Sa matagal nang tsismis na may anak sila… CHAVIT KAY YEN: IKAW LANG MAKAKASAGOT N’YAN

ni Vinia Vivar @Frankly Speaking | August 29, 2025

Photo: Chavit SIngson sa vlog ni Yen Santos - YT

Matapos ang paglilinaw ni Yen Santos sa kanyang vlog tungkol sa isyung may anak sila ni Chavit Singson, this time ay ang pulitiko-business tycoon naman ang nagsalita tungkol dito.

Sa latest vlog ni Yen sa YouTube (YT) ay nag-guest si Manong Chavit at sinagot ang ilang katanungan kabilang na ang matagal nang tsismis na may anak sila ng aktres.

“Ano ang comment mo sa mga rumors tungkol sa atin?” tanong ni Yen sa dating gobernador ng Ilocos Sur.

“Palagay ko, ikaw lang makakasagot n’yan,” pabirong sagot ni Manong Chavit.

Sa naunang vlog ni Yen ay nilinaw na niyang family friend nila si Chavit kaya marahil nagkaroon ng tsismis tungkol sa kanila.

Sinabi rin ng aktres na ang sinasabing anak nila ng pulitiko ay bunsong kapatid niya at si Manong Chavit pa nga ang ninong.

Sa bagong vlog ay inulit muli ni Yen ang koneksiyon nila ni Chavit.

“Parang more than a decade na kasi he’s a good family friend. Super tropa ‘to ng aking parents kaya lagi tayo nai-issue. Meron pa nga raw tayong anak, ‘di ba? Malaki na raw ‘yung anak natin, si Yan-Yan,” saad ni Yen.

“Guys, hindi po namin ‘yun anak. Kapatid ko ‘yun at ninong s’ya nu’n,” dagdag pa ng aktres.

---

Kahit hirap na hirap…

XIAN, KINAKARIR ANG PAGIGING PILOTO

NAGBALIK-TANAW si Xian Lim sa naging journey niya bilang piloto at obvious na masayang-masaya ang aktor sa kanyang bagong career na noon pa ay pinangarap niya.

Nag-post si Xian ng mga larawan mula sa kanyang flight training hanggang sa maging piloto siya at ibinahagi ang mga challenges na pinagdaanan.

“Favorite moments throughout flight training (airplane emoji). Ground school was tough. I didn’t know what to expect, and as the first pilot in my family, it was daunting stepping into the unknown. The deeper the lessons went, the more I asked myself why I chose this path or maybe… why did it choose me?” simula ni Xian.

Matapos ang ground school ay nag-training naman siya para sa kanyang Private Pilot License (PPL) na aniya ay hindi rin naging madali.

“Training for my Private Pilot License pushed me to my limits. At times, it felt impossible. But I learned to take it one day… one step at a time.

“I had to push myself. Commit. Take that leap of faith. The plan was simple. Get my PPL. But after my first checkride, I knew deep down I wanted more. I wanted to keep learning, keep growing, keep flying,” pagbabahagi niya.

Matapos makuha ang kanyang PPL ay hinangad naman niyang magkaroon ng Commercial Pilot License (CPL) at dito ay panibagong challenge ang kanyang hinarap.

“Earning my Commercial Pilot License was a whole new challenge. Endless hours of studying, cross-country flights, landings in unfamiliar aerodromes. It was tough, but it felt right,” aniya.

Ang pinakamahirap daw na parte ay ang Instrument Rating kung saan ay magpapalipad ka ng eroplano sa low-visibility conditions gamit ang aircraft instruments.

“Then came Instrument Rating—the hardest part yet. Long, quiet hours. Alone with your thoughts. No celebratory water splashes. It's just you, the instruments, and endless charts. It’s difficult, but every step reminded me why I started this journey,” sey niya.

Malayo pa raw ang landas na kanyang tatahakin pero sigurado si Xian na itutuluy-tuloy niya ito.

“The road ahead is far from over and I’m here to stay. Staying inspired, staying hungry for knowledge, and chasing the dream,” saad niya.

