Sa lahat ng babaeng hosts, nag-iisang ‘di bineso-beso… ECHO, BINASTOS SI KIM SA IT’S SHOWTIME

ni Janiz Navida @Showbiz Special | February 12, 2026

Photo: Kim Chiu, Jericho Rosales at Anne Curtis - It's Showtime

Usap-usapan ngayon sa social media ang aktor na si Jericho Rosales, hindi dahil sa movie nila ni Anne Curtis na The Loved One na showing na simula kahapon (Feb. 11) kundi dahil sa diumano’y hindi magandang inasal nito nang mag-guest sa It’s Showtime nu’ng Martes (Feb. 10).

Nag-guest si Echo para i-promote nga ang TLO nila ni Anne. 

Nang dumating ito, napansin ng mga netizens na bineso-beso ng aktor ang lahat ng mga female hosts ng It’s Showtime at tanging si Kim lang ang hindi.

Pinanood namin ang episode at hindi man bineso ni Echo si Kim, nag-bow naman ito para ipakita ang kanyang respeto sa aktres.

Kaya lang, bukod sa bagay na ‘yan, nasilipan din si Echo ng pag-a-attitude umano nang tanungin siya ni Kim kung ano’ng bagong ipapakita nila ni Anne sa TLO at ang pabalbal na sagot ng aktor ay “Wala lang” na ewan kung gustong magpatawa o walang maisip na sagot.

Dahil diyan, pinutakti si Echo ng masasakit na salita mula sa mga fans ni Kim at mga netizens na hindi nagustuhan ang inasal niya.

Pinangaralan nila ang aktor na kung magpo-promote ng anumang project, igalang ang mga hosts ng programa.

Mabuti na lang daw at mabait si Kim at na-handle pa rin nang tama ang sitwasyon dahil professional ito.

Samantala, binibigyang-kulay at iniintriga naman ng ilan ang naging treatment ni Echo kay Kim. Dati naman daw okay ang dalawa lalo’t magkapitbahay pala sila sa isang subdivision sa Kyusi.

Pero ngayong girlfriend na raw ni Echo si Janine Gutierrez na ex ni Paulo Avelino na nali-link naman ngayon kay Kim, mukhang may ‘something’ na raw kaya nagkaroon ng wall si Echo kay Kim.

Hala, may ganern ba?! ‘Di ba’t nabalita pa nga recently na magsasama-sama silang apat sa isang project, so paano?

Hmmm… Ngayon pa lang, mukhang may itatanong na sa kanila ang press kapag nagkaroon sila ng mediacon para sa nasabing project, ha?

---

Sa saya lang daw pala kasama…

ALESSANDRA, NADALA NA SA MGA FAKE NA TAO, NAGHAHANAP NG MGA BAGONG KAIBIGAN

HINDI napigilan ni Alessandra de Rossi ang maging emosyonal sa panayam sa kanya ni Bernadette Sembrano recently sa YouTube channel nito.

Naikuwento kasi ni Alex (palayaw ni Alessandra) ang pain na naramdaman niya sa pagkawala ng mga itinuring niyang kaibigan na hindi naman pala naging totoo sa kanya at sa saya o sa sarap lang niya kasama.

Sabi ni Alex, hindi naman siya galit sa mga taong umalis o lumayo sa kanya, kundi mas nasasaktan siya dahil hindi nga naging tunay na kaibigan ang mga ito. 

Para sa kanya, ang tunay na relasyon ay ‘yung may loyalty at honesty, hindi ‘yung kasama lang kapag masaya, pero nawawala agad ‘pag may problema.

Dagdag pa niya, “Nu’ng isang gabi lang, nag-pray ako, gusto ko ng new friends. Gusto ko ng friends na awake. Sabi ko ‘Lord, ‘yung gising, ‘yung nakatingin sa life, hindi naka-auto pilot, hindi mahilig sa luxury, hindi mahilig sa kaartehan.’”

Dahil wala ang pamilya ni Alex sa ‘Pinas, ang mga kaibigan na nga lang naman ang itinuturing niyang kapamilya.

Marami sa mga netizens ang nakisimpatya at sumang-ayon kay Alessandra. Para sa kanila, tama ang kanyang panawagan sa mga totoong kaibigan. ‘Yung may puso at malasakit, hindi ‘yung nakasandal lang sa saya o material na bagay.

