Bong at Jinggoy, present… SEN. LITO, AYAW PUMUNTA SA BUROL NI LOLIT

ni Erlinda Rapadas @Teka Nga | July 9, 2025

Photo File: Lito Lapid - Instagram

Marami ang nag-abang kay Sen. Lito Lapid sa lamay ni Manay Lolit Solis. Naging malapit din kasi ang veteran host/talent manager kay Sen. Lapid. Tinulungan ni Lolit na ilapit si

Sen. Lito sa entertainment media bago ang midterm elections noong Mayo.

Kaya ine-expect ng marami na isa si Sen. Lapid sa unang makikiramay kay Manay Lolit Solis, bukod kina Bong Revilla, Alfred Vargas, Boyet de Leon, Paolo Contis, Benjie Paras, Tonton Gutierrez, atbp. mga anak-anakan ng talent manager.

Pero ayon sa isang staff ni Sen. Lapid, hindi raw talaga siya pumupunta sa lamay ng patay.

Ganunpaman, nagpadala naman ito ng bulaklak at nagparating ng pakikiramay sa pamilyang naulila ni Manay Lolit.

At hindi sila nagkita ni Lorna Tolentino na inili-link ngayon sa kanya, dahil sa tambalan nila sa Batang Quiapo (BQ).

---

Sa July 20 ay parehong magdiriwang ng kanilang kaarawan sina Sue Ramirez at Dominic Roque. 

Twenty-nine na ang aktres at 35 naman ang aktor, nasa tamang edad na sila upang bumuo ng sariling pamilya.

Kaya naman sa kanilang sabay na kaarawan sa darating na July 20, may mga fans ang naghihintay kung may magaganap na wedding proposal.

Handa na ba si Dominic Roque na iwanan ang kanyang buhay-binata? Si Sue na ba ang kanyang “the one”?

Si Sue noon pa ay nagsasabing handa na rin siyang magpakasal sa lalaking ibibigay sa kanya ng tadhana. At mukhang seryoso naman si Dominic  sa relasyon nila ni Sue.

Hindi ito masasabing love on the rebound, dahil naka-move on na rin siya sa breakup nila ni Bea Alonzo. Kaya nang bumuo ng pamilya si Dominic dahil may mga negosyo siya at financially stable na.

---

IKINATUWA namin na makita si Sen. Jinggoy Estrada sa wake ni Manay Lolit Solis. Noon, akala namin ay napipikon siya dahil tinatawag siyang ‘suplado’ at ‘kuripot’ ng yumaong veteran host/talent manager.

Madalas din siyang ikumpara ni Manay Lolit kay Bong na napakagalante at champion ang PR sa entertainment press. 

Bihira rin kasing makita si Sen. Jinggoy sa mga showbiz events at bihirang-bihira na makipag-bonding sa mga reporters.

Kaya kami mismo ay nagulat nang dumalaw si Sen. Jinggoy sa wake ni Lolit. Matagal din na nakipagkuwentuhan si Sen. Jinggoy sa BFF niyang si Bong Revilla at sa iba pang aktor tulad nina Boyet de Leon, Tirso Cruz III, Benjie Paras, atbp..

Well, likas lang ang pagiging tahimik at pormal ni Sen. Jinggoy Estrada kaya akala ng iba ay suplado siya. Pero off-cam ay may pagka-komedyante rin siya.

‘Di raw niya taon ang 2025… SEN. BONG, TALONG SENADOR, ATRAS DING MAG-JOIN SA MMFF

ni Erlinda Rapadas @Teka Nga | July 8, 20255

Photo File: Bong Revilla Jr. - FB

Marami sa mga entertainment press ang natuwa nang makitang muli si Bong Revilla, Jr. matapos ang midterm elections. 

Bale first public appearance niya ito para dalawin ang yumao niyang manager na si Lolit Solis.

Alam ng lahat na hindi pinalad si Bong na makapasok sa Top 12 senators, isang bagay na labis na pinagtatakhan ng marami dahil masipag at working senator naman ang aktor. 

