Bentang-benta sa fans na relate sa ugali niya… VICE, GAMIT NA GAMIT ANG CONCERT PARA BANATAN ANG MGA PULITIKO AT KALABAN

ni Ambet Nabus @Let's See | August 10, 2025

Photo: Vice Ganda - IG

“Peryang-perya. Masaya, makulit, makulay, mahusay, mapangahas at matapang. Sana lang, kayanin niya ang consequences ng mga aksiyon at salita n’ya,” ang unsolicited advice ng mga nakapanood ng concert nina Vice Ganda at Regine Velasquez kamakailan.

Bukod daw kasi sa usual presentation ng songs and dances ng pagka-Songbird ni Regine at high valued production numbers ng mga guest artists, ‘yung pagiging matalas ni Vice ang naging sentro ng humor na may sarcasm, may political stance at nire-receive naman ng mga tawang-tawang audience.

Gamit na gamit nga raw ni Vice ang mga usapin sa DDS, BBM, Duterte, Pinklawan, Cristy Fermin and company, at mga content creators na diumano’y pinagkakakitaan siya, kasama na ang mga birada sa iba pang isyu ng bayan.

Sey pa ng mga nakapanood, “Sa panahon ngayon na uso ang magbigay ng pahayag at saloobin sa mga isyu, hindi naman naiiba si Vice. ‘Yun nga lang, sana ay ready din siya sa backlash, sa responde o anumang posibleng gawin din sa kanya ng mga tao at grupong ang feeling nila’y nayurakan, na-disrespect at pinagkakitaan din somehow.”

“‘Yung mga taong nandu’n na tumawa at natawa ay bahagi lang ng isang komunidad na nakaka-relate at posibleng may ganu’ng emosyon din na mas matalas at matapang lang na inirerepresenta ni Vice. In fact, pinagtatawanan nila ang sarili nilang kahinaan,” pag-analisa pa ng mga kausap naming mas nangangamba raw sa posibleng consequence ng pagmamatapang ng comedian-host.

“Iba na talaga ang panahon ngayon. Kung nasa era pa tayo ng diktadurya, malamang na literal na ipinakain kay Vice ang mikropono sa inasal n’yang ‘yun,” susog pa ng mga kausap namin.

---

Wala nang bagong maipakita… REGINE, HINAYAAN NA LANG NA LAITIN SIYA NI VICE SA CONCERT

“NAGING dekorasyon na lang. Isang magandang dekorasyon,” pakli naman ng mga naghahanap ng bago kay Regine Velasquez sa naturang concert.

Very obvious daw kasing parang naging VIP guest lang ang Songbird dahil nilamon daw talaga ito nang todo sa kudaan at wit ni Vice Ganda.

At gaya sa isang malaking comedy bar, hinayaan lang umano ni Regine na maging subject din siya ng panlalait, pati ang asawang si Ogie Alcasid para lang mapatawa ang audience.

“‘Yung mga lipad-lipad scene n’ya, napanood na namin ‘yun years ago. ‘Yung boses n’ya, paiba-iba na. May sabit, may garalgal at hindi na kasinglinis ng dati. Kaya marahil ipinaubaya na lang n’ya kay Vice ang malaking portion ng show na ikinagalak ng mga manonood. But as for Regine being the concert queen or so, iba na, pero sulit pa rin

naman,” reaksiyon ng mga nakapanood.

Wish daw sana kasi nilang makita ang Songbird na nag-a-ala-Madonna, Beyonce o kahit man lang daw Sarah Geronimo.

---

HINDI rin nakaligtas sa mga kausap namin ang pansinin ang kakaibang glow at pride umano kay Bea Alonzo na kasama ang BF na si Vincent Co sa Day 2 ng concert nina Vice at Regine.

Pagpasok pa lang daw sa gate ay pinagkaguluhan na ang mga ito at may ilang concertgoers na pinagbigyang mapiktyuran sila at makipag-hi and hello.

