Pinoy experts, palalakasin kontra cyberattacks

ni Bong Revilla @Anak ng Teteng | May 22, 2024

Dahil sa sunud-sunod na cyberattacks na nararanasan ng iba’t ibang ahensya ng pamahalaan, mga negosyo, at ang pinakahuli nga ay ang isyu ng wiretapping umano ng Chinese Embassy sa isang opisyal ng Armed Forces of the Philippines (AFP) ay pagsasama-samahin na ng pamahalaan ang husay at galing ng mga ekspertong Pinoy sa cybersecurity upang magsilbing alagad laban sa cyberattacks sa bansa.

Mismong si Pangulong Ferdinand Bongbong Marcos, Jr. (PBBM) na ang nagpakilos sa Department of Information and Communications Technology (DICT) at sa Department of Science and Technology (DOST) upang paigtingin ang cybersecurity ng bansa.

Ayon kay PBBM, nakipag-usap na umano sila sa maraming eksperto at ilan sa kanila ay pinili bilang pinakamahuhusay na silang gagawing operatiba upang palakasin pa ang cybersecurity sa bansa. 

Kasabay nito, sinabi ng Pangulo na hindi na kailangan pang muling paalalahanan ang mga ahensya ng gobyerno na mag-ingat laban sa cyberattacks dahil polisiya na ng pamahalaan na palaging maging alerto laban sa mga ganitong pag-atake.

Napakaraming ahensya ng pamahalaan ang naging biktima na ng cyberattack kaya mataas na rin ang kaalaman ng lahat hinggil sa iba’t ibang klase nito.

Hindi pa matiyak kung ano ang konkretong plano ng pamahalaan hinggil sa mga napiling eksperto laban sa cyberattacks kung ihahanay sila sa mga sundalo ng Armed Forces of the Philippines (AFP) o ordinaryong manggagawa na lamang ng pamahalaan.

Ang mahalaga ay magpakitang gilas na agad ang mga napiling eksperto upang kahit paano ay makapagbigay halimbawa na agad ng kanilang husay at mabigyang babala ang mga walang takot na nagsasagawa ng nasabing pag-atake.

Kapag may isang nasampulan na nasakote at naikulong dahil sa cyberattacks ay tiyak na maghihinay-hinay na ang mga salbaheng ‘yan na walang iniisip kundi ang mamerhuwisyo.

Napapanahon ang isinagawang ito ng pamahalaan dahil matagal na tayong pinahihirapan ng mga nagsasagawa ng cyberattack — lantaran na ang panghihiya ng mga ito kaya marapat lang na kalusin na.

Maging ang pamunuan ng Philippine National Police-Anti-Cyber Group (PNP-ACG) ay aminadong kulang na kulang ang kanilang kakayahan sa pagsugpo ng mga cyberattack.

Marahil sa pinagsama-samang lakas ng mga eksperto ay makakakilos na ang PNP-ACG na gigil na gigil na ring hulihin ang mga gumagawa ng cyberattacks na hindi nila matukoy.

Sana maging ang mga naglipanang online scammers ay matukoy din dahil hanggang ngayon ay marami pa rin ang biktima sa kabila ng ipinapatupad na SIM card registration.

Kung mabubuo sa mas maagang panahon ang grupo ng mga ekspertong ito ay tiyak na mas maraming kababayan natin na bihasa sa computer ang maitataas pa ang antas ng kaalaman na sa huli ay dagdag operatiba na rin laban sa cyberattacks.

Naniniwala akong positibo ang hakbanging ito ni PBBM dahil sinu-sino nga ba ang magkakaamuyan sa kani-kanilang linya kundi sila-sila rin -- malamang sa malamang ay magkakakilala rin ang mga ‘yan.

Kaya hindi malayong ngayon pa lamang ay kinakabahan na ang mga nagsasagawa ng cyberattacks dahil maaaring ang ilan sa kanilang mga kasama ay na-recruit na ng Palasyo.

Alam nilang ito na ang magiging katapusan ng kanilang pang-atake sa mga ahensya ng pamahalaan dahil tiyak na mabubuko ang kanilang istilo ng mga eksperto na nagdesisyon nang umanib sa pamahalaan.

