57 OFWs na pa-Abu Dhabi, na-stranded sa HK, nakauwi na

ni Gina Pleñago @News | March 3, 2026

Photo: Ang mga overseas Filipino worker na na-stranded sa Hong Kong International Airport matapos ma-cancel ang kanilang flight pa-Abu Dhabi dahil sa nangyayaring tensyong  sa Middle East. (Gina Pleñago)

Ligtas na nakauwi sa Pilipinas kahapon ng umaga ang 57 overseas Filipino workers (OFWs) na na-stranded sa Hong Kong International Airport matapos ma-cancel ang kanilang mga flight patungong Abu Dhabi dahil sa tensyon sa Middle East.

‎Ayon sa Department of Migrant Workers (DMW), bago pa ang departure papauwi na ang mga stranded na OFWs, naihatid na ng Migrant Workers Office (MWO) ang mga kaukulang tulong. Partikular ang airport assistance, basic needs at referrals na kanilang kailangan.

Sa ngayon, kasalukuyang naka-standby ang iba pang tauhan ng MWO sa Hong Kong International Airport para ihatid ang assistance sa mga naiwan pang OFWs.

Kabuuang 132 stranded OFWs patungong Riyadh at Dubai naman ang naasikaso at nabigyan ng suporta habang hinihintay ang updates at susunod na travel arrangements.

Sa nasabing bilang, 47 OFWs ang binigyan ng airline tickets para makabalik sa Pilipinas habang inaayos ang kanilang deployment at iba pang dokumentasyon.

Dahil sa bagyong Jolina… Higit 200 pasahero, stranded

ni Jasmin Joy Evangelista | September 7, 2021

Mahigit 200 pasahero ang stranded sa Matnog Port sa Sorsogon nitong Lunes, matapos suspendehin ng Philippine Coast Guard ang mga biyahe papuntang Visayas at Mindanao dahil sa bagyong Jolina, ayon sa opisyal ng Philippine Ports Authority.

Bandang ala-1 ng hapon nang ilikas sa evacuation center ng pamahalaang lokal ang mga pasahero at sasakyan, ayon kay Achilles Galindes, acting division manager ng PPA terminal management office sa Matnog.

"Hindi rin kasi ligtas ang pantalan 'pag ganitong may sama ng panahon kaya kailangan silang ilikas. Kanina sa meeting with LGU, nag-pledge sila to provide food. Nag-serve rin kami ng snacks kanina," ani Galindes.

Kabilang sa mga naantala ang 89 trucks, 22 light cars at 222 na pasahero.

Maibabalik lamang daw sa normal ang biyahe kapag inalis na ang tropical cyclone wind signal sa lalawigan maging sa Visayas area.

3,800, stranded sa Visayas at Mindanao; klase at pasok sa gobyerno, suspendido

ni Mary Gutierrez Almirañez | February 22, 2021

Binaha ang labingpito sa 19 na bayan ng Surigao Del Sur dahil sa walang patid na pag-ulan dulot ng Bagyong Auring kahapon, Pebrero 21, kung saan mahigit 8,000 residente ang naapektuhan at halos 126 barangay ang napinsala at maging ang ilang evacuation centers ay pinasok na rin ng tubig.

Ayon pa sa ulat, mahigit 5,000 pamilya ang inilikas mula naman sa coastal areas ng Surigao Del Norte. Sa Agusan Del Norte ay inilikas din ang 60 residente na nakatira sa tabing-ilog.

Samantala, sa Dinagat Islands kung saan nag-landfall ang bagyo ay umabot na sa mahigit 350 pamilya ang na-evacuate. Nakahanda naman ang lokal na pamahalaan ng Eastern Samar sa forced evacuation kung kinakailangan.

Sa Davao Region, mahigit 40 pamilya ang inilikas kabilang ang mga residente mula sa Mawab at New Bataan sa Davao De Oro, pati na rin sa Mati City, Banaybanay at Caraga sa Davao Oriental.

Ayon sa huling datos ng Philippine Coast Guard, mahigit 3,800 indibidwal ang na-stranded mula sa pantalan ng hilagang Mindanao, hilagang silangang Mindanao, silangang Visayas, kanlurang Visayas, gitnang Visayas at Bicol region dahil sa Bagyong Auring.

Kabilang sa mga stranded ay ang mahigit 2,000 pasahero, mga drivers at mga cargo helpers. Nauna nang inanunsiyo ng pamahalaan ang pagkansela sa klase sa lahat ng antas ng paaralan at kawani ng gobyerno sa Tacloban City at Romblon Province.

Suspendido rin ang klase sa lahat ng antas ng paaralan sa Cantillan, Surigao del Sur, Compostela, Davao de Oro at Madridejos, Cebu.

Samantala, nananatili pa rin sa Signal No. 1 ang mga sumusunod: -Sorsogon -Masbate (kabilang ang Ticao at Burias Islands) -Albay -Catanduanes -Silangang bahagi ng Camarines Sur -Northern Samar -Eastern Samar -Samar -Biliran -Leyte -Southern Leyte -Bohol -Cebu -Siquijor -Hilaga at silangang bahagi ng Negros Oriental -Hilaga at gitnang bahagi ng Negros Occidental -Silangang bahagi ng Iloilo -Silangang bahagi ng Capiz -Dinagat Islands -Surigao Del Norte -Hilagang bahagi ng Surigao Del Sur -Agusan Del Norte Sa ngayon ay wala pang naiulat na nasaktan o nasawi dahil sa pananalasa ng Bagyong Auring.