Magbayaw, pinagbabaril, 1 patay

ni Thea Janica Teh | October 16, 2020

Patay ang isang lalaki matapos itong pagbabarilin sa sariling tahanan sa Bgy. 138 Balut Tondo, Maynila nitong Huwebes nang gabi.

Ayon kay Victor Hepte, Jr. na chairman ng Bgy. 138, sakay ng SUV at may suot na mask at sumbrero ang mga suspek.

Alas-8 ng gabi nang pagbabarilin ng mga hindi pa nakikilalang suspek si Alfredo Roy Elgarico sa kanyang bahay sa Younger Street. Kasama ng biktima ang kanyang bayaw na si Jay-r Castolome.

Sugatan si Castolome nang una itong barilin ng mga suspek. Tinulungan ni Elgarico ang bayaw na siya namang naging dahilan kung bakit siya ang pinagbabaril ng mga suspek.

Umabot sa 12 basyo ng 9 mm at kalibre 45 ang nakuha sa crime scene.

Wala umanong alam ang pamilya kung ano ang motibo sa pagpatay sa kanilang kaanak ngunit, nagkaroon na umano ng kaso ang dalawa kaugnay sa droga at ilegal na baril.

Kuwento pa ni Roylyn Elgarico na asawa ng biktima at kapatid ng sugatan, napagbintangan ang magbayaw na naghagis ng granada sa Raxabago Police Station.

Nakulong ito noong 2014 ngunit agad ding na-dismiss ang kaso.

Sa ngayon ay tatlong suspek ang pinaghahanap ng mga pulis.

Reno liver spread, balik-merkado na

ni Thea Janica Teh | October 16, 2020

Babalik na sa merkado ang sikat na liver spread na Reno matapos mabigyan ng certificate of product registration ng Food and Drug Administration (FDA) ngayong Biyernes.

Ayon kay FDA Head Eric Domingo, sa loob ng dalawang linggo ay nakumpleto na at naipasa na ng manufacturer ng Reno ang mga kulang nitong dokumento.

Matatandaang noong Setyembre ay ipinagbawal sa publiko ang pagbili ng liver spread matapos makita na hindi pa ito rehistrado sa FDA.

Sa ilalim ng Regulatory Law, kinakailangan ng mga food processors ang 2 klase ng authorization upang masiguro ang kalidad ng kanilang produkto pati na rin ang regulatory standard ng kumpanya.

Sa Reno Foods Incorporated, tanging ang License to Operate (LTO) permit as food repacker lamang ang mayroon sila noon.

4 patay sa banggaan ng ambulansiya at truck sa Quezon

ni Thea Janica Teh | October 14, 2020

Apat sa pitong nakasakay sa ambulansiya ang namatay matapos bumangga sa isang ten-wheeler truck sa Quirino Highway sa Tagkawayan Quezon nitong Miyerkules nang umaga.

Ayon sa inisyal na imbestigasyon ng awtoridad, galing umano sa Gubat, Sorsogon ang ambulansiya papuntang Bulacan nang mabangga ito sa isang ten-wheeler truck na galing naman sa Maynila papuntang Naga City.

Parehong sira ang unahan ng mga sasakyan dahil sa lakas ng impact.

Patay agad ang driver ng ambulansiya pati na rin ang kasama nitong nakaupo sa harap.

Kuwento ng isa sa personnel ng Tigkawayan Municipal Disaster Risk Reduction and Management Office (MDRRMO) at Bureau of Fire Protection (BFP), nahirapan umano ang mga rescuer dahil mga naipit sa steel frame ang mga pasahero ng ambulansiya.

Ilan pa sa mga namatay sa insidente ang isang bata at isa pang pasahero na nadala pa sa Maria L. Eleazar Memorial District Hospital ngunit pumanaw din.

Isa pang babaeng pasahero ng ambulansiya ang nasa kritikal na kondisyon habang ang dalawa naman na nasugatan ay nagpapagaling na sa ospital.

Ayon sa Tagkawayan Municipal Police Station official, ang may kasalanan sa insidente ay ang driver ng truck dahil umabot ito sa opposite lane na naging dahilan ng pagbangga.

Samantala, tumanggi naman ang truck driver at sinabing ang driver ng ambulansiya ang may kasalanan dahil dumaan umano ito sa kanilang linya.

Sa ngayon ay patuloy ang imbestigasyon ng mga pulis sa nangyaring insidente.