Dear Doc. Shane,
Last month, nagkaroon ako ng bronchitis. Sa totoo lang, pinipilit kong itigil ang paninigarilyo dahil ito ang dahilan kaya ako tinamaan ng nasabing sakit, gayunman, hindi madali sa akin ang paghinto, lalo na at malakas din manigarilyo ang mga kabarkada at katrabaho ko. Nababahala ako dahil baka may posibilidad na bumalik ito. Gusto kong malaman kung anu-ano ang mga bagay na dapat kong gawin upang hindi ito magpabalik-balik? — Anthony
Sagot
Dalawa ang uri ng bronchitis — chronic at acute.
Chronic bronchitis — paninigarilyo ang karaniwang dahilan nito. Kaya kung ititigil natin ang paninigarilyo at magkaroon nang magandang diet, maiiwasan natin ang bronchitis. Ang pagkakaroon ng chronic bronchitis ay nauulit taun-taon at ang mga sintomas ay ang madalas na pag-ubo na may kasamang plema.
Acute bronchitis — ito ay karaniwan ng secondary infection. Ang bacteria ay umaatake kapag mahina ang katawan ng pasyente dahil may sipon o trangkaso ito. Ang karaniwang tinatamaan ng acute bronchitis ay ang mga taong mayroong asthma, problema sa baga, matatanda, bata at mga naninigarilyo.
Ang sintomas ng acute bronchitis ay madalas na pag-ubo, paghingang may huni (wheezing) at masikip na paghinga, pagkakaroon ng plemang kulay berde at dilaw. Kapag ito ay hindi nagamot, ito ay posibleng mauwi sa pneumonia.
Ano ang mga dapat gawin upang hindi magpabalik-balik ang bronchitis?
Kailangang kumain ng tamang diet upang lumakas ang katawan.
Ang regular na pag-inom ng supplements tulad ng Vitamins A, C at zinc ay kailangan para sa mahusay na functioning ng immune system.
Ang carrots, spinach, leeks, spring onions at melon ay nagbibigay ng maraming beta-carotene at nakatutulong sa kondisyon ng mga baga.
Ang pagkain ng atay minsan isang linggo ay mahusay sapagkat ito ay mayaman sa Vitamin A.
Ang sariwang prutas at gulay ay mayaman sa Vitamin C. Ang shellfish at lean beef ay nagsu-supply ng zinc. Ang oily fish ay may anti-inflammatory effect sa mga baga.
Iwasan ang mga mamantika at matatamis na pagkain.
Iwasan ang sobrang pag-inom ng alak at kape sapagkat pinipigil nito ang immune system na linisin ang toxins sa dugo.
Gayundin, ang immune system ay maaaring mapinsala sa pamamagitan ng exposure sa heavy metals na kinabibilangan ng lead at calcium. Dahil dito, ipinapayong iwasan ang mga pagkaing nabibili sa mga lugar na infected ng traffic pollution. Ang mga pagkain na may mataas sa cadmium ay kinabibilangan ng commercially produced mushrooms at shellfish kung saan nakuha sa tubig na exposed sa industrial pollution.