World Surf League C'ships, opisyal na host ang Siargao

by Sarah Muñoz-(OJT) @Sports News | July 15, 2026

Photo: Proud na itinaas ni PSC Chairman John Patrick Gregorio ang kamay ni John Mark Tokong-ang pambato ng bansa sa world surfing sa idinaos na press conference kahapon ng WSL World Surf League Championship 2026 sa RMSC na idaraos sa Cloud 9, Siargao mula Okt. 31-Nob. 10. (Reymundo Nillama)

Nakatakdang maging sentro ng world surfing ang Cloud 9 sa Siargao matapos ihayag na dito gaganapin ang kauna-unahang World Surf League (WSL) Championship Tour Philippines Pro sa bansa mula Okt. 31-Nob. 10, 2026. 

Ang torneo ay magsisilbing ika-11 leg ng 2026 WSL Championship Tour kung saan sasabak ang ilan sa pinakamahuhusay na surfers sa mundo sa kilalang alon ng Siargao. 

Ayon kina PSC Chairman John Patrick Gregorio, Andrew Stark, President World Surfing League Asia Pacific, Gisella Marie Romualdez Quisumbing Asst. Secretary, Dept of Tourism at event ambassador William Vincent Araneta, inaasahang daragsa sa isla ang mga atleta, media personnel, surfing enthusiasts at mga turista mula sa iba't ibang bansa para sa prestihiyosong kompetisyon. 

Anila, malaking tulong ang pagho-host ng torneo sa pagpapalakas ng sports tourism at ekonomiya ng Siargao. Anila hindi lamang surfing competition ang hatid ng WSL kundi pagkakataon din upang maipakita sa buong mundo ang kagandahan ng Siargao at ang kakayahan ng Pilipinas sa pagdaraos ng international sporting events. 

Inanunsiyo rin sa media launch na may dalawang-taong partnership ang WSL at Pilipinas para sa pagdaraos ng torneo sa bansa. Ang Cloud 9 sa Siargao ay matagal nang kinikilala bilang isa sa mga pangunahing surfing destinations sa mundo at sa kauna-unahang pagkakataon ay magiging bahagi na ito ng opisyal na Championship Tour calendar ng WSL. (

SEA Plus Youth Games paghahanda sa Int'l tilt

by Gerard Arce @Sports News | July 13, 2026

 Photo: Nagtipon ang mga pinuno ng bawat bansa mula sa 11 ASEAN members at 17 imbitadong bansa na lalahok sa Southeast Asian Plus Youth Games or SEA Plus YG sa Dis. 2-14, 2027 sa pangunguna ni Philippine Olympic Committee (POC) President Atty. Abraham “Bambol” Tolentino para maihanda sa international tilt ang mga atleta. (pocpix)

Upang mas maihanda ang mga kabataang national athletes mula sa 18 pampalakasan sa mga malalaking pandaigdigang kompetisyon ay idaraos ang kauna-unahang Southeast Asian Plus Youth Games or SEA Plus YG sa Dis. 2-14, 2027 sa iba’t ibang sports facilities sa bansa.

Nagtipun-tipon ang mga pinuno ng bawat bansa mula sa 11 ASEAN members at 17 imbitadong bansa na lalahok sa naturang youth sports event sa pangunguna ni Philippine Olympic Committee (POC) President Atty. Abraham “Bambol” Tolentino sa idinaos na executive council meeting kahapon sa Solaire Resort and Casino sa Parañaque City.

“Naisip ko 'yan nu'ng Bahrain Asian Youth Games, so Asian Youth Games papunta ng Youth Games, parang kulang, kumbaga pagdating mo ng school diretso ka na ng Asian Games? Sina Palarong Pambansa, sina Batang Pinoy diretso na ng Asian Games. Parang may kulang. Mayroong mga Junior World Championships, pero kulang eh. So, eto yun, Southeast Asian Youth Games,” pahayag ni Tolentino sa isang report.

“Bakit Plus? Para 'yung non-ASEAN maisama natin para mas marami, mas maganda ang competitive. Mas marami pa nga 'yung plus kesa sa original na ASEAN,” dagdag ni Tolentino, kasama si Asian Volleyball Confederation President Ramon “Tats” Suzara.

Merino namayani sa Spain, haharap vs. France sa semis

ni Anthony E. Servinio @Sports | July 12, 2026

Photo: Merino

Laro ngayong Linggo - Quarterfinals

5 AM Norway vs. Inglatera

9 AM Argentina vs. Switzerland

Bayani sa pangalawang sunod na laro si reserba Mikel Merino at itinulak niya ang Espanya sa 2-1 panalo kontra Belgium sa pagpapatuloy ng FIFA World Cup 2026 Playoffs kahapon sa SoFi Stadium sa Inglewood, California. Haharapin ng mga Kastila sa semifinals ang Pransiya sa Miyerkules.

Ipinasok si Merino sa ika-86 minuto para kay Dani Olmo at 2 minuto pa lang nakatapak sa damo ay inihatid ang nagpapanalong goal. Nabitiwan ng kakapasok din na goalkeeper Senne Lammens ang bola at gumulong ito sa naghihintay na mga paa ni Merino.

Nakaunang goal ang Espanya nang tapikin palayo ni goalkeeper Thibaut Courtois ang sipa ni Olmos pero napunta kay Fabian Ruiz na ipinasok ito sa ika-30. Nakabawi agad ang Red Devils at pinantay ang talaan sa 1-1 sa goal ni Charles de Ketelaere sa ika-41.

Napilay sa binti si Courtois at kinailangang palitan ni Lammens sa ika-71. Ito ang kanyang unang aksyon sa torneo at naging matatag hanggang dumating si Merino.

Magwawakas ang quarterfinals ngayong Linggo tampok ang sagupaan ng defending champion Argentina at naghahamon Switzerland sa Arrowhead Stadium ng Kansas City. Aabangan din ang labanan nina Harry Kane at Inglatera kontra Erling Haaland at Norway sa Hard Rock Stadium sa Miami.