Kaya galit na galit sa mga korup… MIKA, LUMAKI SA BAHA

ni Vinia Vivar @Frankly Speaking | October 6, 2025

Photo: FB Mika Salamanca

Naranasan na pala ni Mika Salamanca na bahain ang kanilang bahay sa Pampanga noong bata pa siya, kaya naman, isa rin siya sa mga galit na galit ngayon sa malawakang korupsiyon na nangyari sa flood control projects.

“Nu’ng bata po ako sa Pampanga po, alam n’yo po ba, ‘yung lugar namin sa Masantol, to the point na ‘yung mga tao ngayon, nagkakaroon na sila ng kasabihan na ‘Iihi lang ‘yung palaka, lulubog.’ Ganu’n na kalala,” sey ni Mika nang makatsikahan namin siya sa launching ng bago niyang endorsement na J Spray.

“Never na pong nawala ‘yung lubog du’n sa lugar namin. Sobrang bahain po. Kasi, simula noong bata ako, binabaha na ‘yun at hanggang ngayon na malaki na ako.

“So, s’yempre po, nagagalit din po ako,” aniya.

Hiling ni Mika na managot ang mga korup sa mga kinurakot nila sa flood control projects.

“Managot ang kailangang managot. ‘Yun lang po ang masasabi ko. Make Philippines, Philippines again. Stop corruption!” ang mariing sabi ng Big Winner ng Pinoy Big Brother (PBB) Celebrity Collab Edition.

Samantala, sobrang thankful si Mika sa sunud-sunod na blessings na dumarating sa kanya ngayon. Heto nga’t may panibagong endorsement na naman siya — ang J Spray perfume, which has been in the market since 2017.

Pahayag ni Ms. Kim Yap, representative of Uni Elements Enterprises, makers of J Spray, “Mika is the perfect ambassador for the brand, especially to our young target audience. She represents them in so many ways through her style, her interests, her passions, and so on. We are very thankful to Mika for this opportunity and it may be eight years in the making for our company, but it is definitely worth the wait.”

Si Mika Salamanca ang first-ever endorser ng nasabing perfume brand na may 17 fragrances mula sa limang iba’t ibang series of collections for women at dalawang collections for men.

---

VIRAL ngayon sa iba’t ibang social media platforms ang mga bonggang photos ni Anne Curtis habang rumarampa sa Paris Fashion Week (PFW).

Talaga namang busog na busog ang mga followers ng aktres sa mga stunning photos na ibinabahagi nito sa Instagram suot ang iba’t ibang designers’ clothes sa fashion shows na dinadaluhan.

Ilan sa mga dinaluhan niyang shows ay Dior Beauty, Lanvin, Courrèges, Acne Studios, Loewe, at Rabanne.

Maging ang mga celebrities at sikat na personalidad ay hangang-hanga sa pagka-fashionista ni Anne.

“Fresh,” ang komento ni Isabelle Daza.

“Wow,” reaksiyon naman ni Tim Yap.

“Tu es si belle mon amie (You are so beautiful, my friend),” papuri ni Jackie Forster.

“Ganda!!!!” paghanga naman ni Mariel Rodriguez.

“Wow, nice! Congratulations,” sey ni Rufa Mae Quinto.

Noong September 29 pa dumating si Anne sa Paris for the PFW base na rin sa kanyang IG post.

“Starting my week in Paris! (croissant emoji) Bonjour! Mabuhay!” sey ni Anne Curtis sa kanyang post.

Hindi na raw sila friends ng ex-GF… KLEA: JANELLA, ‘DI DAHILAN NG HIWALAYAN NAMIN NI KATRICE

ni Vinia Vivar @Frankly Speaking | October 5, 2025

Photo: @IG superjanella & YT GMA Network (FTWBA)

Inamin naman ni Klea Pineda na unti-unti na siyang nakaka-move on sa breakup nila ng ex-girlfriend na si Katrice Kierulf.

Sa guesting ng aktres sa Fast Talk with Boy Abunda (FTWBA), sinabi niyang nasa healing process pa rin siya, na normal naman daw sa kahit sinong galing sa breakup.

“Paunti-unti, Tito Boy. May mga pasulput-sulpot na feeling. ‘Di naman bago ‘yun, normal naman ‘yun after ng breakup. Pero I think nagiging better naman ako every day,” sey ni Klea.

Nang tanungin kung magkaibigan pa sila ng ex, “No” ang sagot ni Klea. 

Paliwanag niya, “We’ll get there. Sa ngayon, masyado pa kasing fresh.”

Paglilinaw niya, “Hindi naman kami magkaaway. Parang wala lang siguro. Sa ngayon, wala pang reason para mag-usap ulit o mag-connect kami ulit. Inirerespeto ko rin ‘yung process n’ya, healing process n’ya para sa sarili n’ya.”

