Yulo at Villegas, flag bearer sa olympic closing ceremony

ni Anthony E. Servinio @Sports | August 10, 2024

Photo: Circulations / FB

Napili sina Carlos Yulo ng Artistic Gymnastics at Aira Villegas ng Boxing para magdala ng watawat ng Pilipinas sa pormal na pagsasara ng Paris 2024 Olympics sa gabi ng Linggo sa Paris, Lunes ng umaga (oras sa Pilipinas) sa Stade de France.

Sasamahan nila ang mga kapwa atleta upang ipagdiwang ang matagumpay na dalawang linggo ng mainitang kompetisyon na papalitan ng kasiyahan at pakikipagkaibigan.

Nararapat lang ang dalawa at si Yulo ang unang Pinoy na may dalawang ginto mula sa Floor Exercise at Vault at nangyari ito sa iisang Olympics. Nakamit ni Villegas ang tanso sa kanyang unang Olympics.

\Matapos ang kontrobersyal na pambungad na palabas noong Hulyo 28 ay nagpasya ang muling pag-aralan ng mabuti ang magiging laman ng pagsara. Umani ng batikos ang itinuring na malaswang pagganap ng Huling Hapunan ng Panginoong Hesus kung saan ang mga gumanap ay mga kasapi ng LGBTQ.

\Nakabalot ang listahan ng mga magtatanghal na artista subalit ilan sa mga nabubulong na pangalan ay sina Billie Eilish, Red Hot Chili Peppers at si Snoop Dogg. Gagawa raw si Tom Cruise ng eksena na hango sa kanyang mga pelikula kung saan tatalon siya mula sa himpapawid o sa bubong sa bahagi ng seremonya kung saan ipapasa ng Paris ang pagiging punong-abala sa Los Angeles sa 2028.

Tiyak na babaha ang emosyon kasabay ng pag-apula ng apoy ng Olympics. Subalit kasabay nito ang pangako ng mga atleta na magtitipon muli upang sariwain ang kanilang ugnayan sa loob at labas ng palaruan.

Uuwi agad sina Yulo, Villegas at mga nalalabing na opisyal at staff ng Team Pilipinas. May nakaplanong parada para sa kanila sa Maynila at sa mga lugar ng kanilang paninirahan maliban sa maraming gantimpalang salapi at regalo para sa mga nag-uwi ng medalya.

Sarno nabigong makapagbuhat sa olympics, nauna ang nerbiyos

ni Anthony E. Servinio @Sports | August 10, 2024

Photo: Paris Olympic 2024 / FB

Tatlong akyat sa entablado lang ang itinagal ng pinakaunang sabak ni Vanessa Sarno sa Paris 2024 Weightlifting Sabado ng umaga sa Paris South Arena #6. Namarkahan ang 20-anyos na baguhan na hindi nakapagtapos bunga ng bigo niya mabuhat ang pambungad na 100 kilo sa Snatch ng Women’s 71-kilogram Category.

Sa tatlong subok, nabuhat niya ang barbell lampas ng kanyang ulo subalit binitawan niya agad ito bago siya nakatayo. Dahil wala siyang nabuong buhat ay hindi na siya pinatuloy sa Clean and Jerk at naging ika-12 at huli sa kompetisyon.

Ito ang unang pagkakataon na may timbang na Women’s 71 kaya nagtakda ng Olympic Standard para kilalanin bilang bagong Olympic Record. Tanging ang nagwagi ng ginto Olivia Reeves ng Estados Unidos ang bumuhat ng 117 kilo sa Snatch para higitan ang itinakdang 115 para maging unang may-hawak ng Olympic Record.

Hindi naabot ng Amerikana ang 148 para sa Clean and Jerk at 265 para sa Total at 145 lang ang nakuha niya para sa kabuuang 260. Pilak si Mari Leivis Sanchez ng Colombia sa 257 at tanso si Angie Paola Palacios ng Ecuador sa 256.

Ang iba pang nagtapos ay sina Siuzanna Valodzka ng Neutral Athletes (246), Marie Fegue ng Pransiya (243), Chen Wen Huei ng Chinese-Taipei 236, Joy Ogbonne Eze ng Nigeria (232), Amanda Da Costa Schott ng Brazil (229), Neama Said ng Ehipto (222) at Jacqueline Nichele ng Australia (209). Kasama ni Sarno sa mga hindi nagtapos si Loredana Elena Toma ng Romania na walang nabuhat sa Clean and Jerk matapos ang 115 sa Snatch.

Kahit bigo ay nanatiling positibo si Sarno at nagpasalamat na nakaabot siya sa Olympics. Alam niya na dadating muli ang pagkakataon sa Los Angeles 2028 at pati rin sa Brisbane 2032.

Inabot ang alamat na si Hidilyn Diaz ng dalawang Olympics noong Beijing 2008 at London 2012 bago nakamit ang pilak noong Rio 2016. Iyan ang naglatag ng daan para sa makasaysayang ginto sa Tokyo 2020.

Ando 6th place sa 59kgs. weightlifting

ni Anthony E. Servinio @Sports | August 9, 2024

Photo: Elreen Ando / FB

Nabitin ang huling paghabol ni Elreen Ando sa Women’s 59-kilogram Category ng Paris 2024 Weightlifting Huwebes ng gabi sa South Paris Arena #6. Uuwi pa rin mula sa kanyang pangalawang Olympics na nakataas ang noo ng Pinay.

Sa kanyang unang salang ay nabigo niya maibuhat ang 100 kilo subalit bumalik upang maitaas ang barbell para sa bagong personal na marka. Sinubukan niya ang 102 subalit hindi siya pinalad at winakas ang Snatch sa 100 kilo na pansamantalang inilagay siya sa ika-walong puwesto sa 12 kalahok.

Pagsimula ng Clean and Jerk ay sinubukan niya agad ang 130 kilo na mas mabigat sa kanyang marka na 128. Kinailangan niya ang tatlong buhat bago nakuha ang basbas ng mga hurado at tumalon sa ika-apat na puwesto na may kabuuang 230 kilo.

Nabitin si Ando sa medalya sa gitna ng nakakamanghang ipinamalas ni Luo Shifang ng Tsina na winasak ang mga Olympic Record sa Snatch, Clean and Jerk at Total patungo sa ginto. Nagtala siya ng 107 sa Snatch at 134 sa Clean and Jerk para sa ipinagsamang 241 kilo.

Napunta ang pilak kay Maude Charron ng Canada na bumuhat ng 236 kilo. Nakuntento si defending champion Kuo Hsing Chun ng Chinese Taipei sa tanso at 235 kilo.

Tabla sina Ando, Anyelin Venegas ng Venezuela at Rafiatu Folashade Lawal ng Nigeria sa 230. Ang iba pang nagtapos ay sina Kamila Kontop ng Ukraine (227), Janeth Gomez ng Mexico (217), Dora Tchakounte ng Pransiya (213), Mathlynn Sasser ng Marshall Islands (209) at Lucrezia Magistris ng Italya (208) habang minarkang hindi nakatapos si Yenny Alvarez ng Colombia dahil wala siyang nakumpleto sa Clean and Jerk para isama sa kanyang 105 sa Snatch.

Kinailangan ni Ando na magpapayat para sa kompetisyon dahil naglaro siya sa 64-kilogram noong Tokyo 2020 at naging ika-pito sa likod ni ginto Charron. Inalis ng organizer ang ilang mga timbang kaya ilang atleta ay napilitang umakyat o bumaba ng kategorya.