Takot na takot iwan ng mister… YENG, UMAMING NAPRANING, NAGPA-DOKTOR

ni Reggee Bonoan @Sheet Matters | March 3, 2023

Sa panahon ng pandemya noong 2020 ay isa ang vlog ni Yeng Constantino sa mga pinapanood namin sa YouTube channel dahil nga bawal lumabas kaya nasa loob lang siya ng bahay nila ng asawang si Victor Asuncion.

Ibini-video nila ang kanilang daily routine, ang pagluluto at pagtatanim ng gulay sa likod-bahay nila na maliit lang ang lupa dahil sa townhouse sila nakatira.

Ipinakita rin doon ang sinisimulan nilang dream tiny house sa farm na nabili nilang mag-asawa at naroon din nakatirik ang bahay naman ng ama.

Habang isinusulat namin ang balitang ito ay binalikan ulit namin ang vlog ni Yeng na matagal naming hindi nasilip at hayun, tapos na pala ang tiny house nila na nasa gitna ng maraming puno ng saging, anahaw at iba pa na ang preskong tingnan dahil ang buong palibot ng bahay ay balkonahe.

Kaya namin ito naikuwento ay dahil ginawang busy talaga ni Yeng ang sarili para mapangalagaan din ang kanyang mental health na ilang taong walang trabaho ang entertainment industry dahil sa COVID 19 pandemic.

Hindi naman itinago ng songwriter/singer na napraning siya lalo na sa pagsasama nilang mag-asawa at mabuti na lang ay nakaalalay sa kanya si Yan (palayaw ni Victor).

Aniya, “Kasi, dumating 'yung time na ang daming naghihiwalay. Tapos, aware ako roon sa tinatawag na seven-year itch. Talagang nasa isip ko 'yun, na kailangang malampasan namin. Pressure na ginawa ko sa sarili ko.

"Kaya noong naka-8th-year anniversary na kami, talagang panay na panay ang pasasalamat ko sa asawa ko. At salamat kay Lord for that, dahil nagabayan din kami.

“Sa umpisa, siyempre, nagdi-discover pa lang kayo sa mga bagay about each other. Ang mga away o tampuhan, hindi naman nawawala. And we have learned na kapag mataas na 'yung init ng ulo o galit ng isa, dapat na talagang manahimik na muna o magpakumbaba 'yung isa.

"Yeah, umabot din kami sa point na nagpapa-therapy kami. At wala naman kaming nakitang masama roon, kasi it helped. Na kung kailangang may makausap o isangguni ito, it doesn't mean na may masama na sa mga nangyayari. Guidance iyon.”

Among the Cornerstone artists na dalaga pa noong pumasok sa talent management company ay si Yeng ang unang nag-asawa kumpara kina KZ Tandingan at Moira dela Torre.

Sina Yeng at KZ na lang ang masasabing happily married dahil si Moira ay alam namang nahiwalay na kaagad sa asawang si Jason Marvin Hernandez pagkalipas ng tatlong taon.

Going back to Yeng, it pays to be loyal talaga dahil taong 2013 nang maimbitahan siya kasama ang ilang Cornerstone artists na mag-perform sa opening ng Academy of Rock sa Singapore at dahil magaling naman talaga pagdating sa performance ang Pinoy Dream Academy Season 1 grand winner ay napabilib niya ang pamunuan ng AOR (Academy of Rock) at kinuha siyang brand ambassadress for a year.

Pagkalipas ng sampung taon, heto at muli siyang kinuha bilang Global Ambassadress ng AOR.

Nagreklamong 'exclusive' lang sa BF… Sigaw ni Ogie: Si Liza ang ayaw humiwalay kay Enrique

ni Vinia Vivar @Frankly Speaking | March 3, 2023

Issue pa rin hanggang ngayon si Liza Soberano at ang mga sinabi niya sa kanyang vlog. Ang dami pa ring nagre-react sa mga pahayag niya lalo na nga ang mga nakakaalam sa past ng aktres.

And of course, isa ang kanyang dating manager na si Ogie Diaz sa mga nakakaalam ng kanyang nakaraan dahil ito ang kasama niya sa mahigit 10 years na journey niya sa kanyang karera.

