Alas ipinasok sa classification match ng Chinese-Taipei sa AVC

by Gerard Arce @Sports News | June 12, 2026

Photo: Magbabalik ang Kazakhstan at Vietnam sa semifinal round ng Asian Volleyball Confederation (AVC) dahil sa dominanteng panalo kahapon sa Candon City Arena. (avcpix)

Nagtapos ang magkasunod na podium finish para sa Alas Pilipinas women’s national team matapos malasap ang ikatlong pagkatalo nang walisin ng Chinese-Taipei sa bisa ng 16-25, 14-25, 10-25 sa Pool A ng preliminary rounds ng Asian Volleyball Confederation (AVC) Women’s Volleyball Cup kahapon sa Candon City Arena sa Candon City, Ilocos Sur.

Nahulog sa 2-3 kartada ang national squad para mabigong makapasok sa Final 4 at sumailalim sa classification round, matapos ang bronze medal finish noong 2024 Manila meet at 2025 Hanoi edisyon, kung saan nakamit ang makasaysayang silver medal finish sa likod ng defending champion at powerhouse Vietnam.

Kinumpleto ng Alas Pilipinas ang pool assignments sa nakolektang 7 puntos na pinangunahan lang ng anim na marka ni Alyssa Solomon.  Maghihintay naman ang Alas na tumapos ng third place sa Pool A, sa makakatapat sa classification match, habang may dalawa pang nalalabing laro ang Australia na may 2-1 rekord, at ang magkapitbahay na Kyrgyzstan at Uzbekistan ay may 0-4 at 0-3, kartada. 

Alas masusubok vs. Taiwan para sa asam na AVC semis

by Gerard Arce @Sports News | June 11, 2026

Photo: Walang ibang pakay ang Alas Pilipinas women sa pangunguna ni Alyssa Valdez kundi ang lupigin ang Chinese-Taipei upang makapasok sa semifinals ng AVC Cup.  (avcpix)

Mga laro ngayong Huwebes

(Candon City Arena)

9 am – Vietnam vs Iran

12 nn – Lebanon vs Kazakhstan

3 pm – Pilipinas vs Chinese Taipei

Nahaharap sa malaking pagsubok ang Alas Pilipinas women’s national team kontra sa unbeaten at mahigpit na karibal na Chinese-Taipei na kinakailangang talunin sa bisa ng sweep o fourth set upang magkaroon ng liwanag ang pag-entra sa semifinal round ng Asian Volleyball Confederation (AVC) Women’s Volleyball Cup ngayon sa Candon City Arena sa Ilocos Sur.

Bukod sa asam na panalo ay sasandal din ang national squad na magpatuloy sa pangwawalis ng South Korea sa dalawang nalalabing laro kontra Australia at Chinese-Taipei upang makakuha ng kailangang puntos sa top-2 teams sa Pool A.

May 7 puntos ang Pilipinas mula sa 2-2 kartada, habang may kapwa 9 puntos ang South Korea at Chinese-Taipei, samantalang may 5 puntos ang Australia, na pare-parehong may nalalabing 2  laro sa preliminaries. “At this point, ibibigay din namin talaga ’yung lahat namin. Ang dami naming natutunan, pinag-aralan so buong puso naming haharapin ’yung laban sa Thursday,” wika ni Valdez, na team captain ng team na nagawang manaig kontra Uzbekistan at Kyrgyzstan, habang nabigo sa Australia at South Korea.

SoKor pinaramdam ang lakas vs. Alas sa AVC Cup

by Gerard Arce @Sports News | June 10, 2026

Photo: AVC - Asian Volleyball Confederation

Mga laro bukas (Huwebes)

(Candon City Arena)

9 am – Vietnam vs Iran

12 nn – Lebanon vs Kazakhstan

3 pm – Pilipinas vs Chinese Taipei

6 pm – South Korea vs Australia

9 pm – Kyrgyzstan vs Uzbekistan

Nalasap ng Alas Pilipinas women’s national team ang ikalawang pagkatalo kahapon sa Asian Volleyball Confederation (AVC) Women’s Cup laban sa undefeated at wala pang isang set na talo na South Korea sa bisa ng straight sets 16-25, 18-25, 22-25 na ginaganap sa Candon City Arena sa Ilocos Sur.

Matapos ang impresibong panalo laban sa Kyrgyzstan nitong Lunes, tila bumaligtad ang sitwasyon ng women’s national squad nang mahirapang makakuha ng malinis na atake na sinabayan ng hindi malinaw na receptions upang bumagsak sa 2-2 kartada sa Pool A at nahaharap sa mahalaga at matinding sagupaan kontra mahigpit na karibal na Chinese-Taipei.

Nahirapang masabayan ng Alas Pilipinas ang pambihirang liksi at bilis ng Koreans maging ang tangkad at karanasan. Nagawang makapagtala ng World No.39 ng tig-7 service aces at blocks.

Nagawang makakuha ng 19-16 na bentahe ng Alas sa 3rd set mula sa atake ni Alyssa Solomon, subalit lumikha ng 8-1 run ang South Korea para mamuro ang sa set point sa 24-21.

Sinubukan pang lumaban ng national squad sa magkasunod na atake nina Ara Galang at Nina Ytang, ngunit mula sa timeout ay sumagot ng pambihirang quick attack ang Koreans upang selyuhan ang laro sa unang straight set pagkatalo ng Pilipinas. Nanguna sa Alas si Thea Gagate sa 9 puntos at ni  Nina Ytang sa 8 points. 

Nag-ambag din sina Solomon at Alyssa Valdez ng tig-7 puntos habang hinimok ni Philippine Sports Commission (PSC) Chairman Patrick “Pato” Gregorio na pagtuunang maigi ang kampanya sa AVC Cup at iwaksi ang anumang kaguluhan sa PNVF at ang pagsasantabi muna ng loyalty sa bawat club team.