Anak, sinita sa parking... NBI personnel, hinamon ng barilan ang mga enforcer, lagot

ni Jeff Tumbado @News | August 17, 2026

Photo: LTO Philippines

Sinuspinde ng Land Transportation Office (LTO) ng 90 araw ang driver's license ng isang tauhan ng National Bureau of Investigation (NBI) kaugnay sa pakikipagkomprontasyon nito sa mga enforcers ng LTO sa kalagitnaan ng roadside enforcement operation nitong Agosto 12 sa Lipa City, Batangas.

Ayon sa LTO Central Office, nagsimula ang insidente nang sitahin ng LTO law enforcers ang isang sasakyang ilegal na nakaparada sa national highway at nakahahadlang sa daloy ng trapiko.

Inatasan ang driver na ilipat ang sasakyan sa itinalagang parking area, ngunit tumanggi umano itong sumunod at kinuwestiyon ang awtoridad ng mga enforcer.

Sinasabing nagpakilala umano ang driver bilang ahente ng NBI sa pamamagitan ng pagpapakita ng isang NBI badge.

Habang kinakausap ng mga LTO personnel ang driver, dumating ang kanyang ama sakay ng isang pickup truck at nagpakilalang personnel ng NBI.

Kinuwestiyon din umano nito ang awtoridad ng mga LTO law enforcer na sumita sa kanyang anak.

Sa gitna ng komprontasyon, nagbanggit ang NBI personnel na mayroon siyang baril at hinamon ang mga LTO law enforcer na makipagbarilan.

Bunsod ng insidente ay ipinarating agad sa LTO Central office ang ginawa ng NBI agent.

Nagsagawa ang LTO ng imbestigasyon sa insidente kung saan natuklasan din na gumagamit ng hindi awtorisadong blinkers ang pickup truck ng NBI agent.

Naglabas ang LTO ng Show Cause Order laban sa registered owner at driver ng pickup truck at inatasan silang humarap sa Intelligence and Investigation Division ng LTO Central Office upang ipaliwanag ang mga umano'y paglabag at magsumite ng mga kinakailangang dokumento.

Ayon kay LTO Chief Assistant Sec. Markus V. Lacanilao, tungkulin lamang ng mga law enforcer na panatilihin ang kaayusan at kaligtasan sa kalsada.

100 motorista, huli sa EDSA busway

ni Jeff Tumbado @News | July 21, 2023

Nasa mahigit 100 pribadong sasakyan ang pinaghuhuli ng Land Transportation and Franchising Regulatory Board (LTFRB), Land Transportation Office (LTO), Metropolitan Manila Development Authority (MMDA) at mga miyembro ng Inter-Agency Council for Traffic (i-ACT) dahil sa pagbaybay nang ilegal sa EDSA busway sa bahagi ng Malibay, Pasay kahapon.

Ikinasa ang operasyon dahil sa mga ipinaparating na hinaing ng mismong mga komyuter sa bagong tatag na DOTr Complaint Hotline tulad sa paglabag sa batas-trapiko o “Disregarding Traffic Sign” alinsunod sa Republic Act 4136.

Ilan lamang sa mga naiparating na reklamo ay ang pagdaan ng mga pribadong sasakyan sa EDSA busway lane na nakalaan lamang para sa mga pampublikong bus, emergency vehicle, at sasakyan ng gobyerno.

Mahigit 100 motorista ang nahuli sa nasabing operasyon at lahat ay pinagtitiketan sa paglabag sa batas-trapiko.

Pinaalalahanang muli ng LTFRB ang mga motorista na dumaan lamang sa tamang kalsada partikular sa kahabaan ng EDSA upang iwas-abala at aksidente.

Tumakas sa isolation hotel para maki-party... Kaso kay ‘Poblacion Girl’, tuloy na

ni Zel Fernandez | May 6, 2022

Pinakakasuhan na ang tinaguriang ‘Poblacion Girl’ na si Gwyneth Chua, matapos makitaan ng probable cause ang kaso nito sa Makati City Prosecution Office, kaugnay ng naging paglabag sa mandatory quarantine protocols noong Disyembre, 2021.

Matatandaang, naging headline ng mga balita si Chua nitong nagdaang taon, matapos lumabas sa kanyang isolation hotel sa Makati City upang makipagkita at maki-party sa mga kaibigan nito sa Poblacion, Makati at kalaunan ay nagpositibo sa COVID-19.

Kabilang din sa kaso ang security guard ng Berjaya Hotel na si Esteban Gatbonton.

Sa Berjaya Hotel nanatili si Chua nang mangagaling ito sa US at pinaniniwalaang sa tulong umano ng nabanggit na sekyu ay nakalabas ng kanyang unit si ‘Poblacion Girl’.

Ayon sa prosecution office, hindi naman umano nakitaan ng probable cause para kasuhan ang ilang mga empleyado ng naturang hotel.

Gayundin, wala umanong makitang mga ebidensiya ang prosecutor na makapagpapatunay na pinayagan ng mga hotel staff na makalabas si Chua nang araw na tumakas ito mula sa pagkaka-isolate.