Eala abante sa Mubadala semis, matapos talunin si Svitolina

by Info @Sports News | August 1, 2026

Photo: Alex Eala at Elina Svitolina / WTA

Niyanig ng Pinay tennis prodigy na si Alex Eala ang hard court matapos patumbahin ang world No. 10 na si Elina Svitolina sa straight sets, 6-3, 6-4, upang umabante sa semifinals ng Mubadala DC Open.

Ang pambihirang tagumpay na ito ay nagmarka rin ng ikaanim na panalo ni Eala laban sa isang Top 10 player ngayong taon, at susunod niyang makakaharap si dating world No. 1 Naomi Osaka.

---

Mubadala q'finals: Eala vs. Svitolina sa rematch

Makakaharap ni Filipina tennis star Alex Eala ang No. 2 seed na si Elina Svitolina sa quarterfinals ng 2026 Mubadala DC Open sa Rock Creek Park, Washington, D.C.

Kasunod ito ng impresibong laro ni Eala sa nagdaan niyang matches kontra 2024 Olympic champion Zheng Qinwen at defending 2025 DC Open champion Leylah Fernandez.

Gaganapin ang quarterfinals match ngayong Sabado ng umaga at nakatakda ang isang blockbuster rematch laban sa dating World No. 3 at kasalukuyang World No. 10 na si Svitolina.  Sa huling pagkakataon na nagkita sila, ginulat ni Eala si Svitolina sa pamamagitan ng isang 6-3, 6-4 na tagumpay sa Berlin Open quarterfinals, isang malaking tagumpay na nagtulak sa Pilipina sa semifinals. Magagawa kaya ito muli ni Alex at makapag-book ng isa pang semifinal appearance?

Kagagaling lang niya sa kanyang nakamamanghang comeback victory laban sa defending champion na si Fernandez, ibinaling na ngayon ng world No. 28 ang kanyang atensyon sa isang mas malaking hamon.

Ang rematch ay nangyari mahigit isang buwan matapos talunin ni Eala si Svitolina sa quarterfinals ng Berlin Tennis Open, kung saan nakamit ng Pilipina ang isa sa pinakamalaking panalo sa bisa ng   6-3, 6-4 na tagumpay laban sa Ukrainian star.

Kasabay ng kumpiyansa, hangad ni Eala ang pangalawang sunod na tagumpay laban sa isang kalaban na nasa Top 10 at makalusot  sa Mubadala DC Open semifinals. Dahil sa kanyang momentum, layunin ni Eala na ipagpatuloy ang  pangarap na pagtakbo sa WTA Tour. (MC)

Bomogao babanatan 5th straight sa ONE

by Gerard Arce @Sports News | July 31, 2026

Photo: Islay Erika Bomogao - FB

Hindi paaawat sa kanyang ikalimang sunod na panalo si Pinay Muay World champion Islay Erika Bomogao na kakaharapin si Thai fighter Klinphakha Por Thaisong sa three-round Atomweight Muay Thai match ngayong araw sa ONE Friday Fights 164 sa makasaysang Lumpinee Stadium sa Bangkok, Thailand.

Dalawang magkasunod na knockout victory ang binanatan ni Bomogao noong isang taon kontra kina Nerea Rubio ng Spain sa first round at Ploychompoo ng Thailand sa second round, para sa kanyang 4-fight winning run sa ONE Championship stable na lubos na inensayo ang kanyang arsenal sa kanyang boxing styles.

“Boxing is definitely something that we’ve always been working for and I think we Filipino’s have really been blessed with hands, like Manny Pacquiao,” pahayag ni Bomogao matapos ang KO victory kay Ploychompoo sa pamamagitan ng straight punch sa panga sa 1:34 sa first round sa ONE Friday Nights 134.

Muling patutunayan ng 25-anyos mula Baguio City ang kanyang bangis at tindi kontra sa Thai fighter na galing din sa 2nd-round knockout victory nang patumbahin ang kababayang si Kathi sa pamamagitan ng flying knee sa ONE Friday Nights 51 nitong Abril 24 sa parehong sports venue.

Women's Run PH Series sa tatlong lungsod

ni Anthony Servinio @Sports | July 31, 2026

Photo: Ipinaliliwanag ni race organizer Nicole dela Cruz ang hinggil sa muling pagbubukas ng pampublikong rehistrasyon ng Women's Run PH sa Oktubre 25 sa Ayala Triangle Gardens sa Makati City na may temang "Mas Malaki. Mas Matapang. Mas Malakas." Ito ay para sa pambansang Kamalayan sa Buwan ng Kalusugan ng Kababaihan na pinalawak na rin hanggang sa Iloilo at Davao. (A. Servinio)

Magbabalik ang nangungunang patakbo na inorganisa ng mga kababaihan para sa kababaihan na mas pinalaki ngayong taon. Lalarga ang Lactacyd Women's Run PH Series sa tatlong lungsod para maipamalas ang lakas at husay ng Pinay.

Magsisimula ang serye sa Ayala Triangle, Makati ngayong Oktubre 25. Susundan ito ng mga karera sa Davao sa Enero 17 at Iloilo sa Hulyo 18 sa susunod na taon.

Sa Makati ay maaaring lumahok sa 10, lima at isang kilometro. May karagdagang 16 kilometro sa Davao at Iloilo.

Inaasahan na mahigit 12,000 ang lalahok sa Makati pa lang. Kasalukuyang ginaganap ang pagpapalista online sa Race Roster.

Tatanggap ang mga kalahok ng singlet, numero at maaaring kumuha ng karagdagang t-shirt. Oras na makumpleto ang karera ay gagawaran ng medalya na maaaring ikabit sa ibang medalya ng serye, t-shirt at bag na may mga regalo buhat sa sponsor.

Ang mga damit at medalya ay dumaan sa mabusising proseso ng paglikha. Ito ay para matiyak na pareho itong makakatulong sa maaliwalas na pagtakbo kasabay ng pagiging kaakit-akit sa mata.

Mula nang itatag ay naging ligtas na espasyo ang Women's Run. Nasaksihan ang kababaihan na tinutulungan at magsisilbing inspirasyon sa kanilang kapwa kababaihan.