Mataray at suplada raw, kinatatakutan… HILDA, NAGWO-WALKOUT SA SHOOTING ‘PAG LATE ANG CO-STAR

ni Erlinda Rapadas @Teka Nga | Apr. 24, 2025

Photo: Hilda Koronel - IG

Dahil isa si Hilda Koronel sa mga itinuturing na magaling na aktres sa Philippine Cinema, anytime na gusto niyang gumawa ng pelikula ay may puwang siya sa showbiz. 

Maraming movie producers ang interesadong kunin siya upang magbida sa kanilang pelikula.

Kahit matagal siyang nagpahinga sa pagharap sa kamera ay hindi bumababa ang kanyang stature bilang aktres. Mataas pa rin ang ibinibigay na talent fee (TF) kay Hilda at nasusunod ang kanyang mga demands.

Namimili rin ang aktres ng project na gusto niyang gawin. At isa na nga rito ay ang Sisa, kaya siya umuwi ng ‘Pinas para gawin ang pelikula. 

At kahit madalang na siyang lumabas sa pelikula, marami pa rin ang nag-aabang sa kanyang mga projects dahil may kakaibang tatak ang kanyang mga ginagawa. 

Marami nga ang nanghihinayang dahil hindi natuloy ang movie na pagsasamahan sana nila ng yumaong Superstar/National Artist na si Nora Aunor. Gustung-gusto pa naman ni Hilda na makatambal si La Aunor.

Pagdating sa trabaho ay very professional si Hilda Koronel. Dumarating siya sa set on time kaya kapag may co-stars siyang nale-late sa call time, talagang nagwo-walkout siya. 

Minsan kasi ay 6 na oras siyang pinaghintay sa set ng isang artista kaya nilayasan niya ang shooting. Kaya marami ang natatakot na siya ay makasama sa trabaho, mataray daw kasi si Hilda Koronel at suplada.

---

KABADO raw si Kyline Alcantara sa kanyang role sa bagong revenge serye ng GMA, ang Beauty Empire (BE).

Dito ay kasama niya sina Ms. Gloria Diaz, Ruffa Gutierrez at Barbie Forteza. Challenging ang role na gagampanan ni Kyline bilang kontrabida.

Ganunpaman, handa naman si Kyline na ibuhos ang kanyang kakayahan sa pag-arte sa BE. Alam niya na mataas ang expectation sa kanya ng lahat at hindi siya nagpapatalo sa mga kaganapan ngayon sa kanyang love life.

Maraming fans ni Kyline ang natutuwa na magiging busy ang kanilang idolo sa bago nitong serye. Makakapag-focus siya sa trabaho, at wala nang panahon upang malungkot sa breakup nila ni Kobe Paras. 

Makakatulong din ang pagiging abala ni Kyline upang madali siyang maka-move on kung sakaling totoo ngang hiwalay na sila. 

Payo pa kay Kyline ng kanyang mga loyal fans ay huwag niyang sayangin ang magagandang oportunidad na dumarating sa kanya. Malayo pa ang mararating ng kanyang career, ipahinga muna niya ang kanyang puso.

---

Busy sa kampanya…

SEN. LITO, NO SHOW SA BUROL NI NORA

SAYANG at hindi nakadalaw si Sen. Lito Lapid sa wake ng Superstar na si Nora Aunor.

Marami pa namang Noranians ang naghihintay kay Sen. Lapid dahil isa siya sa mga nakapareha ni La Aunor sa pelikula. 

Dumating sa burol sina Tirso Cruz III, Boyet de Leon, Cocoy Laurel, Juan Rodrigo, Manny de Leon at dating Pangulong Erap Estrada na nakapareha ni Aunor sa pelikula.

Naging leading man ni Nora Aunor si Sen. Lito noon sa pelikulang Kastilyong Buhangin (KB) na idinirek ni Mario O’Hara noong 1980. Nasundan ito ng pelikulang Gaano Kita Kamahal (GKK) na ginawa nila noong 1981. 

Well, naging abala si Sen. Lapid sa kanyang pag-iikot sa Ilocos noong yumao ang Superstar. At gustuhin man niya na damayan ang mga anak nito ay hindi niya magawa.

Pero, nagpahatid naman si Sen. Lapid ng mensahe ng pakikiramay sa mga naulila ng Superstar.

Samantala, labis na ikinatuwa ni Sen. Lapid ang pagkakapasok niya sa Top Rank No. 3 sa latest survey na isinagawa ng Social Weather Station (SWS) noong April 1 to April 15.

Dati-rati ay nasa Top 18 ranking siya sa mga surveys. 

