Titser, may bonus tuwing Oct. 5 — PBBM

ni Mylene Alfonso @News | October 6, 2026

Photo: FB / Bongbong Maros

Tiniyak ni Pangulong Ferdinand R. Marcos Jr. na patuloy na palalawakin ng pamahalaan ang mga insentibo, allowance at iba pang benepisyo para sa mga guro, bilang pagkilala sa kanilang serbisyo.

Sa pagdiriwang ng 2026 National Teachers’ Day na “Teacher, Ikaw Naman” sa Smart Araneta Coliseum, sinabi ng Pangulo na kabilang dito ang World Teachers’ Day Incentive Benefit, na matatanggap ng mga guro tuwing Oktubre 5.

Patuloy din aniya ang proseso para sa 2024 Performance-Based Bonus (PBB) upang mas mabilis itong maibigay sa mga kwalipikadong guro.

“Kabilang dito ang World Teachers’ Day Incentive Benefit na matatanggap ninyo sa tuwing ika-5 ng Oktubre,” ani Marcos.

Pinalawak din ng pamahalaan ang career advancement opportunities sa ilalim ng Expanded Career Progression System. Hanggang Setyembre, 82,105 guro at school heads na ang na-promote, kabilang ang 4,125 education personnel sa Region II.

“Patuloy rin natin gagampanan ang tungkuling pangalagaan ang mga karapatan, kapakanan, at patuloy na pag-unlad ng ating mga guro,” ani Marcos.

Dumalo sa selebrasyon ang libo-libong guro mula sa iba’t ibang bahagi ng bansa, kasama sina House Speaker Faustino “Bojie” Dy III at DepEd Secretary Sonny Angara.

National Teacher’s Day, walang pasok

ni Mervin Reyes @News | October 5, 2026

Photo: File / DepEd

Ilang LGU sa bansa ang nagsuspinde ng klase ngayong araw, Oktubre 5, bilang paggunita sa National Teachers’ Day at World Teachers’ Day.

Sa ilalim ng Republic Act No. 10743, idineklarang National Teachers’ Day at special working holiday ang Oktubre 5.

Sa Luzon, suspendido ang face-to-face classes sa lahat ng antas sa Legazpi City at Sto. Domingo, Albay, at Calauag, Quezon, na papalitan ng modular o asynchronous learning.

Suspendido rin ang public school classes sa Sta. Maria, Bulacan; Infanta at Lingayen, Pangasinan; at Rizal, Nueva Ecija. Ang private schools ay pinayagang magdesisyon.

Nag-anunsyo rin ng suspensyon ang Pugo, La Union; Santa Cruz at Pagsanjan, Laguna; Magsaysay, Palawan; Arayat, Pampanga; at Aguilar, Pangasinan.

Sa Visayas, suspendido ang klase sa Mahaplag, Santa Fe at Tanauan, Leyte, at Catbalogan, Samar.

Sa Mindanao, suspendido rin ang klase sa Talakag, Bukidnon; Piñan, Zamboanga del Norte; at Sarangani.

Samantala, magsasagawa ang Department of Education (DepEd) ng National Teacher’s Day celebration sa Smart Araneta Coliseum sa Quezon City.

Pangungunahan ng DepEd National Capital Region ang programa. Sinimulan naman ang 2026 National Teachers’ Month noong Setyembre 5 sa Cagayan de Oro City, na may temang “Teacher, Ikaw Naman.”

Marcos: Walang guro dapat magretiro bilang Teacher I

by BRT @News | October 4, 2026

Photo: Bongbong Marcos sa mga guro / FB

Tiniyak ni Pangulong Ferdinand Marcos Jr. na mas maraming pagkakataon ang ibibigay sa mga guro para umangat sa kanilang propesyon sa ilalim ng Expanded Career Progression (ECP) System.

Ayon kay Marcos, hindi dapat umabot sa pagreretiro ang isang guro na nananatiling Teacher I matapos ilaan ang malaking bahagi ng buhay sa pagtuturo.

Mahigit 82,000 guro at school heads na ang na-promote sa buong bansa sa ilalim ng ECP System hanggang Setyembre.

Sinabi rin ng Pangulo na patuloy na binabawasan ang administrative work at pinapahusay ang mga benepisyo para sa mga guro.

Ginawa ni Marcos ang pahayag sa Santiago City, Isabela, matapos ang mass oath-taking ng 4,125 bagong-promote at bagong-hire na DepEd personnel sa Region II.