Naging author siya ng maraming batas tulad ng Senior Citizens Expanded Act at ang pagdaragdag sa allowance ng mga guro.

Aminado si Bong na nasaktan siya sa kanyang pagkatalo noong nakaraang eleksiyon. Pero sa payo ng kanyang manager na si Lolit Solis at ng malalapit na kaibigan, bumangon siya at nag-move on.

May mga nagsasabi naman na karapat-dapat siyang bigyan ng puwesto ni PBBM upang patuloy na makapaglingkod sa mas nakararaming Pinoy. 

Pero ayaw daw munang isipin ‘yun ni Bong. One year muna ang palilipasin bago bigyan ng posisyon ang mga natalong kandidato.

Samantala, nababalitang balak daw gumawa ng movie si Bong Revilla, Jr. na ilalahok sa MMFF 2025 sa December. Kakayanin niya kayang tutukan ito dahil hindi na siya magiging abala sa pulitika?

Natanong nga namin ito kay Bong sa wake ni Manay Lolit Solis. Sey niya, “Huwag muna siguro ngayon. It's not my year. May mga nangyaring malulungkot. At heto, nawala pa ang manager kong si Nanay Lolit. Pahinga muna ako ngayon sa pulitika at pelikula.”

---

MAY mga netizens ang nagsasabing kahit hindi si Shuvee Etrata ang nanalo sa Pinoy Big Brother (PBB) Celebrity Collab Edition kundi si Mika Salamanca, nararamdaman nilang mas okey ang Cebuanang dalaga. May pagka-jologs kasi ito at komedyana pa.

Natural na natural siyang kumilos at magsalita. Para siyang si Melai Cantiveros na magaling mag-adlib kaya marami ang natutuwa sa kanya. 

Dapat ay i-build-up nang husto itong si Chuvee at bigyan ng projects o shows upang mag-shine ang career.

Sa hanay naman ng mga guys sa PBB Celebrity Collab Edition ay malakas ang karisma ni Dustin Yu, ang BFF ni David Licauco. Pang-bida at pang-leading man ang porma ni Dustin at malawak ang fan base. 

Tuwang-tuwa rin kay Dustin ang maraming vloggers dahil mabait at maganda ang PR, kaya handa silang suportahan ang career nito.

---

SUCCESSFUL ang ginanap na awarding ng Federation of Filipino Chinese Chambers of Commerce, Inc. sa mga winners ng TikTok Video Competition.

Mahigit 176 videos ang lumahok sa kompetisyon para sa 50th anniversary ng FFCCCII. Ang theme ng TikTok videos ay tumalakay sa cultural ties at friendship between Philippines at China.

May napiling Top 10 entries sa TikTok na mula sa iba't ibang rehiyon ng ‘Pinas. Pinagkalooban sila ng plaque of recognition plus ten thousand pesos each.

May nanalo rin ng 3rd, 2nd at Grand Winner. Nanalong Grand Winner si Mark Capareda ng Tagum City, Davao del Norte at tumanggap ng P100,000 cash prize. Second prize si Emmanuel Labrador ng Navotas at tumanggap ng P50,000. Ang 3rd prize ay si Richard Samulde ng South Cotabato na may P20,000 cash prize.

Ang awarding ng TikTok winners ng FFCCCII ay dinaluhan ni Mr. Victor Lim na FFCCII president at iba pang opisyal ng samahan sa pakikipagtulungan ni Wilson Flores, ang head ng Media and Public Information Committee ng FFCCCII.

Naka-move on na… MIKEE, MAY IPINALIT NA KAY PAUL

ni Erlinda Rapadas @Teka Nga | July 7, 20255

Photo File: Mikee Quintos - IG

Marami ang hindi makapaniwala na nakahanap na ng bagong boyfriend ang Kapuso actress na si Mikee Quintos, kapalit ni Paul Salas. Iilang buwan daw nang sila ay mag-break ng ex-BF, may kapalit na agad.

Samantalang si Paul ay tahimik lang at wala pang ipinakikilalang bagong nobya. Kaya hindi makapaniwala ang mga netizens na ganoon kadaling naka-move on si Mikee matapos ang break-up nila ni Paul.