Aniya pa, mas masakit daw ang magtiwala at umasa sa mga taong hindi pala totoong nagmamalasakit sa kanya kesa sa simpleng hindi pagkakaunawaan lang. 

Sa ngayon, ang mga itinuturing daw niyang totoong kaibigan sa showbiz industry ay sina Piolo Pascual, Empoy Marquez na nakapareha niya sa box office hit movie na Kita Kita, at si Maxene Magalona.

Ibinuking ni Ai Ai, no choice… EMPOY, UMAMING MAY MATAGAL NANG NON-SHOWBIZ GIRLFRIEND

ni Janiz Navida @Showbiz Special | February 11, 2026

Photo: Empoy - FB

No choice ang komedyanteng si Empoy Marquez na amining may long-time girlfriend na siyang non-showbiz nang kantiyawan namin sila ng co-star niya sa pelikulang Batang Paco na si Comedy Queen Ai Ai delas Alas kung posible bang ma-in love sila sa isa’t isa.

Ani Ai Ai, hindi sila talo ni Empoy kahit mas bata ito sa kanya at puwede silang ma-link dahil nga lagi siyang nali-link sa mga mas batang guys.

Ibinuking ng Comedy Queen na may non-showbiz GF si Empoy at parang anak na lang ang turing niya rito.

Hindi naman idinenay ni Empoy na may karelasyon nga siya pero dahil non-showbiz ito, hindi na raw kailangang maisapubliko pa.

Tinanong nga namin si Empoy kung tanggap ba ng girlfriend niya ang trabaho niya bilang artista, at sagot ng komedyante, “Siyempre, bago naman pumasok sa ganu’ng relasyon, alam naman niya ‘yung trabaho ko, so respect lang.”

Sa tanong namin kung okay lang ba sa GF niyang hindi niya inihaharap sa publiko, pabirong sagot nito, “Okay lang kasi lagi namang nakatalikod ‘yun. Talikodgenic ‘yun, eh.”

Gayunman, tiniyak ni Empoy na kapag nagpakasal naman siya, ise-share niya ito sa publiko.

Sa ngayon, may sarili nang bahay si Empoy na katas ng kinita niya sa showbiz. Pero nilinaw niya na ‘yung mga naglabasang mansion sa social media na sinasabing bahay niya matapos mag-box office hit ang Kita Kita movie nila ni Alessandra de Rossi ay fake news.

Isa si Empoy sa mga super-bait at down-to-earth celebrities kahit pa may napatunayan na rin siya sa showbiz at ngayon nga ay bida uli sa comedy film na Batang Paco na showing in cinemas on Feb. 18.

Ang nasabing proyekto ang kauna-unahang handog ng MiVida Productions at maituturing na kanilang statement piece.

Kasama rin nina Empoy at Ai Ai sa Batang Paco sina Mon Confiado, Ynez Veneracion, Chichi Rita at Cassy Lavarias, pati sina Richard Quan, Alma Concepcion, Lara Morena, Natasha Ledesma, Kookoo Gonzales, Gerard Acao, Josh Ivan Morales, Kim Rodriguez, Jovi Vargas, at Quentin Molo.

---

Sikat na personality na nasa pamilya ng mga pulitiko, dawit… EDU, DINAYA RAW SA GOLF, NAG-RANT SA SOCMED

Nagulat ang maraming netizens at golf fans nang mag‑post si Edu Manzano sa kanyang Instagram account para ihayag ang kanyang saloobin tungkol sa kontrobersiyal na Mango Tee 38 Golf Tournament na ginanap kamakailan sa Alabang Country Club.

Sa kanyang post, mariing sinabi ni Edu na “cheating ang nangyari at hindi patas ang laro”. 

Binanggit niya rin na ang golf ay isang laro ng honesty at integridad, kaya’t nakakalungkot daw na may ilang grupo na nakakuha ng sobrang laking scores na ‘di pang-karaniwan, dahilan para ma‑disqualify ang ilang teams at mabawi ang kanilang awards.

“Kung sa simpleng laro ng golf, may daya, paano pa kaya sa totoong buhay kung may mas malaking stakes?” ani Edu.

