Surban at Dormitorio, nagpasiklab sa Danao Cycling

ni VA - @Sports | June 16, 2021

Nangibabaw ang mga beteranong sina Nińo Surban at Ariana Dormitorio sa kani-kanilang event habang dalawang kabataan ang nagpamalas ng potensiyal noong nakaraang wéekend sa idinaos na PhilCycling National Trials para sa mountain bike sa Danao City, Cebu. Nagwagi ang men’s cross-country silver medalist noong 2019 Southeast Asian Games na si Surban sa 6-lap,3-km track sa Sitio Bugho sa Barangay Sandayong Sur at inangkin ang gold medal sa tiyempong isang oras, 22 minuto at 11.21 segundo. Sinundan siya ni Jericho Rivera na nakatawid sa uphill finish line dalawa at kalahating minuto ang lumipas pagkatapos ni Surban at pangatlo si Mark Louwel Valderama na naiwan ng mahigit 3 minuto. Natapos naman ni Dormitorio ang mas maigsing 5 lap,3-km loop race para sa kababaihan sa tiyempong 1:29:50.75. Pumangalawa ang baguhang si Nicole Quinones, anak ni 2003 Vietnam Seagames Men’s MTB gold medalist Eusebio Quinones at inuwi ang silver medal sa kanyang unang pagsabak sa Women’s Elite race pagkaraang maorasan ng 1:42:12.89.Sumunod sa kanya si Pamela Jane Ruiz na nagkamit ng bronze sa naitala nitong oras na 1:48:25.24. “Cycling is back,” wika ni PhilCycling head Rep. Abraham “Bambol” Tolentino na siya ring presidente ng Philippine Olympic Committee. “It’s more than a year since we have an official and this competition in Danao City marks our sport’s return.” “The results showed our cyclists stayed in competitive form even during the pandemic. Everyone wanted to return to action,”pahayag naman ni Oscar “Boying” Rodriguez, ang PhilCycling vice chairman at MTB commission head na kasalukuyan ding chairman ng Danao City Sports Commission. Dalawa namang kabataang siklista ang kinakitaan ng potensyal na mapabilang sa national team. Una na rito si Gart Gaerlan na nanalo sa Men’s Junior race (four laps, 12.4 kms) sa tiyempong 1:03.27.73 at si Athena Marie Magpantay, ang Batang Pinoy champion sa Puerto Princesa noong 2018 na nanguna naman sa Women’s Junior category sa oras na 1:11:11.44. Ang susunod na idaraos ng PhilCycling ang National Trials For Road sa Hulyo 9 at 10 sa Clark, Pampanga.

Gilas Center 'Ange' Kouame may Philippine Passport na

ni VA - @Sports | June 06, 2021

Ganap ng naisyuhan ng kanyang Philippine passport bilang naturalized center ng Gilas Pilipinas si Angelo Kouame. Ang pasaporte ang dokumento na siyang magbibigay kay Kouame ng pagkakataon para makapaglaro kasama ng Gilas Pilipinas sa huling window ng FIBA Asia Cup Qualifiers sa darating na Hunyo 16 - 20 sa Clark, Pampanga. Ang Bureau of Immigration ang nag-release ng pasaporte ni Kouame noong Miyerkules, tatlong linggo pagkaraang lagdaan ni Pangulong Rodrigo Duterte at ganap na naging batas ang Republic Act 11543 na naggawad ng naturalization sa 6-foot-10 slotman na nagmula sa Ivory Coast. Bukod sa FIBA Asia Cup, nakatakda ring palaruin ng Samahang Basketbol ng Pilipinas sa FIBA Olympic Qualifying Tournament (OQT) sa Serbia, 19th Asian Games sa China at FIBA World Cup na gaganapin sa bansa sa 2023 si Kouame. Umaasa ang SBP na makakatulong ng malaki si Kouame sa Gilas squad na pamumunuan nina Dwight Ramos, Isaac Go, Mike at Matt Nieto, Jordan Heading, Tzaddy Rangel at Will Navarro. “I am happy for Ange,” pahayag ni Gilas head coach Jong Uichico na mayroon pang inaasahang isang reinforcement sa katauhan ni Kai Sotto na dumating mula US para maglaro sa National men's basketball team. Kasalukuyan pa ring nasa training bubble sa loob ng Inspire Sports Academy sa Calamba ang Gilas at nakatakda silang magtungo sa Clark sa Hunyo 13.

Obiena, sakalam talaga, naka-gold sa Sweden

ni VA / Gerard Peter - @Sports | June 04, 2021

Patuloy sa kanyang masugid na preparasyon para sa nalalapit na Tokyo Olympics sa gitna ng pandemya ang Filipino pole vaulter na si EJ Obiena.

Sa huling kompetisyon na kanyang nilahukan, nakopo ni Obiena ang gold medal sa Folksam Grand Prix-Goteborg 2021 sa bansang Sweden. Nagawang matalon ni Obiena ang baras na may taas na 5.70 meters sa una niyang attempt upang makamit ang gold medal.

Tinalo niya si reigning Olympic gold medalist na si Thiago Braz ng Brazil na nagkasya lamang sa silver sa naitala nitong 5.65 metérs. Pumangatlo sa kanila si Paul Haugen Lillefosse ng Norway na nakapagtala ng 5.60 meters.

Nagtangka pa si Obiena na talunin ang baras na itinaas sa 5.80 meters ngunit bigo siya sa kanyang tatlong attempts habang nangabigo rin sina Braz at Lillefose sa tangka nila na matalon ang taas na 5.75 meters.

Samantala, umaasa pa rin si Philippine Olympic Committee (POC) President Abraham “Bambol” Tolentino na aabot sa 20 national athletes ang maipapadala ng bansa sa 2021 Tokyo Olympics kasunod ng panibagong tagumpay ni taekwondo jin Kurt Barbosa sa Asian Olympic Qualifying Tournament nitong nagdaang weekend.

Tiwala ang kinatawan ng ika-8th district ng Cavite na malalampasan na ng bansa ang 13 national athletes na naipadala sa 2016 Rio Olympics, kung saan nagwagi ang Pilipinas ng silver medal mula kay women’s under-53kgs weightlifter Hidilyn Diaz.

Kabilang sa mga Olympian na nakipaglaban sa Rio Olympics ay sina 6-time Southeast Asian Games gold medalist Eric Shauwn Cray, 2017 SEAG marathoner champion Mary Joy Tabal, Long-jump queen Marestella Torres-Sunang, boxers Rogen ladon at Charly Suarez, golfer Miguel Tabuena, Judoka Kodo Nakano, swimmers Jesse Lacuna at Jasmine Alkhaldi, table tennis Ian Lariba, taekwondo jin Elaine Kirstie Alora, at weightlifter Nestor Colonia. “Ang laki ng nawala dun sa mga atletang kabilang sa 20 na target nabawasan na tayo, pero in spite of that, nagdadasal pa rin ako na maaabot sa 20, but definitely malalagpasan na natin yung 13,” paliwanag ni Tolentino.