Courtesy resignation, immoral at pagpapakita ng kahinaan ng namumuno

ni Ka Ambo @Bistado | January 12, 2023

MAY aberya sa mga heneral.

Biglang nagpalit ng liderato sa AFP.

◘◘◘

AYUSIN natin ng bahagya.

Ibinalik lang ang dating AFP chief sa tama at angkop niyang posisyon.

Tanging si AFP Chief Andres Centino lamang ang 4-star general pero nasulot siya ni General Bartolome Bacarro na isang 3-star general lamang.

Itinama lang ang “mali”.

◘◘◘

KUNG may aberya sa AFP, mayroon din sa PNP.

Ito ay ang isyu ng balasahan.

◘◘◘

BIGLANG sinibak si Police Brig. General Ronald Lee, na director ng Criminal Investigation and Detection Group (CIDG).

“Kinagat” niya ang “pain” na courtesy resignation.

◘◘◘

MAGANDA ang track record ni Lee at hindi naman siya sangkot sa droga.

Pero, sinasabing “may natapakan” siya nang manungkulan sa Abra.

◘◘◘

NAGLINGKOD si Lee bilang hepe ng CIDG nitong Agosto 2022, kung saan tinutukan nito ang kaso ng 34 missing sabungero.

Nabigyan ni Lee ng hustisya ang ilang biktimang mananabong na kinidnap.

◘◘◘

PINALITAN si Lee ni Police Brig. General Romeo Caramat na dating deputy Director ng Directorate for Intelligence (DI).

Laman ng tsismis sa loob at labas ng PNP ang isyu kaugnay ng pagkakasibak kay Lee.

◘◘◘

MAAARING magdalawang-isip ngayon ang ilang heneral o opisyal ng PNP sa hinihinging courtesy resignation ni DILG chief Benhur Abalos.

Maaaring “magamit ang iskema”—upang masulot o makasingit sa posisyon ang ilang “may kapit” sa poder.

◘◘◘

OKAY sana ang pagbalasa, pero ang paghingi ng “courtesy resignation” ay immoral at kung kukuwestiyunin sa Korte Suprema ay lilitaw na “pekeng pagbibitiw ito”.

Sa personal nating pagtingin at teknikal na pagsusuri—walang “courtesy resignation”.

Kumbaga, resign-kung-resign.

Ganun lang.

◘◘◘

NAKATAYA ang career at hinaharap ng pamilya ng mga opisyal na “kakagat sa pain”.

'Yan ay kahinaan ng lideratura.

◘◘◘

ANG paghingi ng courtesy resignation ay kawalan ng disposisyon ng lider.

Kung sa tingin ng mga superior officer—ay kaduda-duda ang performance o personalidad ng mga tauhan nila—aba’y imbestigahan.

Kapag nakakuha ng ebidensiya, kausapin nang lihim o dili'y kasuhan.

'Yan mismo ang “praktis” sa pribadong kompanya—at maging sa mga opisina ng gobyerno.

◘◘◘

MALINAW na papogi o hindi nauunawaan ng DILG officials ang kanilang ginagawa o kung sinuman ang “may utak” ng courtesy resignation.

Hindi patas 'yan at hindi makatarungan.

◘◘◘

KUNG may sapat na kakayahan, liderato at disposisyon ang lider—hindi kailangan ang courtesy resignation ng mga sisibaking tauhan.

Disposisyon ang tawag diyan.

Mahirap manungkulan sa gobyerno.

Dapat aktuwal na “may yagbols” talaga ang mga lider.

Biyahe ni Marcos sa China, tagumpay!

ni Ka Ambo - @Bistado | January 9, 2023

TAGUMPAY ang biyahe ni P-BBM sa China.

Nagkasundo ang dalawang bansa na mag-usap nang maayos kaugnay sa West Philippine Sea.

◘◘◘

HUMINGI ng paumanhin ang Pangulo sa naganap na aberya sa pagkadiskarte ng signal sa air space.

Inaaksiyunan na ng Malacañang ang naturang problema para hindi na maulit pa.

◘◘◘

PINIGIL ang biyahe ng eroplano papasok at palabas ng bansa dahil walang kakayahan na ma-monitor ang mga ito.

Pero matapos ang anim o walong oras, nagawan ng paraan ng mga kinauukulan.

◘◘◘

TEKA, alam ba ninyong expired na ang vessel monitoring system ng BFAR?

Kaugnay ito ng mga barko na naglalayag sa karagatan.

◘◘◘

HINIHINGAN ng paglilinaw ang BFAR kung ang iginawad na kontrata sa kontraktor noong 2018 para sa pag-supply ng teknolohiya at kagamitan para sa Integrated Marine Environment Monitoring System (IMEMS) nito ay may bisa pa?

Nagpadala na ng inquiry ang isang abogado sa BFAR na may petsang Disyembre 14, 2022.

