Ikatlong pamamaril na 'to — PBBM... Mga iskul, dapat bantay-sarado

ni BMylene Alfonso @News | September 20, 2026

Photo: Si Education Sec. Sonny Angara na nagtungo sa Banga National High School matapos ang insidente ng pamamaril - DepEd

Nanawagan si Pangulong Ferdinand Marcos Jr. ng mas mahigpit na mga hakbang upang matiyak ang kaligtasan ng mga mag-aaral sa mga paaralan, kasunod ng pamamaril sa Banga National High School sa South Cotabato.

Ayon sa Pangulo, hindi dapat maging normal na bahagi ng buhay ng mga batang Pilipino ang karahasan at pamamaril sa loob ng paaralan.

“Hindi natin maaaring tanggapin na maging bahagi na lamang ng buhay ng ating mga anak ang mga pamamaril sa paaralan. Karapatan ng ating mga anak na makapag-aral nang walang takot. Karapatan ng mga magulang na maipadala sila sa paaralan nang alam na uuwi silang ligtas. Ito ang pananagutan natin sa bawat pamilyang Pilipino," diin niya.

Sa harap nito, iniutos ni Pangulong Marcos ang isang masusing imbestigasyon sa insidente, kabilang ang mga pangyayari kung paano nakakuha at nakapagdala ng baril ang isang menor-de-edad sa loob ng paaralan.

Nagpaabot din ang Pangulo ng pakikiramay sa mga pamilyang nawalan ng mahal sa buhay at tiniyak na matatanggap ng mga nasugatan ang kinakailangang gamutan at tulong.

Aniya, ito na ang ikatlong insidente ng nakamamatay na pamamaril sa paaralan sa loob lamang ng nakalipas na tatlong buwan, kasunod ng mga naunang insidente sa Tacloban at Zamboanga.

 “Ito na ang ikatlong nakamamatay na pamamaril sa paaralan sa loob lamang ng tatlong buwan. Matapos ang mga insidente sa Tacloban at Zamboanga, inutusan ko na ang ating mga ahensya na palakasin ang seguridad sa mga paaralan at gawin ang lahat ng kinakailangan upang maiwasan ang muling paglitaw ng ganitong trahedya,"diin niya.

Gamit ang baril ng ama, nagbaril sa ulo... Grade 9 namaril sa iskul, 6 patay, 17 grabe

by Jeff Tumbado @News | September 19, 2026

Photo: LTO

Hindi bababa sa anim na estudyante ang nasawi at 17 iba pa ang nasugatan sa pamamaril sa isang paaralan sa Banga, South Cotabato noong Biyernes, ayon sa Department of Social Welfare and Development (DSWD).

“Sa updated na ulat, anim na mag-aaral ang kumpirmadong nasawi at 17 ang lubhang sugatan. Magpapatuloy ang koordinasyon ng DSWD sa LGU ng Banga at paaralan para sa kaukulang suporta sa mga bata at pamilyang biktima ng insidente,” nakasaad sa Facebook post ng DSWD.

Sinasabing nangyari ang pamamaril ala-1 ng hapon at isang 16-anyos na Grade 9 student ang namaril sa Banga National High School.  

Bago mamaril, nagbabala muna umano ang shooter sa kanyang mga kaklase na umuwi na matapos mananghalian dahil may gagawin umano siya at baka madamay pa ang mga ito, ayon kay Banga, South Cotabato Mayor Albert Palencia. 

Pagkatapos ng tanghalian, umalis umano ang estudyante sa kanilang classroom at nagpaputok na sa katabing classroom.

Nasawi rin ang Grade 9 matapos umanong magbaril sa ulo. Napag-alaman na pagmamay-ari ng kanyang ama ang ginamit na armas.

Nagpahayag naman ng matinding pag-aalala ang Department of Education (DepEd) sa nangyaring insidente.

“Our immediate priority is the safety and well-being of our learners, teachers, and school personnel. We are closely coordinating with the Schools Division Office, Regional Office, local authorities, and law enforcement to verify the circumstances and provide necessary assistance,” ayon sa pahayag ng DepEd.

Mag-asawa, pinagbabaril ng mga nakamotor

by Jeff Tumbado @News | August 22, 2026

Photo: File

Patay ang isang misis habang sugatan naman ang kanyang asawa matapos pagbabarilin ng mga nakamotorsiklong salarin sa Brgy. Inug-ug sa Pikit, Cotabato, Biyernes ng umaga.

Kinilala ang mga biktima na sina Orlan Saguta-on, 34, at Colie Mar, 29, kapwa residente ng Brgy. Amas, Kidapawan City.

Minamaneho ni Orlan ang kanilang multicab mula Brgy. Amas patungong Brgy. Takepan upang maghatid sana ng mga punla ng niyog nang dikitan sila ng mga suspek na sakay ng motor.

Bigla umanong pinagbabaril ang mag-asawa, na kapwa nagtamo ng mga tama ng bala sa iba’t ibang bahagi ng kanilang katawan. Nasawi agad si Colie habang isinugod naman sa pagamutan si Orlan.

Patuloy naman ang imbestigasyon sa krimen.