“I hope you can chase yours too,” pagtatapos pa ng aktor.

Ang malaking tanong, may balak pa bang mag-artista si Xian Lim o magpo-focus na lang siya talaga sa pagiging piloto?

Pati mga nag-share sa socmed, tinalakan… POKWANG, GALIT NA GALIT SA NAGKALAT NA SA KANYA NAGMANA NG HITSURA ANG ANAK NINA VIC AT PAULEEN NA SI TALI

ni Vinia Vivar @Frankly Speaking | August 28, 2025

Photo: Pokwang - IG

Ikinaloka ni Pokwang ang kumakalat na fake news tungkol sa kanya at sa mag-asawang Vic Sotto at Pauleen Luna.

Sa kanyang Threads account ay ini-repost ng komedyana ang screenshot ng fake message niya kay Pauleen.

Sa naturang mensahe ay sinabi raw ni Pokwang sa misis ni Bossing Vic na, “Ma’am Pauleen, kukunin ko na po ‘yang anak namin ni Bossing, halata naman po sa hitsura, ‘di ba? Sa akin nagmana?”

Ang tinutukoy na anak ni Pokwang ay si Tali, ang panganay nina Vic at Pauleen.

Makikita rin sa screenshot ang sagot ni Vic Sotto na: “Ang corny mo mag-joke, Pokwang! Si Willie lang yata natatawa sa ‘yo! ‘Di ka papasa sa Eat… Bulaga! (EB) ko!”

Sa caption ay gigil na gigil na sinagot ni Pokwang ang nakakalokang imbentong kuwento.

“FAKE NEWS! Grabe na ang mga tao sa socmed (social media), mga wala kayong magawa. Makakarma rin kayo sa mga ugali n’yo! 

“Never ko tinawag na ‘Ma’am’ si Pauleen, si Poleng, ‘kaloka! Pero mas malala ‘yung mga nag-share at nanghusga agad!” imbiyernang sabi ng komedyana.

Maging ang mga netizens sa comment section ay galit na galit dahil idinadamay pa ng mga fake news peddlers ang mga batang walang malay.

May mga nagpayo rin kay Pokwang na kasuhan ang gumawa nito para mabigyan ng leksiyon.

---

Nagbakasyon lang sa Mindoro… 

2 ANAK NI MELAI, SABAY NAOSPITAL

NAUWI sa ospital ang pagbabakasyon ni Melai Cantiveros at ng kanyang pamilya sa Mindoro, ang hometown ng mister niyang si Jason Francisco.

Ibinahagi ni Melai sa kanyang Instagram (IG) account ang mga larawan kung saan makikitang nasa ospital sila.

Ayon sa Kapamilya TV host-comedienne ay sabay na nagkasakit ang dalawang anak na sina Stela at Mela kaya na-confine ang mga ito.

“Vacation turned into a hospital staycation,” sey niya.

Kuwela ang paraan ng pagkukuwento ni Melai sa nangyari sa dalawang bata. Ang bunso ay nagkaroon ng UTI (urinary tract infection) at ang panganay naman ay nagkaroon ng sore throat.

“First honor si Stela na nilagnat. Tapos pag-check, she is now the UTI girl. Tapos s’yempre, hindi rin nagpatalo si Ate Mela, kailangan magpamalas din s’ya. So ‘yun, s’ya naman si ‘Sore Throat Girl’. The best silang dalawa, sinobra ang pag-enjoy sa vacation nila,” tsika ni Melai.

Madali namang gumaling ang dalawang bata kaya nagpasalamat si Melai sa mga doktor at nagbiro pa na napaka-hospitable ng hospital.

“Thank you, Doctora Tin Salvador, our savior for this moment of time, and Mindoro Med Hospital. Talagang hospital talaga kayo kasi napaka-hospitable ninyo. Thank you, Lord na okay na ang aking Ate at Baby. You’re the best, God,” sey ni Melai Cantiveros.