Kaya sa bagong cyber operatives ng pamahalaan, pagbutihin n’yo dahil ngayon pa lamang ay excited na ang marami nating kababayan na mapanagot ang mga nagsasagawa ng cyberattacks. 

Malaking tulong din ang bagong panukalang batas na Anti-Financial Account Scamming Act (AFASA) na lumusot na rin sa ikatlong pagbasa at dadaan na lamang ito sa bicameral conference upang pagsama-samahin ang mga bersyon bago lagdaan ni PBBM para maging isang ganap na batas.

Nakapaloob sa panukala na binibigyan ng limitadong karapatan ang Bangko Sentral ng Pilipinas (BSP) na imbestigahan ang financial account ng isang sangkot sa kahalintulad na krimen.

Ang AFASA bill ay nagbabawal at nagpaparusa sa mga krimeng pang pinansyal tulad ng money mule at paglabag sa economic sabotage.

Pinapayagan nito ang BSP na matapos magsiyasat ay mag-apply ng cybercrime warrants, order o request para sa assistance ng cybercrime units ng PNP o National Bureau of Investigation (NBI) sa pag-iimbestiga sa kinasasangkutang kaso.

Maging ang mga magsasagawa ng phising, account takeovers, money mule ay posible nang masampahan ng kasong kriminal.

Sa tingin ko ay tamang-tama ang tiyempo na binubuo ng Palasyo ang mga operatiba ng mga piniling cyber expert at kapag buo na ito ay magiging ganap na batas naman ang AFASA at taumbayan ang makikinabang sa direksyong ito.

Kaya sa mga masasamang loob online, bilang na ang mga araw ninyo!

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Sanib-partido para sa malakas na alyansa

ni Bong Revilla @Anak ng Teteng | May 10, 2024

Kahit hirap na hirap tayo sa paglalakad dahil sa saklay bunga ng ating operasyon sa nakaraan nating aksidente ay dumalo tayo para saksihan ang mas pinalakas na alyansa sa pagitan ng partido ni Pangulong Ferdinand R. Marcos Jr., ang Partido Federal ng Pilipinas (PFP) at Lakas-CMD. 

Bilang chairman ng Lakas-CMD ay pinilit nating dumalo upang personal nating saksihan ang pagkakaisa ng Lakas-CMD, ang nangungunang partido sa bansa, kasama ang PFP nitong Miyerkules sa isang pagpupulong sa Makati City. Tinawag ito bilang “Alyansa Para

Sa Bagong Pilipinas”, dinaluhan ang pagtitipon ng mga miyembro ng dalawang partido kasama sina Pangulong Marcos, Lakas-CMD President House Speaker Martin Romualdez at PFP President Gov. Reynaldo Tamayo, Jr. 

Sa alyansang naganap ay pinatotohanan na buong-buo pa ang UnityTeam na kumopo sa mga nanalo noong nakaraang eleksyon – na ngayon ay handang sumuporta sa lahat ng plano at programa ng pamahalaan.  

Walang pagsidlan ang tuwa na aking nararamdaman dahil sa pagkakaroon ng matibay na alyansang ito, mas mapapabilis ang pagkakamit ng mga layunin ng administrasyong ito patungo sa Bagong Pilipinas. 

Nagpapasalamat ako kay Pangulong Marcos sa pagkakaroon ng ganitong pagkakaisa.

Ang alyansang ito ay patunay ng kanyang pagsisikap na pagsamahin ang mga Pilipino sa iba’t ibang paniniwala upang magsama-sama sa pag-unlad at pag-usbong. 

Bentahe ang alyansang ito, nakagawa ng malaking hakbang ang Lakas-CMD at PFP sa pagkakatiyak ng tagumpay ng administrasyon sa pagkakaroon ng mga kandidatong susuporta sa kanilang mga programa na mahalal sa midterm elections sa susunod na taon. 

Isang malaking hakbang ito patungo sa 2025 midterm elections na ang layunin ay manalo ang mga aspirante mula sa pambansang antas hanggang sa lokal na antas na susuporta at tutulong sa pagpapatuloy ng mga magagandang plano at programa ng ating Pangulo. 