May mga nagsasabi naman na baka ‘dummy’ lang ang lalaking ipinakikilala ni Mikee na bago niyang karelasyon. Ganoon pa man, sakali ngang totoo na may bagong BF na si Mikee, wala namang masama dahil single siya at deserve na lumigaya. At hindi madidiktahan ang kapalaran kung sino ang nakatakda nating makadama sa buhay.

---

NOONG panahon na kasagsagan ng COVID pandemic, isa si Gretchen Barretto sa mga celebrities na tumulong at nagpadala ng ayuda sa lahat ng movie workers—maliit man o malaking artista sa telebisyon at pelikula. Libu-libong Love Box ni Gretchen ang naipadala na naglalaman ng bigas, groceries, atbp. Labis itong ipinagpapasalamat ng mga taga-industriya, lalo na ng mga taong nawalan ng pagkakakitaan noong pandemic.

Kaya naman, minahal ng marami si La Greta dahil dumamay siya sa maliliit na manggagawa sa industriya. Kaya naman ngayon na nadadawit ang pangalan ni Gretchen sa isang malaking kontrobersya, hindi siya nakatikim ng pamba-bash mula sa mga taga-movie industry. May ilang kaibigan ang nagdarasal naman para malinis ang pangalan ni Gretchen Barretto na nadamay lamang sa isyu ng mga lost sabungeros.

---

ALAM kaya ni Anjo Yllana na may Turkish boyfriend na ngayon si Sheryl Cruz? 

Recently ay nag-post si Sheryl sa social media ng larawan nila, kasama ang kanyang Turkish boyfriend. Kitang-kita ang saya at in love si Sheryl sa bago niyang pag-ibig. Pero hindi siya nagbigay ng detalye sa pagkatao ng kanyang karelasyon. Hindi rin binanggit ang pangalan ng guy o gaano na katagal ang kanilang relasyon.

Samantala, sa isang interview kay Anjo ay nabanggit niya na nagkaroon sila ng nakaraan ni Sheryl. At kahit bata pa sila noon ay gusto na niya itong pakasalan. Pero naunahan siya ng takot kay FPJ, na uncle ni Sheryl. Kaya bigla na lang siyang nawala sa buhay ni Sheryl. Dinamdam ito nang husto sa singer at nagmarka ang pang-iiwan sa kanya ni Anjo.

Muntik na silang magkabalikan noong 2017, kaya akala ng mga fans ni Sheryl ay madurugtungan pa ang kanilang love story. Pero hindi pa rin nakapagpatawad, at may mga bagong manliligaw na ngayon si Sheryl Cruz.

---

MARAMI ang nag-abang sa pagdating ni Mark Herras sa burol ng veteran host/talent manager na si Lolit Solis. Matatandaang nagkaroon ng gap at alitan sina Mark at Manay Lolit, na humantong sa paghihiwalay nila bilang talent/manager. Hindi gusto ni Manay Lolit ang pagiging pasaway ni Mark.

Dismayado siya sa naging direksyon sa buhay ng dating alaga. Si Mark ang sinasabing ‘black sheep’ at ‘prodigal son’ sa hanay ng kanyang mga alaga.

Sa unang gabi pa lang ng burol ni Lolit ay dumating agad at nakiramay ang mga alaga niyang artista, sa pangunguna nina Bong Revilla, Congw. Lani Mercado, Christopher de Leon, Sandy Andolong, Gina Alajar, Benjie Paras, Glydel Mercado, Tonton Gutierrez, Yasmien Kurdi, at Pauleen Luna. Sa pangalawang gabi ay dumating sina Gabby Concepcion, Ali Sotto, Arnold Clavio, at Tirso Cruz III.

Samantala, umaapaw sa mga naggagandahang bulaklak ang Aeternitas Chapel na galing sa mga taong nagmamahal kay Lolit Solis. Sa mahigit na tatlong dekada niya sa showbiz ay naging makulay ang kanyang buhay.