28 militante, dedbol sa sagupaan sa Afghanistan-Pakistan border

ni Justine Berganio @Overseas News | September 29, 2026

Photo: File / AP Photo-Shafiullah Kakar

Patay ang 28 hinihinalang militanteng tumawid umano mula Pakistan matapos makasagupa ang Afghan forces sa Kamdesh, Nuristan, malapit sa border nitong Sabado.

Ayon sa Afghanistan Defence Ministry, 32 iba pa ang nasugatan sa operasyon. Iginiit ng Kabul na kabilang sa grupo ang mga miyembro ng Islamic State at dating security personnel ng Afghanistan na umano’y sinanay sa Pakistan.

Itinanggi naman ito ng Pakistan at tinawag na walang basehan ang alegasyon. Ayon sa Islamabad, wala itong kinalaman sa sagupaan, recruitment o training ng mga dating Afghan security personnel, o pagtulong sa Islamic State.

Sinabi ng Afghanistan na umatras ang mga nakaligtas na mandirigma pabalik sa

Pakistan matapos ang operasyon. Kasunod ito ng airstrikes ng Pakistan sa Afghanistan noong Setyembre 21 na sinabi ng Islamabad na pumatay ng 28 militanteng target. Iniulat naman ng UN ang tatlong civilian deaths sa naturang pag-atake. 

---

CHOPPER BUMAGSAK, NASUNOG, 4 TODAS

PATAY ang apat na sakay ng isang pribadong helicopter matapos itong bumagsak at masunog sa Sainte-Brigide-d’Iberville, Quebec, Canada nitong Sabado ng hapon.

Ayon sa Sûreté du Québec, nakatanggap sila ng emergency call  alas-2:30 ng hapon tungkol sa helicopter na nasa distress at posibleng bumagsak malapit sa Rang des Écossais Road, off Highway 10.

Pagdating ng rescue team, nagliliyab na ang helicopter at idineklarang patay sa lugar ang lahat ng sakay. Hindi pa agad nakilala ang mga biktima.

Nakontrol ang apoy makalipas ang isang oras, pero nagpatuloy ang operasyon sa crash site hanggang gabi.

Iniimbestigahan ng Major Crime Unit ng Quebec police ang insidente, katuwang ang crime scene technicians at Transportation Safety Board of Canada. Ayon sa pulisya, maaaring ilang araw bago makumpirma ang pagkakakilanlan ng mga nasawi.

Sa pagpapasabog ng gusali... North Korea, pinagbabayad ng P2 bilyon ng SoKor

ni Justine Berganio @Overseas News | September 17, 2026

Photo: Ang pinasabog na joint liaison office sa South Korea, border town ng Kaesong, North Korea. - KCNA / Reuters

Inutusan ng Seoul Central District Court ang North Korea na magbayad ng 44.6 bilyong won o tinatayang $32.5 milyon (P2B) sa South Korean government dahil sa pagwasak sa Inter-Korean Liaison Office sa Kaesong noong 2020.

Unang pagkakataon na nagsampa ng direktang damages case ang South Korean government laban sa North Korea. Isinumite ang kaso noong Hunyo 2023, tatlong taon matapos pasabugin ng Pyongyang ang gusali.

Itinatag ang liaison office noong 2018 bilang daan para sa komunikasyon at kooperasyon ng dalawang Korea, ngunit sinira ito ng North Korea noong Hunyo 2020 matapos lumala ang tensyon kaugnay ng anti-Pyongyang leaflets na ipinapadala mula sa South Korea.

Gayunman, hindi malinaw kung makokolekta ng Seoul ang ipinag-utos na bayad dahil wala itong praktikal na paraan upang pilitin ang Pyongyang na sumunod sa ruling.

Sinabi naman ng South Korean Unification Ministry na nais nitong maibalik ang inter-Korean dialogue at maresolba ang mga isyu sa pamamagitan ng pag-uusap at kooperasyon. 

---

13-ANYOS NA ESTUDYANTE, ININSULTO, TINAKOT SA LOOB NG BUS, EDAD 50, KULONG

HINDI pinagbigyan ng Bankstown Local Court ang bail ng 50-anyos na si Omar Yassine na kinasuhan matapos umanong insultuhin at takutin ang isang 13-anyos na Muslim student sa loob ng bus sa Sydney, Australia.

Ayon sa police prosecutor, malakas ang ebidensiya laban kay Yassine, kabilang ang video na kuha mismo ng Grade 8 student na naka-hijab at school uniform. Inakusahan siyang sunud-sunod na nang-insulto sa dalagita matapos nitong ipagtanggol ang isa pang babaeng naka-hijab na umano’y kinukuhanan ng litrato.

Mariing itinanggi ni Yassine na siya ang nagsimula ng insidente at sinabing ilang insulto lamang ang kanyang binitawan. May 46-page criminal record din umano siya at katatapos lamang ng isang community corrections order.

Sinabi ni Acting Judge Gary Still na isang vulnerable victim ang 13-anyos at hindi siya pinayagang makapagpiyansa. Kinasuhan si Yassine ng stalking at intimidation with

intent to cause fear, ngunit hindi pa siya kailangang umapela sa mga kaso.

Kinondena naman ng Strathfield MP Jason Yat-sen Li ang insidente at pinuri ang dalagita sa pagsasalita laban sa umano’y racist at Islamophobic abuse. 

50% dagdag-taripa, ban sa mga produkto, etc... U.S.-Canada trade war, lumala

ni Justine Berganio @Overseas News | September 10, 2026

Photo: Pres. Donald Trump at Canadian Prime Minister Mark Carney - FB Donald Trump, The Canadian Press via AP

Lumala ang trade war ng Estados Unidos at Canada matapos ipagbawal ng administrasyong Trump ang pagpasok ng karamihan sa Canadian alcohol, motorcycles, whey, molasses at nonalcoholic beer simula Setyembre 29.

Kasabay nito, magpapataw ang US ng dagdag na 50% tariff sa Canadian cheese, steel, aluminum at bamboo furniture simula sa susunod na Martes.

Ang hakbang ay tugon umano sa $20 bilyong (P1.25T) tariff ng Canada sa mga produktong Amerikano, matapos ding patawan ng US ng kaparehong halaga ang Canadian goods.

Sinabi ng White House na hindi umano nakipagnegosasyon nang maayos ang Canada at hindi inalis ang ilang trade barriers. Nangako naman si Canadian Prime Minister Mark Carney na tutumbasan ng Canada ang US tariffs.

Nagbanta rin si Trump ng 50% tariff sa lahat ng Canadian automotive imports, trucks, auto parts at steel pagsapit ng Enero 1, 2027 kung walang magiging kasunduan.

Ipinagbawal din ni Trump ang Canadian-made products sa federal government contracts hangga’t hindi umano binubuksan ng Canada ang merkado nito sa US.

Target din ng banta ni Trump ang Canadian aircraft maker na Bombardier, ngunit sinalungat ito ng ilang Republican senators dahil sa libu-libong trabaho nitong nalilikha sa US, kabilang ang mahigit 1,200 trabaho sa Kansas.