P54 M halaga ng shabu, nasabat; 2 arestado

ni Lolet Abania | December 13, 2020

Nakasabat ang awtoridad ng P54 milyong halaga ng hinihinalang shabu sa isang drug buy-bust operation sa Muntinlupa City kahapon.

Sa pahayag ng Philippine National Police (PNP), ang dalawang naarestong suspek ay may malaking papel sa sinasabing drug distribution network sa bansa.

Kinilala ang mga suspek na sina Renzy Louise Javier Vizcarra at Red Lewy Javier Vizcarra.

Sa ulat, nagsagawa ng buy bust operation nang alas-5:00 ng hapon nu'ng Sabado ang pinagsanib na puwersa ng mga operatiba ng PNP, Philippine Drug Enforcement Agency (PDEA), Intelligence Service of Armed Forces of the Philippines (ISAFP) at National Intelligence Coordinating Agency (NICA) sa harapan ng isang fast food outlet sa Tunasan.

Nakumpiska rin sa dalawang suspek ang walong kilo ng hinihinalang shabu, tatlong mobile phones, isang Toyota Innova at boodle money.

"Our anti-illegal drugs campaign has resulted even more in this kind of accomplishment because of the cooperation between and among our law enforcement agencies which serves as a stern warning to drug dealers," ayon kay PNP Chief Police General Debold Sinas.

Inihahanda na ang kasong isasampa laban sa dalawang naarestong suspek.

P6.5 M shabu, nasabat sa tulak na Nigerian

ni Thea Janica Teh | November 6, 2020

Tinatayang nasa P6.5 milyong halaga ng shabu ang nasabat nitong Huwebes sa 46-anyos na Nigerian matapos ang buy-bust operation ng Philippine National Police-Drug Enforcement Group (PNP-DEG) sa Las Piñas City.

Kinilala ang suspek na si Kingsley Iwumune na tatlong taon nang naninirahan sa Pilipinas. Kuwento ng mga pulis, nakipagkita ito sa isa sa kanilang mga tauhan sa Gatchalian Avenue at nag-alok ng kalahating kilo ng shabu.

Nagtangka pa itong tumakas kaya nabangga pa ang minamanehong sasakyan sa police mobile. Nakuha sa kanya ang 2 plastic pack ng 1 kilo ng shabu. Ayon kay Police Lt. Col. Enrico Rigor, hepe ng PNP-DEG Legal and Investigation Divison, miyembro umano ang suspek ng isang Nigerian drug syndicate.

Bukod pa rito, sinabi ni Police Maj. Mark Julio Abong na nakulong na umano si Iwumune dahil sa droga sa Caloocan at nakalaya noong 2018.

Napag-alamang siya rin ang bagsakan ng droga ng mga tulak sa Las Piñas at Southern Luzon. Sa ngayon ay hawak na ng pulisya ang Nigerian at inaalam kung saan ito kumukuha ng shabu.

P170,000 halaga ng shabu nasabat; 5 arestado sa Manila North Cemetery

ni Lolet Abania | August 30, 2020

Tinatayang aabot sa P170,000 ilegal na droga, ang nakumpiska mula sa limang naarestong suspek, apat dito ay mga babae, sa Manila North Cemetery, kagabi.

Ayon kay Police Lt/Col. John Guiagui, nakatanggap ng tip ang Manila Police District Station 3, na may magaganap na transaksyon ng ilegal na droga sa loob mismo ng naturang sementeryo.

Agad na rumesponde ang awtoridad sa lugar at naabutan ang limang suspek sa bahagi ng 29th Street ng Manila North Cemetery.

Gayundin, pitong sachet ng shabu na tumitimbang ng 25 gramo, ang narekober ng mga pulis. Batay sa Dangerous Drugs Board (DDB), aabot sa P170,000 ang halaga ng nakumpiskang ilegal na droga mula sa mga suspek.