nito.

Kung susuriin sa biglang tingin, ito ay may kaugnayan sa ekonomiya — pero nagdududa tayo sa ganyang klase ng pagtaya.

◘◘◘

KAPAG krisis o pambihirang krisis, tulad sa nararanasan ngayon, hindi ito nakapokus lamang sa pinansyal o ekonomiya, bagkus — ay nag-uugat ang mala-cancer na krisis sa lahat ng aspekto ng public administration at iba pang larangan pampulitika.

Ibig sabihin, hindi dapat maligaw sa pagtaya ang mga adviser ni P-BBM na ang problema ay ekonomiya lamang, bagkus ay dapat basahin ito o unawain batay sa kabuuang takbo ng gobyerno — kasama ang pulitika — international o local man.

◘◘◘

NAIS nating bigyang-diin, na ang solusyon sa krisis ay hindi dapat pang-ekonomiya lamang, bagkus ang krisis ay sinosolusyunan batay sa lahat ng aspekto ng pamahalaan.

May mahalagang dapat gampanan bilang solusyon ang “public administration”.

◘◘◘

KARANIWANG itinatalaga sa puwesto ay abogado — na walang sapat na karanasan at pang-unawa kung ano ang pasikut-sikot ng public administration — kaya’t nagkakaletse-letse.

Halimbawa, dahil may krisis, ang solusyon ay napokus lamang sa financial area ng gobyerno.

Mali.

◘◘◘

DAPAT isinasabay ang malawak na pangangasiwa sa loob ng burukrasya.

Kapag may krisis, dapat magtipid.

Ibig sabihin, ang unang magtitipid dapat sa gastusin ay ang mismong burukrasya.

◘◘◘

DAPAT iutos ni P-BBM ang pagtitipid sa paggamit ng petrolyo, elektrisidad at tubig sa lahat ng tanggapan ng gobyerno.

Simpleng direktiba lamang ‘yan — pero malaki ang impact sa panahon ng krisis.

◘◘◘

‘Yan ay maipatutupad lamang — ng epektibong lider na may sapat na oryentasyon at kaalaman sa aspeto ng public administration.

Hindi kayang ipatupad ng mga bar topnotcher o mga abogado.

◘◘◘

KARANIWANG “legal na aspeto” ang takbo ng isip at solusyon ng mga abogado, imbes na praktikal at aktwal na karanasan sa loob at labas ng burukrasya.

Siyempre, kasama ang praktikalidad, realidad at aktwal na nararanasan ng mga gumagalaw sa loob ng burukrasya.

◘◘◘

KAPAG matindi ang krisis, magko-collapse ang burukrasya.

Kailangang maiwasan ito ngayon pa lamang — dapat bihasa tayo sa pangangasiwa sa loob ng gobyerno.

Imbentaryuhin at bantayan ang gugulin at transaksyon sa barangay, munisipalidad, siyudad at mga lalawigan.

At mula rito, makikita ng Palasyo ang tunay na larawan na siyang pagbabatayan ng epektibong solusyon — sa panahon ng matinding krisis.

Walang bakuna kontra krisis ng ekonomiya, period!

ni Ka Ambo - @Bistado | June 25, 2022

HAWAK na ni P-BBM ang pangalan ng mga ismaglers.

Huh, dati nang “hinawakan” ‘yan ni P-Digong.

◘◘◘

SA totoo lang, maaaring italaga ni P-BBM bilang bagong komisyoner ng Bureau of Customs ang dating DepCom na si Atty. Rey Nicolas.

Si Atty. Nicolas ang tanging naka-solved ng ismagling sa bansa.

◘◘◘

ISANG bar topnotcher si Nicolas na nahasa sa ilalim ni Titus Villanueva pero kinuyog siya ng mga pusakal na ismagler kaya’t nagkusa na lamang siyang umalis sa serbisyo.

Hindi namumulitika si Nicolas at kabisado nito ang pasikut-sikot sa Adwana dahil isa siyang CESO—malaki ang maitutulong niya sa Administrasyong Marcos.

◘◘◘

HINDI na dapat magpatumpik pa si Marcos, dapat niyang baliin ang gulugod ng mga ismagler — nakataya rito ang seguridad ng bansa.

Ipakita dapat ni P-BBM—na siya ay “isang Marcos”—matalino at epektibo kung kumilos.

◘◘◘

HINDI dapat nagpapabola si P-BBM sa mga sepsep sa paligid, dahil maaaring ipahamak siya ng mga ito.

Ilan dito ay hindi naman talaga maka-Marcos, bagkus ay simpleng mga oportunista lamang.

◘◘◘

NAHAHARAP na sa krisis ang Germany.

Isang superpower din ang Germany, pero nagpapatuta siya sa US at Europe kaya’t nadamay sa krisis ang kanilang bansa.

◘◘◘

UMAAMIN ang mga eksperto na nahaharap ang daigdig sa isang economic crisis.

Pero, ayon sa ilang nagmamasid, sinasadya ang krisis upang isulong ang isang bagumbagong istilo ng ekonomiya — na kontrolado lamang ng iisang bansa.

◘◘◘

ANG India at China ay patuloy na pumapakyaw ng petrolyo mula sa Russia.

Ibig sabihin, aktuwal nang may “world war sa ekonomiya” ng daigdig.

◘◘◘

HINDI kayang diktahan ng US at Europe ang India at China.

Malinaw na “nahahati nang malinaw” ang buong daigdig.

◘◘◘

BANDANG 2024 at 2025 pa mararamdaman ang negatibong epekto ng world war sa ekonomiya.

Maraming gobyerno ang guguho at magmamakaawa — sa “superpower”.

◘◘◘

KAILANGAN makadepensa ang mga Pinoy.

Pumalo na sa halos P55 ang palitan kada dolyar.

Nagtatalon sa tuwa ang mga benepisyaryo ng dollar remittances.

Nangangatog naman sa takot ang mga importers.

◘◘◘

HANGGANG kailan mararanasan ang krisis sa ekonomiya.

Walang bakuna kontra sa economic crisis, wala ring solusyon.