Sa ilang beses din daw na napopokus ang mga ito ng giant monitor while enjoying the antics of Vice Ganda or the sweet songs by Regine, halata raw na inlabey sa isa’t isa ang dalawa.

“Pero in fairness kay Bea, ha, nu’ng portion na nilalait ni Vice sina Cristy (Fermin) and co. at binanggit nitong kakampi nila si Bea, nag-smile lang si Bea at may pa-muwestra pa itong tila nagsasaway o gustong sawayin si Vice,” kuwento pa ng kausap namin.

Ang parehong mga sources din ay naaliw sa pagkukumpara sa kanila ni Atasha Muhlach na sa ngayon nga ay nali-link kay Jacob Ang, anak ng SMB top boss na si Ramon Ang.

“Dati, mga pulitiko at artista ang madalas na pinag-uusapang kombinasyon. Ngayon, matataas na tao sa negosyo at mga kaedad lang nila kaya’t bongga,” hirit pa nila.

4th anniv nila, kakaibang bonding… RHIAN, GAME NA GAME KAHIT SAAN DALHIN NI SAM

ni Mercy Lejarde @Showbiz Talkies | August 11, 2025

Photo: Sam at Rhian - IG

Sa social media post ng aktres na si Rhian Ramos, ibinahagi niya ang larawan kasama ang love of her life na si Sam Verzosa, kasabay ng pagdiriwang nila ng kanilang 4th anniversary.

Saad ni Rhian, “Happy 4 years, booboo.

“Here are some pics from our recent trip! This year wasn’t about Michelin starred restaurants, designer clothes, or remote getaways… on our anniversary, we took a flight and did all the rounds to make sure our health is on point!

“Basically, nag-hospital kami, nagsimba, nag-fasting, and spending time with family.

“I just want you to know that you can take me to any hawker center or market and it’s a five-star experience to me, basta kasama ka.”

Happy anniversary, Rhian and Sam.

---

Paminta noon…

ESNYR, IBINULGAR KUNG PAANO NAGING BAKLA

MASAYA at puno ng revelations ang naging kuwentuhan nina content creator at Pinoy Big Brother (PBB) Celebrity Collab Edition 3rd Big Placer Esnyr at ABS-CBN TV Patrol anchor Karen Davila, kung saan inamin ni Esnyr kung kailan niya unang nalaman ang tunay niyang gender.

Sabi ni Esnyr nang may bonggang ngiti, “Oh, my gosh! Feeling ko po nu’ng bata pa po talaga ako, mga around grade 2, grade 1 po. Kasi 3 po kaming magkakapatid tapos puro babae po silang dalawa. Eh, ‘yung mga laruan nila, parang same lang po sa mga kuwento ng mga another gender, ‘yung mga laruan po nila na dollhouse, ganyan. 

“Minsan naloloka ako kasi walang nabibili na gift para sa akin kaya nakikilaro na lang din ako sa mga laruan nila, medyo naano po ako, naimpluwensiyahan kumbaga.”

Natanong din ni Karen kung natanggap ba si Esnyr ng mga parents niya nang nalaman ang tunay niyang gender.

Sagot naman ni Esnyr, “Feeling ko na hindi nila ‘ko matatanggap ‘pag sinabi ko po mismo sa kanila ang gender ko. Kaya medyo wala po talagang confirmation sa pamilya. Wala. Parang ano na lang, go with the flow. At recently lang po talaga ako nakapag-spread my wings kasi takot po talaga ako, eh. Kasi akala ko po ano.”

Natanong din ni Karen, “Nu’ng bata ka, nagbibihis-lalaki ka? Nagtatago ka?”

Sagot ni Esnyr na may kasamang tawa, “Yes, kumbaga paminta-paminta po ako before. Kaya lahat ng mga throwback pictures ko, lalaki talaga.”

Tanong pa ni Karen, “Pinagalitan ka ba ng mga magulang mo nu’ng una?”

Mabilis na sagot ni Esnyr, “Wala pong pagalit. Actually, nagulat po ako nang inilagay po ako, ipinost po ako ng Papa ko na naka-long hair po ako.”