Sa latest vlog ni Ogie kasama sina Mama Loi at Ate Mrena, muling napag-usapan ang tungkol sa screen name ni Liza na sinasabi nga ng aktres na hindi siya ang pumili.

Ayon kay Ogie, sa pagkakatanda niya ay pumayag din ang aktres sa screen name na

“Liza” nang i-discuss ito sa kanila. Tsika ng talent manager/vlogger, Hope Elizabeth Soberano raw talaga ang real name ni Liza at ang unang screen name nito ay Hope Soberano.

Dahil isang syllable lang ang Hope, naisip ni Malou Santos na gawing Liza na mula naman sa Elizabeth. Nagustuhan daw ng lahat ang pangalan at pati mismo si Liza ay pumayag.

Kaya sey ni Ogie, nagtataka siya kung bakit parang nakakalimutan ni Liza ang mga pangyayari gayung matalas daw ang memory nito.

Isa pang nabanggit ni Ogie ay ‘yung tungkol sa sinabi ni Liza na wala siyang boses sa kanyang career. Lagi raw tinatanong ang aktres sa kanyang opinyon o mga bagay na gusto at ayaw niya. Kaya nga raw apat na pelikula lang ang nagawa nito sa Star Cinema dahil ito raw talaga ang pumipili ng mga proyekto niya na gustong gawin.

Maging ‘yung huling pitching ng Star Cinema kina Liza at Enrique Gil na adaptation ng hit Korean drama na It’s Okay To Not Be Okay ay hindi nga rin daw tinanggap ng dalawa which means may ‘say’ talaga ang aktres sa mga bagay patungkol sa career.

Naalala rin ni Ogie na tinanong si Liza ni Direk Olive Lamasan kung gusto ba nitong makapareha ang ibang aktor other than Quen (Enrique).

“Ang natandaan kong sabi ni Liza ay baka hindi pa handa ang mga fans ng LizQuen, baka hindi nila matanggap. So, gusto pa rin ni Liza, si Enrique pa rin. So, si Liza pa rin ang nasunod.

“Kaya nagtataka ako ru'n na hindi nabigyan ng boses si Liza sa kanyang mga ideas, sa kanyang mga thoughts, para sabihin kung ano ‘yung gusto niyang gawin, na parang nakakulong lang siya sa kahon, parang diniktahan lang siya at nagmukha siyang bulaklak,” sey ni Ogie.

Hindi raw talaga ganu’n ang nangyari pero baka raw ganu’n ang feeling ni Liza kaya gusto na lang niyang intindihin kung saan nanggagaling ang aktres.

ROBIN, NA-HIGH BLOOD NANG MAKITANG NAKA-BRA LANG SI KYLIE SA SERYE

ni Nitz Miralles @Bida | March 3, 2023

Naaliw kami sa nabasang reaction ni Sen. Robin Padilla sa mga naunang eksena ng anak na si Kylie Padilla sa Mga Lihim ni Urduja. Hindi ‘yung action at fight scenes ni Kylie ang umagaw ng atensiyon ni Robin kundi ‘yung nagbibihis ang anak.

“Mahihimatay pala ako dito," sabi ni Robin sa reaction video. “Ano ba ‘yang mga shots na ‘yan?"

Ang tinukoy na shot ni Robin ay ‘yung inaayos ni Kylie ang kanyang bra at nagsuot ng pants.

"Inom muna tayo ng pampababa ng high blood pressure,” patuloy ni Robin sabay kuha ng medicine for high blood pressure sa kanyang bag.

“Sabi ko, paglabas ni Kylie, papalakpak ako nang malakas. Muntik pala akong nahimatay doon sa una," sabi ni Robin.

Kahit shocked sa eksena ni Kylie fixing her bra, ipinagmalaki ni Robin ang performance ng anak sa isang linggong pag-ere ng Mga Lihim ni Urduja.

Parang kakailanganin ni Robin na uminom ng maintenance medicine kapag pinanood ang series ng anak. Hahaha!