Paghabol ng Makati sa BGC, nauwi sa pagkawala ng EMBO

ni BRT @News | August 22, 2023

Hindi umano dapat magmatigas bagkus ay tanggapin na ni Makati Mayor Abby Binay ang “unintended consequences” sa territorial dispute sa pagitan ng Taguig lalo pa at ang Makati sa kanyang pamumuno mismo ang nag-akyat ng usapin sa Korte Suprema.

Ayon kay Atty. Darwin Canete, isang prosecutor at blogger, nang iakyat ng Makati City ang kaso sa SC at hingan ang mga mahistrado ng final determination sa isyu ay dapat batid nito na maaari silang matalo o manalo.

Sinabi pa ni Canete na ang paghahabol sa revenue-rich na Bonifacio Global City (BGC) ay pinursige ng Makati Ctiy mula pa noong panahon ni Makati City Mayor Jejomar Binay at Junjun Binay, kaya dapat naging handa na ang lokal na pamahalaan sa pagkakaroon ng pinal na desisyon sa kaso.

Nang hingan ng reaksyon sa naging takbo ng kaso ng territorial dispute sinabi ni Canete na kung siya ang tatanungin ay hindi na lamang sana hinabol ng Makati ang pagmamay-ari ng BGC, sa ganitong paraan ay hindi nawala sa kanila ang EMBO barangays na kilalang balwarte ng mga Binay.

Apela kay Mayor Binay: EMBO, iturnover na sa Taguig

ni Mylene Alfonso @News | August 21, 2023

Kinatigan ni dating Press Secretary Trixie Cruz Angeles ang posisyon ng Taguig City na hindi kailangan ng writ of execution para iimplementa ang takeover ng Taguig sa EMBO barangays sa basehang hindi ejectment case ang kaso at malinaw ang desisyon ng Korte Suprema na turnover ang dapat na gawin ni Makati City Mayor Abby Binay.

Sa kanyang vlog post na Luminous, hinimay ni Angeles ang usapin ng turf war sa pagitan ng dalawang lungsod.

Ani Angeles, na isang abogado, kung titingnan ang 53 pahinang desisyon ng SC sa nasabing kaso ay walang basehan ang argumento ni Binay na magkaroon muna ng transition period, aniya, “stop exercising jurisdiction” ang malinaw na utos ng hukuman kaya turnover ng hurisdiksyon ang dapat na gawin ng alkalde.

Tinuring din ni Angeles na walang legal basis ang nakuhang opinyon ng Makati City mula sa Office of Court Administrator (OCA) na nagsasabing kailangan muna ng writ of execution.

Ipinaliwanag ni Angeles na “stop exercising jurisdiction” agad ang desisyon ng Supreme Court sa territorial dispute dahil sa umpisa pa lamang ng kaso ay mayroon nang ipinalabas na Temporary Restraining Order (TRO) ang Pasig City Regional Trial Court.

Sa July 8, 2011 decision ni RTC Pasig City Branch 153 President Judge Briccio Ygaña, pinaboran nito ang Taguig sa inihaing Civil Case No. 63896 na Judicial Confirmation of the Territory and Boundary Limits of Taguig, iniutos ng Regional Trial Court na ang Fort Bonifacio Military Reservation kabilang ang Parcels 3 at 4, Psu-2031 ay kumpirmadong bahagi ng territory ng Taguig.

Ayon kay Angeles noong 1994 pa ay dapat hindi na nag-exercise ng jurisdiction ang Makati sa EMBO barangays dahil mayroon nang TRO sa umpisa pa lamang ng litigation ng kaso, kaya sa naging desisyon ng SC noong 2022 ay ang kautusan nito ay turnover ng jurisdiction matapos manalo na ang Taguig.

Sinabi rin nito na mas mainam na iturnover na ni Mayor Binay ang EMBO Barangays habang magkaroon ng arrangement kay Mayor Lani Cayetano para sa mga ari arian.

Taguig, nanindigang 'di na kailangan ng Writ of Execution sa 10 barangay

ni Gina Pleñago @News | August 19, 2023

Hindi umano kailangan ng Taguig ang isang writ of execution upang ipatupad ang hurisdiksiyon sa Fort Bonifacio Military Reservation na binubuo ng parcels 3 at 4 ng Psu-2031.

Malinaw umanong nakasaad sa desisyon ng Supreme Court na ang 10 barangay sa Parcels 3 at 4 ay kumpirmado at deklaradong nasa teritoryong sakop ng Taguig, na fibal at executory.

Kaugnay nito, awtomatiko umanong maaalis ang mga nasabing barangay sa teritoryo ng Makati City.

Ikinalat umano ng Makati ang sinasabing “initial assessment” mula sa Office of the Court Administrator (OCA) ng SC na naka-address sa Executive Judge ng RTC Makati kung saan ang opinyon sa "desisyon ng SC" ay mayroong writ of execution bago ang pagdinig sa korteng pinagmulan” na ipatutupad ng DILG.

Binigyang-linaw ng Taguig na ang nasabing opinyon at pahayag ay walang puwersa sa batas at hindi nagbubuklod sa Taguig.