Dagdag na tanong ni Karen, “Umiyak ka noon?”

Sagot ni Esnyr, “Opo. S’yempre, ‘yun na po ‘yung moment na the day before po ako lumipad dito sa Manila, kasi ikinuha na po ako ng ticket ng ABS. ‘Yun po ‘yung first and last post n’ya sa akin before po ako pumasok ng PBB. Sobrang laking impact po ng nagawa ng pag-post n’ya po sa akin kasi wala na po akong kinatatakutan kumbaga, kasi parang tanggap na po ako ng mismong father ko, ng mismong parents ko po. 

“Hindi na magma-matter sa akin ‘yung sasabihin ng ibang tao kaya mas naging ano po ako, confident po ako.”

Natanong din ng magaling na broadcast journalist na si Karen kung ano ang pangarap ni Esnyr.

Sagot naman ni Esnyr with all smiles, “Pangarap ko po sariling bahay ko po talaga.”

Tanong pa ni Karen, “For your parents?”

Sagot ni Esnyr, “Yes, for my parents and for me. Pero uunahin ko po muna ‘yung parents ko kasi s’yempre, sila ‘yung nand’yan ever since.”

Pak na pak ka d’yan, Esnyr.

Feeling First Lady, Belle… ESNYR, UMAMING PINADADALHAN NG FOOD NI DONNY, GUSTO PANG PATIRAHIN SA BAHAY

ni Mercy Lejarde @Showbiz Talkies | August 10, 2025

Photo: Esnyr at Donny - IG

Ibinahagi ng content creator at Pinoy Big Brother (PBB) Celebrity Collab Edition 3rd Big Placer na si Esnyr John Ranollo kung paano nabuo ang pagkakaibigan nila ng Kapamilya aktor at TV host na si Donny Pangilinan sa guesting niya sa YouTube (YT) vlog ng TV Patrol anchor na si Karen Davila.

Sa question and answer portion ay tinanong ni Karen kung bakit naging close si Esnyr kay Donny at paano ito nangyari.

Sagot ni Esnyr, “Si Donny po ‘yung pinaka-genuine and pinakatotoong tao na nakilala ko po rito sa showbiz.

“Nu’ng una ko pong movie ay kasama ko sila, at nu’ng pack-up na po ako, ‘di ko na alam kung saan po ako pupunta, meron po akong money na taping money, tapos sabi ko, ‘Donny, baka puwede mo akong i-help.’ Ayaw n’ya na gastusin ko po ‘yung pera ko, gusto n’ya na sa bahay na lang po nila mag-stay ako. Tinulungan n’ya po ako, nag-find po s’ya ng matutuluyan ko rito sa Manila.

“Sa loob po ng 1 month na ‘yun, inasikaso n’ya po talaga ‘ko. Nagpapadala s’ya ng food… Akala ko po, first year lang po s’ya ganu’n sa akin, hanggang sa sobrang consistent n’ya po talaga sa ‘kin. Lahat po ng mga achievements ko, wala po s’yang absent na nag-congrats po sa akin na he always tells me na he’s proud of me sa lahat ng mga achievements ko, lalo na po nu’ng nagsu-shooting po ako rito nu’ng may YouTube na po ako.”

Dagdag na tanong ni Karen, “So you really found a friend in Donny?”

Mabilis na sagot ni Esnyr habang may ngiti sa mga mata ay “Yes.”

Paliwanag niya, “I found a friend in him. At more than just a friend po, like family na po talaga. Kasi pati sa mga finances ko, tutok din po s’ya. Kumbaga feeling ko, kuya ko s’ya. Ganyan, ‘yun po. I’m super lucky to have him as a friend.”

Napansin din ni Karen na parang maiiyak si Esnyr nang pinag-uusapan nila si Donny.

Sabi naman ni Esnyr, “Sobrang ano lang po talaga, happy ko lang po talaga at sobrang lucky ko po to have him as a friend.”

