3-0 na ang Gilas Pilipinas, 'di nakaporma ang Thailand

ni VA - @Sports | December 2, 2020

Muling nagpamalas ng matinding laro ang mga miyembro ng Gilas Pilipinas para talunin ulit ang koponan ng Thailand , 93-69, noong Lunes ng gabi sa FIBA Asia Cup 2021 qualifiers sa Manama, Bahrain.

Nagawang walisin ng Pilipinas ang dalawa nitong laro sa second window sa loob ng Bahrain bubble.Dahil dito, nangingibabaw na ngayon ang Gilas Pilipinas sa Group A taglay ang malinis na kartadang 3-0, panalo-talo kasunod ang South Korea (2-0) na hindi lumahok sa bubble.

Namuno si Javi Gomez de Liaño sa naturang panalo ng Gilas sa iniskor nitong 19 puntos kabilang na dito ang ipinukol nyang apat na 3-pointers kasunod ang kanyang nakababatang kapatid na si Juan na nagtala ng 14 puntos, at tig-4 na rebounds at assists at si Dwight Ramos na may 13-puntos, 5-rebounds at 2-assists."Since the lead we had in the first game was very big, we were concerned that they might take the game for granted," pahayag ni Gilas coach Jong Uichico. "We really harped on executing the offense and playing better defense."

"Thailand played a better game today than they did in the first game," dagdag nito.

Ang natatanging 'di magandang pangyayari sa kampanya ng Gilas sa second window ay ang pagka-injured ni Matt Nieto na sinamang palad na dumanas ng "twisted ankle" sa third quarter ng kanilang ikalawang laban.

Samantala, sanhi ng magandang laro na kanilang ipinakita, lahat ng 14 na miyembro ng Gilas Pilipinas squad na naglaro sa Bahrain bubble ay kasama na sa mga pagpipilian upang bumuo sa koponang isasabak sa third window ng qualifiers sa darating na Pebrero.

Young Gilas Pilipinas team sasabak na sa FIBA Asia Cup

ni VA / Anthony E. Servinio - @Sports | November 21, 2020

Huhugot ng positibong enerhiya mula sa mga kabataan na magbubuo ng Gilas Pilipinas sa darating na 2021 FIBA Asia Cup Qualifiers sa Manama, Bahrain mula Nobyembre 26 hanggang 30. Lilipad na papuntang Gitnang Silangan ang koponan bukas sa pamumuno ni Coach Joseph Uichico matapos ang mabilisang paghahanda sa Inspire Sports Academy sa Calamba City, Laguna.

Binubuo ang pambansang koponan ng mga PBA rookie draftees Isaac Go, Rey Suerte, Allyn Bulanadi, Mike Nieto at Matthew Nieto at mga pambato ng kolehiyo sa pangunguna ni NCAA Most Valuable Player Calvin Oftana at Kenmark Carino ng San Beda University, Angelo Kouame, Dwight Ramos, Dave Ildefonso at William Navarro ng Ateneo de Manila University, JD Tungcab, Javi Gomez de Liano, Juan Gomez de Liano at Kobe Paras ng University of the Philippines-Diliman at Justine Baltazar ng De La Salle University. Magsisilbing assistant coaches sina Boyet Fernandez ng San Beda at dating NBA player Alton Lister habang kasama si Coach Tab Baldwin ng Ateneo bilang Gilas Program Director.

Matagal nang nasa plano ng Samahang Basketbol ng Pilipinas (SBP) na imbitahin ang mga kabataan para sa Gilas, nagkataon lang na maraming suliranin bunga ng kasalukuyang krisis sa kalusugan na pumigil sa pagsimula ng ensayo ng mas maaga. Nagpasalamat si SBP President Al Panlilio sa Inter-Agency Task Force, Philippine Sports Commission at Department of Foreign Affairs sa kanilang tulong upang matuloy ang paglahok ng Gilas sa Bahrain.

Ipinaliwanag ni Panlilio na hindi na nila pinatawag ang mga manlalaro ng mga koponan na tapos na ang kampanya sa PBA Philippine Cup. Malaki ang sakripisyo na ginawa ng mga pro sa mahigit isang buwan sa loob ng PBA bubble kaya minabuti ng SBP na pahingahin muna sila.

Ayon kay Coach Baldwin, mas mahalaga na magkaroon muna ng chemistry ang koponan bago sila tumuloy sa mga estratehiya. Dalawang beses sa isang araw ang kanilang ensayo subalit isa sa kanilang suliranin ang pagkakaroon ng walang katiyakan kung sino ang makakalaro nila.