Korina at Julius, binayaran daw ng P10M sa interbyu sa mag-asawang Discaya… HAMON NI IGAN KAY MAYOR VICO: MAGLABAS KA NG EBIDENSIYA!

ni Vinia Vivar @Frankly Speaking | August 24, 2025

Photo: Arnold Clavio at Mayor Vico Sotto - TWAR - FB

Naglabas ng sariling opinyon ang Kapuso veteran broadcaster na si Arnold “Igan” Clavio hinggil sa kontrobersiyal na post ni Pasig City Mayor Vico Sotto.

Sa kanyang Instagram (IG) post ay inalmahan ni Igan ang mga pahayag ng anak nina Vic Sotto at Coney Reyes sa Facebook (FB) hinggil sa mga sikat na journalists na diumano’y tumanggap ng P10 million kapalit ng interview sa mag-asawang Curlee at Sarah Discaya.

Bagama’t walang pangalang binanggit si Mayor Vico ay kalakip ng kanyang post ang larawan ng magkahiwalay na interview nina Julius at Korina sa mag-asawa.

Sa kanyang post, hinamon ni Arnold si Mayor Vico na maglabas ng ebidensiya na tumanggap nga sina Julius at Korina ng malaking pera mula sa mag-asawang Discaya.

“Mayor, kung mayroon kang matibay na ebidensiya laban kina Babao at Sanchez na nagpabayad sa mag-asawang Discaya para sila ay makapanayam, ilantad mo,” mensahe ni Igan sa alkalde ng Pasig.

Aniya pa, hindi niya inaasahang manggagaling kay Mayor Vico ang tinawag niyang

‘iresponsableng’ pahayag.

“Kung hindi ka sigurado sa P10 milyong piso, magkano ba? O mayroon ba? Dahil sabi mo, ‘Alam ninyo na.’ Hindi ko ito inaasahan na manggagaling sa ‘yo ang napakairesponsableng pahayag na ito. Gusto kong malaman, tulungan mo kami,” ani Igan.

Litanya pa niya sa Pasig mayor, “‘Wag kang magtago sa mga pasaring, parinig o haka-haka dahil sa industriya namin, mahalaga ang terminong ‘verification’ ng facts sa pagbabalita. Maraming pinagdadaanan ang isang balita bago ito umere.”

Patuloy niya, “Sa amin sa GMA Network Inc. at Super Radyo DZBB, sinasala ang bawat panayam at kailangan na may approval ng mga news manager.”

Para kay Arnold, isang malaking hamon sa kredibilidad ng lahat ng mamamahayag ang akusasyon ni Mayor Vico kaya naman nais niyang protektahan ang kanilang industriya.

“Ang akusasyong ito laban kina Babao at Sanchez ay tila ‘di makatarungan hindi lamang sa dalawa kundi sa buong industriya.

“Hindi ito para ipagtanggol ko ang dalawang mamamahayag sa paninira ni Sotto kundi para maproteksiyunan ang buong industriya ng pamamahayag na kinukuhanan ng impormasyon ng publiko.

“Nahaharap kami ngayon sa malaking hamon pagdating sa kredibilidad. Nand’yan ang social media na pilit sinisiraan ang mainstream media at mas pinaniniwalaan pa ng marami,” sey pa ni Igan.

Payo pa niya kay Mayor Vico, “‘Wag ka nang makisawsaw sa mapanganib na panahon dahil sa sarili mong interes na pulitikal. Nasa demokrasya tayo at may karapatan ang sinuman na marinig ang kanilang panig.

“Ang kuwestiyunin mo, ang makapanayam ang kalaban mo sa pulitika ay pagsikil sa karapatan ng publiko sa impormasyon.”

Patuloy pa niya, “Parehas tayo ng layunin, magkaroon ng malinis na gobyerno. Pero ‘wag mo namang isingit sa kamalayan ng mga Pilipino na ikaw lang ang malinis at matuwid.”

Hirit pa ni Arnold, “Ano’ng alam mo sa propesyon namin, Mayor? Ano ang ‘grey areas’ na binabanggit mo? Gusto kong malaman.”

Pagtatapos na mensahe ni Igan kay Sotto, “May trabaho ka, may trabaho rin kami. Respeto, walang personalan…”