Walang makain, dumami — SWS

ni Jeff Tumbado @News | May 14, 2026

Photo: File

Tumaas ang bilang ng mga pamilyang Pilipino na nakaranas ng “involuntary hunger” sa unang bahagi ng 2026, ayon sa pinakahuling survey ng Social Weather Stations (SWS).

Sa survey na isinagawa mula Marso 24 hanggang 31 sa pamamagitan ng house to house interview sa may 1,500 households sa buong bansa, umakyat sa 23.2 porsyento ang antas ng gutom mula sa 20.1 porsyento noong Nobyembre 2025.

Ayon sa SWS, ang “involuntary hunger” ay tumutukoy sa mga pamilyang nakaranas ng gutom at walang makain kahit minsan sa nakalipas na tatlong buwan.

Ito na ang pinakamataas na naitalang hunger rate mula noong Marso 2025 kung saan pumalo ito sa 27.2 porsyento.

Sa apat na pangunahing rehiyon ng bansa, pinakamataas ang naitalang gutom sa Visayas na may 28%, sinundan ng Luzon sa labas ng Metro Manila na may 22.4%, Metro Manila na may 22%, at Mindanao na may 21.7%.

May margin of error na ±3 porsyento ang survey para sa national percentages.

Samantala, ±6 porsyento naman ang margin of error sa Metro Manila, Visayas, at Mindanao, habang ±4 porsyento sa Luzon sa labas ng Metro Manila.

SWS: 45% mga Pinoy walang nabago sa buhay, 30% guminhawa na

ni Angela Fernando - Trainee @News | January 27, 2024

Lumabas sa isang survey ng Social Weather Stations (SWS) na 45% sa mga Pinoy ang naniniwalang walang pagbabago sa kanilang buhay sa nagdaang 12 buwan.

Ayon sa resulta ng survey mula Disyembre 8 hanggang Disyembre 11, 2023, 30% na mga Pinoy ang naniniwalang gumaan ang kanilang buhay habang 25% naman ang nagsasabing lumala ang kanilang estado.

Tinawag na "gainers" ng SWS ang mga naniniwalang umayos ang kanilang buhay at "losers" naman ang mga nagsasabing mas sumama ang kanilang kalagayan.

Nagbigay naman ng "high" na net gainers score o dagdag na 5 puntos ang naging resulta ng survey, mas mataas ito ng 7 puntos kumpara sa -2 nu'ng Setyembre 2023 ngunit anim na puntos na mas mababa kaysa sa napakataas na +11 nu'ng Hunyo 2023.

Dahil sa taas-presyo ng pagkain.. 51% ng mga Pinoy, mahirap — SWS

ni BRT | May 9, 2023

Limampu't isang porsyento ng mga pamilyang Pilipino ang itinuturing na mahirap, ayon sa pinakahuling survey na isinagawa ng Social Weather Stations (SWS).

Sa 1,200 Filipino adults na naitala 51% ang nagsabing nire-rate nila ang kanilang sarili bilang mahirap.

Tatlumpu’t isang porsyento ang nagsabing sila ay nasa borderline poor habang ang isa pang 19% ay nagsabing hindi sila mahirap.

Sinabi ng SWS na ang tinatayang bilang ng mga self-rated na mahihirap na pamilya ay nasa 14 milyon noong Marso 2023, mas mataas mula sa 12.9 milyon noong Disyembre 2022.

Dagdag dito mas maraming Pilipino sa Metro Manila at Visayas ang nag-rate sa kanilang sarili na mahirap noong Marso.

Ang mga self-rated poor ay tumaas sa Metro Manila mula 32% hanggang 40% at sa Visayas mula 58% hanggang 65%.

Gayunpaman, bumaba sa Luzon mula 49% na naging 43%. habang sa Mindanao ay mula 59% hanggang 62%.

Sinasabi umano ng mga pamilya na mahirap sila kapag mataas ang inflation rate lalo na ang food inflation.