Phreatic eruption, naitala sa Bulkang Bulusan

ni V. Reyes | Apr. 29, 2025

Photo: Bulusan Volcano - Sorsogon PIO/Juban MDRRMO

Apektado ng ashfall ang ilang bayan sa Sorsogon kasunod ng phreatic eruption sa Bulkang Bulusan sa Sorsogon, Lunes ng umaga.

Ayon sa Sorsogon Provincial Information Office, partikular na apektado ng ashfall ang mga bayan ng Juban at Irosin.

Nabatid din mula kay Philippine National Police Region 5 Director Andre Dizon, na mahigit sa 100 indibidwal o 33 pamilya sa mga apektadong barangay ang inilikas na.

Sinasabing makapal na abo ang bumalot sa mga Barangay Puting Sapa at Buraburan sa bayan ng Juban habang katamtaman sa Brgy. Guruyan at iba pang barangay.

Inabisuhan na rin ang mga motorista na magdahan-dahan sa pagbiyahe sa mga kalsadang apektado ng ashfall.

Alas-4:36 ng madaling-araw nang maganap ang phreatic eruption sa Bulkang Bulusan na tumagal hanggang alas-5 ng madaling-araw.

Ang phreatic eruption ay ang pagbuga ng usok o steam bunga ng pag-init ng tubig sa ilalim ng lupa na nadikit o maaaring lumapit sa magma.

Sa impormasyon mula sa Philippine Institute of Volcanology and Seismology (PHIVOLCS), inabot ng hanggang 4.5 kilometro ang pagbunga mula sa bunganga ng bulkan.

Nakataas na ngayon ang Alert Level 1 (Low-level unrest) sa Bulkang Bulusan kasunod ng pagsabog.

Inabisuhan na rin ang mga lokal na pamahalaan at ang publiko na sundin ang pinaiiral na 4-kilometer radius permanent danger zone.

"Vigilance in the 2-kilometer Extended Danger Zone (EDZ) on the southeast sector must be exercised due to the possible impacts of volcanic hazards such as PDCs, ballistic projectiles, rockfall, avalanches and ashfall on these danger areas," dagdag pa ng PHIVOLCS.

Itinaas sa Alert Level 1.. Mount Bulusan sa Sorsogon, nag-alburoto — PHIVOLCS

ni Lolet Abania | June 5, 2022

Naitala ang pagsabog ng Mount Bulusan sa Sorsogon ngayong Linggo ng umaga, ayon sa Philippine Institute of Volcanology and Seismology (PHIVOLCS).

Agad na itinaas ng PHIVOLCS ang alert status ng Bulusan Volcano sa Alert Level 1 (low-level unrest) mula sa dating 0 (normal). “Alert Level 1 status is now raised over Bulusan Volcano, which means that it is currently in an abnormal condition,” pahayag ng PHIVOLCS.

Ayon kay PHIVOLCS Director at Science Undersecretary Renato Solidum Jr., naitala ang phreatic eruption ng alas-10:37 ng umaga at tumagal ng 16 minuto.

“Kanina, nagkaroon ng phreatic eruption ang Bulusan Volcano... ‘Yung pagsabog ay sanhi ng pagpapakulo ng tubig sa ilalim ng crater. Tumagal ito ng 16 minutes at patuloy natin itong sinusubaybayan,” sabi ni Solidum sa isang radio interview ngayong Linggo.

Sa isang bulletin kalaunan, na inisyu ng alas-11:40 ng umaga, sinabi ng PHIVOLCS na ang eruption ay tumagal ng humigit-kumulang sa 17 minuto, habang isang steam-rich grey plume na umabot sa isang kilometrong taas ang naobserbahan mula sa munisipalidad ng Juban, bago ito pumailanglang pakanluran.

“Hindi naman kataasan ang taas ng pagsabog. May mga maitim o dark gray na eruption cloud na nakikita na umuusli sa crater nito na hindi naman kataasan. Posible itong mangyari sa Bulusan (Volcano) na madalas magkaroon ng phreatic eruption,” saad ni Solidum.

“With the ongoing activity ng Bulusan, magtataas tayo ng Alert Level 1 [we will raise it to Alert Level 1],” sabi ni Solidum na aniya pa, napansin din nila na tumaas ang bilang ng volcanic earthquakes ng bulkan na umabot sa 77 beses sa magdamag.

Ayon pa sa PHIVOLCS, “a phreatic eruption refers to a steam-driven explosion that occurs when water beneath the ground or on the surface is directly heated by hot rocks or new volcanic deposits (e.g. pyroclastic density currents, lava) or indirectly by magma or magmatic gas.” Nakapagtala naman ng ashfall sa Juban at Casiguran, sabi ng PHIVOLCS.

Sa report ng Municipal Disaster Risk Reduction and Management Office (MDRRMO), apat na barangay sa Irosin ay nakaranas din ng ashfall. Paalala naman ni Solidum sa mga residente, dapat nang iwasan ang four-kilometer radius ng permanent danger zone dahil lubhang mapanganib sa nasabing lugar sa ngayon.

“Furthermore, people living within valleys and along river/stream channels especially on the southeast, southwest and northwest sector of the edifice should be vigilant against sediment-laden stream flows and lahars in the event of heavy and prolonged rainfall should phreatic eruption occur,” pahayag pa ng PHIVOLCS.

Smog sa mga lugar sa Luzon, may bad effect sa kalusugan

ni Lolet Abania | August 18, 2021

Nakararanas ng matataas na volcanic smog o vog ang maraming lugar sa Luzon matapos na magbuga ng sulfur dioxide (SO2) ang dalawang nag-aalburotong bulkan, ang Taal Volcano at ang submarine volcano na Fukutoku-Okanoba ng Japan, ayon sa Department of Science and Technology - Philippine Institute of Volcanology and Seismology (DOST-PHIVOLCS).

Patuloy na naglalabas ng SO2 ang dalawang bulkan habang nananatiling madilim ang paligid dahil sa maitim at hazy ang hangin, kung saan magdudulot ito ng masamang epekto sa kalusugan.

Ang mga lugar na nakararanas ng vog ay Ilocos Norte, Ilocos Sur, La Union, Pangasinan, Abra, Apayao, Benguet kabilang na ang Baguio City, Ifugao, Kalinga, Mountain Province, Cagayan, Isabela, Nueva Vizcaya, Zambales, Pampanga, Bulacan, Bataan, Metro Manila, Cavite, Laguna, Batangas, Rizal, Quezon, Oriental Mindoro, Occidental Mindoro, Romblon.

Pinapayuhan naman ang publiko na manatili na lamang sa loob ng bahay para maiwasan ang masamang epekto ng vog.