Umorder sa drive thru, pumalag na pinagbayad… VICE: ENDORSER NA AKO, SINISINGIL PA AKO?!

ni Ador V. Saluta @Adore Me! | February 18, 2024

Viral sa social media ang video ni Vice Ganda kung saan pabiro siyang nagalit sa staff ng fast food chain na kanyang ine-endorse matapos siyang pagbayarin sa kanyang in-order sa pamamagitan ng drive thru.

Sa kanyang latest vlog ay makikitang umorder ng pagkain ang It's Showtime host sa nasabing fast food chain. Matapos niyang umorder ay nag-proceed na siya sa cashier sa drive-thru window para bayaran ang mga pagkain na kanyang inorder.

Bagama't nakilala siya ng crew, siningil pa rin si Vice kaya pabirong nagalit ang komedyante at tinanong kung bakit daw siya sinisingil, eh, siya ang endorser?

"Ako ang endorser ng McDonald’s, sinisingil n'yo ‘ko? ’Di ba dapat, libre na ‘ko?” pabirong hirit ni Vice Ganda.

Natameme ang staff at 'di malaman ang isasagot kaya't sa puntong ito, nilinaw ng Unkabogable Superstar na biro lamang ito at saka nagbayad na siya ng eksaktong amount.

Agree, Janine? PA-FLOWERS NI PAULO KAY KIM, GIMIK LANG PARA SA SHOW

ni Ador V. Saluta @Adore Me! | February 17, 2024

Nitong nakaraang Valentine's Day, nagulat ang It's Showtime host na si Kim Chiu dahil nakatanggap siya ng bouquet of pink roses mula sa isang mysterious guy. 

Dahil aminado ang actress na siya'y loveless sa ngayon after her breakup with Xian Lim, kaagad na nag-viral sa social media ang post ni Kim kung saan ibinida nito ang bulaklak na kanyang natanggap.

Sa kanyang post sa Instagram Stories last February 14, Araw ng mga Puso, masayang ibinahagi ni Kim ang kanyang natanggap na bouquet of pink roses.

"Okay lang walang boyfriend, may flowers ka naman," ang mababasang message sa card na kalakip ng bouquet. 

Kapansin-pansin sa naturang card na may letter "P" ito, kaya kung sinu-sinong actor or non-showbiz guy ang pinaghinalaang nagbigay sa kanya ng bulaklak. 

At dahil si Paulo Avelino ang leading man ngayon ni Kim sa bagong seryeng ginagawa niya titled What's Wrong With Secretary Kim, ang espekulasyon ng mga netizens ay galing sa aktor ang naturang bouquet of pink roses.

Pero kung may mga kinilig sa gesture na ito ni Paulo, sabi naman ng ilang netizens, hindi na bago ang ganitong pautot o promo para sa isang project. Obyus naman daw na pinaiingay ang tambalang Paulo at Kim para mapag-usapan ang upcoming series nila.

'Di nga ba't balitang nagkabalikan sina Paulo at Janine Gutierrez kaya paano bibigyan ng malisya ang pagbibigay ng flowers ni Paulo kay Kim?

Sana lang, 'wag maging marupok si Kim at ma-fall in love kay Paulo habang ginagawa nila ang kanilang second series together after Linlang sa Prime Video.

Inirereto ni Kris sa kaibigang doktor.. CARLA, 'DI PA HANDANG PALITAN SI TOM

ni Ador V. Saluta @Adore Me! | February 2, 2024

Matatandaan nitong nakaraang linggo habang ongoing ang pagpapagamot niya sa isang hospital sa USA, hindi nakaligtaan ni Kris Aquino na mag-reply sa message sa kanya ni Carla Abellana na praying for Kris' recovery.

Subali't nakakaaliw ang buntot na mensahe ni Kris kay Carla dahil may kilala raw siyang doktor sa hospital na gusto niyang ireto sa Kapuso actress. Hindi binanggit kung Pinoy ang doktor o American, basta't kilala raw niya ito na single at mabait.

Nag-react si Carla sa komento ni Kris tungkol sa doktor na kung okay lang sa kanya, 'pag na-grant na raw ang kanyang annulment.

Sa report ng GMA News ay inamin ni Carla na flattered siya dahil sa kabila ng karamdaman ngayon ni Kris ay naiisip pa umano siya nito.

“I find it amusing and at the same time, nakaka-flatter kasi naiisip niya pa ako," sabi ni Carla. 

"May ganoong nirereto siya, may suggestion siyang ganu'n. Okay naman.

Nakakatuwa!” ani Carla. 

Para kay Carla, isa raw itong compliment  dahil despite ng pinagdaraanan ni Kris, nakuha pa niyang ireto ang aktres sa iba. 

“In a way, compliment pa nga ‘yun. Parang magandang gesture coming from her na meron siyang naiisip para sa akin.”

Ngunit ayon kay Carla, hindi pa siya handang makipagrelasyon sa ngayon.

“Medyo mahirap iyon kasi all the way sa US, medyo natatakot pa po ako. 

“Not that I don’t want to take her offer or not that I don’t trust her, pero sa ngayon, parang tatawanan ko na lang muna. Hindi ko muna ie-explore 'yun,” sabi ni Carla.