2 pang Pinoy, nadale sa Taiwan... 3 sasakyan nagsalpukan, 62-anyos na Pinay, todas

ni Justine Berganio @Overseas News | August 26, 2026

Photo: File / FP

Isang Pinay ang kabilang sa dalawang nasawi sa isang vehicular accident sa Taiwan noong Agosto 19, ayon sa Manila Economic and Cultural Office (MECO).

Kinilala ang biktima na si Ebelia Escalona Cortes, 62, na nasangkot sa aksidente sa Freeway No. 1 sa Miaoli County.

Batay sa ulat ng Taiwanese media, sakay si Cortes ng van na patungo sa Taiwan Taoyuan International Airport nang bumangga ito sa likuran ng isang Tesla sedan.

Matapos ang unang banggaan, bumaba ang dalawang driver upang mag-usap. Ngunit isang sedan ang sumalpok sa van habang nasa labas sila. Ayon sa pulisya, naipit si Cortes sa pagitan ng front passenger seat at mga upuan sa likuran.

Dalawa pang Pilipino, sina Gloria Tiu Chua at Gerald Ritkie Tiu Chua, ang nagtamo ng minor injuries at ligtas nang nakabalik sa Maynila noong Agosto 23.

Nakatakdang maiuwi sa Pilipinas ang mga labi ni Cortes sa Agosto 30. Nangako ang MECO na tutulong sa kanyang pamilya.

5 sasakyan, inararo ng trak sa flyover

ni Mai Ancheta @News | August 10, 2023

Nagkabuhol-buhol ang daloy ng trapiko sa kahabaan ng Aurora Boulevard flyover sa Pasay City matapos araruhin ng 10-wheeler truck ang limang sasakyan na nasa unahan nito, Martes ng gabi.

Sa imbestigasyon ng Pasay Traffic and Parking Management Office, patungo sa Bacoor, Cavite ang trak at habang nasa flyover ay bigla umano itong nawalan ng preno at dumausdos kaya nabangga ang mga sasakyang nasa unahan.

Ayon naman sa pahinante ng trak na si JR David, maayos ang kundisyon ng kanilang trak bago bumiyahe mula sa Pampanga.

Nagtamo ng mga bahagyang sugat ang mga pasahero ng mga sasakyan habang na-trauma ang ilan. Mahaharap naman sa kaukulang kaso ang driver ng truck na hindi pinangalanan.

133 sasakyan, nagbanggaan: 6 patay, 65 sugatan

ni Lolet Abania | February 13, 2021

• 

• 

Anim ang namatay habang 65 ang sugatan matapos na magsalpukan ang mga sasakyan sa isang highway sa Texas, USA.

Pahirapan ang pagsagip ng mga rescuers sa mga naipit na biktima sa halos 133 sasakyan na nagkarambola kabilang ang mga trailer trucks na nangyari sa North Texas Express toll lanes ng Fort Worth kahapon nang umaga, ayon sa report ng Reuters.

Ayon pa sa ulat, madulas ang kalsada dahil sa mga pag-ulan habang sinabayan pa ng malamig na panahon na ilang araw nang nararanasan sa nasabing lugar, kung saan sinasabi rin ng mga firefighters na dahilan ng naganap na “mass casualty incident.”

Sa dami ng mga nagkapatung-patong na sasakyan, kinailangan pang gumamit ng mga hydraulic rescue equipment ng mga rescuers upang mailigtas ang mga naipit na mga biktima.

Agad na dinala ang 65 na mga sugatan sa pinakamalapit na ospital. Lahat ng lanes sa Interstate 35W ng Forth Worth sa hilagang bahagi ng lugar ay pansamantalang isinara.