Joel, lumipat, Alan out, agawan sa Senado, tapos na... SP Win sa mga senador: Magsimula tayo

ni Mylene Alfonso @News | June 18, 2026

Photo: Senate PH

Nanawagan si Senate President Win Gatchalian sa lahat ng kanyang kasamahan sa Senado na magsimula uli at magkaisa sa pagharap sa mga hamon ng bansa.

"Nananawagan ako sa lahat ng aking kasamahan sa Senado, mayorya man o minorya, na magsimula tayo muli. Magkaisa sa paglilingkod at harapin nang sama-sama ang mga hamon ng ating bansa," ani Gatchalian sa kanyang talumpati sa special session ng Senado kahapon.

Pormal na ngang nahalal si Gatchalian bilang bagong Senate President sa special session na ipinatawag ni Pangulong Ferdinand Marcos Jr. kahapon.

Sa isinagawang special session, si Senador Juan Miguel Zubiri ang nagmungkahi kay Gatchalian para sa posisyon ng Senate President.

Pinalitan ni Gatchalian si Sen. Alan Peter Cayetano bilang lider ng Senado matapos makakuha ng 13 boto, na nagtapos sa halos dalawang linggong sigalot sa liderato na nagdulot ng legal na debate at kalituhan sa mga empleyado ng Senado.

Matapos nito, nanumpa si Gatchalian bilang Senate President, sa pangunguna ni Sen. Vicente “Tito” Sotto III, na siyang nangasiwa sa kanyang panunumpa sa tungkulin.

Sa kanyang talumpati sa nominasyon, pinatunayan ni Sen. Juan Miguel Zubiri na si Gatchalian ay masipag at mahusay na namuno sa ilang mahahalagang komite ng Senado, kabilang ang Committee on Energy, Committee on Economic Affairs, Committee on Basic Education, at Committee on Finance.

“He's the leader that the Senate needs in this time of division and disarray, and he has done this before. I know he'll be able to rise above the fray and lead us back to our principal function, which is to attend to the work of legislation,” wika ni Zubiri.

“I have every confidence that as Senate president, he'll be able to set the institution back on the right path, guided by the highest standards of service, integrity and morality. To my colleagues, I plead, let us elect Senate President Gatchalian and let us get back to our work in this hallowed institution,” din pa niya.

Idineklara ang pagkakaroon ng quorum sa special session matapos dumalo ang 13 senador, kabilang sina Senators Francis “Chiz” Escudero at Joel Villanueva, na kapwa dating kabilang sa kampo ni Cayetano.

Samantala, nahalal naman si Sotto bilang Senate President Pro Tempore sa nasabing sesyon.

Iminungkahi ni Sen. Panfilo “Ping” Lacson ang nominasyon kay Sotto para sa posisyon, na sinang-ayunan naman ng lahat ng iba pang senador na dumalo sa plenaryo.

Kasunod nito, nanumpa si Sotto bilang Senate President Pro Tempore, kung saan ang panunumpa ay pinangasiwaan naman ni Gatchalian.

Edukasyon at benepisyo, prayoridad sa Pag-Asa Island

ni Kuya Win Gatchalian @Win Tayong Lahat | March 24, 2026

Nitong nakaraang linggo ay nagkaroon ng oportunidad ang inyong lingkod na makadalaw sa Kalayaan Island Group (KIG), kung saan nakausap natin ang mga lokal na opisyal, ang Philippine Coast Guard, ang mga kasapi ng ating sandatahang lakas.

Sa pagdalaw natin, nakita rin natin ang pangangailangan ng ating mga kababayan sa Pag-Asa Island, lalo na pagdating sa estado ng mga pasilidad.

Kaya naman nakasuporta ang inyong lingkod sa mga kababayan natin sa KIG, lalo na sa Pag-Asa Island, pagdating sa mga pangunahing pangangailangan tulad ng edukasyon, kalusugan, at maayos na pamamahala.

Bagama’t maliit lamang ang Pag-Asa Island at meron lamang humigit-kumulang 400 na mga residente, mahalaga ang papel na ginagampanan nito sa pagtaguyod ng ating soberanya at pambansang teritoryo.

Ang ating mga kababayan sa Pag-Asa Island at ang kanilang nagpapatuloy na presensya doon ay simbolo ng ating soberanya sa bahaging iyon ng bansa. Kaya naman mahalagang tiyakin nating mapapatatag natin ang mga serbisyo para sa ating mga kababayan sa Pag-Asa Island, lalo na’t pagkilala rin ito sa mahalagang papel na ginagampanan nila para sa seguridad ng ating bansa. Mahalagang tiyakin nating magiging komportable ang ating mga kababayan sa naturang isla.