Dagdag pa niya, “This is how corruption survives, not only through giant scandals but through small dishonest acts people excuse because 'laro lang.'”

Ayon sa mga reports, may mga teams na kinabibilangan ng kilalang personalidad mula sa pamilya ng mga pulitiko na na‑disqualify dahil sa highly unusual na score submissions, at nagdulot ito ng malaking kontrobersiya sa tournament. 

Dahil dito, marami ang nakadama ng panghihinayang at nagkomento online tungkol sa hindi patas na laban.

At dahil kilala si Edu sa pagiging vocal lalo na sa mga ganitong isyu, nagbigay siya ng kanyang opinyon upang maging aral sa mga golf players at iba pang sports enthusiasts.

Sa kanyang post, pinayuhan niya rin ang mga manlalaro na huwag basta‑basta i‑compromise ang integridad sa laro, kahit maliit na stakes ang pinag-uusapan.

Sa social media, nag‑viral ang post ni Edu at marami ang pumuri sa kanyang pagiging matapat at vocal. 

Ang ilang netizens ay nagsabing “Nakaka-proud si Sir Edu,” samantalang may ilan ding nag‑debate kung paano maiiwasan ang ganitong klase ng insidente sa mga susunod na tournaments.

Blind item, pinangalanan ng mga netizens… SARAH, NIYAYA RAW NG LAPLAPAN SI MICHELLE, TINANGGIHAN

ni Janiz Navida @Showbiz Special | February 10, 2026

Photo: Sarah Lahbati, Xian Gaza at Michelle Dee - FB

Unfair para kay Sarah Lahbati na pangalanan ng ilang netizens bilang subject diumano sa blind item ng Pambansang Marites na si Xian Gaza tungkol sa isang famous celebrity na pa-victim umano at nagpapanggap na ulirang ina, gayung may kakaiba naman itong mga ginagawa.

Parte ng ipinost na BI (blind item) ni Gaza sa kanyang Facebook account: “Inaya ng laplapan si Michelle Dee (sa Forbes mansion ng isang very famous congressman na anak ng bilyonaryo) ngunit hindi siya pinatulan nito.”

Bagama’t walang binanggit na pangalan ang Pambansang Marites, agad ikinonek ng mga netizens kay Sarah Lahbati ang blind item dahil sa sinabi ni Xian na: “Si famous celebrity mom natin ay permanently banned din sa maraming bars and clubs around Metro Manila dahil siya ay sinasaniban ng masamang espiritu tuwing nalalasing. Pinerahan din niya ng malala ‘yung isang major stockholder ng Jollibee kaya nagalit sa kanya ‘yung anak ng isang top government official at Sinipa Siya nito palabas sa kanilang grupo dahil isa-isa niyang hina-harvat ang mga kalalakihan sa loob ng billionaire'S circle.”

Kung matatandaan, ilang buwan na ang nakararaan ay nagkaroon ng isyu kay Sarah Lahbati na diumano’y ineskortan palabas ng isang high-end bar sa BGC, Taguig dahil sa pagkaka-link niya sa anak ni former House Speaker Martin Romualdez na si Marty Romualdez.

Sa ngayon, wala pang sagot si Sarah tungkol sa mga hindi kagandahang akusasyon laban sa kanya, pero bilang isa ring ina, mas maa-appreciate namin kung ipaglalaban ni Sarah ang kanyang reputasyon para na lang sa kanyang dalawang anak kesa dumedma sa isyu na masyado nang below the belt.

---

Anak, hinayaan na raw sa mga desisyon sa buhay… KARLA, TODO-IWAS PAG-USAPAN ANG KASALANG DANIEL-KAILA

AFTER 55 yrs., finally ay may celebrity endorser na ang W Express, ang leading ISO-certified logistics and courier service provider sa ‘Pinas, at ito’y walang iba kundi si Momshie Karla Estrada!

Pormal ngang ipinakilala ang aktres bilang first brand ambassador ng kumpanya sa media launch na ginanap kahapon sa Makati Diamond Residences.

Kuwento ni Karla, nakilala niya ang mga bossing ng W Express nang kailanganin niya noon ng mabilisang pag-aayos ng kanilang tourist visa para masamahan ang anak na si Daniel Padilla nang parangalan ito sa Korea.

