Education Center sumabog, 42 bata nadale

ni Justine Berganio @Overseas News | August 20, 2026

Photo: Sundalo ng Taliban sa isang rally - Mohammad Yunus Yawar / Reuters

Sugatan ang hindi bababa sa 42 bata matapos sumabog ang isang education center sa Dasht-e-Barchi, Kabul, Afghanistan nitong Lunes ng gabi.

Ayon sa United Nations Assistance Mission in Afghanistan, nasa 42 kabataan ang nasaktan sa insidente at nanawagan ito ng imbestigasyon upang matukoy ang tunay na dahilan ng pagsabog.

Sa isang ospital sa Kabul, hindi bababa sa 35 estudyante ang isinugod. Lahat ng pasyente ay edad 10 hanggang 14, habang tatlo ang kinailangang sumailalim sa operasyon.

Hindi pa nakukumpirma kung ano ang sanhi ng pagsabog. Hindi rin agad tumugon ang Kabul police na pinamumunuan ng Taliban sa mga katanungan tungkol sa insidente.

Dahil matagal nang tinatarget ng mga militanteng grupo ang Dasht-e-Barchi, kinondena ng ilang opisyal ang insidente bilang posibleng pag-atake. Tinawag naman ito ng UN human rights rapporteur na isang “heinous attack,” habang iginiit ng European Union na hindi katanggap-tanggap ang pag-atake laban sa mga bata at education center.

Malaking komunidad ng Hazara at Shi’ite minority ang nakatira sa lugar na ilang beses nang naging sentro ng pag-atake. Patuloy namang hinihintay ang resulta ng imbestigasyon upang malaman kung aksidente o sinadyang pag-atake ang pagsabog.

Doble ang pabuya ‘pag babae ang nakahuli... P1.8M, alok ng Iran sa makakahuli at makakapatay sa sundalo ng US

ni Justine Berganio @World News | August 18, 2026

Photo: Iranian Army commander-in-chief Amir Hatami - Iranian Army / WANA / Reuters

Umigting ang tensyon sa pagitan ng Iran at Estados Unidos matapos mag-alok ang Iranian Army ng $30,000 (P1.8M) pabuya para sa sinumang makakahuli at makakapatay ng isang sundalong Amerikano. 

Doble naman ang makukuhang pabuya para sa mga babaeng maglalakas-loob na makagawa ng naturang programa.

“Anyone who kills or captures and hands over an invading American military personnel will receive a reward equivalent to $30,000 or 5 billion tomans from the Islamic Republic of Iran’s Army,” ayon kay Army Chief Amir Hatami.

“Courageous Iranian women who carry out such an action will receive double the reward,” dagdag niya.

Wala namang inilabas na detalye ang Iranian military kung saan maaaring isagawa ang naturang paghuli. Wala rin itong kumpirmasyon na mayroong US ground troops na kasalukuyang nakadeploy sa Iran.

Sa gitna ng tensyon, muling iginiit ni Hatami na dapat umalis ang Estados Unidos sa Middle East at kinuwestiyon ang presensya nito sa Persian Gulf, Gulf of Oman at Strait of Hormuz.

Kabilang sa mga naitalang operasyon ng US sa rehiyon ang rescue mission noong Abril para sa isang Amerikanong piloto na napabagsak ang eroplano.

Ang hakbang ng Iran ay nagdagdag sa tensyon sa pagitan ng dalawang bansa habang nagpapatuloy ang kanilang hidwaan sa rehiyon.

Hindi pa umano siya target... Trump, pinalalakas ang kampanya kontra-ICC

ni Justine Berganio @World News | August 2, 2026

Photo: File

Nagbiro si US President Donald Trump na hindi pa siya target ng International Criminal Court (ICC), ngunit sinabi niyang posible itong mangyari sa hinaharap habang pinalalakas ng kanyang administrasyon ang kampanya laban sa international tribunal.

Sa isinagawang cabinet meeting sa Camp David nitong Biyernes, sinabi ni Trump na wala siyang impormasyon na hinahabol siya ng ICC, ngunit pabirong inamin na hindi niya isinasantabi ang posibilidad. Natawa naman ang mga miyembro ng kanyang gabinete sa naging pahayag.

Inihayag ito ni Trump habang nagsasalita si US Secretary of State Marco Rubio, na muling iginiit ang matinding pagtutol ng Estados Unidos sa ICC. Ayon kay Trump, hindi ang kanyang sarili ang ipinagtatanggol ng Amerika kundi si Israeli Prime Minister Benjamin Netanyahu at iba pang lider na nahaharap sa imbestigasyon ng korte.

Noong Nobyembre 2024, naglabas ang ICC ng arrest warrant laban kay Netanyahu kaugnay ng digmaan sa Gaza at mga alegasyon ng war crimes. Hindi kabilang ang Estados Unidos at Israel sa mga bansang lumagda sa Rome Statute, ang kasunduang lumikha sa ICC.

Samantala, sinabi ni Rubio na nagpapatuloy ang kampanya ng Trump administration upang hikayatin ang iba’t ibang bansa na kumalas sa ICC. Ayon sa kanya, limang bansa na ang nagpahayag ng planong umalis sa tribunal, kabilang ang Chad at Venezuela.

Iginiit din ni Rubio na itinuturing ng Estados Unidos ang ICC bilang isang “illegitimate international organization,” dahilan upang ipagpatuloy ng administrasyon ang panawagang i-boycott ang nasabing korte.