Binigyan din ng pagkakataon ni Karen na mag-message si Esnyr kay Donny.

Mensahe ni Esnyr, “Donny, I think it’s time, umamin na tayo. Tayo talaga!” sabay tawa.

Pero seryosong dugtong nito, “Donny, thank you. Love you. Alam mo naman na ‘yan at babawi ako soon. Wait ka lang d’yan, okay, babawi ako sa ‘yo soon.”

Dagdag pa niya, “Ang ganda ko naman, parang first lady take. Uy… wait lang, Belle (Mariano), ‘wag kang maano. Sa lahat ng DonBelle fans d’yan, as a friend lang ‘to. ‘Wag ninyo akong ratratin (awayin) d’yan.”

Anyway, sabi nga ng veteran actress na si Daisy Romualdez, napakabait na bata nga raw ni Donny Pangilinan at marespeto pa. Dapat daw gayahin ng ibang kabataan ang aktor at sure si yours truly na kaya naging kaibigan ni Donny Pangilinan si Esnyr ay dahil pareho lang silang mabait. 

Pak, ganern!

---

MULA sa entablado ng Tawag ng Tanghalan (TNT) All-Star Grand Resbak hanggang sa recording studio, pasok na rin sa music scene ang 2nd placer na si Ian Manibale sa paglabas ng kanyang debut single na Vicente Cruz.

Released under ABS-CBN’s DNA Music and written by Gabriel Tagadtad, the song is about love that is full of anticipation, hope, and memories.

“It’s all about love na puno ng paghihintay, pag-asa, at alaala sa Vicente Cruz. It’s a song ng isang taong naghihintay sa pag-ibig na dumating nang hindi inaasahan,” pagbabahagi niya. 

Aniya pa, “Napaka-personal ng kanta at kahit hindi ako ang nagsulat, ramdam ko bawat linya.”

The up-and-coming singer from Catanduanes was hailed as second placer in TNT twice—first in 2021 when he joined the noontime contest’s Season 5 edition, and this year in the All-Star Grand Resbak Season 2.

“Honestly, may kaunting panghihinayang. Sabi ko nga sa sarili ko ‘Second na naman,’ but I’m always grateful sa kung ano ang narating ko. Second place is the biggest achievement na nangyari sa buhay ko, back-to-back pa, and mas nangingibabaw ‘yung motivation ko na mas pagbutihin at i-pursue ‘yung music,” sey niya.

Sa ngayon, mas ganado si Ian na ituloy ang kanyang passion sa musika. Aniya, hindi siya titigil hangga’t may mga taong nakikinig at nai-inspire sa mga kanta niya. 

At kung galing at puso rin lang ang pag-uusapan, mukhang malayo pa ang mararating ng Catanduanes pride na ito, mula Vicente Cruz hanggang sa mas malalaking entablado sa hinaharap.

---

IBINIDA ng aktor na si Mikael Daez sa social media ang sweet family moment kasama ang misis na si Megan Young at ang kanilang adorable baby boy na si Leon, na tila handang-handa na para sa kanilang travel adventure.

Sabi ni Mikael sa post niya ay “Travel ready family! Today we applied for Leon’s passport. Decided to go matchy-matchy with the lil (little) boy. Can’t wait for the first adventure with him.”

Dagdag pa ni Mikael sa post niya ay, “Swipe to the end to see his passport photo. P.S., found the perfect adventure music to pair with the vibe. Anime fans IYKYK (If You Know, You Know).”

Sa pinakahuling larawan na sinasabi ni Mikael ay ang passport photo ni Baby Leon, na super cute and adorable.

Kitang-kita sa mga litrato ang excitement nina Mikael Daez at Megan Young sa bagong yugto ng kanilang pamilya. At kung sa unang passport photo pa lang ay super cute na si Baby Leon, tiyak na mas marami pang travel memories at adventure snaps ang aabangan ng mga fans sa kanilang “travel ready” family. 

‘Yun lang and I thank you.