Marami silang nagpunta that time to support Daniel at nang pangakuan siya ng W Express ng worry-free trip sa Korea dahil sila na raw ang bahalang mag-ayos ng lahat, nagtiwala siya at hindi naman nasira ang kumpanya sa kanya. Kaya ngayon, endorser na nga siya at binansagan pang “Cargo Queen” o “Cargo Queen Mother” (as suggested by our colleague, Gerry Olea).

Tinanong nga namin si Karla kung ano’ng maituturing niyang “heaviest cargo” sa buhay niya bilang Cargo Queen, at nagpakatotoo naman ang aktres na ang pamilya niya.

Pero nilinaw ni Karla na kahit sila ng panganay na si Daniel ang nagsilbing breadwinner ng kanilang pamilya, hindi naman “pabigat na cargo” ang turing niya sa pamilya at sabi nga niya, hindi nakakapagod ang pagtulong sa sariling pamilya at mga kamag-anak.

Very open ding sinagot ni Karla ang iba pang tanong ng press, pero ang obyus lang na iniwasan nito ay ang tanong ni Tito Gorgy Rula sa posibilidad na mauwi sa kasalan ang relasyon nina Daniel at Kaila Estrada.

Ang tanging sinabi ni Karla ay matagal na niyang binigyan ng freedom si Daniel at hinayaang magdesisyon para sa buhay nito, although nandiyan pa rin naman siya para gumabay lang at magpaalala. 

Naniniwala naman daw kasi siyang dahil sa maturity ni Daniel, kayang-kaya nitong magdesisyon para sa sariling buhay lalo’t nasa tamang edad na ito.

Anyway, bukod sa mabilis at organisadong pagpoproseso ng visa, nag-aalok din ang W Express ng malawak na hanay ng mga serbisyo ng courier at logistics kabilang ang domestic at international na pagpapadala, secure na transportasyon ng mahahalagang dokumento, corporate logistics solution, at customized na serbisyo sa paghahatid para sa parehong mga negosyo at indibidwal na customer.

---

HINDI maiaalis sa pamilya ni dating Sen. Bong Revilla ang maging emosyonal, lalo na ang misis nitong si Congw. Lani Mercado, dahil sa ipinakitang suporta at pagmamahal ng mga loyal supporters nila sa ginanap na Ecumenical Prayer Rally last Feb. 8, kung saan more than 15,000 Caviteños ang nagtipun-tipon sa Aguinaldo Shrine.

Sa kabila ng mga akusasyon kay ex-Sen. Bong na nasa Quezon City Jail Male Dormitory ngayon dahil sa pagdawit sa kanya sa flood control scam, naniniwala ang mga supporters niya sa kawalan ng katarungang pagpiit sa kanya. Kaya ang panawagan nila, maging patas ang proseso ng hustisya.

Naniniwala rin ang mga naturang supporters na napulitika at biktima ng panggigipit ang dating senador.

Alas-5 ng hapon, nagsimula ang pagtitipong pinangunahan ng mga kinatawan mula sa simbahang Katolika, mga Kristiyano, Protestante, Muslim, at iba pang religious groups. Layunin ng pagtitipong ipanalangin ang kapayapaan ng bansa at ang pananaig ng katotohanan.

Dumalo rin ang mga samu't saring supporters, civic groups, at people’s organizations mula sa iba’t ibang bayan at lungsod ng Cavite. Naniniwala silang dapat manaig ang batas nang walang kinikilingan.

Nilinaw nilang hindi kilos-protesta ang pagtitipon kundi isang panawagan sa kunsensiya.

Sabi naman ni Congw. Lani Mercado-Revilla, “Maraming salamat po sa inyong lahat na patuloy na naniniwala, nagdarasal, at naninindigan para sa katotohanan. Ang inyong presensiya at panalangin ang nagbibigay-lakas sa aming pamilya sa panahong ito ng pagsubok.

“Tiwala kaming makakamtan muli ang hustisya para kay Bong.  Sa tulong ng Diyos at sa tamang proseso ng batas, lalabas at manaig ang katotohanan,” dagdag niya.

Nagtapos ang Ecumenical Prayer Rally sa isang sama-samang panalangin.