Bibigyang prayoridad natin ang edukasyon, kalusugan, at ang maayos na pamamahala. Nakausap natin ang punong-guro ng Pag-Asa Integrated School at tiniyak natin ang ating buong suporta sa pagkakaroon ng mas maayos na mga pasilidad para sa kanilang paaralan. Titiyakin din natin ang pagkakaroon ng mas malalaking mga health center upang matutukan ang kalusugan ng ating mga kababayan.

Susuportahan din natin ang pagkumpuni sa kanilang municipal hall na matagal nang hindi nagagamit. Titiyakin din ang patuloy na suporta sa mga pangangailangan ng ating Philippine Coast Guard, lalo na sa pagpapatuloy ng mga patrolya sa gitna ng patuloy na pagtaas ng presyo ng langis.

Sa pagtaguyod natin sa kapakanan ng ating mga kababayan sa Pag-Asa Island, malinaw ang ating mensahe: ang islang ito ay bahagi ng Pilipinas at patuloy nating pangangalagaan ang kapakanan ng mga Pilipino rito.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Kumpletong aklat para sa bawat mag-aaral sa 2026

ni Kuya Win Gatchalian @Win Tayong Lahat | March 10, 2026

Sa loob ng mahabang panahon, hindi nakatanggap ang ating mga mag-aaral ng kumpletong mga aklat na may mahalagang papel sa kanilang pagkatuto. Ngayong taon, naglaan tayo ng sapat na pondo upang matiyak na bawat mag-aaral ay magkakaroon ng kumpletong mga aklat.

Sa ilalim ng 2026 national budget, P19.5 bilyong pondo ang inilaan natin para makumpleto ang mga textbook na kinakailangan ng ating mga mag-aaral mula Kindergarten hanggang Grade 12.

May ilang mga pag-aaral na ang kakulangan ng mga aklat sa ating mga mag-aaral ay nagpakita ng pinsala sa kanila.

Ayon sa 2024 Southeast Asia Primary Learning Metrics, 42% ng mga mag-aaral sa Grade 5 ang nagbabahaginan ng mga aklat. Kung ihahambing sa datos noong 2019, lumalabas na halos kalahati ng mga mag-aaral ang nawalan o kinulang ng mga aklat noong 2024.

Kung susuriin pa natin ang datos ng 2024 SEA-PLM, lumalabas na 23% ng mga mag-aaral ang gumagamit ng aklat kasama ang isa pang mag-aaral, samantalang 19% ang gumagamit ng aklat kasama ang dalawa o higit pang mag-aaral. Lumabas din sa SEA-PLM na para sa mga mag-aaral na Pilipino, ang pagkakaroon ng mga aklat ay maiuugnay sa mas mataas na marka sa reading at mathematics.

Sa 2022 Programme for International Student Assessment (PISA) naman, lumabas na 55% ng ating mga 15-taong gulang na mga mag-aaral ay pumapasok sa mga paaralan, kung saan iniulat ng punong-guro ang kakulangan sa mga educational materials, kabilang ang mga textbook, information and communications technology (ICT) equipment, library o laboratory materials.

Samantala, 49% naman ang mga nasa paaralan kung saan iniulat ng mga punong-guro nila ang kakulangan o mababang kalidad ng mga educational materials.Noong 2024, iniulat din ng Second Congressional Commission on Education (EDCOM II) ang mga hamong may kaugnayan sa kakulangan ng mga textbooks.

Lumabas sa pag-aaral ng Komisyon na mula 2014 hanggang 2023 ay 27 textbooks lamang ang nabili ng Department of Education (DepEd).

Ayon pa sa Komisyon, mga mag-aaral sa Grade 5 at 6 lamang ang nagkaroon ng kumpletong mga textbooks.Pinuna rin ng EDCOM II na nitong mga nagdaang taon, hindi lubos na nagamit ng DepEd ang pondong inilaan para sa pagbili ng mga textbooks.

Matatandaang iniulat ng Komisyon na sa P12.65 bilyong inilaang pambili ng textbooks mula 2018 hanggang 2022, 951.9 milyon o pitong porsyento lamang ang na-disburse. Kamakailan ay sinimulan na ng DepEd ang mga reporma pagdating sa pagbili ng mga textbooks.

Kung dati ay umabot lamang sa 27 na mga titles ng aklat ang nabili ng DepEd, umabot na ito sa 105 noong 2025. Ngayong taon na naglaan na tayo ng pondo para tiyaking bawat mag-aaral ay may aklat, mahalagang matiyak ng DepEd ang pagpapatuloy ng mga repormang maghahatid ng kumpletong mga textbook sa ating mga mag-aaral.

Patuloy naman nating babantayan kung paano ginagastos ng pamahalaan ang 2026 national budget, lalo na ang makasaysayang pondong inilaan natin para sa sektor ng edukasyon.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com