Iran, may banta sa US ‘pag ipinagpatuloy ng Israel ang pag-atake sa Beirut

ni Jenny Rose Albason @World News | June 3, 2026

Nagbabala ang Iran na maaaring maapektuhan ang umiiral nitong ceasefire understanding sa Estados Unidos kung magpapatuloy ang mga pag-atake ng Israel sa Beirut, Lebanon, sa gitna ng tumitinding tensyon sa rehiyon.

Ayon kay Iranian Foreign Minister Abbas Araghchi, saklaw ng kasunduan sa Washington ang pagpapanatili ng tigil-putukan sa lahat ng larangan, kabilang ang Lebanon. Aniya, ang anumang paglabag sa isang bahagi ng kasunduan ay maaaring magdulot ng pagbagsak ng kabuuan nito.

Ang pahayag ay kasunod ng utos ni Israeli Prime Minister Benjamin Netanyahu na magsagawa ng airstrikes sa Dahieh district sa Beirut, na inilarawan niyang pagtarget sa mga "terror infrastructure" na umano'y may kaugnayan sa mga pag-atake ng rocket at drone na iniuugnay sa Hezbollah.

Samantala, sinabi ni US President Donald Trump na patuloy siyang nakikipag-ugnayan sa magkabilang panig, kabilang si Netanyahu at mga kinatawang may kaugnayan sa Hezbollah.

Sa kanyang mga social media post, sinabi ni Trump na walang planong magpadala ng mga tropang Amerikano sa Beirut dahil sa umiiral umanong kasunduan na naglalayong itigil ang sigalot kapalit ng pagtigil ng Israel sa pambobomba sa Lebanon.

Gayunman, wala pang kumpirmasyon sa sinasabing direktang komunikasyon sa pagitan ng Estados Unidos at Hezbollah.

Kinumpirma naman ni Netanyahu ang kanyang pakikipag-usap kay Trump, ngunit iginiit na magpapatuloy ang operasyon ng Israel laban sa Hezbollah hangga't nagpapatuloy ang mga pag-atake ng militanteng grupo laban sa mga sibilyan sa Israel.

Pampasabog sa quarrying site aksidenteng pumutok, dose-dosena todas

ni Jenny Rose Albason @World News | June 3, 2026

Hindi bababa sa apat na dosenang katao ang nasawi matapos ang isang malakas na pagsabog sa hilagang bahagi ng Myanmar noong Linggo.

Naganap ang insidente bandang alas-12 ng tanghali sa Namhkam Township.

Ayon sa isang first responder sa Namhkam District sa Shan State, umabot sa 46 ang nasawi, kabilang ang ilang bata, habang mahigit 70 naman ang nasugatan. Isa pang rescuer ang nagsabing 59 katao ang kabuuang bilang ng mga namatay sa insidente.

Sinabi ng Ta’ang National Liberation Army (TNLA), isang kilalang ethnic armed group sa bansa, na ang pagsabog ay dulot ng aksidenteng pagputok ng mga nakaimbak na pampasabog na ginagamit sa pagmimina at quarrying.

Wala pa umanong tiyak na bilang ng mga biktima ang inilalabas ng grupo habang nagpapatuloy ang imbestigasyon upang matukoy ang eksaktong sanhi ng insidente.

Ayon pa sa TNLA, pag-aari ng kanilang economic department ang mga pampasabog, at patuloy nilang inaalam kung bakit ito sumabog.

Matatandaang nananatiling nasa gitna ng digmaang sibil ang Myanmar mula nang agawin ng militar ang kapangyarihan noong 2021, na nagbunsod ng tuloy-tuloy na labanan sa pagitan ng junta forces at iba't ibang pro-democracy at ethnic armed groups.

WHO, nanawagan ng tigil-putukan sa lumalalang Ebola outbreak sa Congo

ni Jenny Rose Albason @World News | May 29, 2026

Nanawagan ang World Health Organization (WHO) ng agarang tigil-putukan sa silangang bahagi ng Democratic Republic of the Congo (DRC) upang mapigilan ang pagkalat ng Ebola habang nagpapatuloy ang labanan sa rehiyon.

Ayon sa WHO, lumalala ang Ebola outbreak sa gitna ng patuloy na sigalot, dahilan upang magsiksikan ang mga lumikas sa evacuation at displacement camps kung saan mas mabilis na kumakalat ang sakit.

Sinabi ni WHO Director-General Tedros Adhanom Ghebreyesus na lubhang naaapektuhan ng digmaan at outbreak ang sitwasyon sa eastern DRC, kung saan nahihirapan ang mga health worker na makapaghatid ng tulong dahil sa kaguluhan.

Ayon kay Tedros, hindi magiging epektibo ang pagtugon sa outbreak habang nagpapatuloy ang pambobomba at labanan, kaya nanawagan siya sa lahat ng panig na magpatupad ng agarang ceasefire.

Ang kasalukuyang Ebola outbreak ay mula sa Bundibugyo strain na wala pang aprubadong bakuna o lunas, at idineklara ng WHO bilang international health emergency dahil sa mabilis na pagdami ng kaso.

Mahigit 900 na ang pinaghihinalaang kaso at higit 200 ang pinaghihinalaang nasawi sa tatlong probinsya sa eastern Congo, kabilang ang mga lugar na kontrolado ng mga rebeldeng grupo.

Ayon sa mga humanitarian organization, marami sa mga nasawi ay mga bata, habang lampas na rin sa kapasidad ang mga refugee sites sa karatig-bansang Uganda dahil sa pagdagsa ng mga lumikas.