Muli niyang nilinaw na hindi third party si Janella Salvador sa breakup nila ni Katrice.

“I think nadamay lang naman ‘yung pangalan ni Janella kasi nga magkasama kami sa film, at naghiwalay kami ni Katrice right after naming mag-shoot,” ani Klea.

“Walang third party na nangyari. ‘Yun ‘yung pinipilit na sabihin ng mga tao online. Hindi ko maintindihan kung saan nila nakuha ‘yun, pero mas malaki ‘yung reason kung bakit naghiwalay kami ni Kat na wala roon si Janella,” dagdag pa niya.

Well, bukas ang BULGAR sa panig ng ex niyang si Katrice Kierulf.

---

Sana raw, tumulong din ang iba… 

BARBIE, NAG-DONATE NG P100 K SA MGA BIKTIMA NG LINDOL SA CEBU

Nag-donate ng P100,000 na tulong si Barbie Forteza sa mga naapektuhan ng malakas na lindol sa Cebu.

Personal na inabot ng aktres ang kanyang donasyon para sa relief operations sa Northern Cebu. Ipinaabot niya ito sa pamamagitan ng Save the Children Philippines, kung saan ay nagsisilbi siyang ambassador.

Ipinost ng Save the Children PH sa official Instagram (IG) page ang ginawang pagtulong ng kanilang ambassador.

“Children in Cebu are still reeling from the earthquake and aftershocks, with some forced to sleep outside in the rain. To support urgent relief and children’s education, @sparklegmaartistcenter actress and Save the Children Philippines ambassador @barbaraforteza donated P100,000 for our response and called on the public to help children in need,” pahayag ng organisasyon.

Nagpasalamat din sila kay Barbie at in-encourage rin ang iba pa na tumulong.

“Thank you, Barbie, for standing #ForAndWithChildren in this difficult time,” saad nito.

Umaasa naman si Barbie na maraming Pilipino ang magkakaisa para tulungan ang mga nasalanta ng lindol, partikular na ang mga bata.

“Children have the right to protection and education, even in the most difficult circumstances. I hope more people will come together to support the children of Northern Cebu, because they deserve to feel safe, cared for, and hopeful again,” pahayag ni Barbie.

Matatandaang noong nakaraang Martes ay niyanig ng 6.9 magnitude na lindol ang Northern Cebu at nag-iwan ng malawakang pinsala.

Nautakan daw ng misis sa pera… DEREK, NAGSALITA NA SA HIWALAYAN NILA NI ELLEN

ni Vinia Vivar @Frankly Speaking | September 30, 2025

Photo: IG @derekramsey / FB Ellen Meriam Adarna

Sinagot agad ng mag-asawang Derek Ramsay at Ellen Adarna ang blind item ng Pambansang Marites na si Xian Gaza.

Sa Facebook (FB) page ng naturang influencer noong Linggo, may tsika siya tungkol sa showbiz couple na ang celebrity guy ay isang billionaire.

“Eh paano ngayon ‘to? Kasal sila. Walang divorce sa Pilipinas. Eh peso billionaire si celebrity guy. May prenup bang pinirmahan si super famous celebrity girl? O waley?

“So meaning to say, may habol s’ya sa bilyones ni guy? Tapos ‘yung anak nila, may habol din sa yaman ng kanyang ama? Under the guardianship ni girl? Is this the masterplan from the start?

“Nautakan ba s’ya ni babae? OMG! Nakakaloka iisipin ko pa tuloy ‘to ngayon paano ako makakatulog nito mamaya mygaaahd,” ang pa-blind item (BI) ni Xian.

Kasunod nito ay nagsabi na siya ng pangalan kaya naman madali nang nahulaan ang kanyang BI. Idinamay niya si John Lloyd Cruz na kesyo hindi raw pinakasalan ni girl.

“Si JL (John Lloyd Cruz) hindi n’ya pinakasalan kasi wala s’yang mapapala. Ang makukuha lang n’ya ay kalahati ng lupa sa paso at limang banig ng Biogesic.

“Pero etong isa, pinakasalan n’ya agad-agad after a few months of relationship. Pinagplanuhan. Mautak,” ani Xian.

Unang nag-react si Ellen sa pamamagitan ng kanyang Instagram (IG) Stories.

“Ang daming nag-tag. Kailangan ko na ng Biogesic,” sey ni Ellen habang hinihimas ang ulo.

Dagdag niya, “Paano ko pakakasalan hindi naman nag-propose,” na tila sagot sa sinabi ni Xian na hindi niya pinakasalan si Lloydie dahil wala siyang mapapala.

