Pagbabakuna sa Tokyo at SEAG delegates, sisimulan na

ni Gerard Peter / VA - @Sports | May 24, 2021

Kasunod ng pag-apruba ng Inter Agency Task Force on Emerging Infectious Disease (IATF-EID) na maisama sa mga prayoridad ang national athletes at coaches na sasabak sa Tokyo Olympics at 31st SEAG na mabigyan ng bakuna, hindi na magpapatumpik-tumpik pa ang Philippine Olympic Committee (POC) na gawin agad ang hakbang para sa parehong delegasyon.

Inanunsiyo ni POC President Abraham “Bambol” Tolentino na isasagawa na ang agarang pagbabakuna sa lahat ng Olympics at SEA Games bound na athletes, coaches, officials, media at lahat ng kasama sa dalawang malaking kompetisyon sa Biyernes sa Manila Prince Hotel sa San Marcelino sa Ermita, Manila.

“Inaprubahan na rin ang ating vaccination day sa Friday, exclusive for Olympic (bound) at SEAG (bound) delegates, maghapon iyon, kasama ang lahat ng coaches, athletes, officials, media, journalists, lahat ng bound for Tokyo and SEA Games na nandito sa Manila within that day,” pahayag ni Tolentino, kahapon ng umaga sa weekly PSA Forum webcast. “Kailangang makipag-coordinate na sa POC para maibigay na namin iyong total persons na darating sa Biyernes,” dagdag ng sports official, matapos maaprubahan ang ipinadalang sulat ng national Olympic body noong Mayo 18 sa IATF na gawing prayoridad ang mga Tokyo at SEAG bound delegates.

Tugon ang hakbang na ito sa ipinalabas na kautusan ng Vietnam Southeast Asian Games Organizing Committee na magpapatupad sila ng “No vaccine, No participation” policy sa lahat ng delegasyon ng 11 bansa sa darating na biennial meet.

“Karugtong ito ng announcement ng Vietnam na “No Vaccine, no Participation” Policy, so pasalamat po tayo sa national government na inapronahan iyon, iyong request na mabakunahan na. So with that, yung Olympic bound, kakaunti lang naman iyon, all Vietnam bound, maybe less than a thousand or more, definitely sasabak tayo sa Vietnam because of that vaccination policy,” paglalahad ng 57-anyos na pinuno rin ng Integrated Cycling Federation of the Philippines (PhilCycling).

Kiamco, naghari sa Illinois classic 9-Ball

ni VA / Eddie M. Paez Jr. - @Sports | May 25, 2021

Nagkampeon si Filipino cue master Warren Kiamco sa 9-Ball mini event ng 2021 Racks On The Rocks Classic na ginanap noong Linggo sa West Peoria, Illinois

Ipinoste ni Kiamco ang dikit na 9-7 panalo kontra sa kababayang si Roland Garcia sa naganap na All-Filipino championship match para maangkin ang titulo. Nakopo ni Kiamco ang top prize na $3,300 habang nakamit naman ni Garcia ang runner-up prize na $2,200. Hindi naman sinuwerte sa 8-Ball event si Kiamco makaraang tumapos lang na pangwalo para sa karagdagang premyong $300 habang nagtapos pang-apat si Garcia at nag-uwi ng dagdag na $700 premyo. Ang panalo ikalawang sunod na panalo ni Kiamco sa buwang ito kasunod ng panalo nya sa Diveney Cues Bar Box Classic 10-Ball Division sa East Moline, Illinois noong sinundang linggo at ikatlo sa taong ito kabilang na ang naunang 5th Annual Barry Behrman Memorial Spring Open 9-Ball noong nakalipas na buwan.

Bubuo na ang Gilas women ng malakas na team pa-SEAG

ni VA - @Sports | May 21, 2021

Uumpisahan na ng Gilas Pilipinas Women ang pagbuo ng isang malakas na koponan na isasabak sa mga darating na international tournaments gaya ng FIBA Women’s Asia Cups at 31st Southeast Asian Games. Kabalikat ang Fil-Am Nation Select, magdaraos ang Gilas Women’s ng tryout para sa seniors’ squad sa Hunyo 4-5 sa La Verne, California. “Partnering with Fil-Am Nation allows for us to build a connection; and most importantly, relationship with the Fil-Am coaches and, of course, players so that we can build a bridge, and more players would be eligible to play for their country,” pahayag ni Gilas Women’s head coach Patrick Aquino. Nasa Estados Unidos ngayon si Aquino para tulungan si Jack Animam na maiayos ang pagti- training nito sa East West Private. Pangungunahan ang kabuuang 27 players na inimbitahan para lumahok sa tryout nina Mai-Loni Henson at Chanelle Molina.

Kabilang sa paghahandaan ng Gilas Women's ang darating na FIBA Asia Women’s Cup na nakatakdang ganapin sa Setyembre 26-Oktubre 3; ang FIBA 3×3 Asia Cup at 31st Southeast Asian Games sa Hanoi sa Nobyembre. Naimbita rin sa tryout sina Ella Fajardo at ang Sacramento State product na si Gabi Bade gayundin ang mga centers at power forwards na sina 6-foot Lexi Marks ng Boise State; 5-foot-10 Malia Bambrick ng Pepperdine; 5-foot-10 Kiera Oakry ng UC San Diego; 5-foot-10 Kayla Revelo ng University of Hawaii-Hilo at 5-foot-9 Kayla Padilla ng Pepperdine. Ang iba pang mga inimbita ay sina Vanessa De Jesus ng Duke, Aurea Gingras ng George Washington, Mel Isbell ng New Mexico State, Lei McIntosh ng UC Berkeley, Gabby Rones ng Nevada, Angie Villasin ng North Park, Jessica Malzarte ng Frezno Pacific, Janelle Ganer ng St.Thomas, Lynette Garon ng Southwest at iba pa.

Samantala, inaasikaso ng Fil-Am Nation founder na si Cris Gopez ang mga kinakailangang "compliance requests" para sa bawat player dahil ayon sa isinasaad ng NCAA rules na kailangan munang aprubahan ng kanilang eskuwelahan ang partisipasyon ng kanilang student-athlete sa national team tryouts.