ni Erlinda Rapadas @Teka Nga | May 4, 2025
Photo: Julia Barretto at Gerald Anderson - IG
Sa isang interbyu, naibahagi ni Gerald Anderson ang dahilan kung bakit nagtagal ang relasyon nila ni Julia Barretto.
Noong una ay marami ang nagsasabing hindi pa rin pipirmi at titino si Gerald kay Julia. Bukod sa malaki ang agwat ng kanilang edad, hindi pa raw sawa sa pagbubuhay-binata si Gerald. Tiyak na iiral pa rin ang kanyang pagiging chickboy.
Ganunpaman, bumilang na ng taon ang relasyong Julia at Gerald. At habang nagtatagal ay lalong tumitibay ang kanilang pagmamahalan.
Hanga si Gerald kay Julia Barretto dahil sa taglay nitong strong personality at tiwala sa sarili, hindi nakaramdam ng insecurity si Julia sa kanyang mga co-stars at nakita ni Gerald ang full support sa kanya ng GF.
Kahit daw may mga pagkakataon na bihira silang magkita dahil sa kanyang mga commitments, nararamdaman ni Gerald na concerned sa kanya si Julia.
Ayon pa kay Gerald, magaan na karelasyon ang isang katulad ni Julia na walang demands at expectation.
NAALARMA at nababahala ang marami sa sunud-sunod na pagyao ng mga sikat na celebrities. Unang buwan pa lang noon ng 2025 ay halos nagkakaisa na ang mga kilalang psychics sa kanilang babala na magluluksa ang showbiz dahil may mga sikat at malalaking artista na papanaw.
Yumao nga ang veteran actress at Movie Queen na si Gloria Romero, ganoon din si Delia Razon na lola ni Carla Abellana.
Halos magkasunod naman na yumao ang Asia’s Queen of Songs na si Pilita Corrales at ang Superstar at National Artist na si Nora Aunor.
Sumunod kay Nora Aunor ang magaling na singer na si Hajji Alejandro, na binansagang “Kilabot ng mga Kolehiyala”.
Ngayon, ang actor-director na si Ricky Davao ang namaalam na dahil sa cancer. Kaya naman marami ang nagsasabing kailangan nang magpamisa ang mga samahan ng mga artista upang maputol at tumigil na ang ‘sumpa’ at kamatayan sa mga taga-showbiz.
HINDING-HINDI malilimutan ng Primetime King na si Dingdong Dantes ang naging experience niya nang makatrabaho ang Superstar na si Nora Aunor.
Taong 2015 nang mag-guest si Aunor sa seryeng Pari ‘Koy (PK) na pinagbibidahan noon ni Dingdong. Kaya naman medyo kabado ang aktor kung papaano niya gagawin ang kanilang mga eksena.
Makapasa kaya siya sa Superstar?
Pero nang dumating daw sa set ng PK si Aunor, hindi ito nag-stay sa tent na nakalaan sa kanya. Sa halip ay nagpalabas siya ng dalawang upuan at dito sila nag-usap at nagkuwentuhan ni Dingdong habang inaayos pa ang mga kukunan nilang eksena.
Halos hindi makapaniwala si Dingdong Dantes na ganoon ka-humble at down-to-earth ang Superstar. Wala itong kaere-ere at hindi VIP kapag nasa shooting. Wala rin siyang gaanong demand sa production staff kaya komportable ang lahat.
Kaya ganoon na lamang ang paghanga at pagsaludo ni Dingdong Dantes sa yumaong Superstar at National Artist na si Nora Aunor, at malaking karangalan na nakatrabaho niya ito.
BUMUBUHOS ngayon ang pakikiramay kay Jackie Lou Blanco sa pagpanaw ng ex-husband niyang si Ricky Davao.
Ilang linggo pa lang ay pumanaw ang kanyang inang si Pilita Corrales. Hindi pa siya nakakapagpahinga sa pagluluksa, sumunod nga ang dati niyang mister na si Ricky Davao.
Dalawang tao na kanyang minahal ang nawala sa buhay ni Jackie Lou. Masakit man, kailangan niyang magpakatatag.
Si Ricky Davao ay 63 years old at napakaaktibo pa sa showbiz. Walang mag-aakala na ang isang masayahing tao na tulad niya ay maagang mamamaalam.
Maaalala si Ricky ng malalapit niyang kaibigan sa showbiz sa hilig niyang kumanta kapag may mga showbiz gatherings at kapag nagkikita-kita sila ng kanyang mga showbiz friends. Madalas ay si Ricky ang life of the party. Masaya siyang kasama dahil napaka-down-to-earth at marunong makisama.
Nagluluksa ang buong showbiz sa pagkawala ng isang magaling na aktor at direktor na si Ricky Davao.
Rest in peace.
