NGAYONG tag-ulan, napakahirap magpatuyo ng damit, lalo na kung walang dryer at garahe o terrace ang bahay. Siyempre, dahil sa madalas na pag-ulan, hindi puwedeng magsampay sa labas, kaya ang option, sa loob ng bahay isasampay para matuyo ang mga nilabhang damit. Pero, mga ‘tol, knows ba ninyong may negative effects din ang pagsasampay ng mga basang damit sa loob ng bahay?
Sey ni Barry O’Rourke, RTE Lifestyle Journalist, ang ganitong gawain ay maaaring magdulot ng negatibong epekto sa kalusugan lalo na sa mga taong mayroong asthma. Ayon kay Pheena Kenny ng Asthma Society of Ireland, dahil sa moist, nagkakaroon ng tinatawag na “spores” na nagdudulot ng iba’t ibang allergic reactions sa tao. Dahil dito, nabubuo ang mould at fungi na maaaring malanghap ng tao. Hindi lamang asthma ang puwedeng maidulot nito kundi maging eczema at iba pang allergies. Dagdag pa niya, ang aspergillus fumigartus spore ay lubhang delikado kung sakaling malalanghap ito ng tao dahil ito ang dahilan sa pagkakaroon ng lungs infections. Samantala, Ayon kay Professor David Denning ng National Aspergillosis Centre in Manchester, hindi lamang malubhang pagkasira ng lungs ang maidudulot ng ganitong gawain kundi maging ang pagkasira ng sinuses. Sinang-ayunan din ito ni Dr. Nick Osborne, Senior Lecturer in Environmental Health sa University of New South Wales, aniya, delikado rin ang dustmites na mahilig pamugaran ang mamasa-masang lugar. Sabi rin ni Catharine Paddock, PhD., ng Machester, United Kingdom, ang pagsasampay sa loob ng bahay ng mga damit na ginamitan ng fabric conditioner ay masama sa kalusugan dahil sa cancer-causing chemicals na humahalo sa hangin.
Kaya ang payo ng mga eksperto dahil hindi maiiwasang magsampay sa loob ng bahay ngayong tag-ulan, dapat piliin ang lugar na pagsasampayan ng damit kung saan well-ventilated at malayo sa living room at mga kuwarto. Gayundin, dahil mabilis kumalat ang moulds o fungi sa mga basang lugar, ilayo rin ang lugar ng pagsasampayan sa bathroom at kusina.
Now we know, mga ‘tol! Siguro, this time, hindi na tayo magsasampay basta-basta ng mga basang damit kung saan-saan.
Gets mo?