Kai Sotto, may tsansa nang maglaro sa Gilas

ni VA @Sports | July 19, 2023

Taliwas sa mga naunang ulat, may tsansang maglaro si Kai Sotto para sa Gilas Pilipinas sa darating na FIBA World Cup.

Ayon kay Gilas coach Chot Reyes, inaasahan ang pagdating sa bansa ng 7-foot-3 big man kahapon-Martes (Hulyo 18) mula sa pagtatapos ng stint nito sa Orlando Magic sa NBA Summer League.

Gayunman, ani Reyes ay hindi niya alam kung magpapakita ito sa kanilang ensayo. “Whether he comes to practice or not, I have no idea.”

Nagkaroon ng pagdududa kung makakasama si Sotto sa paghahandang ginagawa ng Gilas para sa FIBA World Cup pagkaraang mapabalitang nagtamo ito ng back injury sa pagtatapos ng kanyang paglalaro sa NBA Summer League.

Ngunit ayon kay Reyes sinabi sa kanya ni Tony Ronzone, ang manager ni Sotto sa Wasserman, na walang anumang seryosong injury ang Filipino slotman.

“Ronzone said that all the x-rays came back negative, so that is good news. But I have not had the chance to talk to Kai himself,” ani Reyes.

Dahil sa kanyang stints sa National Basketball League, Japan B. League at Summer League, inaasahang malaki ang maitutulong ni Sotto sa kampanya ng Pilipinas sa World Cup.

Patuloy ang training camp sa Meralco gym hanggang sa katapusan ng Hulyo, nakatakdang tapusin ng Gilas Pilipinas ang preparasyon nila sa World Cup sa pamamagitan ng paglalaro sa isang pocket tournament sa China sa unang linggo ng Agosto kung saan inaasahan na makakasama na nila si Sotto.

Sotto, bomalabs sa Gilas 2023 FIBA dahil na-injured

ni VA @Sports | July 17, 2023

Posibleng hindi makalaro para sa Gilas Pilipinas sa darating na 2023 FIBA Work Cup si Kai Sotto.

Ito'y pagkaraan niyang ma- injured sa pagtatapos ng kanyang stint sa NBA Summer League kahapon ng umaga (Manila time). Sanhi ng nasabing injury, tumagal lamang si Sotto nang mahigit walong minuto matapos siyang ipasok sa first half.

Inilabas siyang scoreless na may natitira na lamang 5:35 na oras sa second period at hindi na nakabalik. Walang naipasok si Sotto sa tatlo niyang field goal attempts.

Nakapag-ambag lang sya ng dalawang rebounds at tig-isang assist at shotblock sa nasabing 77-94 na kabiguan ng Magic sa Celtics.

Nabigo siyang mahigitan ang impresibo niyang laro nang una siyang gamitin kamakalawa kontra Portland kung saan nagposte siya ng 6 na puntos, 4 na rebounds, 3 blocks at isang assist sa loob ng mahigit 13 minuto sa loob ng court.

Wala pang plano kung ano ang susunod na hakbang ni Sotto ayon sa handler nito na si Tony Ronzone maliban sa uuwi ito ng Pilipinas sa Miyerkules.

Dahil sa napakaikling exposure na ibinigay sa kanya, posibleng maapektuhan ang tsansa ni Sotto na mabigyan ng offer para maglaro sa NBA.

At kung hindi makakuha ng offer para maglaro sa NBA, maaaring ituloy na lamang ni Sotto ang paglalaro para sa Hiroshima Dragonflies sa Japan’s B. League.

Filipino nationality kay Sanchez, aprub na ng World Aquatics

ni VA @Sports | July 10, 2023

Inaprubahan ng World Aquatics-ang international federation para sa water sports ang pagpapalit ng swimmer na si Kayla Noelle Sanchez ng kanyang nationality mula Canadian sa pagiging Filipino noong nakaraang Huwebes.

“The World Aquatics has approved the request for the sport nationality’s change of the Athlete [Sanchez], born on 7 April 2001, in the Aquatics sports of Swimming, from Canada (CAN) to Philippines (PH),” pahayag ni World Aquatics legal counsel Loic Loutan sa isang liham na may petsang Hulyo 4 na ipinadala nila sa Philippine Olympic Committee (POC).

“Therefore, the Athlete is entitled to represent Philippines (PHI) in international competitions from 6 July 2023 onwards,” dagdag nito.

Mismong si POC president Abraham “Bambol” Tolentino ang tumutok sa pagpapalit ng nationality ni Sanchez maging ang pagkumpleto nito sa isang taon na residency requirement.

“Finally, the good news,” ani Tolentino. “The country now has a very strong anchor in its national swimming team.”

Si Sanchez na Ang mga magulang ay tubong Pampanga, ay opisyal na sasalang sa paglangoy para sa Pilipinas sa darating na 19th Asian Games sa Setyembre 23 hanggang Oktubre 8, 2023 sa Hangzhou, China.

Hindi na sIya lalahok sa World Aquatics Championships na gaganapin sa Hulyo 14 - 30 sa Fukuoka, Japan para makapag-focuS sa kanyang preparasyon para sa Asian Games.

Lumaki sa Canada, nagwagi si Sanchez ng silver medal sa 4x100m freestyle relay at bronze sa 4x100m medley relay bilang miyembro ng Canadian team noong 2020 Tokyo Olympics.

Nagwagi rin sIya ng tatlong gold medals para sa Canada sa world championships.