Sa ngayon ay masasabi nating nasa tamang direksyon ang Lakas-CMD na pinakamatibay na partidong pulitikal sa bansa sa kasalukuyan at inaasahang pinakamatatag sa darating na eleksyon. 

Lalo na at nagsanib-puwersa ito sa partido ni PBBM, ang PFP kaya dumoble pa lalo ang lakas ng Lakas-CMD. 

Nakakatuwa at punung-puno ang pinagdausan ng pagsasanib-puwersang ito dahil sa napakaraming congressmen na nagsidalo mula sa Lakas-CMD at mga gobernador mula sa iba’t ibang lalawigan na mga kasapi sa PFP. 

Ngayon pa lamang ay nakikita na ang tagumpay ng alyansang ito dahil ang panalo rito ay ang taumbayan na umaasang isang araw ay pangarap na makaranas ng pag-unlad hindi lang sa personal na kabuhayan kundi sa buong bansa. 

Isa sa ipinagpapasalamat pa natin ay ang mapabilang tayo sa ganitong alyansa na pinopostehan ng mga matitikas na pulitiko sa bansa at kilala sa mahusay na serbisyo-publiko kaya kampante ako na nasa mabuting kamay ang ating mga kababayan. 

Bentahe at sa maagang panahon ay naisaayos na ang pinakamalakas na alyansa dahil mas napaghahandaan ang tamang direksyon ng bansa at hindi magkukumahog kung kailan nasa harap na ang problema. 

Sa kaso ko na lamang, puwede na akong hindi dumalo sa ginanap na pagsasanib-puwersa dahil sa aking kalagayan na hindi pa makalakad ng maayos ngunit ayokong palampasin ang makasaysayang alyansa na hindi ko personal na masaksihan dahil simula 1994 ay kaanib na ako ng Lakas at hindi tayo nagpalipat-lipat ng partido kahit kailan. Tatlumpung taon na nga pala ako ngayong taon sa Lakas. 

Iba’t ibang emosyon ang naranasan sa ginanap na alyansa ng dalawang pinakamalakas na partido sa bansa, ngunit lahat ay positibo na magbubunga ng mabuti ang alyansang ito na may iisang adhikain — ang mapabuti ang kalagayan ng bansa. 

Inaasahang habang papalapit nang papalapit ang eleksyon ay magkakaroon ng maraming lipatan sa iba’t ibang partido ngunit nakakatuwang makita na sa ganito kaaga ay establisado na ang Lakas-CMD na ngayon ay dumoble pa, lumakas pa dahil dito. 

Wala namang hangad ang alyansang ito kundi ang kapanatagan, kapayapaan at pagkakaisa at magkaroon ng mga maaasahang pagpipilian sa darating na halalan. 

Kaya nga ngayon pa lamang ay nagbubunyi na ang marami sa ating mga kababayan dahil ang mga mahuhusay na nagserbisyo sa kanilang panunungkulan ay kabilang sa alyansang ito na handang ipagpatuloy ang progresibong paglilingkod sa bayan. 

Para makatiyak — suportahan natin ang alyansang ito na tunay na nagkakaisa at handang ipagpatuloy ang plano at programa ng pamahalaan tungo sa ikauunlad ng bayan.  

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

After ng ‘Walang Matigas’, next ‘Alyas Pogi 4’

ni Bong Revilla @Anak ng Teteng | May 8, 2024

Marami ang nalungkot dahil magwawakas na ang 14 na episodes ng ‘Walang Matigas na Pulis sa Matinik na Misis’ Season 2 na binuo ng 26 episodes mula Season 1 na tinutukan linggu-linggo ng ating mga tagasubaybay.

Mababago na umano ang kanilang routine pagsapit ng alas-7:15 ng gabi tuwing Linggo dahil hindi na nila mapapanood ang ‘Walang Matigas’ na naging bahagi ng buhay ng maraming pamilyang Pinoy.

Dahil dito ay nais kong pasalamatan ang maraming tagasubaybay na hindi bumitaw mula sa Season 1 hanggang Season 2, kaya nanatiling mataas ang ating ratings na umabot ng 10.1 rating kumpara sa kasabay na Voice teens na 6.0 base sa inilabas ng Nielsen Phils.