Nangangako si Sen. Lito Lapid na sakaling siya ay lumusot muli ay tututukan niya ang mga batas na makakatulong sa pangangailangan ng mahihirap nating kababayan tulad ng edukasyon, trabaho, kalusugan, pagkain, turismo at mga pangangailangan ng mga senior citizens.

Sakaling palarin sa darating na midterm election, bale pang-apat na termino na ni Lito Lapid bilang senador.

Hindi lang ang mga ex ng aktres… PBBM AT FIRST LADY LIZA, DUMATING SA HULING BUROL NI NORA

ni Erlinda Rapadas @Teka Nga | Apr. 23, 2025

Photo: PBBM sa wake ni Nora - Nora Aunor National Artist

Nagulat ang marami at halos hindi na nakilala si Cocoy Laurel nang dumalaw sa burol ni Nora Aunor sa The Heritage Park sa Taguig. 

Nagkapareha sina Cocoy at Nora sa pelikulang Lollipops and Roses at Burong Talangka. Matinee idol ang porma noon ni Cocoy dahil mestiso at rich kid. Tinanggap si Cocoy ng mga tagahanga ni Nora. 

Dalawang beses na sumilip sa The Heritage si Cocoy Laurel. Noong last night ng burol ay nagpaunlak siya ng interbyu sa mga TV reporters. 

Ibang-iba na ang hitsura ngayon ni Cocoy, hukot na siya at laging nakasuot ng dark hoodie. Nawala na ang dating tikas ng katawan niya.

Maging si Manny de Leon na isa sa mga aktor na nakapareha ni La Aunor ay hindi na rin halos makilala. Medyo nagkaedad na siya at tumaba, kaya malayung-malayo sa mga naging leading man noon ni Guy na sina Christopher de Leon at Tirso Cruz III. 

Ganoon din naman si Juan Rodrigo na nakapareha ni Guy sa limang pelikula. Minahal din ng mga Noranians si Juan Rodrigo dahil mabait siya at maalaga sa Superstar.

Samantala, natuwa ang mga Noranians nang dumating sa huling lamay ng kanilang idolo ang Pangulong Ferdinand Marcos, Jr. at si First Lady Liza Araneta-Marcos. 

Naroroon din ang mag-aamang dating Pangulong Joseph Estrada (naging karelasyon din ni Guy), Sen. Jinggoy Estrada at Col. Jude Estrada. 

Nagpasalamat din ang mga anak ni Nora Aunor sa pagpupugay at pagbibigay ng importansiya at pagkilala ng marami sa kanilang inang si Nora Aunor.

---

Dumating at nakiramay sa mga anak ni Nora Aunor sina Sen. Robin Padilla, Phillip Salvador at Sen. Bong Go nang ihatid ang Superstar sa Libingan ng mga Bayani kahapon. 

Naroon din sina Liz Alindogan at Portia Ilagan, Nadia Montenegro at iba pang malalapit na kaibigan ni Guy. 

Napaka-solemn ng seremonya bago ang libing. 

Nagpahatid naman ng taos-pusong pasasalamat sina Ian de Leon, Lotlot, Matet, Kiko, at Kenneth sa lahat ng dumamay sa kanilang pamimighati.

Samantala, dumagsa ang mga Noranians sakay ng iba’t ibang bus para ihatid ang idolo nilang Superstar sa Libingan ng mga Bayani. 

Nag-iiyakan at nagkakantahan sila ng Superstar ng Buhay Ko at hindi ininda ang matinding init ng araw nu’ng tanghaling tapat. 

Well-behaved at maayos naman ang iba’t ibang grupo ng mga Noranians habang ginaganap ang seremonya. Mistulang grand reunion ng mga Noranians ang naganap na paghahatid sa Superstar-National Artist sa kanyang huling hantungan. Bakas na bakas ang kalungkutan sa mukha ng mga Noranians ngayong wala na ang idolong Superstar.

---

MARAMING Noranians naman ang nagtatanong kung saang sinehan muling ipapalabas ang pelikulang Pieta na isa sa mga huling pelikula na ginawa ni Nora Aunor.

Nag-announce kasi si Konsehal Alfred Vargas na muling ipapalabas ang Pieta sa mga sinehan at ito ay LIBRENG MAPAPANOOD. 

Kaya naman, excited na ang mga Noranians na mapanood ito dahil napakamahal ng bayad ngayon sa mga sinehan. Kaya kahit gustuhing manood ng mga fans ni Nora ay hindi nila magawa.

Magandang idea ang naisipan ni Alfred Vargas (bilang producer ng Pieta) na muli itong ipalabas sa mga sinehan, at libre sa lahat.

