Ms. Dee / Pasaway Spotted
Hindi na umano kinakaya ng kanyang mga kapwa kawani ang umano’y kamalditahan ng bagong talagang secretary ng isang sangay ng gobyerno.
Ang tsika sa ating pasaway spotter, ayaw daw ni Madam Secretary na napapaligiran siya ng pangit at palaging nakasimangot na mga tao kaya sa unang mga araw na siya ay itinalaga sa puwesto, ipinatapon nito ang dalawang career officers sa mga walang kuwentang departamento.
“Mga pangit kasi sila at palaging nakasimangot at hindi bumabati sa akin,” ang sabi umano ni Madam Secretary.
Ibang level ang trip ni madam, ‘kaloka! Kasalanan na ba ngayon ang maging pangit? Bawal na rin pala ang sumimangot?
Ibinulong din ng ating spotter na dahil sa umano’y paghahamak at pangha-harass ni Madam Secretary sa iba pang kapwa opisyal, nagkasagutan sila ng director sa loob ng opisina nito.
But wait, there’s more! Kumuha umano ng nagpanggap na testigo si Madam Secretary para makasuhan ang director na bumangga sa kanya. Tinawag na “Poison Ivy” na sinasabing tsismosang pagala-gala sa gusali ng naturang sangay ng gobyerno ang hinilang testigo ni Madam Secretary.
Pinagawan umano ng affidavit si “Poison Ivy” para durugin nang wagas ang nakaalitang director ni Madam Secretary. Ang hindi naman alam ni Madam Secretary, ipinakalat na sa ibang empleyado ang kopya ng affidavit laban sa director. ‘Yan, nagkabukuhan pa yata na maraming wrong grammar sa English ang “bata” ni Madam Secretary.
May isusumbong ka bang pasaway na opisyal sa gobyerno? Ibulong mo nga sa akin, mag-email sa pasawayspotted@gmail.com.