Sobra-sobra talaga ang pasasalamat ko sa marami nating kababayan na hanggang sa ngayon ay hindi pa rin natitinag sa pagsubaybay sa atin mula pa nang isinapelikula natin ang ‘Walang Matigas na Pulis sa Matinik na Misis’ na si Lani Mercado ang ating leading lady kasama si Tessie Tomas na isang block buster movie.

Hanggang sa gawin na itong TV series sa GMA 7 na ang inyong lingkod pa rin ang bida bilang si Major Bartolome ‘Tolome’ Reynaldo at ginampanan naman ni Beauty Gonzalez ang dating role ni Lani.

Nakakatuwa na tinanggap ng publiko ang bagong tambalan namin ni Beauty at marami ang humihiling na magkaroon pa ng Season 3, ngunit dahil sa nangyaring aksidente sa akin -- napunit ang tissue sa aking Achilles tendon ay kailangan kong magpahinga ng tuluy-tuloy na anim na linggo bago ako makapaglakad nang maayos na tulad ng dati.

Pinasasalamatan din natin ang pamunuan ng GMA7 na hindi nagdalawang isip na bigyan tayo ng pagkakataong makagawa pa ng TV series.

Sayang nga lamang at naaksidente tayo nang simulan na natin ang shooting ng ‘Alyas Pogi 4’ na marami rin sa ating mga tagasubaybay ang humihiling nito.

Isa sa mga eksena ang naging dahilan kaya ako naaksidente dahil ayokong may ibang gumaganap sa mga maaksyong eksena para makatotohanan ang dating, ngunit sadyang hindi na tayo bumabata, kaya nangyari sa atin ang insidenteng ito.

Pero may kasabihan nga na, “Kung gusto maraming paraan, kung ayaw maraming dahilan!” kaya ikinokonsidera natin na mapagbigyan ang kahilingan ng marami nating kababayan sa oras na bumuti na ang ating kalagayan.

Marami na rin kasi ang excited nang mabalitaan nilang ginagawa na natin ang ‘Alyas Pogi 4’ na talaga namang naging blockbuster movie, pero naudlot ang lahat dahil sa aksidenteng sinapit ko.

Kahit ako at ang buong pamilya ko ay excited na rin sa ‘Alyas Pogi 4’ dahil sa alam nila na pinaghandaan nang husto ang pelikulang ito. Mula script hanggang sa pinakamaliit na detalye ay pinulido upang masulit naman ang matagal na paghihintay ng ating mga tagasuporta.

Halos 10 taon din tayong nagpahinga sa paggawa ng pelikula, kaya nauunawaan natin ang pananabik ng marami nating supporters.

Nakakapanibago ngunit hindi naman natin maiwan ang paggawa ng pelikula dahil dito na tayo nakilala — mula bata ay artista na ako at hindi n’yo ako iniiwan, kaya marapat lang na suklian ko ang inyong pananabik.

Target nating matapos ang ‘Alyas Pogi 4’ bago magsimula ang campaign period para sa halalan sa 2025 upang magkaroon naman tayo ng panahon na asikasuhin ang mga kaalyado natin sa pulitika.

Tungkol sa ‘Walang Matigas na Pulis sa Matinik na Misis’ ay may nakaabot sa ating impormasyon na may niluluto umanong Season 3 ang naturang TV series pero wala pang kumpirmasyon dahil nakadepende ang lahat ng ‘yan sa mga boss natin sa GMA7.