Aktres, ‘di nagpakipot, todo-bigay… KOBE, PINAGSAWAAN DAW AGAD SI KYLINE

ni Erlinda Rapadas @Teka Nga | Apr. 22, 2025

Photo: Kyline at Kobe Paras - Instagram

Naglalabasan na ngayon sa social media ang tunay na dahilan ng hiwalayang Kyline Alcantara at Kobe Paras.

Kahit hindi pa nila inaamin sa publiko na break na sila, may mga posts na si Kyline patungkol sa pinagdaraanan nila ngayon ni Kobe. 

Marami ang nagsasabing sobra raw kasing selosa ang aktres kaya walang nagtatagal na karelasyon.

Si Kobe naman daw ang hindi na nakatiis, kaya nakipaghiwalay na lang kay Kyline.

Ganunpaman, may depensa naman ang kampo ng aktres. Umiral na naman daw ang pagiging babaero ni Kobe at lumipas na ang kanyang atraksiyon kay Kyline.  

Tatak na raw ni Kobe na hindi nagtatagal sa kanyang karelasyon. Kadalasan ay isang taon lang at nauuwi na sa paghihiwalay.

Marami naman ang sumisisi kay Kyline dahil bigay-todo ito kung ma-in love. Hindi man lang niya pinahirapan si Kobe nang siya ay ligawan.

Nawalan ng challenge sa kanya ang basketball player, kaya madali siyang binitiwan nang makatagpo ng bagong chicks na may kakaibang atraksiyon.

Hindi rin si Kobe ang tipo na magseseryoso agad sa pag-ibig.

---

Lingid sa kaalaman ng marami, may nai-record palang pitong awitin ang Superstar/National Artist na si Nora Aunor bago siya biglaang pumanaw.

Ayon sa ilang malalapit na kaibigan ni La Aunor,  plano raw na i-release commercially ang 7 awitin na nai-record ni Guy bilang handog na rin sa libu-libo niyang tagahanga na tumangkilik at nagmahal sa kanya nang mahigit limang dekada.

Bukod sa mga bagong awitin na iniwan ni Nora, plano rin na i-restore ang magaganda niyang pelikula na nagmarka sa mga moviegoers tulad ng Himala, Bona, Tatlong Taon Na Walang Diyos, Flor Contemplacion Story at Bulaklak ng City Jail. 

Maging ang pelikulang Pieta na ipinalabas recently ay magkakaroon daw ng rerun. 

May dalawa pa siyang pelikulang natapos na hindi pa naipapalabas, ang Kontrabida at Ligalig. 

Dapat ay may mag-asikaso upang maipalabas na ang nasabing mga pelikula ni Nora Aunor.

Samantala, sa araw na ito ay ihahatid na sa kanyang huling hantungan si La Aunor sa Libingan ng mga Bayani pagkatapos ng necrological mass at tribute sa kanya ng NCCA na gagawin sa Metropolitan Theater.

---

MAGANDANG gesture ang ginagawa ni Alden Richards na pagsuporta sa pelikula ng mga kasamahang artista, tulad na lang ng kanyang pag-sponsor sa block screening para

sa pelikulang Samahan ng mga Makasalanan (SNMM) kung saan bida sina David Licauco, Sanya Lopez, Betong at Buboy Villar. 

Nakatrabaho ni Alden sina David at Sanya sa Pulang Araw (PA) ng GMA-7. Dito nabuo ang kanilang friendship. Kaya naman, nagpa-block screening si Alden para sa pelikulang SNMM bilang suporta.

Well, sana lahat ng artistang nabibigyan ng tagumpay ay tulad ni Alden na marunong mag-share ng blessings at tumulong sa kapwa niya artista. 

Wala siyang inggit kaninuman. Ipinu-push niya ang mga pelikulang Pilipino upang kumita sa takilya. Hindi siya makasarili, kaya patuloy ang pagdating sa kanya ng suwerte.

---

ISA sa mga labis na nalungkot at nanghinayang sa pagpanaw ng Superstar na si Nora Aunor ay ang magaling na aktres-direktor na si Gina Alajar.

Bukod sa nagkatrabaho sila ni Aunor sa ilang pelikula ay magkumare rin sila. 

Ang huling movie na pinagsamahan nila ni Guy ay ang Pieta. Nag-request pa raw sa kanya si Aunor na kunin siya ni Gina sa isang pelikula dahil gusto niyang maging direktor si Gina. 

Ganoon kalaki ang tiwala ni Nora Aunor sa kakayahan ng direktor.

Pero, hindi nga nila agad nabili ang gusto nilang istorya na isinulat ng isang magaling na nobelista kaya hindi nagkaroon ng chance si Alajar na idirek ang Superstar-National Artist na si Nora Aunor.