◘◘◘

ITINAKDA sa IMEMS ang paglalagay ng lahat ng mga barko sa pangingisda ng isang vessel monitoring system para matukoy ang eksaktong lokasyon ng mga ito saan mang dako ng karagatan.

Binigyang-diin na apat na taon lang ang nakalaang panahon para sa “delivery of goods” umpisa sa unang araw na matanggap ng nanalong kontraktor ang “notice to proceed” at base na rin ito sa bidding documents.

◘◘◘

NILINAW ng abogado na nakalagay sa “award” na Disyembre 4, 2018 ang petsa ng “notice to proceed” at nagtatapos ito noong Disyembre 4, 2021.

Base mismo sa award, lampas isang taon nang paso ang kontrata.

◘◘◘

KAHIT pa sabihin na typo error ang nangyari sa nakasulat na expiration date at ang tunay na intensyon ay Disyembre 4, 2022, paso na rin ito.

Ang pagkapaso ng kontrata ay nangangahulugang hindi na mababawi ng kontraktor ang inilagak nitong “performance bonds”.

◘◘◘

NAGING mainit ang isyu sa vessel monitoring system nang humatol ang hukuman sa Malabon City noong 2021 at ideklarang unconstitutional ang IMEMS.

Ito ay pinanigan mismo ni dating Solicitor General Jose Calida at kanyang sinabihan ang BFAR na sundin ang naging desisyon ng korte.

◘◘◘

SANA ay maayos agad ng mga awtoridad ang isyu sa vessel monitoring upang hindi matulad ang sitwasyon sa “aberya sa airspace”, kamakailan.

Ang katamaran ng mga opisyal ang nagdudulot ng mas malaking problema.

Maunawaan sana ito ng lahat.

Wa’ masama sa Maharlika Fund, basta ‘wag pakialaman ang pondo ng SSS AT GSIS

ni Ka Ambo - @Bistado | December 17, 2022

Isa nang priority bill ang Maharlika Fund.

Inalis na sa naturang pondo ang kontribusyon ng GSIS at SSS members.

Malaking tama!

◘◘◘

HINDI tayo tutol sa Maharlika Fund, ang tangi lang nating tinutulan ay paggamit ng pension fund.

At malinaw na nakinig ang Malacañang at Kongreso.

Maraming salamat!

◘◘◘

SA totoo lang, dapat isama sa Maharlika Fund ang ilang porsyento sa sin tax at iba pang katulad nito.

Maaari rin gumawa ng batas na nagpapataw ng malaking buwis sa “idle land”—o mga nakatiwangwang na lupain.

Matagal nating binabanggit ito, pero bakit walang gumagawa ng panukalang batas?

◘◘◘

ANG “idle land tax” ay buwis—hindi sa mga ordinaryong tao, bagkus ay buwis ito sa malalaking korporasyon at multi-bilyunaryo na namamakyaw ng lupain—pero hindi naman idine-develop.

Ibig sabihin, mapupuwersa ang mga korporasyon at bilyunaryo na bungkalin o i-develop ang mga pag-aari nilang ekta-ektaryang lupain upang hindi mapatawan ng “idle land tax”.

◘◘◘

INDIRECT at directly, mapasisigla ng “idle land tax” ang agrikultura at industriya, kung saan magkakaroon ng trabaho ang mga magsasaka, manggagawa at sisigla rin ang maliliit na negosyo na naka-wing o nakadikit sa “land development industry”.

Bakit hindi ito isinusulong, nais ba nilang proteksyunan ang mga bilyunaryo?

◘◘◘

ISANG dahilan din kung bakit pabor sa Maharlika Fund, dahil puwedeng magkusa ang Pamilya Marcos na i-donate na lamang sa Maharlika Fund ang mga “pinag-aagawan sa korte” na kayamanan, pero pinakikinabangan lamang ng mga bangkong dayuhan.

Isang lehitimong iskema ang Maharlika Fund upang matapos na rin ang isyu sa “Marcos Wealth” na siyang magsisilbing paglalagakan ng mga kontrobersyal na pondong hindi matukoy kung kailan mareresolba.

Panahon na para pakinabangan ng Republika ito sa “panahon ng krisis”.

◘◘◘

IPAGDASAL nating magkasundo ang gobyerno ng Republika ng Pilipinas at Pamilya Marcos nang may basbas ng hukuman na ilagak o ipasok na lamang sa Maharlika Fund—ang kontrobersyal na kayamanang—nakalagak sa mga bangko sa ibang bansa at maging sa Pilipinas.

Sa ngayon, pribadong bangko lamang at abogado ang nakikinabang sa mga naturang pondo.

◘◘◘

DAPAT hingin o makakuha ng opinyon o payo mula sa mga mahistrado kung paanong lehitimong maipasok sa Maharlika Fund ang pinag-aagawang “kayamanan” upang maisarado na ang naturang isyu at kaso—nang lehitimo at walang nilalabag na batas.

Ngayon na ang angkop at tumpak na panahon para maareglo ito sa lalong madaling panahon.

Mali o tama?