Sunud-sunod na pagpapatalsik sa mga lider... Thailand, nagbukas uli ng halalan

by Jenny Rose Albason @Overseas News | February 10, 2026

Photo FIle: Thai-PBS

Muling nagbukas ang mga presinto sa Thailand nitong Linggo para sa isang krusyal na halalan, habang patuloy na sinusubukang bumangon ng bansa mula sa sunud-sunod na pagpapatalsik sa mga lider at pagbuwag sa mga partidong pulitikal sa loob lamang ng nakalipas na dalawang taon.

Kabilang sa mga pangunahing hamon na kakaharapin ng susunod na pamahalaan ang matamlay na ekonomiya, ang tensiyon sa border laban sa Cambodia, at ang lumalalang banta ng mga transnational cyberscam network sa Timog-Silangang Asya.

Sa loob ng huling dalawang taon, nasaksihan ng Thailand ang mabilis at madalas na pagpapalit ng liderato bunsod ng mga desisyon ng korte at pagbagsak ng mga koalisyon sa gobyerno.

Photo File: Lillian Suwanrumpha / AFP

Si Srettha Thavisin ng Pheu Thai Party ay naupo bilang punong ministro noong Agosto 2023 matapos ang halalan kung saan hinarang ng Senado ang panalo ng Move Forward Party. Gayunman, pinatalsik siya ng Constitutional Court noong Agosto 2024 dahil sa isyu ng etika kaugnay ng kanyang pag-appoint ng isang opisyal.

Pumalit sa kanya si Paetongtarn Shinawatra, bunsong anak ng dating punong ministro na si Thaksin Shinawatra at miyembro rin ng Pheu Thai Party. Naupo siya noong Agosto 2024 ngunit napatalsik din ng korte makalipas lamang ang ilang linggo.

Noong Setyembre 2024, si Anutin Charnvirakul ng Bhumjaithai Party ang naging kasalukuyang punong ministro matapos makuha ang suporta ng parlamento kasunod ng pagbuwag ng mga naunang alyansa. Siya ang ikatlong lider ng Thailand sa loob lamang ng dalawang taon.

Sa ilalim ng konstitusyong binuo ng militar noong 2017, nananatiling makapangyarihan ang mga hindi inihahalal na institusyon tulad ng Senado at ng Constitutional Court, na patuloy na may malaking impluwensiya sa pulitika ng bansa.

Sa kasalukuyang halalan, inaasahan ang panibagong matinding negosasyon sa pagitan ng mga partido, dahil malabo pa ring may makakuha ng ganap na mayorya sa gitna ng kontroladong sistemang pulitikal ng Thailand.

Cannabis para sa bisyo, ipagbabawal sa Thailand

ni Eli San Miguel - Trainee @News | February 6, 2024

BANGKOK, Thailand - Nagpaplano ang gobyerno ng Thailand na agad na maipasa ang isang batas upang pigilin ang mga tao mula sa paggamit ng cannabis para sa bisyo o paglilibang.

Sumunod ang desisyong ito matapos na gawing legal ang cannabis noong 2022.

Maraming tindahan ng cannabis ang nagbukas, lalo na sa Bangkok, na nakababahala sa ilang mga tao na nais ng mas mahigpit na mga patakaran.

Sinabi ng health minister na si Chonlanan Srikaew nitong Martes na isang bagong panukalang batas na nagbabawal sa recreational use ng cannabis ang ihaharap sa susunod na linggo sa pulong ng kabinete.

“The new bill will be amended from the existing one to only allow the use of cannabis for health and medicinal purposes,” pahayag ni Srikaew sa mga reporteers.

Madalas na nagpapahayag si Prime Minister Srettha Thavisin, na umupo sa puwesto noong nakaraang Agosto, tungkol sa kanyang pagtutol sa recreational use ng droga at sinabi na dapat lamang itong payagan para sa medisinal na gamit.

Thai drug dealer, timbog

ni Mabel Vieron (OJT) | March 4, 2023

Ni-raid ng Thai investigative police ang isang condo sa suburb ng Bangkok na tinataguan umano ng isang smuggler ng droga na ilang buwan nang tumakas.

Kinilala ang suspek na si Saharat Sawanjaeng, 25, isang Thai national at residente ng Bangkok.

Ayon sa pulisya, sumailalim sa maraming plastic surgery ang suspek hanggang sa hindi na ito makilala.

Si Sawanjaeng ay pinaghahanap mula noong nakaraang taon dahil sa umano'y pag-import ng higit sa 2,500 gramo at 290 tablet ng MDMA.

Umamin umano si Sawanjaeng sa pagkakaroon ng worldwide connections, na kinasuhan ito ng habambuhay na pagkakulong dahil sa pag-import at ilegal na pamamahagi nito sa Thailand.