Napakaganda kasi ng naging kumbinasyon ng buong cast ng TV series na ito na isa rin sa mga dapat kong pasalamatan na sina Max Collins as Elizabeth “Elize/Puso” Riego-De Dios, Kate Valdez as Sheena Riego De Dios (Season 1), Kelvin Miranda as Gary Hernando, Carmi Martin as Lucita “Lucing” Dallego, Niño Muhlach as Sylvestre “Style” Salonga, Dennis Padilla as Vincent Policarpio, Maey Bautista as Candida Magtulis, Raphael Landicho as Fransisco “Kiko” Reynaldo, Nikki Co as Dustin Tibayan, Angel Leighton as Pretty Competente, E. R. Ejercito as Juancho “Kamao” Dehado, Bembol Roco as Ulo (Season 1), Dennis Marasigan as Lorenzo delos Reyes (Season 1), Jestoni Alarcon as Gener Alberto (Season 2), Ejay Falcon as Ace Catacutan (Season 2), Liezel Lopez as Jacqueline “Jacq” Dela Torre (Season 2), Jeffrey Tam as Onofre “Bunso” Batumbakal (Season 2) , Herlene Budol as Mia (Season 2), Dion Ignacio as Blake (Season 2), Lianne Valentin as Loretta Montecillo (Season 2), Celeste Cortesi as Diana “Diamond Ricci” Mondejar (Season 2), Mika Salamanca as Megan Espinosa (Season 2)  at Roi Vinzon as Vito Poblete (Season 2). 

Nais ko ring pasalamatan ang iba pang artista na mga naging guest sa loob ng dalawang season na sina Jeric Raval as Dodong “Buto” Butak, Geneva Cruz as Iris “Virus” Dehado, Manolo Pedrosa as Nikko “Bituka” Carpio, Diego Llorico as a barangay tanod, Vince Crisostomo as Dimaano, Seb Pajarillo as Peralta, Kiel Rodriguez as Ed, Stanley Abuloc as Noel, Michael Roy Jornales as Mata, Sophia Senoron as Jessica, Bernard Palanca as “Balat” Trinidad, Jimmy Santos as Billy Boy Rosales, Ian Ignacio as JC, Dinky Doo Jr. as Ryan, Thou Reyes as Chester “Mukha” Campos, Al Tantay as Marcus Galang, Michael V. as Hugo “Utak” Salazar, Ronald dela Rosa as Batome, Lani Mercado as Batome’s wife, Jay Manalo as Pancho Blanco, Ramon Christopher as Redentor Pigsart, Antonio Aquitania as Rafael “Paeng” Advincula, Brent Valdez as Alfred MJ Ordillano as Harry, Michael de Mesa as Luther Abueva, Sanya Lopez as Mildred Darlene Yabut, Sherry Lara as Biring Batumbakal, Roger Kent Ostia, John Feir as a scammer, Leandro Baldemor as Ariel, Tart Carlos as Tere, Atak Arana as Venus Arevalo, Christian Vasquez as Estong, Marnie Lapuz as Sandra del Mundo, Johnny Revilla as Ninong, Giovanni Baldisseri as Commissioner Pascual, Renzo Cruz as Lawrence Montecillo at Antonio Vinzon as Arkel Poblete. Sana ay wala akong nakaligtaan dahil lahat kayo ay naging bahagi ng dalawang season ng ‘WMPMM’.

Masaya at walang naging pasaway sa TV series na ito kaya nakalulungkot na magwawakas na ito ngayong Linggo (May 12) at ngayon pa lamang ay napakarami na ang nagtatanong kung kailan sisimulan ang Season 3.

Nakakataba ng puso ang ganitong mga reaksyon dahil lalo akong ginaganahan na gumawa ng mga bago pang proyekto at asahan ninyong mga quality TV series at pelikula ang ating gagawin.

Siyempre, higit na dapat nating pasalamatan ay ang Maykapal dahil hanggang ngayon ay hindi niya tayo pinababayaan lalo na sa ating kalusugan -- dahil sa edad nating ito ay nagagawa pa nating makipagsabayan sa mga batang naglulundagan at nakikipagbakbakan sa pelikula.

Ilan na rin naman ang apo ko, ‘yung pinakamatanda nga binata na, pero nagagawa pa rin nating magpakilig ng mga kabataang babae na labis ko talagang ipinagpapasalamat.

Sa rami ng mga biyayang nagdaratingan sa ngayon ay nais ko lalong ipagpasalamat na mayroon akong pamilya na nakasuporta sa akin sa pangunguna ng pinakamamahal kong maybahay na si Congresswoman Lani Mercado na sa kabila ng pagiging isa ring lingkod-bayan ay lagi tayong inaasikaso.

Kaya kahit sumigaw ako ng salamat ay kulang ang salitang ito sa rami ng blessings!

Anak ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com