Nagpahiwatig ang Timog Korea na hindi sila pupunta sa mga laro bunga ng pangamba sa COVID-19. Bigla rin nagbago ang kalendaryo at may sinisingit na laro kontra Indonesia na dapat ay sa Pebrero, 2021 pa gaganapin.

Ang sigurado pa lang ang dalawang laban kontra Thailand, kasama 'yung naudlot noong nakaraang Pebrero na dapat sa Pilipinas gaganapin. Bukas naman ang Gilas na laruin ang Indonesia subalit kailangang malinaw kung ito ay opisyal na laro o ensayo lang.

Kasama sa biyahe ang lahat ng 16 na manlalaro, pati si Kouame na nakabinbin pa rin sa Senado at Kongresso ang panukalang batas na gagawin siyang isang mamayanan ng Pilipinas. Kung sakali, handa ang Gilas na maglaro na puro Pinoy kung hindi maipasa ang batas.

Dagdag si SBP Chairman Emeritus Manuel V. Pangilinan na talagang isinulong ng FIBA na matuloy ang mga laro sa Bahrain dahil matagal nang walang Basketball sa buong mundo. Nag-alok din ang Pilipinas na maging punong abala para sa ikatlo at huling yugto ng mga laro ngayong Pebrero, 2021.

Samantala, ipaglalaban ng SBP sa FIBA na payagan ang mga manlalaro na hindi nakakuha ng pasaporteng Filipino bago mag edad 16 na maglaro bilang ganap na Filipino at hindi bibilangin bilang naturalized citizen. Ito ay sa gitna ng mga ulat na pinayagan ng FIBA ang 27 anyos na Indonesian-American forward Brandon Jawato na maglaro sa Bahrain bilang lokal na manlalaro kasama ang kanilang naturalized player na si Lester Prosper na dating PBA import ng Columbian Dyip at San Miguel Beer.

'Pinas, silver medalist sa FIBA ESports Open II ng Asya

ni VA / Anthony E. Servinio - @Sports | November 17, 2020

Binigo ng Australia ang E-Gilas Pilipinas para mauwi ang kampeonato ng Timog Silangang Asya at Oceania sa pagpaptuloy ng 2020 FIBA ESports Open II noong Linggo ng gabi. Winalis ng mga Australyano ang seryeng best of three sa pamamagitan ng magkasunod na walang dudang 62-54 at 69-54 na tagumpay upang patumbahin ang mga Pinoy.

Pareho ang kuwento ng dalawang laban kung saan hindi agad natumbasan ng mga Pinoy ang enerhiya at gana ng kalaban sa simula at lumayo agad ang Australia. Nagawa na bawasan ang lamang subalit kinapos ng oras.

Nagtapos ang Pilipinas na numero uno matapos ang elimination round na may kartadang 5-1 panalo-talo. Bago ang serye, dinagdag nila ang dalawa pang tagumpay kontra sa walang panalong Indonesia, 54-49, at Australia, 76-45.

Tila ibang koponan ang naglaro para sa kampeonato at hindi nila malampasan ang mahigpit na depensa ng Australia. Hindi din nakatulong na umasim ang kanilang mga tira lalo na mula sa three-points na paborito nilang sandata sa dalawang araw ng torneo.

Tinutukan ng depensa si point guard Aljon Cruzin na angat-angat ang laro noong elimination round. Dahil dito, nag-doble kayod ang buong koponan na lumikha ng puntos sa likod nina Philippe Herrero IV, Clark Banzon, Rial Polog at Custer Galas.

Pinili ang 18-anyos na si Benjamin Klobas bilang Most Valuable Player at gagawaran siya ng bagong mamahaling relos. Ang iba pang mga kasapi ng Australia ay sina kapitan Max Ellwood, Cooper Cameron, Cameron Sloper, Kyle Vassalloo at Jonte Burns.

Sa ibang mga laro, nananatili sa Saudi Arabia ang kampeonato ng Gitnang Silangan matapos ng kanilang seryeng best of seven sa Lebanon, 4-1. Tinanghal ang Cote d’Ivoire na unang kampeon ng Aprika matapos walisin ang Gabon, 4-0.

Magbabalik ang FIBA ESports Open II sa Disyembre 12 at 13 sa tapatan ng 18 bansa ng Europa. Susunod dito sa Disyembre 19 at 20 ang pinagsabay na mga torneo para sa Hilaga at Timog Amerika.