Tungkol naman sa billionaire si celebrity guy, saad ng misis ni Derek, “Billions! Oh my God billions! The only billions, ang anino ng billions na nakikita ko ay sa flood control lang.”

Kasunod nito ay inisa-isa ni Ellen ang mga bilyonaryo na alam niya tulad ng Sy Family, Gokongwei, Zobel, Aboitiz, Tan, Lucio Tan, Villar, Zaldy Co, Discaya.

Pero in fairness ay ipinagtanggol niya si Lloydie na, as we all know ay ama ng anak niyang si Elias Modesto. Tinawag niya itong Biogesic na isa sa mga sikat na ineendorso ng aktor.

“And ‘wag mong ismolin si Biogesic because simple lang s’ya. Ikaw, you don’t know but ang assets no’n, I know, you know,” sey ni Ellen.

Resbak pa niya kay Xian, “And kung maki-Marites ka man lang, at least get everything right like everything. Mahirap naman sabihing unreliable source, I’m a liar.”

Pagkatapos ng kanyang litanya ay makikitang naka-smile na si Ellen. 

“‘Yan na, um-effect na ‘yung Biogesic. Good night,” sey niya.

Samantala, kahapon ng umaga naman sumagot si Derek tungkol sa post ni Xian. Mariin niyang itinanggi ang blind item.

“Morning guys. So there’s this issue about Mr. Xian Gaza, uhm, I’ll just keep this very simple. There’s no truth to anything that he said, that’s it, guys. That’s all I have,” pahayag ni Derek.

Kapansin-pansin lang na mukhang hindi nga magkasama sa bahay sina Ellen at Derek.

Magkahiwalay kasi sila ng video na dati naman ay parating magkasama. Makikita sa video ni Derek na kagigising lang niya at wala sa tabi niya si Ellen na dati namang lagi niyang katabi.

---

NAGPAHAYAG ng paghanga ang pangulo ng Federation of Filipino Chinese Chambers of Commerce and Industry, Inc. (FFCCCII) sa mga matatapang at makabayang showbiz personalities tulad nina Sarah Geronimo, Vice Ganda, Anne Curtis, atbp..

Ang mga nabanggit na artista ay buong-tapang na nagpahayag ng pagkontra sa malawakang korupsiyon sa flood control projects.

Marami sa kanila ay nakiisa rin sa kilos-protesta kontra korupsiyon na isinagawa sa Luneta at EDSA noong Sept. 21.

Saad ni Lim, “Hinahangaan namin ang katapangan at pagka-makabayan ng mga kabataang nagpapahayag para sa mabuting pamamahala. Ang mga personalidad sa entertainment tulad nina Sarah Geronimo, Anne Curtis, Vice Ganda, David Licauco, Dingdong Dantes, Angel Locsin, Dustin Yu, Nadine Lustre, Kim Chiu, Jodi Sta. Maria at marami pang iba ay naglalatag ng isang makabuluhang halimbawa ng pakikilahok sa lipunan.”

Samantala, sa pangunguna ni Lim, binasbasan ng grupo ang pagdiriwang ng Mid-Autumn Festival, na nakatakdang ganapin sa October 6, kasama ang panalangin para sa kapayapaan.

Nangako rin ang FFCCCII na ipagpapatuloy ang paglilingkod sa mga biktima ng kalamidad (tulad ng Bagyong Opong) at pagpapatayo ng mga pampublikong paaralan sa iba’t ibang parte ng bansa.

Kilala bilang Mooncake Festival, ang sinaunang pagdiriwang na ito ang pangalawang pinakamahalagang tradisyon sa kulturang Tsino na sumisimbolo sa pagsasama-sama ng pamilya at pagpapasalamat.

Nakikiisa sa diwa ng pagdiriwang na nagbubuklod sa lahat, muling patutunayan ni Lim ang matatag na pangako ng FFCCCII sa mga programa nitong corporate social responsibility.

Kabilang dito ang pagdo-donate ng mga gusali para sa pampublikong paaralan sa kanayunan, pagtulong sa mga biktima ng mga kalamidad at pagsuporta sa mga kabayanihang pagsisikap ng mga Filipino Chinese fire volunteer brigade sa buong bansa.

Dagdag pa rito, ipinahayag niya ang paghanga ng Federation sa idealismo ng kabataan, lalo na ng mga personalidad na ginagamit ang kanilang plataporma upang isulong ang pagbabago laban sa katiwalian.

Mananatili umanong tapat ang FFCCCII sa pagpapalago ng mas matibay na ugnayan ng mga kultura at sa pag-aambag sa pag-unlad ng bansa, na isinasabuhay ang mensahe ng Mid-Autumn Festival na pag-asa at pagbabahagi ng biyaya sa kapwa.